Kor. dĩɛ̃l 13

Yì nãbɩgaa'n cɔ̃mmã̀ saa mã́ gbǝ̃ǝ̃ yì nã

Halle mǝ̃n ba mǝ̃̀ waa cuu taa'n tammã, nã̀ã ba mǝ̃̀ waa mɛlɛgɛba tammã, nǝ̃ mǝ̃̀ nãbɩgaa'n cɔ̃mmã́ ba mã̀ sǝ̃n dwal mǝ̃̀ nã, mǝ̃n nǝ̃ nã́ã́ gǝncuu-i, yindagǝ nã nã́ã́ jũnjumũũ-i gɩ̀ du gɩ̀ suu cwaa'n tɔ̃nɲã.

2 Gɩ-ń dwal mǝ̃́ ba mǝ̃̀ gbǝ̃ǝ̃ mǝ̃̀ taa mǝ̃̀ hiil Dũnnũ cãwanĩɛ̃ga nã, gɩ-ń dwal mǝ̃́ ba nǝ̃ cɔ̃nfǝ̃ǝ̃gǝgɩ min nã̀ã ba mǝ̃̀ gbǝ̃ǝ̃ mǝ̃̀ fɩrǝǝ Dũnnũ cɔ̃mmã nã, gɩ-ń dwal mǝ̃́ cu Dũnnũ furũũgɩ nã ǹ-ba mǝ̃̀ gbǝ̃ǝ̃ mǝ̃̀ waa nǝ̃ tãnũnɲã wà ɲã́ suro ǹ-vã ǹ-hal nǝ̃ ɲí ba ɲì nɔ̃ ɲì hã-m, nǝ̃ mǝ̃̀ nãbɩgaa'n cɔ̃mmã́ ba mã̀ sǝ̃n dwal mǝ̃̀ nã, mǝ̃̀ sǝ kuu.

3 Gɩ-ń dwal mǝ̃́ hã kokwaaba nǝ̃ mǝ̃̀ nãkruɔɲinɲã min, nã̀ã ba mǝ̃̀ ji hũɔ̃ ǹ-ya bá hyã mǝ̃̀ cãndi, mǝ̃̀ nãbɩgaa'n cɔ̃mmã-ń ba mã̀ sǝ̃n cɔ̃mmã́ ba mã̀ sǝ̃n dwal mǝ̃̀ nã, mǝ̃̀ ce dɩ̀-lǝ dɩ̀ min mǝ̃ǝ̃lǝ̃ǝ̃-i.

4 Curow mãã wù nãbɩgaa'n cɔ̃mmã̀ dwal wù nã, wù hũɔ̃ cɔ̃mmã wù hla nã, nã̀ã ba wù ce diifɩnfaari wù hã bà dɩgaliɛw, wù sǝ̃n ya wù yisɩrɩ́ hlǝ curo'n kuu nã, wù sǝ̃n hĩɛ̃ wù hla, nã̀ã ba wù sǝ̃n bũũ wù yuu yo.

5 Wù sǝ̃n hũɔ̃ ǹ-ce circɔ̃mmã, wù sǝ̃n caa wù hla'n faa'n cɔ̃m dɩndɩn sǝ, wù hiɛgà sǝ̃n gǝǝraa gà dũ, nã̀ã ba curow-ń ce-yǝ nǝ̃ diibɩblaari, wù sǝ̃n ɲãl-dǝ wù hiɛga nã.

6 Curow mãã wù nãbɩgaa'n cɔ̃mmã̀ dwal wù nã, wù sǝ̃n ce kweyi-kweyiw cɔ̃ncĩɛ̃mmã yuunã, nǝ̃ wù ce-yǝ sulam'n yuunã-i.

7 Wù ce cɔ̃mmã min dũndɔw, nã̀ã ba wùu cu Dũnnũ furũũgɩ nã bǝ̃ǝ̃ wo bǝ̃ǝ̃, nã̀ã piɛ wù nãkruɔgu wù drɔ, nã̀ã ba wù hũɔ̃ wù cɔ̃mmã wù hla nã.

8 Dũnnũ tanhiilaabaa mãã bà taa bà hiil Dũnnũ cãwanĩɛ̃ga nã, bà cãwanĩɛ̃gà ji ta, tammãã mãã cuu cwaabà sáa hi ǹ-waa-mã ǹ-da, nã̀ã ba bà waa-mã, mã̀ waamã̀ ji ta, yì cɔ̃nfǝ̃ǝ̃gǝ yo, gɩ̀ ji ta, nǝ̃ yì nãbɩgaa'n cɔ̃m-lǝ, mã-ń dwal yì nã, mã̀ dwállá yì nã fɩraa-i.

9 Nã̀ã wa yì cɔ̃nfǝ̃ǝ̃gǝgɩ̀ sǝ gùu jalliɛ, nǝ̃ yi mãã yì taa yì hiil Dũnnũ tammã nã, nĩĩguu mãã, gùú yo gɩ̀ tammã sǝ mã̀ã jalliɛ.

10 Nǝ̃ gùú bǝ̃ǝ̃guu mãã Dũnnũẁ ji pɩgaa-yáà nǝ̃ cɔ̃mmãã mãã mã̀ jállíɛ, gɩ̀-lǝ nã, mã̀ã́ mãã mã̀ sáa jalliɛ yì saa, mã̀ ji tã.

11 Gùú bǝ̃ǝ̃guu mãã mǝ̃̀ yáá tãnkuurw, mǝ̃̀ yáá mǝ̃̀ waa tãnkuuram-i, nã̀ã ba mǝ̃̀ kãn tãnkuurammã nã, nã̀ã ba mǝ̃̀ blǝ cɔ̃mmã tãnkuurammã nã.

Nǝ̃ mǝ̃̀ jáa vǝ̃ǝ̃, mǝ̃́ ya baasaalsǝ'n cɔ̃mmã min mã́ ba.

12 Kuɔkuɔ-lǝ, yi sǝ yìi hi ǹ-fǝ̃ǝ̃ Dũnnũ cɔ̃mmã́ kaalaa yì nã gbaa.

Mã́ nǝ̃ nã́ã́ yi mãã yi-ń ce yí ba yì da ɲinɲã bii siɛtɩbɩblayǝw nã nĩĩguu mãã.

Nǝ̃ yuugɩ́ nàa yuu nã, yi ga juo fǝ̃ǝ̃ mã́ kaalaa yì nã lɩgǝlɩgǝ.

Mǝ̃̀ sáa hi mǝ̃̀ fǝ̃ǝ̃ cɔ̃mmã min mã́ jalliɛ kuɔkuɔgu, nǝ̃ gɩ̀-lǝ gɩ̀ yuugu mǝ̃̀ ji fǝ̃ǝ̃ mã̀ min mã́ jalliɛ nã́ã́ Dũnnũw mãã wù fǝ̃ǝ̃-m gùú tammãã mãã.

13 Yindiɛ ɲinɲã siɛl ji yanãã ɲã síì tã ǹ-da: Curoẃ hũɔ̃ Dũnnũ cɔ̃mmã, nã̀ã piɛ wù nãkruɔgu wù drɔ, nã̀ã ya wù nãbɩgaa'n cɔ̃mmã́ dwal wù nã.

Nǝ̃ ɲã̀ siɛl ɲã́ã̀ min nã, gùú mãã gɩ̀ ta nã, gɩ̀-i, ń ya ǹ nãbɩgaa'n cɔ̃mmã̀ dwal ǹ nã.