Esdras 1

Esdras

Siirɩsɩ fãngãtasǝ'n blɩdĩɛ̃lããrǝdɩ nã, Fɩraa-Dũnnũẃ juo dii dɩdarǝ Pɛrsɩ yiɛ'n yuuntigǝ̃ngã Siirɩsɩ hiɛga nã, ǹ-da ce wù cãwandii mãã dɩ̀ wáalá Seremi nũɔ̃gɩ nã, dɩ́ suu. Wù cíé wú haa ǹ-waa-dǝ, halle nã̀ã ce wú yal-dǝ, dɩ̀ yáá dìi waa wù yuuntasǝ'n yiɛgɩ min nã wà:

2 Pɛrsɩ yiɛ'n yuuntigǝ̃ngã Siirɩsɩw mãã wù waa dìi, dɩ̀-i nnĩĩ nã: Fɩraa-Dũnnũw, Drɔ-Dũnnũw, wù hlã-m nǝ̃ ɲũũrũũ yanɲã min yuuntasǝri, nã̀ã ne ǹ-hiil-m wà mǝ̃́ mã Dũnnũ bũũsuɔgu Serusalɛmgu, Suuda yiɛgu ǹ-hã-yǝ.

3 Ɲì sǝ̃ǝ̃nã, bà min mãã wù bluuba, mǝ̃̀ cirǝ̃ǝ̃ bà nã wà bá ver ǹ-kã Serusalɛmgu, Suuda yiɛgu, bá ver ǹ-mã Fɩraa-Dũnnũ bũũsuɔgu gɩ̀ sùɔ́gɩ nã, Isɩrayɛl bluu'n Dũnnũẃ nàa gɩ̀ sùɔ́gɩ nã Serusalɛmgu! Bà Dũnnũẃ ba bà saa.

4 Fɩraa-Dũnnũ bluu'n dɩgaliɛẁ járrá sùɔ́ wo sùɔ́, gɩ̀ sùɔ́ntaabà ga hã-ba nǝ̃ jinɲã, nǝ̃ sãnãw, nǝ̃ wariɛga, nǝ̃ kwasǝnɲinɲã, ǹ-pɛ gɩ̀ mãã gɩ̀ dwal bà nã nǝ̃ bá hã-ba nǝ̃ gùú ɲããhãnɲãã mãã wà Dũnnũ suɔ'n ɲin-i Serusalɛmgu.»

5 Suuda nũɔ̃'n swamntaaba nǝ̃ Bɛ̃nsamɛ̃ nũɔ̃'n bɩgaaba, puruɔntaaba nǝ̃ Levi nũɔ̃ntaaba, Dũnnũẁ díilá-dǝ bàá bà min hiɛga nã, bá suro ǹ-ta Serusalɛmgu, bà ga ver ǹ-mã Fɩraa-Dũnnũ suɔgu.

6 Bà jirataaba min bá hã-ba nǝ̃ kwaplar'n ɲinɲã, sãnãw, wariɛga, kwasǝnɲinɲã, nǝ̃ ɲinɲãã mãã solli, ǹ-pya gɩ̀ mãã gɩ̀ dwal bà nã nǝ̃ bá hã-ba nǝ̃ gùú ɲããhãnɲã.

7 Nabukadɩnɩsaarẁ yáá wùu tuu gùú gũngon'n wariɛgaa mãã Fɩraa-Dũnnũ suɔgu Serusalɛmgu, ǹ-kãã kra-ga wù dũnnũ duugɩ nã, Yuuntigǝ̃ngã Siirɩsɩẃ ce bá ver-ga ǹ-hã-ba.