Jalli (Nombres) 14

Gùú nã-i Isɩrayɛl bluu'n kuruɔ gúɔ̀gɩ min, bá nǝ̃ǝ̃ kɔ̃mɔ̃nɲã nã, ǹ-ce yisɔkukuuguu kaaluugɩ nã.

2 Bà min bá suro Musaba nǝ̃ Arɩnãw yuunã, ǹ-ba bà waa nǝ̃-ba wà: «Aah biɛ gúɔ̀-lǝ, yi nã́ã́ ba yìi kurǝǝ Misɩra yiɛgu, yindagǝ nã jerkwaar díɛ́ nã, gùú yáá gùu buɔ nã.

3 Fɩraa-Dũnnũẁ cállá ǹ-jo nǝ̃-yáà lǝ díɛ́ nã wanĩĩ? Dɩ̀ káaláa wà yi ga kurǝǝ byarcesuɔgɩ nã-i. Bà ga tuu yì canããba nǝ̃ yì tãnkuuraaba. Nǝ̃ yi-ń ver ǹ-maar Misɩra yiɛgu, nã́ã́ gùú sáá gɩ̀ ji buɔ yì nã-i?»

4 Nã̀ã fǝ̃ǝ̃ ǹ-ba bà waa nǝ̃ bà ɲĩɛ̃ wà: «Yáalà yí ne yí hiil yuuntiidiɛ nã, yí ver yí maar Misɩra yiɛgu hlo.»

5 Musaba nǝ̃ Arɩnãw, bá juo duruu ǹ-curǝǝ Isɩrayɛl bluu'n kuruɔ gúɔ̀ min yigagɩ nã.

6 Nǝ̃ gùú cwaaba nã mãã bà yáá bàa kãã ŋmã ǹ-dǝ̃́ǝ̃̀ Kãnãã yiɛgu, bà-lǝ sǝ̃ǝ̃nã, cɔ̃m mã́ã̀mã́ gaala cwaaba hǝ̃ǝ̃l hiɛ nã, fuwɔ ǹ-ce bá fa ǹ-taalaa bà kuulanãmba nã. Bà-lǝ bà-i Nũnɩ bíɛ́ Sosuwe bá nǝ̃ Yefũnɩ bíɛ́ Kalɛbɩw.

7 Bá fǝ̃ǝ̃ ǹ-waa nǝ̃ cokuruɔ gúɔ̀ wà: «Yí kã́ã́ ǹ-ga ŋmã ǹ-dǝ̃́ǝ̃̀ gùú yiɛguu mãã, gɩ̀ fa ǹ-car!

8 Yiɛ gúɔ̀gɩ nã ɲi ga ba salli dɩn nã-i, nǝ̃ ɲããvaluu yo gɩ̀ sɩga ca ɲì nã. Fɩraa-Dũnnũw-ń ba dàa wù caa yì faagu, wù ji cal ǹ-kã nǝ̃-yáà yiɛ gúɔ̀ nã, ǹ-ga hã-yáà nǝ̃-gǝ.

9 Nǝ̃ bláá suro Fɩraa-Dũnnũw yuunã. Bláá sɔ̃ yiɛ gúɔ̀gɩ̀ cwaaba nã. Bà kiibà bǝ̃́ǝ̃lǝ̃́ǝ̃ bà saa, nǝ̃ hãmĩĩ-lǝ, Fɩraa-Dũnnũẃ nìɛ nǝ̃-yáà. Yi ga kãã mũũ ǹ-kaaraa bà nã yindiingu. Bláá sɔ̃ ba nã!»

10 Isɩrayɛl bluu'n kuruɔ gúɔ̀gɩ min bá fǝ̃ǝ̃ ǹ-ba bà waa wà bá ya bá tuu tɩntrãga ǹ-nǝ̃ǝ̃ ǹ-ko Sosuweba nǝ̃ Kalɛbɩw. Fɩraa-Dũnnũ yuuntasǝ'n gbɩgbaamã́ paa ǹ-juo hillaa bà nã Dũnnũ bũũkuɔli drɔ.

