Jalli (Nombres) 13

Fɩraa-Dũnnũẃ fǝ̃ǝ̃ ǹ-waa nǝ̃ Musaw wà:

2 «Tĩ́ɛ̃lã̀ cwaabá kãã ŋmã ǹ-dǝ̃́ǝ̃̀ Kanãã yiɛguu mãã mǝ̃̀ hã Isɩrayɛl bluubaa nǝ̃-gǝ. Níyà ɲí hiil plǝrɩ wo plǝr'n yigantaaba sǝ̃ǝ̃nã curow dɩn ɲí tĩɛ̃-ba.»

3 Fɩraa-Dũnnũẁ wáalá dìí, Musaẃ nɔ̃ ǹ-hã-yǝ, wú tĩɛ̃ cwaabá hlǝ Paarã jerkwaarɩ nã dìi ǹ-maar, bà min bà yáá Isɩrayɛl bluu'n yuntaa-i.

4 Bà yiriɛga-i nnĩĩ nã: Sakur bíɛ́ Samuwaw, Wurbɛn plǝrɩ nã;

5 Horɩ bíɛ́ Safatɩw, Simeyɔ̃ plǝrɩ nã;

6 Yefũnɩ bíɛ́ Kalɛbɩw, Suuda plǝrɩ nã;

7 Yisefu bíɛ́ Igalw, Isɩkar plǝrɩ nã;

8 Nũnɩ bíɛ́ Hosew, Efrayim plǝrɩ nã;

9 Arafu bíɛ́ Paltiw, Bɛ̃nsamɛ̃ plǝrɩ nã;

10 Sodi bíɛ́ Gadɩyɛlw, Sabulɔ̃ plǝrɩ nã;

11 Suusi bíɛ́ Gaadiw, Mãnãse plǝrɩ nã mãã dɩ̀ hlǝ́rá Yisefu plǝrɩ nã;

12 Gɩmal bíɛ́ Amiyɛlw, Dan plǝrɩ nã;

13 Mikayɛl bíɛ́ Seturw, Asɛr plǝrɩ nã;

14 Wofɩsi bíɛ́ Nãbiw, Nɛfɩtali plǝrɩ nã;

15 Nǝ̃ Maki bíɛ́ Guyɛlw, Gadɩ plǝrɩ nã.

16 Musaẁ tĩ́ɛ̃lã́ bàá mãã bá kãã ŋmã ǹ-dǝ̃́ǝ̃̀ Kãnãã yiɛgu, bà-lǝ bàá yiriɛgaa yáá nnĩĩ nã. Musaw nã̀ã fǝ̃ǝ̃ ǹ-suu Nũnɩ bíɛ́ Hosew nǝ̃ yirdarǝ wà Sosuwe.

17 Musaẁ gáa ba wù tĩɛ̃ cwaa báà gùú nã mãã, bá ba bà kã bà ga ŋmã ǹ-dǝ̃́ǝ̃̀ Kanãã yiɛgu, wú waa nǝ̃-ba wà: «Ɲì jãnɩmmã nã Kãnããgu, tíyà ^aNegɛvɩ yiɛgu, nǝ̃ ɲí fǝ̃ǝ̃ ɲí yuguraa tãnsǝ'n yiɛgɩ nã.

18 Gɩ̀-lǝ gɩ̀ nã, ɲi ga da ǹ-fǝ̃ǝ̃ gɩ̀ yiɛgɩ mãã nĩĩguu mãã. Gɩ̀ yiɛntaaba-ń ba bàa ɲũrũɔ̃ yindagǝ nã bà sáa ɲũrũɔ̃, dàa bá nǝ̃ pyãnũũgu-ì yindagǝ nã mǝ̃nkurnãã-i.

19 Kã́ã̀ ɲi ga ne bà mãã gùú yiɛgɩ nã mãã, ɲí fǝ̃ǝ̃ gɩ-ń ba gɩ̀ fa, yindagǝ nã gɩ-ń ba gùu bla, cwaabá nǝ̃ kuɔya nã-i, dàa bá nǝ̃ liɛ nã-i gàá mãã bàa mã ǹ-cal gà nã.

20 Níyà gɩ̀ yiɛ'n hlɔ̃mmã-ń ba nǝ̃ sãmmã yindagǝ nã mã-ń ba mã̀ã suruɔ, tubiɲinɲã-ń ba dàa yindagǝ nã ɲã̀ sɩraa. Klã́ã̀ bibyammã nã nǝ̃ ɲí ver ɲí jo nǝ̃ lǝ díɛ̀dɩ tubiɲin'n biiga.» Sulammã nã, ɛ̃rsɛ̃dĩɛ̃l'n hil'n bǝ̃ǝ̃gu yáá.

21 Cwaa báàbá fǝ̃ǝ̃ ǹ-suro Tɩsin jerkwaarɩ nã ǹ-kãã ŋmã ǹ-dǝ̃́ǝ̃̀ Kãnããgu fuwɔ ǹ-ga hi Erho lǝri, Lebo-Hamãtɩ lǝri tuɔra.

