Samiyɛl sɛbɛdĩɛ̃lw (1 Samuel) 17

Filisɩ yiɛntaabá kãã tɩgii bà byarcekurɔnɲã Soko lǝri, Suuda yiɛgu, nã̀ã kãã nǝ̃ǝ̃ bà kuɔyaga Efɛsɩ-Damimgu, Soko lǝri nǝ̃ Aseka lǝ'n sɔhlaagɩ nã.

2 Sayulw nǝ̃ Isɩrayɛl sɩrǝǝsɩba yo, bá tɩgii bà ɲĩɛ̃. Bá kãã nǝ̃ǝ̃ bà kuɔyaga Ela nɩgǝraagɩ nã, nã̀ã cǝ̃ǝ̃ byarcetɩntǝ̃lũnɲã ǹ-hiraa Filisɩ yiɛntaaba yuunã.

3 Filisɩ yiɛntaabà yáá tãnũũdaagɩ nã, nǝ̃ Isɩrayɛl bluubá ba bà yiganã yiɛ'n kuugɩ nã: nɩgǝraagùu buruɔ bà nã.

4 Sɩrǝǝsɩdiɛ, wùú mãã wù yiirìi hlǝ, wú juo hlǝ Filisɩ yiɛntaa'n kuɔyaga sǝ̃ǝ̃nã, ǹ-ba wù hɩr wù kuganãã byarcekurɔnɲã sǝ̃ǝ̃gɩ nã. Bà yáá bà be-yǝ wà Goliyatɩ, wù yáá wù hlǝ Gatɩ lǝ-i, nǝ̃ wù daamã́ ba nã́ã́ mɛtɩrba siɛl tuu-i.

5-6 Wù yáá wùu suu kwabyãr'n hucuugu wù yuugɩ nã, nã̀ã dii kwabyãr'n kuulaaw, bàa ce-yǝ nǝ̃ ciiga, wù dɩsɩmmã̀ yáá mã̀ ji hi culo gwasiɛlw (60). Wù yáá nǝ̃ kwabyãr'n lwanɲã, yà dii-ɲã wù vyanɲã nã, nã̀ã hĩɛ̃sã haagǝgu.

7 Wù haagǝ'n gbaa'n bũũmã̀ yáá nã́ã́ kuulaasɔ̃rããbaa mãã bà nũũ bà kuulasɔ̃ɲinɲã gùú daagɩ nã mãã, nǝ̃ kwal'n cũɔ̃gǝguu mãã gɩ̀ yáá gɩ̀ nũɔ̃gɩ nã, gɩ̀ dɩsɩmmã̀ yáá culo nɩrhǝ̃ǝ̃l-i. Wùú mãã wù yáá wùu tuu wù haacĩĩkuugu, wù yáá wù wáà wù yigagɩ nã.

8 Filisɩ yiɛntabiɛ wáà kãã hiraa, nã̀ã kaasǝ ǹ-waa nǝ̃ Isɩrayɛl sɩrǝǝsɩba kurɔnɲãã mãã ɲã̀ã cǝ̃ǝ̃ byarcetɩntǝ̃lũnɲã ǹ-hiraa wà: «Ɲi hlǝ́rá ǹ-juo cǝ̃ǝ̃ byarcetɩntǝ̃lũnɲã hamã nã-i? Mã́ã sǝ Filisɩ yiɛntabiɛw-i, nǝ̃ ɲimãã ba Sayul lwɛba-iì? Níyà ɲí hiil wudiɛẃ hɩr ǹ-jo mǝ̃̀ nãã!

9 Wu-ń ba wù ji gbǝ̃ǝ̃ ǹ-hi mǝ̃̀ nã, wú ko-m, yi ji ba ɲì lwɛba. Nǝ̃ mǝ̃-ń hi wù nã, nã̀ã ko-yǝ, ɲi ji ba yì lwɛba, ɲì ce mããcemmã ɲì hã-yáà.»

