Samiyɛl sɛbɛdĩɛ̃lw (1 Samuel) 16

Fɩraa-Dũnnũẃ fǝ̃ǝ̃ ǹ-waa nǝ̃ Samiyɛlw wà: «Ǹ ji kaal Sayul blaa'n kaaluugu ǹ-ga hiraa-gǝ bii bǝ̃ǝ̃-i? Mǝ̃̀ nǝ̃́nǝ̃́ǝ̃ wù nã, wu báa ji da ǹ-ba Isɩrayɛl bluu'n yuugɩ nã hlo. Dii nɔ̃mmã́ yu ǹ yendi, nǝ̃ ń suro ń maar! Mǝ̃̀ tĩɛ̃-n Betɩlehɛm lǝntabiɛ Jese kuugɩ nã, nã̀ã wa wù byanããba sǝ̃ǝ̃nã, mǝ̃̀ díɛ́ wùú mãã mǝ̃̀ caa wú ba yuuntigǝ̃ngãw.»

2 Samiyɛlẃ fǝ̃ǝ̃ ǹ-waa wà: «Mǝ̃n ji gbǝ̃ǝ̃ ǹ-kã tam hamã-i? Sayulẁ ji nɔ̃-dǝ, nã̀ã ko-m.» Fɩraa-Dũnnũẃ waa wà: «Ga blǝ nǝ̃ǝ̃blɩw ń kã nǝ̃-yǝ n ga waa wà n jo ǹ ji jãn siim-i ǹ hã Fɩraa-Dũnnũw.»

3 Ga jar Jesew Dũnnũjãnũũ gúɔ́ nã, mǝ̃̀ ga pɩgaa-n ń fǝ̃ǝ̃ ǹ diicerǝdi. Mǝ̃-ń ga pɩgaa-n nǝ̃ gùú tii mãã, ǹ ga tũn nɔ̃mmã wùú nã-i, ǹ-ce-yǝ yuuntigǝ̃ngãw ǹ-hã-m.

4 Fɩraa-Dũnnũẁ wáalá Samiyɛlẃ ce dìi, wú ce-dǝ. Wú suro ǹ-kã Betɩlehɛm lǝri. Lǝ'n vũnvãnããbá sɔ̃ ǹ-jǝ̃ǝ̃lǝ̃ǝ̃-yǝ nǝ̃ gbǝrsǝri ǹ-kãã yugu-yǝ wà: «Ǹ jollɩ̀ fla-ì?»

5 Wú siɛ-ba wà: «Ũwũũ, mǝ̃̀ jo mǝ̃̀ ji jãn siim-i mǝ̃̀ hã Fɩraa-Dũnnũw. Pérrà ɲì hla nã, nǝ̃ ɲí jo yí kã yi ga jãn siimã.» Wú ce Jesew bá nǝ̃ byanããba, bàá yo, bá kãã per bà hla nã, nã̀ã jar-ba Dũnnũjãnũũgɩ nã.

6 Bà gáa jãn wú da Eliyabɩw, wú ba wù waa nǝ̃ wù hla wà: «Dɩ̀ káaláa, Fɩraa-Dũnnũẁ níé ǹ-hiil wùú mãã ǹ-ce wú ba yuuntigǝ̃ngãw, wú nìɛ nhlíɛ̀ nã wù yigagɩ nã.»

7 Fɩraa-Dũnnũẃ fǝ̃ǝ̃ ǹ-waa nǝ̃ Samiyɛlw wà: «Báa ne wù yigagu, yindagǝ nã wù daamã, nã̀ã wa mǝ̃̀ hlárá-yǝ. Sulammã nã, Fɩraa-Dũnnũ nelli, nǝ̃ cwaa'n dǝllɩ̀ sǝ sùɔ́gɩ dɩn: cwaabà ne gùú mãã gùu saa yinɲã nã, nǝ̃ Fɩraa-Dũnnũ-lǝ, wú ba wù ne hiɛga.»

8 Jeseẃ fǝ̃ǝ̃ ǹ-be Abinãdabɩw, ǹ-ce wú juo ta Samiyɛl yigagɩ nã. Samiyɛlẃ waa wà: «Fɩraa-Dũnnũẁ sáa ne ǹ-hiil wáà yo wùú sǝ.»

9 Jeseẃ ce Sammãẃ kãã ta, Samiyɛlẃ waa wà: «Wùú yo, Fɩraa-Dũnnũẁ sáa ne ǹ-hiil wùú sǝ.»

10 Jeseẃ ce wù byanããba nã, nɩrhǝ̃ǝ̃lẃ ta Samiyɛl yigagɩ nã, Samiyɛlẃ waa nǝ̃-yǝ wà: «Fɩraa-Dũnnũẁ sáa ne ǹ-hiil wù dɩn yo, bà sǝ̃ǝ̃nã.»

11 Samiyɛlw nã̀ã fǝ̃ǝ̃ ǹ-waa nǝ̃ Jesew wà: «Ǹ byanããba min bà júó-ì?» Wú siɛ-yǝ wà: «Bà wuusaalẃ yanãã, nǝ̃ wú nàa wù cii tũmba nã.» Gɩ̀-i, Samiyɛlẃ fǝ̃ǝ̃ ǹ-waa nǝ̃ Jesew wà: «Tĩɛ̃ curoẃ kãã be wú jo, nã̀ã wa wu-ń ba wù sáa jo, yi síì jiraa.»

12 Jeseẃ fǝ̃ǝ̃ ǹ-tĩɛ̃ curoẃ kãã jo nǝ̃-yǝ. Wù yáá nǝ̃ kɩkǝmmã, wù yinɲã̀ fa, nǝ̃ wù yiga yo gɩ́ ba gɩ̀ fa. Fɩraa-Dũnnũẃ fǝ̃ǝ̃ ǹ-waa nǝ̃ Samiyɛlw wà: «Suro ń tũn nɔ̃mmã wù drɔ ń ce-yǝ yuuntigǝ̃ngãw, nã̀ã wa wù-lǝ wɩ̀-i.»

13 Samiyɛlẃ tuu nɔ̃m'n yendi, ǹ-juo tũn wù drɔ, wù ɲũũnãtaa'n yinɲã nã. Ǹ-tuu gɩ̀-lǝ gɩ̀ yuugɩ nã, nǝ̃ gɩ̀ furũũgɩ nã, Dũnnũ Yuflǝẃ juo ba Dawudaw nã. Samiyɛlẃ fǝ̃ǝ̃ ǹ-suro ǹ-ta Arɩmã lǝri.