22 Bà tíɛ́ ^bNegɛvɩ yiɛgɩ-i, ǹ-jãn Kãnããgu. Anakɩ kukurayǝ'n furuntaa'n plaaga mãã nnĩĩ, bà yáá dàa gùú sùɔ́gɩ-i: Ayimãba plǝri, Sesayiba plǝri, nǝ̃ Talmayiba plǝri. Hebrɔ̃ lǝrɩ̀ mlã ǹ-ce bii nɩrhǝ̃ǝ̃lw, nǝ̃ Tɩsowan lǝri mãã Misɩra yiɛgu, dɩ́ ji da dɩ́ mã.

23 Gɩ̀ furũũgɩ nã, bá suro ǹ-kã Ɛskɔl nɩgǝraagɩ nã, ǹ-kãã jãn ǹ-bǝr ɛrsɛ̃ bii'n susuruudagǝ. Bá tuu-gǝ nǝ̃ tubituudagǝ bii bà be-ga wà grɩnadɩ nǝ̃ fiigietuu'n biiga ǹ-piɛ daldarǝ drɔ, nǝ̃ cwaaba hǝ̃ǝ̃lbá fǝ̃ǝ̃ ǹ-tuu-dǝ.

24 Isɩrayɛl bluubà mãã bà bǝ́rrá ɛrsɛ̃ bii'n susuruugu Ɛskɔl nɩgǝraagɩ nã, bá fǝ̃ǝ̃ ǹ-suu gɩ̀ sùɔ́'n yiiri wà susuruu'n nɩgǝraa.

25 Bãn gwaahǝ̃ǝ̃l kusuugɩ nã, bàá nǝ̃n yáá bàa kã bà ga ŋmǝ̃ǝ̃ ǹ-dǝ̃́ǝ̃̀ Kãnãã yiɛgu, bà mããcemmã́ tã, bá jã ǹ-gbãl.

26 Bá ver ǹ-jo Musaba nǝ̃ Arɩnãw nǝ̃ Isɩrayɛl bluuba nã Paarã lǝ'n jerkwaarɩ nã, Kadɛsɩgɩ nã. Bà díɛ́ cɔ̃m wo cɔ̃mw mãã, bá tuu pɩgaa-mã ǹ-ja-ba, nã̀ã pɩgaa-ba nǝ̃ tubiɲin'n biigaa mãã díɛ́-ga gɩ̀ sùɔ́gɩ nã.

27 Bà wáalá dìí mãã nǝ̃ Musaw, dɩ̀-lǝ dɩ̀-i nnĩĩ: «Ǹ tĩ́ɛ̃lã́-yáà wà yí kã gùú yiɛgɩ nã mãã, yí kã́ã́ gɩ̀ nã. Sulammã nã, yiɛ gúɔ̀ nã, ɲi ga ba sallii dɩn nã-i, nǝ̃ ɲããvaluu yo gɩ̀ sɩga ca ɲì nã. Gɩ̀ tubiɲin'n biidaaga-i nnĩĩ nã!

28 Nǝ̃ dɩdiindɩ́ nìɛ, bàá mãã jirammã nã yiɛ gúɔ̀ nã, bá nǝ̃ fãngããgu, nǝ̃ bà liɛ yo gá nǝ̃ gàa bɩnǝ̃ǝ̃ nǝ̃ bá mã dofũyaga ǹ-caliɛ gà nã. Halle Anakɩ kukurayǝ'n furuntaa yo yí díɛ́-ba.

29 Amalɛkɩ bllubá nàa bàa jiraa ^cNegɛvɩ yiɛgu. Hitɩ nũɔ̃ntaaba nǝ̃ Sebuusɩ nũɔ̃ntaaba nǝ̃ Amoritɩ nũɔ̃ntaabá nàa bàa jiraa tãnsǝ'n yiɛgu, nǝ̃ Kanãã yiɛntaabá ba bàa jiraa ǹ-pɛ̃ lwaakɩnkan'n nũɔ̃gu, nǝ̃ Surdɛ̃ lwaa'n bɩmblanɲã nã.»

30 Kalɛbɩẃ fǝ̃ǝ̃ ce bàá nǝ̃n yáá bà waa bà hã Musaw bá suu bà nɔ̃nɲã nã, nã̀ã hiil wù yalli ǹ-waa wà: «Jaatiɛ yi ga hũɔ̃ yiɛ gúɔ̀gɩ́ ba yì kuugu. Yi ji hi dɩ̀ nã!»

31 Nǝ̃ Kalɛbɩ nãbɩgaabaa nǝ̃n yáá bàa tĩɛ̃-yǝ bá yuguraa ǹ-kã, bà-lǝ bá waa wà: «Yi síì gbǝ̃ǝ̃ suro ǹ-kãã du bluu báà nã, bá nǝ̃ pyãnũũgu ǹ-ɲǝ̃ǝ̃-yáà!»

32 Nã̀ã fǝ̃ǝ̃ ǹ-du nã ǹ-ba bà diