Kor. dĩɛ̃l 16

Jinɲãã mãã ɲã̀ nǝ̃ǝ̃ Serusalɛm Igɩlisɩ taaba yuunã

Yindiɛ mã́ã cwanãã, ɲi mãã ɲì ga nǝ̃ǝ̃ gùú jinɲãã mãã ǹ-tĩɛ̃ ǹ-pya Kɩrsa bluuba nã Serusalɛmgu, ɲimãã yo cíyà-dǝ nã́ã́ mǝ̃̀ wáalá nǝ̃ Galasii yiɛ'n Igɩlisɩ taaba, bá ce-dǝ nĩĩguu mãã.

2 Yahudyaba saajaluu'n yudĩɛ̃lãã wo yudĩɛ̃lãã, curo wo curo, wù nãkruɔgɩ̀ mãã gɩ̀ vaa nǝ̃ gùú jinɲã̀ã wú ba wù kra ɲã̀ nã wù suɔgu, gɩ̀-lǝ gɩ̀ tammã, ɲi síì fennãã mǝ̃̀ hillɩ nã nã̀ã ji da ɲí nǝ̃ǝ̃ jinɲã̀ã.

3 Mǝ̃-ń jo, ɲi híilá bàá, mǝ̃̀ ji yal sɛbɛw ǹ-dii bà nãkruɔgɩ nã ǹ-tĩɛ̃ bá maar nǝ̃ ɲã̀ jinɲã̀ Serusalɛmgu.

4 Nǝ̃ gɩ-ń ba gɩ̀ saa mã́ã yo mǝ̃́ kã Serusalɛmgu, mǝ̃̀ ga kã yi maar yì min.

Polw mãã wù caa wú ce gùú waali

5 Mǝ̃̀ mãã mǝ̃̀ caa mǝ̃́ ta Mãsedwan yiɛgu, gùú cíé mǝ̃̀ ga ta ǹ-hlǝ gɩ̀ sùɔ́gɩ nã, nã̀ã ga da mǝ̃́ kã ɲì nãã.

6 Mǝ̃̀ ne mǝ̃́ wa gɩ-ń hyãl mǝ̃̀ ga wa mǝ̃́ ce bãndan ɲì nãã, halle yindagǝ nã mǝ̃́ ce yɔ'n bǝ̃ǝ̃ yo gɩ̀ min ɲì nãã ɲi da ǹ-tĩɛ̃rãã mǝ̃̀ nã mǝ̃̀ waalɩ nã.

7 Mǝ̃̀ sǝ̃n caa mǝ̃́ ta ǹ-dǝ̃́ǝ̃̀-ɲã́ã̀ dɩndɩn sǝ nã̀ã car.

Dũnnũw-ń hũɔ̃ mǝ̃̀ ga hǝ̃ǝ̃sǝ ɲì nãã.

8 Nǝ̃ mǝ̃̀ ji ba dìɛ Efɛsɩ lǝri fuwɔ Pãntekɔtɩ paaruu'n bǝ̃ǝ̃gɩ̀ ji hi.

9 Sulammã nã, Dũnnũẁ cíɛlá hlũgǝ̃ngããgu ǹ-hã-m mǝ̃́ ba mǝ̃̀ ji ce wù mããcemmã huhorɩmmã nã, Dũnnũ mããcem'n ɲããtaabà bṹũlã́ gɩ̀ sùɔ́gɩ nã.

10 Timotew-ń kã ɲì nãã, fǝ̃́ǝ̃lã̀ ɲi blǝ-yǝ gbǝrsǝrìi báa ga da ǹ-blǝ-yǝ ɲì sǝ̃ǝ̃nã.

Wùú yo, wù ce Yitii'n mããcem-i mã́ã tammã.