10 Filisɩ yiɛntabiɛw nã̀ã ver ǹ-waa hlo wà: «Mǝ̃̀ caa Isɩrayɛl bluu'n sɩrǝǝsɩba nǝ̃ cɔ̃mmã jimããgu: hlã́ã̀-m nǝ̃ bibiɛdiɛ, yí mũũ nǝ̃-yǝ yì min!»

11 Sayulw nǝ̃ Isɩrayɛl bluuba min, bà gáa ba bà nɔ̃ Filisɩ yiɛntabiɛ wáà cãwanĩɛ̃ga nã, gbǝrsǝrɩ́ blǝ-ba bá ba bà ɲãnãã.

12 Nǝ̃ Dawuda-lǝ, wù yáá Efrata yiɛntabiɛ mãã Betɩlehɛm lǝri Sude yiɛgu, bà be-yǝ Jese, wùú biɛ yáá. Gɩ̀ biɛw yáá nǝ̃ byanãã nɩrsiɛl-i. Sayul bǝ̃ǝ̃gu, biɛ wáà yáá wùu mǝ̃gaa ǹ-vǝ̃ǝ̃.

13 Jese byavũnvãnããba siɛlbà yáá bàa duu Sayulw nã byarcesuɔgɩ nã. Wù byanããba siɛlbaa mãã bà yáá bàa kã byarcesuɔgɩ nã, bà yiriɛga-i nnĩĩ nã: Eliyabɩw, wùú húulá dĩɛ̃lãmmã nã, bà hǝ̃ǝ̃lnãẃ ba Abinãdabɩw, nǝ̃ Sammãẃ ba bà siɛlnãw.

14 Dawudaẁ yáá wuusaalw, nǝ̃ vũnvãnããba siɛl báà bá duu Sayulw nã.

15 Nǝ̃ Dawuda-lǝ, wù yáá wu-ń ce wú ba wù wáà wù gbãllãã: wù kã wù dǝ̃ǝ̃ Sayulw, nã̀ã ba wù ver wù kã wù cii wù tǝ tũmba nã Betɩlehɛm lǝri.

16 Filisɩ yiɛntabiɛ wáà yáá wù kuganãã Isɩrayɛl bluuba nã, ciibǝǝgu nǝ̃ bahɛruugɩ nã, wù bla wù pɩgaa wù hla nã nǝ̃-ba nĩĩgɩ-i bãn gwaahǝ̃ǝ̃l kusuugɩ nã.

17 Jeseẃ waa nǝ̃ wù bíɛ́ Dawudaw wà: «Tuu bleciɛlyǝ wáà bɩgatĩɛ̃ nã nǝ̃ burbii nũɔ̃sɔ̃ wáà, ń sɔ̃ n ga hã ǹ vũnvãnããba, bà kúɔ́lɩ nã.

18 Tuu nɔ̃nɔ̃fiiyǝ'n bɩmbenĩɛ̃ nũɔ̃sɔ̃ wáà, n ga hã bà sɩrǝǝsɩba kurɔn'n yuuntiiw, ǹ ga da ǹ vũnvãnããba-ń ba dàa hinnǝ̃, nǝ̃ ń jo nǝ̃ kuu n ji hã-m, gùú mãã gɩ̀ pɩgaa wà cɔ̃m'n sɩraa bà nã.

19 Bá nàa nǝ̃ Sayulw nǝ̃ Isɩrayɛl bluuba min Ela nɩgǝraagɩ nã, bà ce byaari nǝ̃ Filisɩ yiɛntaaba.»

20 Dawudaẃ suro ciibǝpuruugu, ǹ-ya wù tũmbá ba nǝ̃ wanciindiɛ, ǹ-tuu wù wariɛga ǹ-ta, nã́ã́ Jeseẁ hlã-yǝ nǝ̃-dǝ nĩĩgu mãã. Wù gáa hi bà kuɔyaga gùú nã, byarcekurɔnɲã̀ yáá dàa ɲã̀ kã ɲã̀ cǝ̃ǝ̃ byarcetɩntǝ̃lũnɲã, nã̀ã ɲã̀ kaasǝ byarcekaasuugu.