11 Fɩraa-Dũnnũẃ waa nǝ̃ Musaw wà: «Bluu báàbà ji hla mǝ̃̀ cɔ̃mmã fuwɔ ǹ-ga hi bǝ̃ǝ̃ hagɩ-i. Bà ji hla bà síì hũɔ̃ ǹ-piɛ bà nãkruɔgu mǝ̃̀ nã fuwɔ ǹ-ga hi bǝ̃ǝ̃ hagɩ-i, nã̀ã da mǝ̃̀ cíé cɔ̃nnuromcin mã̀ã́ mãã mã̀ pɩgaa mǝ̃̀ fãngããgu bà sǝ̃ǝ̃nã.

12 Mǝ̃̀ ga juo mũũ ǹ-suu bà nã nǝ̃ nardiɛ ǹ-guu bà nã. Nǝ̃ yíǹ-lǝ, mǝ̃̀ ji ce coplǝrdarǝ dɩ́ hlǝ yíi nã-i, dìí mãã dɩ̀ ji ba diigǝ̃ngããri nã̀ã ba nǝ̃ fãngããgu ǹ-ɲǝ̃ǝ̃ Isɩrayɛl bluuba.»

13 Musaẃ siɛ Fɩraa-Dũnnũw wà: «Misɩra yiɛntaabà fǝ̃́ǝ̃lã́ wà ń híilá cwaa báàbà yiɛgu nǝ̃ ǹ fãngãã-i.

14 Bà táalá-dǝ ǹ-ja yiɛ gúɔ̀gɩ̀ cwaabà. Kanãã yiɛntaabà nṹɔ̃́ wà yíi Fɩraa-Dũnnũ, ń nìɛ ǹ bluuba sǝ̃ǝ̃nã, wà nǝ̃-n ce ń pɩgaa ǹ hla gbaa ǹ-ja-ba. Bà nṹɔ̃́ wà yíi cíilá bà nã, nã̀ã wa nǝ̃-n ce ń ta bà yigagɩ nã bǝ̃ǝ̃nãgu yiiluudagǝ kusunã, yisuɔgu ń ba dǝ̃mpirdarǝ sǝ̃ǝ̃nã.

15 Nǝ̃ yindiɛ, nǝ̃-ń ko ǹ-guu ǹ bluuba nã yindiingu, bàá mãã bà nṹɔ̃́ ǹ gaaciega nã, bà ji ba bà waa ǹ cɔ̃mmã wà:

16 Fɩraa-Dũnnũẁ sáa ji ba wù ji gbǝ̃ǝ̃ ǹ-kã nǝ̃ wù bluubaa gùú yiɛgɩ nã mãã wù plã wù nũɔ̃gu wà wú ji hã-ba nǝ̃-gǝ, wà gɩ̀-lǝ gùú cíé wú juo ko ǹ-guu bà nã jerkwaarɩ nã.

17 Gɩ̀ sùɔ́gɩ nã, Fɩraa-Dũnnũ, mǝ̃̀ cirǝ̃ǝ̃ cirǝ̃ǝ̃ ǹ nã-i, pɩgaa-yáà nǝ̃ ǹ fãngããguu nã́ã́ ǹ yáá nã̀ã pã ǹ nũɔ̃gu nǝ̃-yáà nĩĩguu mãã wà,

18 Fɩraa-Dũnnũw sɩrĩɛ̃ hyadũũgɩ nã, nã̀ã ba wù kusufɩnfaagɩ sǝ nǝ̃ kǝr. Wà wú ce diicĩɛ̃rǝntaaba nǝ̃ bàá mãã bà sǝ̃n nɔ̃ bà hã-yǝ bà dũndɔw. Nǝ̃ wu síì yaala yuɔrɔtaa'n piirɩmmã́ ba. Nã̀ã wa wu ji piir-ba fuwɔ ǹ-hi bà tãnkuuraaba, bà huɔnbiiba, nǝ̃ bà huɔnbii'n tãnkuuraaba yindagǝ nã fuwɔ ǹ-ga hi bà huɔnbii'n tãnkuuraa'n tãnkuuraaba nã.