11 Curo'n báa diɛ-yǝ, nǝ̃ píyà wù nã wú ver nǝ̃ hyasɩrãgǝgu wù waalɩ nã ǹ-jo mǝ̃̀ nãã; nã̀ã wa mã́ã̀ nǝ̃ cwanããbaa mãã dìɛ nhlíɛ̀, yí nìɛ yì cii-yǝ.

12 Nǝ̃ yì cwanĩĩ Apolɔsɩ-lǝ, mǝ̃̀ círǝ̃́ǝ̃ wù nã bãncin wà wu kã ɲì nãã bá nǝ̃ yì cwanããdaba ǹ-ga dǝ̃ǝ̃-ɲã́ã̀, nǝ̃ wù kusuu sǝ gbal gbal wú ji kã ɲì nãã kuɔkuɔgu.

Wu-ń ji da gbaagu, wù ji kã.

Pol cãwaafaaldǝdi

13 Mã́ã cwanãã, bláà nũmǝ̃nãw, mǝ̃́garà ɲí cu Dũnnũ cɔ̃mmã nã; bláá ya gbǝrsǝrɩ́ jãn ɲì hiɛgà nã.

Gbǝ̃́ǝ̃lã́ ɲì hiɛgàa.

14 Ɲi-ń ba ɲì ce kuu wo kuu, cíyà-gǝ ɲí pɩgaa wà ɲì nãbɩgaa'n cɔ̃mmã dwal ɲì nã.

15 Ɲi fǝ̃ǝ̃ Sɩtefanasɩw nǝ̃ wù suɔntaaba min.

Bàá dĩ́ɛ̃lã́ ǹ-hũɔ̃ Yesu Kɩrsa cɔ̃mmã Akayi yiɛgɩ nã nã̀ã ba bà pya Kɩrsa bluuba nã, gɩ̀ sùɔ́gɩ nã, mǝ̃̀ cirǝ̃ǝ̃ ɲì nã,

16 bláà ɲì nɔ̃ ɲì hã gɩ̀ tuutaaba nǝ̃ cwaaba min mãã bà ce mããcemmã̀ã nǝ̃-ba.

17 Sɩtefanasɩw nǝ̃ Fɔrtunãtusɩw nǝ̃ Akayikusɩbà jollɩ̀ dwállá mǝ̃̀ nã; bà túulá ɲì sùɔ́gu mǝ̃̀ tuɔra.

18 Bà sã́rrã́ mǝ̃̀ hiɛga, nã̀ã sɩrĩɛ̃ ɲimãã yo ɲì yaga nã.

Bláà ɲì bũũ gɩ̀ tuutaaba!

19 Igɩlisɩ taaba mãã Asii yiɛgu, bà hã-ɲã́ã̀ nǝ̃ fyãnuugu.

Akilasɩba nǝ̃ Prisilw nǝ̃ Igɩlisɩ taaba mãã bà nãã, bà hã-ɲã́ã̀ nǝ̃ fyãnuuguu nǝ̃ bà hiɛgà min Yitii'n yiirɩ nã.

20 Yì cwanããba min bà fyãn-ɲã́ã̀.

Hlã́ã̀ ɲì ɲĩɛ̃ nǝ̃ cwansǝ'n fyãnuuguu mãã gɩ̀ pɩgaa wà ɲí dwal nǝ̃ ɲì ɲĩɛ̃.

21 Mã́ã Pol, mã̀ã hla'n nãkruɔ yállá fyãnuu gúɔ̀.

22 Yitii'n cɔ̃mmã-ń ba mã̀ sǝ̃n dwal gùú tiiw nã, Dũnnũẃ piɛ wù nãkrɔbɩblaagu wù drɔ!

Maranata!

Gɩ̀ yuugɩ-i wà: «Yitii, jo!»

23 Yitii Yesuẃ ne ɲì yiɛgu.

24 Ɲì min cɔ̃mmã̀ dwal mǝ̃̀ nã Yesu Kɩrsa yiirɩ nã.

Kwaya!