21 Isɩrayɛl bluuba nǝ̃ Filisɩ yiɛntaabá juo cǝ̃ǝ̃ byarcetɩntǝ̃lũnɲã, bàa hiraa, bà ne bà ɲĩɛ̃.

22 Dawudaẁ yáá wù kã nǝ̃ gùú ɲinɲãã mãã, wú kãã hã wùú mãã wù cii wariɛga nã nǝ̃-ɲã, nã̀ã sɔ̃ ǹ-kã byarcekurɔn'n tɩntãlũnɲã nãã. Wù gáa yii ǹ-hi, wú yugu wù vũnvãnããba ǹ-ne ba-ń ba hinnǝ̃.

23 Wù bla cãwandɩ nã nǝ̃-ba, Filisɩ yiɛntabiɛ mãã wù hlǝ Gatɩ lǝri, bà be-yǝ wà Goliyatɩ, wú juo hlǝ bà bluuba sǝ̃ǝ̃nã, ǹ-ba wù kuganãã Isɩrayɛl bluu'n kurɔnɲã nã. Wú waa gùú cãwanĩɛ̃ga dɩnga-i, nã́ã́ wù mãã wù hi wù waa-ga nĩĩgu mãã. Dawudaẃ nɔ̃-ga.

24 Bà gáa da biɛ wáà, gbǝrsǝrɩ́ juo blǝ Isɩrayɛl bluubà min, bá ta kwarɩmmã.

25 Curo wo curoẃ ba wù waa wà: «Ɲi díɛ́ biɛ wáà-ì? Wù kúganã́ã ǹ-jo wù ji caa Isɩrayɛl bluuba-i nǝ̃ cɔ̃mmã. Gùú tiiw-ń ko-yǝ, yuuntigǝ̃ngãẁ ji suu wù nã nǝ̃ gbaasǝri, nã̀ã hã-yǝ nǝ̃ wù bisĩɛ̃w, nã̀ã hiil wù suɔntaa'n nũɔ̃gu nãn'n pãllɩ nã Isɩrayɛl yiɛgu.»

26 Dawudaẃ fǝ̃ǝ̃ ǹ-yugu bàá nǝ̃n yáá wù tuɔra wà: «Gùú tii mãã wù ko Filisɩ yiɛntabiɛ wáà, ǹ-hiil ciiri Isɩrayɛl yigagɩ nã, bà ji ce bii ǹ-hã gɩ̀ tiiw? Halǝmblǝ-i nǝ̃ Filisɩ yiɛntabiɛ wáà, blakor wáà, nǝ̃ wú juo ba wù tuuraa Nũmǝ̃nãtii-Dũnnũ byarcekurɔnɲã nã?»

27 Isɩrayɛl sɩrǝǝsɩbá ver ǹ-tu wù nã nǝ̃ gùú cãwanĩɛ̃ga dɩnga-i wà: «Gùú tii mãã wù ji ko biɛ wáà, bá ji ce dɩ̀-i ǹ-hã-yǝ.»

28 Dawuda vũnvũɔ̃ Eliyabɩẁ nṹɔ̃́ wù waa cɔ̃mmã nǝ̃ cwaa báà, wù hiɛgá mǝ̃gaa ǹ-dũ nǝ̃-yǝ. Wú waa wà: «Ǹ hɩ́rrǝ́ ǹ-jo níɛ́ nã wanĩĩ? Ǹ hlã halǝmblǝ-i nǝ̃ tũnkurɔbiigu jerkwaarɩ nã? Mǝ̃̀ fǝ̃́ǝ̃lã́ ǹ yircaagǝgu nǝ̃ ǹ hiɛ'n blasǝri. Ǹ hɩ́rrǝ́ ǹ jo ǹ ji ne byarciegǝ-i.»

