Kor. dĩɛ̃l 14

Dũnnũ Yuflǝw mãã wù hã cwaaba nǝ̃ ɲã̀ã

Cɔ̃mmã̀ min nã, bláà ɲì caa wà ɲì nãbɩgaa'n cɔ̃mmã-i mã́ dwal ɲì nã.

Bláà ɲì kaal Dũnnũ Yuflǝw fãngãn'n dɩgaliɛ yo wù cɔ̃mmã nã.

Nǝ̃ ɲi mãã ɲì saa ɲí caa Dũnnũ Yuflǝ fãngããguu mãã ǹ-ɲǝ̃ǝ̃ ɲì min, gɩ̀-i, ɲí ba ɲì gbǝ̃ǝ̃ ɲì taa ɲì hiil Dũnnũ cãwandɩ nã.

2 Curow-ń ba wù waa tammãã mãã cuu cwaabà sáa hi ǹ-waa-mã ǹ-da, wù sǝ̃n waa-mã nǝ̃ cwaa sǝ, nǝ̃ wù waa-mã nǝ̃ Dũnnũ-i.

Cwaabà sǝ̃n nɔ̃ wù mãã wù waa dìí.

Dũnnũ Yuflǝ fãngãã cíé wú ba wù waa cɔ̃mmãã mãã mã̀ã ŋmǝ̃ǝ̃rǝ̃ǝ̃ Dũnnũ cɔ̃mmã nã.

3 Nǝ̃ wùú mãã wù taa wù hiil Dũnnũ cãwanĩɛ̃ga nã, wù-lǝ wù waa nǝ̃ cwaa-i, ǹ-da ǹ-ce bá kã nǝ̃ yiga Dũnnũ cɔ̃mmã nã, nã̀ã hã-ba nǝ̃ hyagbǝ̃ngbãndi.

4 Wùú mãã wù waa tammãã mãã cuu cwaabà sáa hi ǹ-waa-mã ǹ-da, wù waa wù gbǝ̃ǝ̃ wù hla'n hiɛ-i, nǝ̃ wùú mãã wù taa wù hiil Dũnnũ cãwanĩɛ̃ga nã, wù-lǝ wù gbǝ̃ǝ̃ Igɩlisɩ taa'n hiɛ-i.

5 Mǝ̃n caa ɲì min ɲí ba ɲì waa tammãã mãã cuu cwaabà sáa hi ǹ-waa-mã ǹ-da, nǝ̃ mǝ̃̀ caa ɲí ba ɲì gbǝ̃ǝ̃ ɲì taa ɲì hiil Dũnnũ cãwandɩ nã hlo ǹ-ɲǝ̃ǝ̃ tammãã mãã cuu cwaabà sáa hi ǹ-waa-mã ǹ-da.

Sulammã nã, wùú mãã wù taa wù hiil Dũnnũ cãwandɩ nã, wù ta wùú mãã wù waa tammãã mãã cuu cwaabà sáa hi ǹ-waa-mã ǹ-da wù nã.

Mǝ̃̀ sáa hla cãwanĩɛ̃ gáàga yuugɩ́ fɩr ǹ-da ǹ-ce Igɩlisɩ taaba min bá kã nǝ̃ yiga Dũnnũ cɔ̃mmã nã.

6 Mã́ã cwanãã, yáà mǝ̃́ yugu-ɲã́ã̀: mǝ̃-ń kã ɲì nãã ǹ-kãã ba mǝ̃̀ waa tammãã mãã cuu cwaabà sáa hi ǹ-waa-mã ǹ-da, mã̀ ji pya ɲì nã nǝ̃ bii?

Mã̀ síì pya ɲì nã nǝ̃ cɔ̃m; mǝ̃̀ sáa hla mǝ̃́ waa Dũnnũ pɩ́gará-m nǝ̃ dìí ǹ-ja-ɲã́ã̀, yindagǝ nã mǝ̃́ pɩgaa-ɲã́ã̀ nǝ̃ cɔ̃m Dũnnũ cɔ̃mmã nã, yindagǝ nã mǝ̃́ taa ǹ-hiil wù cãwandarǝ nã, yindagǝ nã mǝ̃́ kal-ɲã́ã̀ nǝ̃ wù cɔ̃mmã.