19 Fɩraa-Dũnnũ, ǹ mãã kusufɩnfaantiiw, mǝ̃̀ cirǝ̃ǝ̃ cirǝ̃ǝ̃ ǹ nã-i, ce ǹ bluu'n diicĩɛ̃rǝ'n dũndɔw hlo. Sulammã nã, ǹ-tuu bà hlǝm'n bǝ̃ǝ̃gu dìi Misɩra yiɛgu ǹ nìɛ ǹ ce bà dũndɔw.»

20 Fɩraa-Dũnnũẃ fǝ̃ǝ̃ ǹ-siɛ-yǝ wà: «Mǝ̃̀ cíé bà dũndɔw nã́ã́ ǹ cirǝ̃ǝ̃ dɩ̀ nã nĩĩgu mãã.

21 Nǝ̃ gɩ-ń ba gùu ba wà sulammã nã mǝ̃́ nìɛ nũmǝ̃nã-lǝ, wà mǝ̃̀ yuuntasǝ'n gbɩgbaamã nìɛ ɲũũrũũgɩ min nã,

22-23 cwaa báàbà min bà brǝn'n nũɔ̃gɩ nã, curo'n sɩga jãn yiɛ gúɔ̀ nã mãã mǝ̃̀ plã mǝ̃̀ nũɔ̃gu nǝ̃ ɲì tǝvũnvãnããbaa wà mǝ̃ ji hã-ba nǝ̃-gǝ, bà min mãã bà hlárá mǝ̃̀ cɔ̃mmã, ǹ-nǝ̃nǝ̃ǝ̃ mǝ̃̀ nã, bà sɩga da-gǝ. Nã̀ã wa bà díɛ́ mǝ̃̀ yuuntasǝ'n gbɩgbaamã, nǝ̃ mǝ̃̀ cíé gùú cɔ̃nnorɩmmãã mãã mã̀ pɩgaa mǝ̃̀ fãngããgu, Misɩra yiɛgu nǝ̃ jerkwaarɩ nã. Nǝ̃ dɩ̀-lǝ dɩ̀ min nã, bá nìɛ bà kã nǝ̃ yiga bà dǝ̃ǝ̃-m bà ne, ǹ-ba bà sǝ̃n nɔ̃ bà hã-m.

24 Nǝ̃ mǝ̃̀ mããcier Kalɛbɩ-lǝ, wù sáa ce cwaa'n dɩgaliɛ tammã. Wù nṹɔ̃́ ǹ-hã-m, halle wù sáa yiilǝǝ. Gɩ̀-lǝ gùú cíé mǝ̃́ ba mǝ̃̀ ji ce wú jãn gùú yiɛgɩ nã mãã wù kã́ã́ ǹ-ga ŋmã ǹ-dǝ̃ǝ̃-gǝ. Mǝ̃̀ hã wù tãnkuuraaba, wù huɔnbiiba, nǝ̃ wù huɔnbii'n tãnkuuraa yo bá tuu-gǝ nǝ̃ sùɔ́gu.

25 Amalɛkɩ nũɔ̃ntaaba nǝ̃ Kanãã yiɛntaabá nàa dàa jirammã nã gɩ̀ yiɛ'n nɩgǝraagɩ nã. Gɩ̀ súɔ̀gɩ nã, jíyã̀ ɲí ver cicuɔgu ɲí ta jerkwar'n yiɛgu ɲi tuu hĩɛ̃tun'n Baabumbɛ̃m'n hlũũgu.»

26 Fɩraa-Dũnnũẃ fǝ̃ǝ̃ ǹ-ver ǹ-waa nǝ̃ Musaba nǝ̃ Arɩnãẁ hlo wà:

27 «Mǝ̃̀ nṹɔ̃́ Isɩrayɛl bluubaa suro ǹ-haar bà yaliɛga mǝ̃̀ yuunã. Cobɩbliɛ báà, bà ji yaala bà síì haar bà yaliɛga mǝ̃̀ yuunã bii bǝ̃ǝ̃-i?