29 Dawudaẃ siɛ-yǝ wà: «Mǝ̃̀ cíé bii? Mǝ̃̀ sǝ̃n saa mǝ̃́ waa cɔ̃m yo-ì?»

30 Wú ver wù furũũgu ǹ-hã-yǝ, nã̀ã yugu wudiɛ nǝ̃ gùú yugummã dɩnmã. Isɩrayɛl sɩrǝǝsɩbá siɛ-yǝ dĩɛ̃lãm tammã.

31 Bá nɔ̃ Dawuda cãwanĩɛ̃ga, bá kãã tu-ga ǹ-ja Sayulw, wú ce bá kã nǝ̃-yǝ wù nãã.

32 Dawudaẃ fǝ̃ǝ̃ ǹ-waa nǝ̃ Sayulw wà: «Curo báa ya wù cãndɩ́ karaa Filisɩ yiɛntabiɛ wáà cɔ̃mmã nã! Mã́ã mãã ǹ mããcierw, mǝ̃̀ ji kã yi ga mũũ nǝ̃-yǝ.»

33 Sayulẃ siɛ-yǝ wà: «Ǹ síì gbǝ̃ǝ̃ ǹ-kã ɲi ga mũũ nǝ̃ Filisɩ yiɛntabiɛ wáà. Tãnkuur-i nǝ̃-n, nǝ̃ wù-lǝ wú ba sɩrǝǝsɩw wù pũmpǝrsǝ'n bǝ̃ǝ̃gu dìi.»

34 Dawudaẃ waa nǝ̃ Sayulw wà: «Ǹ mããcierẁ yáá wù cii wù tǝ tũmba nã-i. Jaraw, yindagǝ nã kwasǝnkuugu bà be-gǝ wà ursɩ, wù yáá wu-ń jo wù ji hiil tũmblɩw dɩnw bà kuruɔgɩ nã,

35 mǝ̃̀ yáá mǝ̃̀ sɔ̃ ǹ-duu wù nã, ǹ-kãã mũũ-yǝ, nã̀ã ɲǝ̃ǝ̃ ǹ-hũɔ̃ tũmblɩw wù nũɔ̃gɩ nã. Nǝ̃ wu yáá wu-ń suro mǝ̃̀ yuunã, mǝ̃-ń ce mǝ̃́ blǝ-yǝ wù nǝhlɩgǝw nã, ǹ-mũũ-yǝ, nã̀ã ko-yǝ.

36 Ǹ mããcierẁ yáá wù ko jaraw nǝ̃ ursɩw nnĩĩ-i. Filisɩ yiɛntabiɛ wáà mãã wù sǝ wùu síì, wùú yo, wù dǝllɩ̀ ji ce nnĩĩ-i, nã̀ã wa wù tuuraa Nũmǝ̃nãtii-Dũnnũ sɩrǝǝsɩba kurɔnɲã nã.»

37 Dawudaẁ nã̀ã waa ǹ-pɛ nã wà: «Fɩraa-Dũnnũ híilá-m jara ɲicãnfuugǝgɩ nã nǝ̃ ursɩ viɛgɩ nã, wù ga hiil-m Filisɩ yiɛntabiɛ wáà yo wù nãkruɔgɩ nã.» Sayulẃ fǝ̃ǝ̃ ǹ-waa nǝ̃-yǝ wà: «Nnĩĩ-lǝ, maar! Fɩraa-Dũnnũẃ ba ǹ saa!»

38 Sayulẃ ce bá hã Dawudaw nǝ̃ wù hla'n byarcewariɛga, bá suu kwabyãr'n hucuugu ǹ-hã-yǝ, nã̀ã dii kwal'n kuulaaw ǹ-hã-yǝ.

39 Dawudaẃ hĩɛ̃sã Sayul dãngunã ǹ-piɛ kuulanãmba drɔ, nã̀ã wa wu wáà nǝ̃-ɲã ǹ-ne, ǹ-waa ǹ-ji naa. Wù sáá wùu mĩɛ̃ nǝ̃ gɩ̀ byarceɲinɲã, wú waa nǝ̃ Sayulw wà: «Mǝ̃̀ síì gbǝ̃ǝ̃ ǹ-waa nǝ̃ byarcewariɛ gáà, mǝ̃̀ sáa mĩɛ̃ nǝ̃-ga.» Nã̀ã fǝ̃ǝ̃ ǹ-hiil-ɲã ǹ-kra.

