1 Rois 3

3 Fɩraa-Dũnnũ cɔ̃mmã̀ yáá mã̀ dwal Solmãnw nã, nĩĩgɩ-i, wù tǝ Dawudaẁ yáá wùu yal dìí mãã ǹ-kra, wú ba wù yáá wù duu dɩ̀ nã. Nǝ̃ wù yáá wù kã gùú sɔsǝrii mãã dìi kra dɩ̀ dǝ, wù jãn siimã, nã̀ã ba wù tii wusunããba.

4 Yuuntigǝ̃ngãẃ suro ǹ-kã Gabawɔ̃ lǝri wù ga jãn siimã, nã̀ã wa gùú sùɔ́ nũɔ̃sǝn sùɔ́guu mãã gùú kra gɩ̀ dǝ. Solmãnẃ kãã ko kwasǝnɲin tonnũɔ̃sɔ̃ trãngwaahǝ̃ǝ̃l (1 000) siijãnkuugɩ nã.

5 Gabawɔ̃ lǝri, Fɩraa-Dũnnũẃ kãã hillaa wù nã dãnsãndɩ nã yisuɔgu, nã̀ã waa nǝ̃-yǝ wà: «Ǹ mãã ǹ caa gùu, cirǝ̃ǝ̃ gɩ̀ nã, mǝ̃̀ hã-n nǝ̃-gǝ-i.»

6 Solmãnẃ siɛ-yǝ wà: «Ǹ cíé ǹ mããcier Dawudaw, mǝ̃̀ tǝw, nǝ̃ kusufɩnfaagǝ̃ngããgu, nã̀ã wa, wù yáá wù wáà ǹ yigagɩ nã yalntasǝrɩ nã, nǝ̃ sũɔ̃lɩmmã nã, nǝ̃ wù hiɛ yo, gà yáá gàa pesǝ nǝ̃-n; nǝ̃ ń fǝ̃ǝ̃ ǹ pã-yǝ nǝ̃ kusufɩnfaagǝ̃ngãã gúɔ̀: ǹ hlã-yǝ nǝ̃ biɛnĩĩ, wùú mãã wù ji tuu wù sùɔ́gu yuuntasǝrɩ nã, yi da-dǝ nĩĩgɩ-i jimããgu.

7 Kuɔkuɔ, Fɩraa-Dũnnũ, mǝ̃̀ Dũnnũ, ǹ kárrá mǝ̃̀ nã yuuntigǝ̃ngãw, mǝ̃̀ tǝ Dawuda sùɔ́gɩ nã, mã́ã mãã ǹ mããcierw. Nã̀ã da tãnkuurblɩ nǝ̃-m, mǝ̃̀ sǝ̃n fǝ̃ǝ̃ cɔ̃ncin dɩ̀ kusuugɩ nã.

8 Ǹ mããcierw-i nnĩĩ nã, ǹ bluubaa sǝ̃ǝ̃nã, ǹ níé ǹ-hiil wùú mãã. Ǹ bluu báá yo, bà ɲṹrṹɔ̃, bà bṹũlã́ fuwɔ curo'n síì gbǝ̃ǝ̃ ǹ-ja ǹ-fǝ̃ǝ̃ bà nũɔ̃gu, yindagǝ nã ǹ-yal bà yiriɛga.

9 Gɩ̀ sùɔ́gɩ nã, hã ǹ mããcierw nǝ̃ hiɛgaa mãã gà ji hũɔ̃ nɔ̃lli, ǹ-da ǹ-ba wù jar ǹ bluu'n sugolli, ǹ-da ǹ-ba wù fǝ̃ǝ̃ wù pyariɛ diifɩnfaari diibɩblaarɩ nã! Sulammã nã, halii yáá wù ji gbǝ̃ǝ̃ ǹ-jar ǹ bluu'n sugolli, coplǝgǝ̃ngãr díɛ̀dɩ tuugu.»