28 Kã n ga waa nǝ̃-ba wà mã́ã Fɩraa-Dũnnũ, wà gɩ-ń ba gùu ba wà mǝ̃́ nǝ̃ nũmǝ̃nã sulammã, wà mǝ̃n-lǝ mã́ã háalá mǝ̃̀ nũɔ̃gu ǹ-waa wà ba wáalá gùú cãwanĩɛ̃ga, mǝ̃̀ ji blǝ-ba ǹ-vaa nǝ̃ gà-lǝ gà-i.

29 Bà ji kurǝǝ jerkwaar díɛ́ nã-i. Bà min mãã nǝ̃ bii gur nǝ̃ kuugɩ́ piɛ, nǝ̃ bá ba bàa ja-ba ǹ-fǝ̃ǝ̃ bà nũɔ̃gu, nã̀ã ba bàa yal bà yiriɛga, bà mãã bà sórrá ǹ-hla bà hla nã mǝ̃̀ yuunã bà ji kurǝǝ.

30 Mǝ̃̀ yáá mã̀ã pã mǝ̃ nũɔ̃gu wà mǝ̃ ji hã-ba nǝ̃ gùú yiɛgu mãã bá jiraa gɩ̀ nã, dɩ̀ kaalaa wà gɩ-ń vã ǹ-hlǝ Yefũnɩ bíɛ́ Kalɛbɩw nã nǝ̃ Nũnɩ bíɛ́ Sosuwew nã, wà bà sǝ̃ǝ̃nã curo'n sɩga jãn yiɛ gúɔ́ nã.

31 Nǝ̃ bà tãnkuuraabisaalaabaa mãã bà yáá bà waa bà cɔ̃mmã wà bà byarcekuurǝǝbá ga juo blǝ ǹ-ta nǝ̃-ba, mǝ̃̀ ji ce bà-lǝ bà-i bá jãn gùú yiɛgɩ nã mãã bà tǝba yáá bà hla-gǝ, gɩ̀ ga dwal bà nã.

32 Nǝ̃ bàá nǝ̃ bà hla-lǝ, bà pĩɛ̃nĩɛ̃gà ji ba dìɛ jerkwaar díɛ́ nã-i.

33 Nǝ̃ bà tãnkuuraa-lǝ, bà-lǝ bà ga ce bii gwaahǝ̃ǝ̃lw wancendɩ nã jerkwaarɩ nã. Bà tǝbà mãã bà sáa hũɔ̃ ǹ-sũɔ̃l nǝ̃-m, gɩ̀-lǝ gùú ji ce bà tãnkuuraabà ji ba ywaruugɩ nã fuwɔ bà-lǝ bà min bá ji ta ǹ-ga kurǝǝ ǹ-baal.

34 Bà cíé bãn gwaahǝ̃ǝ̃l wɩ̀-i, ǹ-kãã ba bà waaraa bà ŋmã bà dǝ̃ǝ̃ Kanãã yiɛgu. Nǝ̃ gɩ̀-i nnĩĩ, bà gaabɩbliɛ'n cɔ̃mmã nã, bà ji ba ywaruugɩ nã bii gwaahǝ̃ǝ̃l kusuugɩ nã. Yuu wo yuu gɩ́ vaa nǝ̃ blɩ kukur. Gɩ̀-lǝ gɩ̀ tammã, ɲi ji fǝ̃ǝ̃ wà ǹ-suro mǝ̃̀ yuunã dɩ́ ji gbǝ̃ǝ̃ ɲì nã.