40 Wú tuu wù valuugu ǹ-fuɔ nã, nã̀ã kã jurjurw nã ǹ-kãã ne ǹ-hiil tɩntrãga ndiiga mlǝǝr mlǝǝr gà nã, ǹ-dii-ga wù wancen'n bɩgatĩɛ̃ nã, nǝ̃ wù jifa nã. Nã̀ã fǝ̃ǝ̃ ǹ-tuu wù kǝ̃ntǝ̃ǝ̃gǝgu wù nãkruɔgɩ nã ǹ-ba wù kuganãã Filisɩ yiɛntabiɛ nãã.

41 Filisɩ yiɛntabiɛẃ ba wù kuganãã Dawudaw nã fiyãã fiyãã, nǝ̃ wùú mãã wù yáá wùu fuɔ wù haacĩĩkuugɩ nã, wù-lǝ wú ba wù wáà wù yiganã yiɛgu.

42 Filisɩ yiɛntabiɛẃ ba wù ne Dawudaw, wù gáa da-yǝ, wù sáa ne wú ba kuu. Nã̀ã wa wù ne wú ba tãnkuurkɩkǝmnĩĩdiɛ, wù fa.

43 Wú waa nǝ̃ Dawudaw wà: «Mǝ̃̀ jáa ba vaa-i nǝ̃-m-ì, nǝ̃ ń ba ǹ jo mǝ̃̀ yuunã nǝ̃ valunɲã?» Nã̀ã fǝ̃ǝ̃ ǹ-cirǝ̃ǝ̃ wù dũnnũba nã, wà bá piɛ bà nãkrɔbɩblaagu Dawuda drɔ.

44 Nã̀ã waa ǹ-pɛ nã wà: «Jo mǝ̃̀ nãã mǝ̃ ji hã diɛrnɲinɲã nǝ̃ jerbɩganããba nǝ̃ ǹ kũɔ̃mã, bá wuu!»

45 Dawudaẃ waa nǝ̃ Filisɩ yiɛntabiɛw wà: «Ǹ jo mǝ̃̀ yuunã nǝ̃ dãngunãw, pugɔluɔgu nǝ̃ haagǝgu; mǝ̃n jo ǹ yuunã Fɩraa-Dũnnũ yiirɩ nã-i; Cuutiiw, nǝ̃ Isɩrayɛl bluu'n sɩrǝǝsɩba kurɔn'n Dũnnũw mãã ǹ túuráa wù nã wù yiirɩ nã.

46 Jimããgu, Fɩraa-Dũnnũẁ ji dii-n mǝ̃̀ nãkrɔnɲã nã. Mǝ̃̀ ji ko-n nã̀ã bǝr ǹ yuugu. Jimããgu, mǝ̃̀ hã drɔ diɛrnɲinɲã nǝ̃ jerbɩganããba nǝ̃ Filisɩ yiɛntaa'n sɩrǝǝsɩba pĩɛ̃nĩɛ̃ga. Gɩ̀-lǝ gɩ̀ nã ɲũũrũũgɩ min gɩ̀ ji fǝ̃ǝ̃ wà Isɩrayɛl bluubá nǝ̃ Dũnnũ,

47 nǝ̃ cwaa báà min, bà ji fǝ̃ǝ̃ wà Fɩraa-Dũnnũ sǝ̃n kor nǝ̃ dãngunã yindagǝ nã pugɔluɔ. Sulammã nã, Fɩraa-Dũnnũ-lǝ, wùú gbǝ̃́ǝ̃lã̀ nã, wù dii-ɲã́ã̀ yì nãkrɔnɲã nã.»

48 Filisɩ yiɛntabiɛẁ gáa ba wù kuganãã Dawudaw nã, Dawudaẃ nǝ̃ǝ̃ vyanɲã nã ǹ-ba wù sɔ̃ wù kã byarcejiraagɩ nã, wù jǝ̃ǝ̃lǝ̃ǝ̃ Filisɩ yiɛntabiɛ nã.

