Josué 2

Nũnɩ bíɛ́ Sosuweẃ ŋmã ǹ-ce ŋmãndǝ̃ǝ̃taaba hǝ̃ǝ̃lbá hlǝ Sitimǝ̃gu, ǹ-waa nǝ̃-ba wà: «Máarà ɲi ga waaraa ɲí ne yiɛ gúɔ̀, mǝ̃́garà ɲí ne Seriko lǝri.» Bá fǝ̃ǝ̃ ǹ-ta ǹ-kãã cɔ cijalw mãã wù suur wù hla wù hã bibyanããba wù suɔgu, bà be cijal wáà wà Arhabɩ.

2 Cwaabá kãã waa nǝ̃ Seriko lǝ'n yuuntigǝ̃ngãw wà: «Isɩrayɛl bluubà júó nhlíɛ̀ nã, yisuɔ gúɔ̀ nã, bà jo bà ji waaraa bà ne yì yiɛgu.»

3 Seriko lǝ'n yuuntigǝ̃ngãẃ tĩɛ̃ bá kãã waa nǝ̃ Arhabɩw wà: «Gùú bluubaa mãã bà júó ǹ nãã, ǹ-juo jãn ǹ duugɩ nã, hiil bá jo. Nã̀ã wa bà júó bà waaraa bà ne yiɛ-i.»

4 Cijalẃ fǝ̃ǝ̃ ǹ-blǝ ǹ-ŋmǝ̃ǝ̃rǝ̃ǝ̃ cwaaba hǝ̃ǝ̃l báá nã, nã̀ã juo waa nǝ̃-ba wà: «Sulam-i, bluu báàbà júó mǝ̃̀ nãã, nǝ̃ mǝ̃n sáa mǝ̃̀ fǝ̃ǝ̃ bà wanhlǝm'n sùɔ́.

5 Nǝ̃ taagà jáa ba gà cu, bá ba bà jo bà ji suu lǝ'n fieri, bá hlǝ ǹ-ta. Mǝ̃̀ sáa fǝ̃ǝ̃ bà tíɛ́ gùú sùɔ́. Ɲi-ń wa ɲi ɲǝ̃ǝ̃ ǹ-duu bà nã ɲì gbɩraanã, ɲi ga wa hi-ba hlũũgɩ nã.»

6 Wù yáá wùu ce ŋmãndǝ̃ǝ̃taabá yugo duu'n yuugu nã̀ã ŋmǝ̃ǝ̃rǝ̃ǝ̃ bà nã lɛ̃tragaa mãã wù yáá wùu mǝ̃gaa-ga ǹ-kra gà sǝ̃ǝ̃nã.

7 Bluu báàbá ta nǝ̃ hlũũguu mãã gɩ̀ kã Surdɛ̃ wanhuɔlw nã, ǹ-ba bà ɲǝ̃ǝ̃ bà duu bà nã. Bà tal'n furũũgɩ nã, bá fǝ̃ǝ̃ ǹ-suu fieri.

8 Ŋmãndǝ̃ǝ̃taabà jáa wa ba ji mǝ̃rǝ̃ǝ̃, Arhabɩẃ yugo ǹ-duu bà nã duu'n yuugɩ nã.

9 Wú kãã waa nǝ̃-ba wà: «Mǝ̃̀ fǝ̃́ǝ̃lã́ dɩ̀ nã, wà Fɩraa-Dũnnũw hlã-ɲã́ã̀ nǝ̃ yiɛ gúɔ̀. Ɲi ce gbǝrsǝri ǹ-car, ɲì gbǝrsǝrɩ̀ blǝ́rá-yáà nǝ̃ yiɛ gúɔ̀gɩ yiɛntaaba min bà ɲãnãã nǝ̃ ɲãnãmmã nã ɲì yigagɩ nã.

10 Sulammã nã, Fɩraa-Dũnnũẁ búrúɔ hyãbii'n lwaakɩnkandɩ nã nĩĩguu mãã ǹ-hã-ɲã́ã̀ ɲì hlǝmmã nã Misɩra yiɛgu, nǝ̃ ɲi cíé Amoritɩ nũɔ̃'n yuntaagǝ̃ngĩɛ̃ba hǝ̃ǝ̃lbaa mãã Surdɛ̃ huɔlɩmmã nã Sihɔ̃ba nǝ̃ Ɔgɩw nǝ̃ dìi, ǹ-guu-ba nã, yi nṹɔ̃́-dǝ.

11 Dɩ̀ nɔ̃llɩ nã, yì hiɛgá juo yuɔ, yí juo ba yì fiisa yì tar ɲì yigagɩ nã, nã̀ã wa Fɩraa-Dũnnũw-i, ɲì Dũnnũw, wùú mãã Dũnnũẁ drɔgu, drɔkuɔl nã, nã̀ã ba ɲũũrũũgɩ nã hlɔ̃mmã drɔ.

12 Nǝ̃ yindiɛ, mǝ̃̀ cirǝ̃ǝ̃ ɲì nãã, wáasǝ̀ Fɩraa-Dũnnũw, wà mǝ̃ cíé-ɲã́ã̀ nǝ̃ gùú kusufɩnfaagu, wà ɲi ji ce mǝ̃̀ suɔntaaba nǝ̃ gùú kusufɩnfaagɩ dɩngɩ-i. Cíyà mǝ̃́ hũɔ̃ dɩ́ kaalaa wà

13 ɲi ji ya mǝ̃̀ tǝw, mǝ̃̀ ɲũw, mǝ̃̀ tǝ̃ǝ̃ba, mǝ̃̀ nãndanããba nǝ̃ bà bɩgaaba min bá ba nũmǝ̃nãw, nǝ̃ wà ɲi ji kor-yáà kúúgɩ nã.»

