1 Rois 10

Saba lǝ'n cijalw mãã wù ya yuuntigǝ̃ngãw, wú kãã nɔ̃ Solmãn yiirɩ nã, Fɩraa-Dũnnũ yir'n cɔ̃mmã nã, wú juo hiraa wù yigagɩ nã, nã̀ã yugu-yǝ nǝ̃ yugummã minw mãã wù tɩ́gɩnǝ̃́ǝ̃ mã̀ nã.

2 Wú kãã hi Serusalɛmgu nǝ̃ wù furũntaacin, nǝ̃ ɲũgɔ̃minããbàa tuu wusunããba, sãnãcindarǝ, nǝ̃ tɩntrãkuusǝyaga. Wú fǝ̃ǝ̃ ǹ-kã Solmãnw nãã ǹ-yugu-yǝ nǝ̃ yugummã minw mãã wù tɩ́gɩnǝ̃́ǝ̃ mã̀ nã.

3 Solmãnẃ siɛ wù yugummã min; mãdam'n sáa vaalaa wù nã: Wú waa gà min yuugu ǹ-ja-yǝ.

4 Saba lǝ'n cijalw mãã wù ya yuuntigǝ̃ngãw, wù gáa da Solmãn yigakaalagǝgu, nǝ̃ wù yáá wùu mã gùú yuntaagǝ̃ngĩɛ̃'n suɔgu mãã,

5 gùú tasaba nǝ̃n júó ǹ-ji kra wù juwuukaagɩ nã, wù mããcieraa'n wancɔm'n sɔsǝri, mããcieraa'n kuulanãmba nǝ̃ bà mããcemmã, wù ɲããɲũɔ̃n'n yigantaaba, nǝ̃ wù mãã wù jãn gùú siimãã mãã bà ye-mã nǝ̃ yellɩ nã wù hã Fɩraa-Dũnnũw, wù bũũduugɩ nã, wù fiisaagɩ́ bǝr.

6 Wú fǝ̃ǝ̃ ǹ-waa nǝ̃ yuuntigǝ̃ngãw wà: «Mǝ̃̀ nṹɔ̃́ dìí mãã mǝ̃̀ yiɛgu, ǹ cɔ̃mmã nã, nǝ̃ ǹ yigakaalagǝ'n cɔ̃mmã nã, sulam-i!

7 Mǝ̃̀ wáalá mǝ̃̀ ga juo da-dǝ nǝ̃ mǝ̃̀ yinɲã, mǝ̃̀ sáá mã̀ã hũɔ̃-dǝ. Nǝ̃ bà sáá bàa taa dɩ̀ buor yo nǝ̃-m! Ǹ yigakaalagǝgu nǝ̃ ǹ gbaasǝrɩ̀ máalá mǝ̃n nũɔ̃ ɲã̀ã́ mãã ɲã̀ cɔ̃mmã nɔ̃nɲã nã.

8 Ǹ bluu'n yunɲã̀ dwállá, ǹ mããcieraa'n yunɲã̀ dwállá, nã̀ã wa bá nìɛ pyandiɛ ǹ yigagɩ nã, bà ji gbǝ̃ǝ̃ ǹ-da ǹ yigakaalagǝ'n tɔ̃nɩw.

9 Fɩraa-Dũnnũw mãã ǹ Dũnnũw, mǝ̃̀ dũũ kwayaw mǝ̃̀ hã-yǝ, wùú mãã wù níé ǹ-hiil-n ǹ-kra-n Isɩrayɛl bluu'n yuuntasǝ'n guujirakuugu drɔ! Isɩrayɛl bluu'n cɔ̃mmã̀ mãã mã̀ dwal Fɩraa-Dũnnũw nã fɩraa, gɩ̀-i wú ce ń ba bà yuuntigǝ̃ngãw, ń da ǹ-ba ǹ-jar sugolli nǝ̃ sũɔ̃lɩmmã.