49 Dawudaẃ dii wù nãkruɔgu wù bɩgatĩɛ̃ nã, ǹ-hiil tɩntãndɩ dɩndi, ǹ-nǝ̃ǝ̃-dǝ nǝ̃ kǝ̃ntǝ̃ǝ̃gǝgu; dɩ́ kãã tuu Filisɩ yiɛntabiɛ'n sãnũũgu ǹ-jãn ǹ-ba gɩ̀ kusunã. Filisɩ yiɛntabiɛẃ duruu ǹ-curǝǝ.

50 Dawudaẁ gbǝ̃́ǝ̃lã́ Filisɩ yiɛntabiɛ nã nĩĩgɩ-i nǝ̃ kǝ̃ntǝ̃ǝ̃gǝgu nǝ̃ tɩntãndi; wù nǝ̃́ǝ̃lã́-yǝ, nã̀ã ko, wù sáá nǝ̃ dãngunã yo wù nãkruɔgɩ nã.

51 Wú sɔ̃ ǹ-kãã hiraa Filisɩ yiɛntabiɛ tuɔra, ǹ-tuu wù dãngunãw ǹ-ŋmǝ̃ǝ̃l-yǝ wù fuugǝgɩ nã. Wú faal-yǝ nã̀ã bǝr wù yuugu. Filisɩ yiɛntaabà gáa da wà bà kũnkonblaw kúú, bá du kwarɩmmã nã.

52 Isɩrayɛl bibyanããba nǝ̃ Suuda bɩgaabá suro, ǹ-ba bà kaasǝraa bà ɲǝ̃ǝ̃ bà duu bà nã fuwɔ nɩgǝraagɩ nã dìi, nǝ̃ Ekrɔ̃ lǝ'n dũndɔ̃lĩɛ̃ga nã dìi. Filisɩ yiɛntaabaa nǝ̃n yáá bàa kɔsuɔ nã́ã́ bá ji kurǝǝ-i, bá duruu hlũũgɩ nã mãã gɩ̀ hlǝ Sarayim lǝri, ǹ-kã fuwɔ Gatɩ lǝri nǝ̃ Ekrɔ̃ lǝri dìi.

53 Isɩrayɛl bluubá ya bà ɲǝ̃ǝ̃mã́ ba nã̀ã ver ǹ-jo Filisɩ yiɛntaabà yáá bàa nǝ̃ǝ̃ bà kuɔyaga gùú sùɔ́gu ǹ-juo ɲǝ̃ǝ̃ ǹ-hũɔ̃ bà ɲinɲã.

54 Dawudaẃ tuu Filisɩ yiɛntabiɛ'n yuugu ǹ-kã nǝ̃-gǝ Serusalɛmgu, nã̀ã kra wù byarcewariɛga nã wù kuɔblɩrɩ nã.

55 Sayulw yáá wùu da Dawudaẁ hɩr wù kã Filisɩ yiɛntabiɛ nãã, wù yáá wùu yugu wù sɩrǝǝsɩba yuuntii Abnɛrw wà: «Abnɛr, halii bíɛ́-i nǝ̃ biɛmpɩr wáà?» Abnɛrẁ yáá wùu siɛ-yǝ wà: «Yuuntigǝ̃ngã, mǝ̃̀ sáa fǝ̃ǝ̃!»

56 Gɩ̀-i yuuntigǝ̃ngãẃ waa nǝ̃-yǝ wà: «Yugurǝǝ ń fǝ̃ǝ̃ biɛmpɩr wáà mãã gùú tii'n bíɛ́w.»

57 Dawudaẁ gáa ko Filisɩ yiɛntabiɛw nã̀ã ver, Abnɛrẃ tuu ǹ-kã nǝ̃-yǝ Sayul yigagɩ nã, Dawudaw wùu fuɔ Filisɩ yiɛntabiɛ'n yuugɩ nã wù nãkruɔgɩ nã.

58 Sayulẃ yugu-yǝ wà: «Biɛmpɩr, halii bíɛ́-i nǝ̃-n?» Dawudaẃ siɛ-yǝ wà: «Ǹ mããcier Jesew mãã Betɩlehɛm lǝntabiɛw, wùú bíɛ́-i nǝ̃-m.»