7 Yi-ń tuu ǹ-fi ɲããmǝ̃ǝ̃l'n cɔ̃m yo mã́ nǝ̃ nnĩĩ-i, fyãlli yindagǝ nã bĩĩɲɩw, gɩ̀ yallɩ-ń ba dɩ̀ sáa tuu gɩ̀ mǝ̃ǝ̃lɩmmã nã, halii ji gbǝ̃ǝ̃ ǹ-fǝ̃ǝ̃ bà mãã bà mǝ̃ǝ̃l gùú blɩri.

8 Wùú mãã wù bu yendi wù be cwaaba byaarɩ nã, wu-ń ba wù sáa bu-dǝ cwaabá nɔ̃ dɩ́ kaalaa, halii ji tɩgɩnǝ̃ǝ̃ ǹ-hlǝ byaari?

9 Gùú tammã dɩn mã̀-i ɲi-ń ba ɲì waa tammãã mãã cuu cwaabà sáa hi ǹ-waa-mã ǹ-da, ɲi caa bá fǝ̃ǝ̃ ɲì cãwandì danii tam-i nǝ̃ dɩ̀ sáa kaalaa bà nã?

Ɲì cãwandɩ̀ ji ta saluugɩ nã mǝ̃ǝ̃lǝ̃ǝ̃ nnĩĩ-i.

10 Gùú tammãã mãã cwaabà waa-mã cuuw nã mã̀ bṹũlã́, nǝ̃ mã̀ dɩn yo mã̀ sɩriɛ mã̀ã́ mãã mã̀ sǝ̃n waa cɔ̃m sǝ.

11 Gɩ̀-i, curow-ń ba wù sǝ̃n waa tammãã mãã mǝ̃n nɔ̃-mã, mǝ̃̀ tuu wú ba norii-i, nǝ̃ wùú yo wù ba wù tuu mǝ̃n ba norii.

12 Gɩ̀ sùɔ́gɩ nã, Dũnnũ Yuflǝw mãã wù hã cwaaba nǝ̃ gùú fãngãnɲãã mãã, bláà ɲì kaal ɲã̀ã́ cɔ̃mmã nã-i, ǹ-da da-ɲã dugɔ nã̀ã wa gɩ̀-lǝ gùú dwállà ɲì nã.

Nǝ̃ ɲi mãã ɲì saa ɲí caa-ɲã dìí yuugɩ nã mãã, gɩ̀-i, ɲí ba ɲì pɛ Igɩlisɩ taa'n dɩgaliɛ nã, bá da ǹ-kã nǝ̃ yiga Dũnnũ cɔ̃mmã nã.

13 Gɩ̀-i, Dũnnũw-ń hã wùú mãã nǝ̃ fãngããgu wú ba wù waa tammãã mãã cuu cwaabà sáa hi ǹ-waa-mã ǹ-da, wù saa wú cirǝ̃ǝ̃ wù nã wú hã-yǝ nǝ̃ fãngããgu wù ba wù gbǝ̃ǝ̃ wù taa wù hiil mã̀ nã.

14 Sulammã nã, mǝ̃-ń ba mǝ̃̀ ce cirǝ̃mmã tammã nã mãã cuu cwaabà sáa hi ǹ-waa-mã ǹ-da, mã̀ã́ mãã mǝ̃̀ sǝ̃n nɔ̃-mã, gɩ̀ ba nã́ã́ mǝ̃̀ ce cirǝ̃mmã nǝ̃ mǝ̃̀ yuflǝ dɩndɩn-i nǝ̃ mǝ̃̀ cɔ̃nfǝ̃ǝ̃gǝgɩ́ ba.