10 Solmãn cirǝ̃m mã́ã̀mã́ dwal Fɩraa-Dũnnũw nã.

11 Dũnnũẃ fǝ̃ǝ̃ ǹ-waa nǝ̃-yǝ wà: «Ǹ mãã ǹ círǝ̃́ǝ̃ dɩ̀-lǝ dɩ̀ nã, nǝ̃ ǹ sáa cirǝ̃ǝ̃ mǝ̃ nã ǹ-hã ǹ hla wà ń caa bìicin-i, yindagǝ nã gbaasǝ-i, yindagǝ nã ǹ ɲããtaa'n kuugu, nã̀ã ba ǹ cirǝ̃ǝ̃ cɔ̃nfǝ̃ǝ̃gǝgɩ nã, ǹ ji ba ǹ jar sugolli,

12 mǝ̃̀ ji ce mǝ̃̀ diicerǝdi ǹ-vaa nǝ̃ ǹ cãwandi. Mǝ̃̀ ji hã-n nǝ̃ hiɛgaa mãã nǝ̃ yigakaalagǝgu, nǝ̃ cɔ̃nfǝ̃ǝ̃gǝgu, ɲã̀ã́ mãã ɲã̀ tuugɩ̀ sáa da ǹ yigantaaba nã, nǝ̃ curo'n síì da wùú mãã wù ji ba yin tuugu.

13 Ǹ pya nã, ǹ mãã ǹ sáa cirǝ̃ǝ̃ gùú nã, mǝ̃̀ ji hã-n nǝ̃-gǝ: gbaasǝri nǝ̃ bũũmã, ǹ-ya ń ba nũmǝ̃nãw, ɲã̀ síì tã ǹ nã, yuuntigǝ̃ngãdiɛ'n síì da wùú mãã wù ji kã ɲí vaa nǝ̃-n.

14 Nǝ̃ nǝ̃-ń ba ǹ wáà mǝ̃̀ hlũsǝri, nǝ̃-ń ba ǹ nɔ̃ ǹ-hã, mǝ̃̀ mãã wà ń ce dìí, nǝ̃ mǝ̃̀ fãngãtasǝrɩ̀ kárrá gàá nã mãã, nã́ã́ ǹ tǝ Dawudaw cíé-dǝ nĩĩgu mãã, mǝ̃̀ ji hã-n nǝ̃ biicin.»

15 Solmãnẃ fǝ̃ǝ̃ ǹ-nĩĩ, wù dãnsãndii yáá nĩĩgu. Wú fǝ̃ǝ̃ ǹ-ver ǹ-jo Serusalɛmgu, ǹ-juo hiraa Fɩraa-Dũnnũ twanɲũɔ̃kuruu'n yigagɩ nã. Wú jãn siimãã mãã bà ye-mã nǝ̃ yellɩ nã, nǝ̃ paaruu'n siimãã, nã̀ã ce bá hĩɛ̃ hĩɛ̃rgǝ̃ngããri ǹ-hã wù mããcieraaba.

16 Yuudagǝ, canããbà hǝ̃ǝ̃ldaba, bàá mãã bà suur bà hla bà hã bibyanããba, bá kãã jo yuuntigǝ̃ngãw nãã, ǹ-juo hiraa wù yigagɩ nã.

17 Wudiɛẃ waa wà: «Mǝ̃̀ tii, ce mǝ̃̀ kafal, cijal wáà, nǝ̃ mã́ã̀, yi nǝ̃ duugɩ dɩn nã-i, mǝ̃̀ húulá tãnkuurw wù tuɔra, duugɩ nã.

18 Bãnɲã siɛl gɩ̀ furũũgɩ nã, wùú yo, wú huu. Yi cɔ yì min-i, norii'n sɩraa nǝ̃-yáà duugɩ nã, cwa yì hǝ̃ǝ̃l hãmĩĩ dɩn-i dàa.

