Deteronɔm (Deutéronome) 34

Musa kúúcɔ̃mmã

Musaẃ yuguraa ǹ-kã Pisɩga tãnũũ'n yuugɩ nã, Nebo tãnũnɲã sǝ̃ǝ̃nã Mohabɩ yiɛ'n curommã nã, Seriko lǝ'n yigagɩ nã. Fɩraa-Dũnnũẃ fǝ̃ǝ̃ ǹ-pɩgaa-yǝ nǝ̃ lǝ díɛ̀dɩ min: Ǹ-tuu Galaadɩgɩ nã ǹ-ga kra Danɩgɩ nã,

2 Nɛfɩtaligɩ min nǝ̃ Efrayim yiɛgu nǝ̃ Mãnãse yiɛgu, Suuda yiɛgɩ min ǹ-ga kra bǝ̃ǝ̃'n jãnɩm'n yiɛ'n lwaakɩnkandɩ nã,

3 Kãllĩɛ̃'n Lǝrii mãã bà be-dǝ wà Seriko lǝ, dɩ̀-lǝ dɩ̀ nã, Negɛvɩgu, Surdɛ̃ jũɔ̃'n nũɔ̃gɩ nã, ǹ-maar ǹ-ga hi Suwar lǝri.

4 Fɩraa-Dũnnũẃ fǝ̃ǝ̃ ǹ-waa nǝ̃-yǝ wà: «Yiɛ gúɔ̀-i mǝ̃̀ wáasǝ́ mǝ̃̀ hla'n nũɔ̃'n drɔ, ǹ-pã mǝ̃̀ nũɔ̃gu nǝ̃ Ibramãw, Isiyagaw nǝ̃ Yakubaw mǝ̃́ wa mǝ̃ ji hã bà furũntaaba nǝ̃-gǝ. Mǝ̃̀ yíɛ́ ń da-gǝ nǝ̃ ǹ yinɲã, nǝ̃ ǹ síì da ǹ-jãn gɩ̀ nã.»

5 Fɩraa-Dũnnũ mããcierhuhoryǝ Musaẁ kúú gùú sùɔ́gɩ-i, Mohabɩ yiɛgu, ǹ-vaa nǝ̃ Fɩraa-Dũnnũẁ yáá wùu waa-dǝ nĩĩgu mãã.

6 Wù díilá-yǝ Mohabɩ yiɛ'n jũɔ̃gɩ nã-i, gùú sùɔ́guu mãã gùú vĩĩ sùɔ́guu mãã bà be-gǝ wà Betɩ-Pewɔr. Ǹ-ji vaa nǝ̃ jimããgu, curo'n sǝ̃n fǝ̃ǝ̃ wù furuu'n sùɔ́gu.

7 Musa kúúgɩ nã, wù yáá nǝ̃ bii gundii nǝ̃ bii gur-i, nǝ̃ wù yáá wù daraa lɩgǝlɩgǝ, nã̀ã ba nǝ̃ wù pyãlũũ yo kuu'n sáa hlǝ gɩ̀ nã.

8 Isɩrayɛl bluubá kaal Musa kaaluugu, wù blaa'n yun bãn gur nǝ̃ nũɔ̃sɔ̃ kusuugɩ nã Mohabɩ curommã nã fuwɔ ǹ-ji da Musa kúú'n kaluu'n yunɲã́ ji suu.

9 Nũnɩ bíɛ́ Sosuweẁ, Dũnnũẁ yáá wùu fɩr wù kusuugu nǝ̃-yǝ nã̀ã hã-yǝ nǝ̃ cɔ̃nfǝ̃ǝ̃gǝgu dugɔ, nã̀ã wa Musaẁ yáá wùu piɛ wù nãkrɔnɲã wù drɔ. Isɩrayɛl bluubà yáá bà nɔ̃ bà hã-yǝ bà ce bà gaaciegà min ǹ-vaa nǝ̃ Fɩraa-Dũnnũẁ yáá wùu kra dìí nã mãã ǹ-hã Musaw.

10 Isɩrayɛlgu, Dũnnũ tanhiildiɛẁ sáa suro Musa tammã, nã̀ã wù-lǝ Fɩraa-Dũnnũẁ yáá wù waa cɔ̃mmã nǝ̃-yǝ gbaa.

11 Wù tĩ́ɛ̃lã́ wɩ̀-i wú kãã ce cɔ̃m mã̀ã́ mãã mã̀ pɩgaa Dũnnũ fãngããgu, nǝ̃ cɔ̃nnorɩmmã Misɩra yiɛgu, Misɩrayuuntigǝ̃gãw nã, wù mããcieraaba nã nǝ̃ Misɩra yiɛntaabà min nã.

12 Gɩ̀-lǝ gùú Musaw cíé gaacegǝ̃ngĩɛ̃gaa mãã gà ce gbǝrsǝri nǝ̃ fãngããgu Isɩrayɛl bluu'n yinɲã nã.