15 Mǝ̃̀ ji ce bii gɩ̀-lǝ gɩ̀ nã?

Mǝ̃̀ ji ba mǝ̃̀ ce cirǝ̃mmã nǝ̃ mǝ̃̀ yuflǝw, nã̀ã ba mǝ̃̀ ce-mã nǝ̃ cɔ̃nfǝ̃ǝ̃gǝ yo, mǝ̃̀ ji ba mǝ̃̀ hyar hlãnɲã nǝ̃ mǝ̃̀ yuflǝw, nã̀ã ba mǝ̃̀ hyar-ɲã nǝ̃ cɔ̃nfǝ̃ǝ̃gǝ yo.

16 Sulammã nã, nǝ̃-ń ba ǹ dũũ kwayaw Dũnnũw nã ǹ yuflǝw dɩn nã, gùú tii mãã wùu jiraa nǝ̃-ɲã́ã̀ cirǝ̃m'n sùɔ́gɩ nã, nã̀ã ba wù sǝ̃n nɔ̃-mã, wù ji ce danii nã̀ã siɛ ǹ kwaya dũũmã wà kwaya nǝ̃ wù sǝ̃n nɔ̃-mã?

17 Halle ǹ kwaya dũũmã-ń ba mã̀ã fa ǹ-car tam wo tam, mã̀ sáa pya ǹ nãcuro wáá nã wú ba wù ji vǝ̃ǝ̃ Dũnnũ cɔ̃mmã nã.

18 Mǝ̃̀ dũũ kwaya Dũnnũw nã ǹ-da wà mǝ̃ waa tammãã mãã cuu cwaabà sáa hi ǹ-waa-mã ǹ-da ǹ-ɲǝ̃ǝ̃ ɲì min.

19 Nǝ̃ yi-ń tɩgii Igɩlisɩ taaba sǝ̃ǝ̃nã, gɩ̀ dwal mǝ̃n nã mǝ̃́ waa cãwaabiigá ndiiga cwaabá nɔ̃-ga, ǹ-da ǹ-kal-ba, ǹ-ɲǝ̃ǝ̃ mǝ̃́ waa cãwaacin tammã nã mãã cuu cwaabà sáa hi ǹ-waa-mã ǹ-da.

20 Mã́ã cwanãã, bláá ba ɲì blǝ cɔ̃mmã̀ã tãnkuurammã nã; bláà nã́ã́ tãnkuuraa-i diibɩblar'n yiɛgu, nǝ̃ bláà ɲì blǝ cɔ̃mmã covũnvãnãmmã nã.

21 Dɩ̀ yállá Musa hlũũgɩ nã wà Cuutii Dũnnũẃ nàa wùu waa wà: «Mǝ̃̀ ji waa cɔ̃mmã nǝ̃ Isɩrayɛl bluuba niɛrɛmmã nã-i, mǝ̃̀ ji ce niɛriɛ'n nãmbenĩɛ̃gá wanãã nǝ̃-ba, nǝ̃ dɩ̀-lǝ dɩ̀ min drɔ, bà síì nɔ̃ ǹ-hã-m.»

22 Gɩ̀-i, bàá mãã bà waa gùú tammãã mãã cuu cwaabà sáa hi ǹ-waa-mã ǹ-da, bà sǝ̃n waa-mã bà pɩgaa bàá mãã bà hṹɔ̃lã́ Yesu cɔ̃m sǝ nǝ̃ cɔ̃m, nǝ̃ bà waa-mã bà pɩgaa bàá mãã bà sáa hũɔ̃ mã̀-i nǝ̃ cɔ̃m.

Gùú tammã dɩnmã-i, bàá mãã bà taa bà hiil Dũnnũ cãwandɩ nã, bà sǝ̃n taa bà hiil-dǝ bà pɩgaa bàá mãã bà sáa hũɔ̃ Yesu cɔ̃m sǝ nǝ̃ cɔ̃m, nǝ̃ bà pɩgaa bàá nǝ̃n hṹɔ̃lã́ wù cɔ̃m-i nǝ̃ cɔ̃m.

23 Yi-ń tuu ǹ-ne, Igɩlisɩ taaba min ba-ń tɩgii bà ɲĩɛ̃ ǹ-ba bà waa tammãã mãã cuu cwaabà sáa hi ǹ-waa-mã ǹ-da, nǝ̃ bà nãyodiɛ hlǝ yiɛdagǝ ǹ-juo hi-ba yindagǝ nã nǝ̃ǝ̃nĩĩtiiw mãã wù sáa hũɔ̃ Dũnnũ cɔ̃mmã, wù síì waa bá pe pe-ì?