19 Yisuɔgu, cijal wáà biɛẁ náalá, nã̀ã wa wù mã́rrã́ wù drɔ.

20 Wú fǝ̃ǝ̃ ǹ-suro yisɔvũnvǝ̃ǝ̃gǝgu, ǹ-tuu mǝ̃̀ bíɛ́w mãã wù yáá mǝ̃̀ tuɔra, ǹ-kãã mǝ̃rǝ̃ǝ̃-yǝ ǹ-kuu wù hla, nã̀ã tuu wù byakulǝyǝw, ǹ-juo mǝ̃rǝ̃ǝ̃-yǝ ǹ-kuu mã́ã̀, nǝ̃ gɩ̀-lǝ gɩ̀ nã, mã́ã mãã ǹ mããcierw, mǝ̃n ba mǝ̃̀ yáá duɔsǝmmã nã.

21 Ciibǝǝ gúɔ̀ nã, mǝ̃́ suro wà mǝ̃ hã mǝ̃̀ biɛẃ ŋmãsã, ǹ-da-yǝ, wùu ku. Taagà jáa kaalaa, mǝ̃́ mǝ̃gaa ǹ-ne-yǝ, mǝ̃́ da-yǝ wà mã́ã byahuuyǝ sǝ.

22 Cijaldiɛ wáà waa wà: «Kwasǝ-i! Mã́ã biɛw-i nũmǝ̃nãw, yíi bíɛ́w kúú.» Nǝ̃ wuudĩɛ̃lẃ siɛ-yǝ wà: «Talalla! Yíi bíɛ́w kúú nǝ̃ mǝ̃n bíɛ́w ba nũmǝ̃nãw.» Bà yáá bà yii nnĩĩ-i yuuntigǝ̃ngã'n yigagɩ nã.

23 Solmãnẃ waa wà: «Wudiɛ wa: “Mǝ̃̀ biɛw-i nũmǝ̃nãw, yíi bíɛ́w kúú”, wudiɛ wáà wa: “Talalla! Yíi bíɛ́w kúú, mã́ã biɛw-i nũmǝ̃nãw.”»

24 Nã̀ã fǝ̃ǝ̃ ǹ-hã-ba nǝ̃-dǝ wà: «Jówà nǝ̃ dãngunãw ɲi ji hã-m.» Bá jo nǝ̃ dãngunãdiɛ yuuntigǝ̃ngã'n yigagɩ nã.

25 Gɩ̀-i, yuuntigǝ̃ngãẃ fǝ̃ǝ̃ ǹ-waa wa: «Táalà ɲí buruɔ tãnkuurw mãã nũmǝ̃nãw tiɛmã hǝ̃ǝ̃lmã, nǝ̃ ɲí hã-ba curo wo curo yiɛgɩ dɩngu.»

26 Gɩ̀-i, cijalw mãã wù bíɛ́ yáá nũmǝ̃nãw, wù bíɛ́'n hujãndɩ́ blǝ-yǝ wú waa nǝ̃ yuuntigǝ̃ngãw wà: «Eh! Mǝ̃̀ tii, hlã́ã̀-yǝ nǝ̃ tãnkuurw mãã nũmǝ̃nãw, bláà ko-yǝ.» Nǝ̃ wudiɛ wáà-lǝ wú ver ǹ-waa wà: «Táalà-yǝ! Wù síì ba mǝ̃n yo, wù síì ba yíi yo, ǹ yo.»

27 Gɩ̀-i, yuuntigǝ̃ngãẃ tuu cãwandi ǹ-waa wà: «Hlã́ã̀ wuudĩɛ̃lw nǝ̃ tãnkuurw mãã nũmǝ̃nãw, bláá ko-yǝ. Wù-lǝ wɩ̀-i wù ɲũw.»

28 Isɩrayɛl bluuba min bá nɔ̃ sugollii mãã yuuntigǝ̃ngãẁ járrá-dǝ dɩ̀ cɔ̃mmã nã, nã̀ã ba bà sɔ̃ wù nãã. Sulammã nã, bà yáá bàa ne ǹ-da wà wu yáá wù da Dũnnũ cɔ̃nfǝ̃ǝ̃gǝgu, wù jar sugolli nǝ̃ sũɔ̃lɩmmã.