Josué 1

Sosuwe sɛbɛw (Josué)

*** sélections particulières ***

Fɩraa-Dũnnũ mããcier Musa kúú'n furũũgɩ nã, Fɩraa-Dũnnũẃ waa nǝ̃ Nũnɩ bíɛ́ Sosuwe, Musa pyannãtiiw wà:

2 «Mǝ̃̀ mããcier Musaẁ kúú. Kuɔkuɔgu, suro, ń huɔl Surdɛ̃ lwaagu nǝ̃ coplǝr díɛ̀dɩ min, ń jãn nǝ̃-ba yiɛgɩ nã mãã mǝ̃̀ hã Isɩrayɛl bluuba nǝ̃-gǝ.

3 Ɲì viɛtragà mãã gà ga sa sùɔ́ wo sùɔ́, mǝ̃̀ hã-ɲã́ã̀ nǝ̃-gǝ nã́ã́ mǝ̃̀ wáalá-dǝ nǝ̃ Musaw nĩĩgu mãã.

4 Ɲì yiɛgɩ̀ ji tuu jerkwaarɩ nã nǝ̃ Libã yiɛgɩ nã ǹ-maar, fuwɔ Efratɩ lwaagɩ nã dìi, lwaagǝ̃ngããgu, Hitɩ nũɔ̃ntaa'n yiɛgɩ min, Baakɩnkan'n yiɛgu ǹ-maar bǝ̃ǝ̃'n jãnɩm'n yiɛgu.

5 Ǹ-ya ń ba nũmǝ̃nãw, curo'n síì gbǝ̃ǝ̃ ǹ-hiraa ǹ yigagɩ nã ǹ-kã ɲí da cɔ̃m nã. Mǝ̃̀ ji ba nǝ̃-n nã́ã́ mǝ̃̀ bla nǝ̃ Musaw nĩĩgu mãã. Mǝ̃̀ síì ver mǝ̃̀ furũũgu ǹ-hã-n, mǝ̃̀ síì nǝ̃nǝ̃ǝ̃ ǹ nã.

6 Dii kɩkǝmmã ǹ hla nã, nǝ̃ ń ba nǝ̃ hyagbǝ̃ngbãndi, nã̀ã wa mǝ̃̀ wáasǝ́ mǝ̃̀ nũɔ̃gu nǝ̃ coplǝr díɛ̀dɩ tǝvũnvãnããba wà mǝ̃ ji hã-ba nǝ̃ gùú yiɛguu mãã, yíǹ-lǝ yíi ji dii-gǝ bà nãkruɔgɩ nã.

7 Yíi dii kɩkǝmmã ǹ hla nã, nǝ̃ ń mǝ̃gaa ń ba nǝ̃ hyagbǝ̃ngbãndi dugɔ ǹ wáà ǹ vaa nǝ̃ hlũũgɩ minw mãã mǝ̃̀ mããcier Musaẁ kárrá gɩ̀ nã. Báa nǝ̃nǝ̃ǝ̃ hlũũgɩ nã ń kã nãdĩĩyiɛ, yindagǝ nã ɲiɲũɔ̃yiɛ, gɩ̀-lǝ gɩ̀ nã, nǝ̃-ń ta haa yiɛ haa yiɛ wo, ǹ cɔ̃mmã̀ fa-i.

8 Báa ya Musa hlũũ'n sɛbɛ wáà hal ǹ nũɔ̃gɩ nã! Ji ba ǹ ver ǹ kal-yǝ yisuɔ nǝ̃ bǝ̃ǝ̃nã, ǹ-ji da ǹ-ba wáà ǹ vaa nǝ̃ kuu wo kuu mãã gɩ̀ yállá gɩ̀ kusunã. Gɩ̀-lǝ gɩ̀ nã, ǹ mãã ǹ ji dii ǹ nãkruɔgu cɔ̃m wo cɔ̃m nã, ǹ fǝ̃ǝ̃ mã̀ cel'n tammã-i, mã̀ fa ǹ saa-i.

9 Mǝ̃̀ sáa kra dɩ̀ nã ǹ-hã-n mǝ̃́ wa bá nǝ̃ kɩkǝmmã nǝ̃ ń ba hyagbǝ̃ngbãndɩ-ì? Báa sɔ̃ cɔ̃m nã, báa ya ǹ hiɛgá yuɔ. Nã̀ã wa, ǹ ji ba nǝ̃-n ta sùɔ́ wo sùɔ́, Fɩraa-Dũnnũw, ǹ Dũnnũw, wù ji ba nǝ̃-n.»

10 Sosuweẃ fǝ̃ǝ̃ ǹ-kra dɩ̀ nã ǹ-hã Musa hlũũ'n yuntaabaa mãã cwaa'n yuugɩ nã,

11 wà bá ta ǹ-hlǝ kuɔyaga min nã, ǹ-ga kra dɩ̀ nã ǹ-hã cwaaba wà: «Tɩ́gɩnǝ̃̀ǝ̃ ɲì wuriɛga nã, nã̀ã wa bãnɲã siɛl kusuugɩ nã, ɲi ji huɔl Surdɛ̃ lwaagu, ǹ-kãã ɲǝ̃ǝ̃ ǹ-hũɔ̃ gùú yiɛguu mãã Fɩraa-Dũnnũw, ɲì Dũnnũẁ hã-ɲã́ã̀ nǝ̃-gǝ.»