24 Nǝ̃ gɩ-ń ba nã́ã́ ɲì min ɲi taa ɲì hiil Dũnnũ cãwan nã-i nǝ̃ ɲì nãyoẁ hlǝ yiɛdagǝ yindagǝ nã nǝ̃ǝ̃nĩĩtiidiɛ-i wùu juo ba wù nɔ̃ nǝ̃ nɔ̃lli dɩn, wù nṹɔ̃́ gàá mãã, gà-lǝ gàá ji ce wú hũɔ̃ ǹ-fǝ̃ǝ̃ wù diicĩɛ̃rǝdi.

Wù nṹɔ̃́ kuu wo kuu, gɩ̀ ji hã-yǝ nǝ̃ dii lǝri,

25 nǝ̃ cɔ̃m wo cɔ̃mmã wù yáá wù kãn-mã wù hiɛga nã, mã̀ hlǝ taasǝ̃ǝ̃nǝ̃ǝ̃gu-i.

Gɩ̀-lǝ gɩ̀ nã, wù ji kuulǝǝ ǹ-curǝǝ wù yigagu ɲũũrũũgu ǹ-bũũ Dũnnũw nã̀ã waa wà sulammã nã Dũnnũẃ nìɛ ɲì sǝ̃ǝ̃nã.

Dũnnũ bũũtammã Igɩlisɩ taaba sǝ̃ǝ̃nã

26 Gɩ̀ sùɔ́gɩ nã, mã́ã cwanãã ɲimãã mãã Kɩrsaw nã, hadi sáalà dɩ́ ce?

Ɲi-ń tɩgii Dũnnũ bũũmã nã, ɲì sǝ̃ǝ̃nã wudiɛẁ ji gbǝ̃ǝ̃ ǹ-hyar hlǝ̃ǝ̃gɩ dɩn, wudiɛẃ kal cwaaba nǝ̃ Dũnnũ cãwandìi; wudiɛ ji gbǝ̃ǝ̃ ǹ-fɩr cɔ̃mdamã, mã̀ã́ mãã Dũnnũẁ pɩ́gará-yǝ nǝ̃-mã ǹ-ja cwaaba, wudiɛẁ ji gbǝ̃ǝ̃ ǹ-waa tammãã mãã cuu cwaabà sáa hi ǹ-waa-mã ǹ-da nǝ̃ wudiɛẃ fɩr mã̀ yuugu.

Mã̀-lǝ mã̀ min, mã̀ saa mã́ pya Igɩlisɩ taaba nã bá kã nǝ̃ yiga Dũnnũ cɔ̃mmã nã.

27 Bàá mãã bà waa tammãã mãã cuu cwaabà sáa hi ǹ-waa-mã ǹ-da, bá báa maa cwaabà hǝ̃ǝ̃l yindagǝ nã bà siɛl.

Ba-ń wa bá waa-mã, bá ba bà waa-mã cwaaba dǝndǝn bà duu bà ɲĩɛ̃ nã, nǝ̃ curoẁ dɩnẃ da wùú mãã wù ji taa ǹ-hiil bà cãwanĩɛ̃ga nã ǹ-ja cwaaba.

28 Curow-ń ba wù sɩraa ɲì sǝ̃ǝ̃nã wùú mãã wù gbǝ̃ǝ̃ wù fɩr tammãã mãã cuutaabà sáa hi waa-mã ǹ-da, bláá ce ɲí haar ɲì yaliɛga Igɩlisɩ taaba sǝ̃ǝ̃nã wà ɲi waa-mã, nǝ̃ bláà ɲì waa-mã nǝ̃ Dũnnũẁ ɲì hiɛga nã.