14 Bluu báàbá fǝ̃ǝ̃ ǹ-siɛ-yǝ wà: «Nǝ̃-ń ba ǹ sáa pisɩrĩɛ̃ dìí mãã dìɛ ǹ-kã yì yiɛgu, yi waasǝ-dǝ yì hla'n yunɲã nã-i. Nǝ̃ Fɩraa-Dũnnũw-ń ji hã-yáà nǝ̃ yiɛ gúɔ̀ gùú nã, yi ji blǝ-n nǝ̃ kusufɩnfaagu, nǝ̃ sũɔ̃lɩmmã.»

15 Wú ce bá hlǝ flãntiɛrw nã, ǹ-hɩr nǝ̃ ɲĩĩnǝ̃ǝ̃w, nã̀ã wa wù duugɩ yáá lǝ'n dofũũli drɔ-i.

16 Wú fǝ̃ǝ̃ ǹ-waa nǝ̃-ba wà: «Tíyà tãnũũ'n yiɛgu, nã̀ã wa ɲi ga jal nǝ̃ bàá mãã bà ɲǝ̃ǝ̃ bà duu ɲì nã. Bláà dàa ŋmǝ̃ǝ̃rǝ̃mmã nã gɩ̀ sùɔ́gɩ nã ǹ-ji da bãnɲã siɛlɲã, fuwɔ ba ga ver ǹ-jo. Gɩ̀ furũũgɩ nã-i ɲi ga gbǝ̃ǝ̃ ǹ-car nǝ̃ ɲì hlũũgu.»

17 Bluu báàbá fǝ̃ǝ̃ ǹ-waa nǝ̃-yǝ wà: «Ǹ cíé yí waasǝ gùú waasǝmmãã mãã, yi mãã yì ji hiil-mã yì sǝ̃ǝ̃gɩ nã nĩĩguu mãã, gɩ̀-i nnĩĩ nã:

18 Yì jãnɩmmã nã lǝ'n kusuugɩ nã, vaa ɲĩĩnǝ̃ǝ̃blɩbumbɛ̃mãr díɛ̀, ǹ cíé yí hlǝ gùú flãntiɛrw nã, nǝ̃ ń tɩgii ǹ tǝw, ǹ ɲũw, ǹ cwanããba nǝ̃ ǹ suɔntaaba min duugɩ nã.

19 Bà sǝ̃ǝ̃nã, wùú nǝ̃n maa ǹ duu'n dũndɔ̃lli, wù twammã̀ ji tũnũũ wù yuugɩ nã, nǝ̃ dɩ̀-lǝ hãmĩĩ nũɔ̃'n sɩraa. Nǝ̃ bàá mãã bà ga ba nǝ̃-n duu'n kusuugɩ nã, ba-ń haar bà nãkruɔgu ǹ-jĩɛ̃ curo nã bà sǝ̃ǝ̃nã tam wo tam, dɩ̀-lǝ bà twammã tũnũmmã ji ba yì yuunã tuul-i.

20 Nǝ̃, nǝ̃-ń pisɩrĩɛ̃ dìí mãã dìɛ ǹ-kã yì yiɛgu, ǹ cíé yí waasǝ gùú waasǝmmãã hãmĩĩ vyanɲã hlǝ́rá mã̀ nã-i.»

21 Wú siɛ-ba wà: «Dɩ́ ce nã́ã́ ɲi wáalá-dǝ nĩĩguu mãã.» Wú fǝ̃ǝ̃ ǹ-hal bà nãã bá fǝ̃ǝ̃ ǹ-ta. Wú kãã vaa ɲĩĩnǝ̃ǝ̃blɩbumbɛ̃mããri flãntiɛrw nã.

22 Bá fǝ̃ǝ̃ ǹ-ta ǹ-kãã hi tãnũũgɩ nã, bá ba dàa ǹ-ce bãnɲã siɛl fuwɔ bàá nǝ̃n yáá bà ɲǝ̃ǝ̃ bà duu bà nã, ba ga ver ǹ-kũũ. Bàá nǝ̃n yáá bà ɲǝ̃ǝ̃ bà duu bà nã, bá caaraa bà nã yiɛ gúɔ̀gɩ min nã ǹ-ji naa, bà sáa da-ba.

23 Cwaaba hǝ̃ǝ̃l báàbá fǝ̃ǝ̃ ǹ-ver ǹ-hɩr tãnũũgu ǹ-huɔl Surdɛ̃ lwaagu. Bá fǝ̃ǝ̃ ǹ-jo Nũnɩ bíɛ́ Sosuwe nãã, ǹ-juo taa cɔ̃m wo cɔ̃m mãã mã̀ híí-ba.

24 Bá waa nǝ̃-yǝ wa: «Dɩ̀ káaláa Fɩraa-Dũnnũẁ díilá yiɛ gúɔ̀gɩ min yì nãkruɔgɩ nã, halle yiɛ gúɔ̀gɩ taaba min bà ɲãnãã nǝ̃ ɲãnãmmã nã-i yì yigagɩ nã.»