Jalli (Nombres) 20

Isɩrayɛl bluu'n kuruɔ gúɔ̀gɩ min, bá kãã hi Tɩsin jerkwaarɩ nã blɩ'n hiradĩɛ̃lããgɩ nã. Bà fǝ̃ǝ̃ ǹ-kãã jiraa sùɔ́dagǝ nã bà be-gǝ wà Kadɛsɩ. Miriyamẁ kúú gùú sùɔ́gɩ-i bá dii-yǝ.

2 Cokuruɔ gúɔ̀gɩ́ kãã ba, bà sáa ga ba bà ga da hũmmã sùɔ́ gúɔ́ nã. Gɩ̀-i, bá fǝ̃ǝ̃ ǹ-suro Musaba nǝ̃ Arɩnãw yuunã, ǹ-kãã tɩgii ǹ-cal ba nã.

3 Bá kãã ba bà jã Musaw nǝ̃ byaari wà: «Gúɔ̀-lǝ, yi nã́ã̀ ba yìi kurǝǝ gùú nã mãã Dũnnũẁ kúó yì cwanããba gùú yáá gùú buɔ nã!

4 Ɲã́ júó nǝ̃ Fɩraa-Dũnnũ bluu hãmĩĩ jerkwaar díɛ́ nã wanĩĩ? Yi da ǹ-kurǝǝ nǝ̃ yì kwasǝnɲin'n kurɔnɲã-i?

5 Ɲi cíé yí hlǝ Misɩra yiɛgu ǹ-jo nǝ̃-yáà sɔbɩblaa gúɔ̀ nã wanĩĩ? Kuu'n síì gbǝ̃ǝ̃ ǹ-dũũ, fiigietuu'n sɩriɛ, viiɲɩtuu'n sɩriɛ, tubituuguu mãã bà be-gǝ wà grɩnadɩtuu gùú yo gɩ̀ sɩriɛ, nǝ̃ halle hũnɲũɔ̃m yo mã̀ sɩriɛ.»

6 Musaba nǝ̃ Arɩnãẁ, bá ta ǹ-hiilaa Isɩrayɛl bluu'n kuruɔ gúɔ̀ tuɔra. Bà gáa hi Dũnnũ bũũkuɔl'n dũndɔ̃lɩ nã, bá duruu ǹ-curǝǝ. Dũnnũ yuuntasǝ'n gbɩgbaamã́ fǝ̃ǝ̃ ǹ-hillaa bà nã.

7 Fɩraa-Dũnnũẃ fǝ̃ǝ̃ ǹ-waa nǝ̃ Musaẁ wà:

8 «Tuu ǹ valblɩri, ɲi nǝ̃ ǹ vũnvũɔ̃ Arɩnãẁ, ń tɩgii Isɩrayɛl bluuba. Ɲi ga waa cɔ̃mmã nǝ̃ tɩntaluugu gɩ̀ sùɔ́gɩ nã bà yinɲã nã, gɩ̀ ga hiil hũmmã. Ǹ ga ce hũmmã́ juu ǹ-hlǝ tɩntaluugɩ nã ǹ-ja-ba, ǹ-hã Isɩrayɛl bluubá ɲũɔ̃ nǝ̃ bà kwasǝnɲin'n krɔnɲã!»

9 Musaẃ jãn ǹ-tuu wù valblɩri Dũnnũ bũũkuɔlɩ nã nã́ã́ Fɩraa-Dũnnũ wáalá-dǝ nnĩĩgu mãã.

10 Musaba nǝ̃ Arɩnãẁ, bá kãã tɩgii Isɩrayɛl bluuba tɩntaluu gúɔ̀ nã. Musaẃ fǝ̃ǝ̃ ǹ-waa nǝ̃-ba wà: «Ɲimãã mãã ɲĩ̀ĩ suro ǹ-hla ɲì hla nã, nṹwã̀ ɲí hã-m! Nã́ã́ yi ji gbǝ̃ǝ̃ ǹ-ce hũmmã́ juu ǹ-hlǝ tɩntaluu gúɔ̀ nã ǹ-hã ɲã́ã̀-i?»

11 Musaw nã̀ã fǝ̃ǝ̃ ǹ-haar wù valbɩri ǹ-mũũ tɩntaluu gúɔ̀ yinhǝ̃ǝ̃lgu, hũmmã́ hlǝ piyɛ̃, Isɩrayɛl bluubá ɲũɔ̃ nǝ̃ bà kwasǝnɲinɲã min.

12 Gɩ̀-i, Fɩraa-Dũnnũẃ fǝ̃ǝ̃ ǹ-waa nǝ̃ Musaba nǝ̃ Arɩnãw wà: «Ɲi sáa hũɔ̃ ǹ-piɛ ɲì nãkruɔgu mǝ̃n nã, ǹ-pɩgaa ǹ-ja Isɩrayɛl bluubaa wà mã́ã-i Dũnnũhuhoryǝw, ɲimãã síì ta bà yigagɩ nã ǹ-kã nǝ̃-ba gùú yiɛgɩ nã mãã mǝ̃̀ ji hã-ba nǝ̃-gǝ.»

13 Cwaabà ja gùú sùɔ́gɩ-i wà Meriba hũnnaalw. Gɩ̀ yuugɩ-i wà byar'n hũnnaalw. Sulammã nã, Isɩrayɛl bluubà cáalá Fɩraa-Dũnnũw nǝ̃ byaari gùú sùɔ́gɩ-i, nǝ̃ wú pɩgaa ǹ-ja-ba wà wɩ̀-i Dũnnũhuhoryǝw.