1 Rois 11

Niɛrɛcanãã'n cɔ̃mmã́ juo dwal Solmãnw nã dugɔ, wú tuu Mohabɩ yiɛntacanããba, Amon nũɔ̃ntacanããba, Edɔ̃m nũɔ̃ntacanããba, Sidɔ̃ yiɛntacanããba, nǝ̃ Hitɩ nũɔ̃ntacanããba ǹ-pya Farawunã bisĩɛ̃ nã.

2 Nǝ̃ canãã báàbà ya coplaa gáà cwaa-i, gàá mãã Fɩraa-Dũnnũẁ yáá wùu waa nǝ̃-ga wà: «Ɲi síì kã bà nãã, bà sɩga jo ɲì nãã. Dɩ̀ káaláa bà ji ce ɲì hiɛgá duu bà dũnnũba nã.» Nǝ̃ niɛrɛcanãã báàbà cɔ̃mmã̀ mãã mã̀ dwállá Solmãnw nã, wú kãã dii wù hla ǹ-hã copla gáà.

3 Solmãnẁ yáá wùu taa yuntaagǝ̃ngĩɛ̃'n bisii tũndii gundii bà siɛl (700), nã̀ã dii canãã gundii bà siɛlbaa (300) nǝ̃ canãã, bà-lǝ bàá gáa ver wù hiɛga Dũnnũ cɔ̃mmã nã.

4 Solmãnẁ jáa ba wù byanvãsǝrɩ nã, wù canããbá ver wù hiɛga wú ba wù duu bà dũnnũdaba nã, wù sáa ji ba wù ji ɲǝ̃gãr Fɩraa-Dũnnũw nã, wù Dũnnũw, nǝ̃ hiɛga min, wù tǝ Dawuda tammã.

6 Wú ce dìí mãã dìi bla Fɩraa-Dũnnũ yinɲã nã, nã̀ã ba wù sáá wù nɔ̃ wù hã-yǝ tǝmm nã́ã́ wù tǝ Dawudaẁ yáá wù ce-dǝ nĩĩgu mãã.

9-10 Fɩraa-Dũnnũw, Isɩrayɛl bluu'n Dũnnũw, wù yáá wùu hillaa Solmãnw nã yin hǝ̃ǝ̃l, nã̀ã ba wù yáá wùu kra dɩ̀ nã ǹ-hã-yǝ dɩ́ kaalaa wà wu báa bũũ dũnnũdaba, nǝ̃ Solmãnẁ sáa nɔ̃ ǹ-hã-yǝ nã̀ã fǝ̃ǝ̃ ǹ-pyar wù hla wù nã. Gɩ̀-i, Fɩraa-Dũnnũ hiɛgá dũ nǝ̃ Solmãnw.

11 Wú waa nǝ̃-yǝ wà: «Ǹ mãã cíé ǹ hla nnĩĩ, ǹ sáa ji wáà twanɲũɔ̃gǝguu mãã mǝ̃̀ yáá mã̀ã kã yi ce-gǝ, yindagǝ nã mǝ̃̀ yáá mã̀ã kra dìí nã mãã ǹ-hã-n, mǝ̃̀ ji ɲǝ̃ǝ̃ ǹ-hũɔ̃ yuuntasǝri ǹ saa ǹ-hã ǹ mããcierdiɛ nǝ̃-dǝ.

12 Nǝ̃ ǹ tǝ Dawuda cɔ̃mmã nã, mǝ̃̀ síì ce dɩ̀-lǝ ǹ-ya ń ba dìɛ nũmǝ̃nãw: mǝ̃̀ ji ɲǝ̃ǝ̃ ǹ-hũɔ̃ yuuntasǝri ǹ bíɛ́w saa-i;

13 nǝ̃ gɩ̀-i nnĩĩ, mǝ̃̀ síì ver ǹ-hũɔ̃ yuuntasǝrɩ min sǝ wù saa, mǝ̃̀ ji ya cwaa'n nũɔ̃gɩ dɩngɩ́ ba wù saa, mǝ̃̀ mããcier Dawuda cɔ̃mmã nã, nǝ̃ Serusalɛm cɔ̃mmã nã, lǝri mãã mǝ̃̀ níé ǹ-hiil-dǝ.