29 Nǝ̃ Dũnnũẁ hlã bàá nǝ̃ fãngããgu bá ba bà gbǝ̃ǝ̃ bà taa bà hiil wù cãwandɩ nã, bàá yo bà saa bá hã cwaaba hǝ̃ǝ̃l yindagǝ nã bà siɛl nǝ̃ cãwandìi nǝ̃ bà dɩgaliɛẁ jiraa ǹ-blǝ-dǝ ǹ-ne.

30 Dũnnũw-ń pɩgaa curodiɛ hlo nǝ̃ cɔ̃m wà wu waa-mã, wùú nǝ̃n yáá cãwandɩ nã wù saa wú suu wù nũɔ̃gɩ nã.

31 Ɲì min ɲi ji gbǝ̃ǝ̃ ǹ-ba ɲì taa ɲì hiil Dũnnũ cãwandɩ nã cwaa ɲì dǝndǝn ǹ-duu ɲì ɲĩɛ̃ nã ǹ-da ǹ-kal cwaaba min nã̀ã gbǝ̃ǝ̃ bà hiɛgà.

32 Bàá mãã nǝ̃ fãngããgu bà taa bà hiil Dũnnũ cãwandɩ nã, fãngããgɩ́ nǝ̃ bà saa bá ba bà ji gbǝ̃ǝ̃ ǹ-blǝ bà hla'n ǹ-ba ciyɛ̃ ciyɛ̃.

33 Cɔ̃ngaalammã̀ sǝ̃n dwal Dũnnũw nã, nǝ̃ Dũnnũẁ caa yi ba nǝ̃ hyasɩrãgǝ-i nã́ã́ dɩ̀ mãã dɩ̀ ce Kɩrsa bluu'n Igɩlisɩ taaba min sǝ̃ǝ̃nã gùú tammã.

34 Hlũũgɩ̀ sǝ canããbaa saa, bá ba bà ji waa cɔ̃mmã tɩgɩm'n sɔsǝrɩ nã; bá suu bà nɔ̃nɲã nã; bà saa bá ba bà nɔ̃ bà hã bà blaba nã́ã́ Musa hlũũgɩ̀ wáalá-dǝ nĩĩguu mãã.

35 Ba-ń ba bà caa bá ce yugummã cɔ̃mdamã nã, bà saa bá yugu bà blaba-i suɔgɩ nã.

Nã̀ã waa gɩ̀ sáa saa cijalẃ tuu cãwandi Igɩlisɩ taaba sǝ̃ǝ̃nã.

36 Ɲi kãn wà Dũnnũ cãwandɩ̀ hlǝ́rá ɲimãã nã-ì?

Dàa ɲi kãn wà ɲimãã dɩndɩn nṹwã̀ dǝ-ì?

37 Gùú tii nǝ̃n ba wù kãn wà wù-lǝ Dũnnũ tanhiil-i, yindagǝ nã wà Dũnnũẁ hlã-yǝ nǝ̃ fãngããdagǝ, wù saa wú fǝ̃ǝ̃ wà mǝ̀ mãã mǝ̃̀ yal dìi mǝ̃̀ hã-ɲã́ã̀ nnĩĩ, Yitii Dũnnũ hlũũ'n nǝ̃ǝ̃l-i.

38 Nǝ̃ wu-ń ba wù sáa nɔ̃ ǹ-hã mǝ̃̀ yállá dìí, curo'n báa ce ǹ-nɔ̃ ǹ-hã-yǝ.

39 Mã́ã cwanãã, bláà ɲì caa Dũnnũẃ hã-ɲã́ã̀ nǝ̃ fãngããgu ɲí ba ɲì gbǝ̃ǝ̃ ɲì taa ɲì hiil wù cãwandɩ nã ǹ-ɲǝ̃ǝ̃ ɲinɲã min.

Nǝ̃ wù hlã bàá nǝ̃ fãngããgu bá ba bà waa tammãã mãã cuu cwaabà sáa hi ǹ-waa-mã ǹ-da, bláá ce ɲí ɲǝ̃ǝ̃-ba nǝ̃ mã̀ waamã.

40 Cɔ̃m wo cɔ̃mmã́ ce ǹ-saa, nã̀ã vaa nǝ̃ mã̀ hlũũgu.