35 Mã́ã Fɩraa-Dũnnũ, dìí mãã dɩ̀ yáá mǝ̃n saa mǝ̃̀ ji hã-ba nǝ̃-dǝ dɩ̀-lǝ dɩ̀-i nĩĩgu. Cobaliɛ báàbà mãã bà sórrá ǹ-jar mǝ̃̀ nã, mǝ̃̀ ji ce dɩ̀-lǝ dɩ̀-i. Bà min bà ji tã jerkwaar díɛ́ nã-i. Bà ji kurǝǝ níɛ́-i.»

36 Musaẁ yáá wùu tĩɛ̃ bàá mãã bá kãã ŋmã ǹ-dǝ̃́ǝ̃̀ Kanãã yiɛgu, nǝ̃ bà verɩmmã nã bá juo diɛ yiɛ gúɔ̀ fuwɔ ǹ-ce Isɩrayɛl bluubá suro Musaw yuunã.

37 Fɩraa-Dũnnũẃ fǝ̃ǝ̃ ǹ-juo tĩɛ̃ narplaaga min bà drɔ. Bà-lǝ bàá yáá bàa waa yiɛ gúɔ̀gɩ̀ blasǝ'n cɔ̃mmã.

38 Gɩ̀-lǝ gɩ̀ tĩɛ̃taaba sǝ̃ǝ̃nã, Sosuweba nǝ̃ kalɛbɩw dɩn yáá bàa yanãã nũmǝ̃nãw.

39 Musaẃ fǝ̃ǝ̃ ǹ-kãã taa Fɩraa-Dũnnũ cãwanĩɛ̃ gáà ǹ-ja Isɩrayɛl bluuba. Gɩ́ mǝ̃gaa ǹ-ca bà nã, bà yigasǝrɩ́ ɲǝ̃ǝ̃ dugo.

40 Gɩ̀ taakaal ciibǝǝgu pur, bá suro ǹ-tuu tãnsǝ'n hlũũgu ǹ-ba bà waa wà: «Yi fǝ̃́ǝ̃lã́ wà yi yuɔruɔ, nǝ̃ kuɔkuɔ-lǝ, Fɩraa-Dũnnũẁ mãã wù wa yí kã gùú yiɛgɩ nã mãã, yí tɩ́gɩnǝ̃́ǝ̃ yì maar sùɔ́gɩ-i.»

41 Musaẃ fǝ̃ǝ̃ ǹ-yugu-ba wà: «Bincɔ̃m nã-i, Fɩraa-Dũnnũẁ kárrá dìí nã mãã, ɲí ba ɲì caa ɲí wáà ǹ-ta dɩ̀ drɔ? Dɩ̀ sɩga fa ɲì saa.

42 Fɩraa-Dũnnũẁ sɩraa nǝ̃ ɲã́ã̀, bláá ce ɲí yuguraa ɲí kã, nã̀ã wa ɲì ɲããtaabà ga gbǝ̃ǝ̃ ɲì nã.

43 Amalɛkɩ nũɔ̃ntaaba nǝ̃ Kanãã yiɛntaabá nàa bà fennãã ɲì nã. Bà ga ko ǹ-guu ɲì nã byarcesuɔgɩ nã. Ɲi mãã ɲì vérrá ɲì furũũgu ǹ-hã Fɩraa-Dũnnũw, wùú yo sɩga ba nǝ̃ ɲã́ã̀.»

44 Isɩrayɛl bluubá hla nã̀ã suro yugbǝ̃ǝ̃gɩ nã, ǹ-kã tãnsǝ'n yiɛgu. Nǝ̃ Musaẃ ba dàa kuɔl nã nǝ̃ Fɩraa-Dũnnũ twanɲũɔ̃kuruugu.

45 Amalɛkɩ nũɔ̃ntaaba nǝ̃ Kanãã yiɛntaabaa nǝ̃n yáá dàa jirammã nã gɩ̀ tãnsǝ'n yiɛgu, bá hlǝ ǹ-hɩr ǹ-suu Isɩrayɛl bluuba nã, ǹ-ko ǹ-gbǝ̃ǝ̃ bà nã, ǹ-ga ɲǝ̃ǝ̃ ǹ-duu bà nã Hɔrmãgɩ nã dìi.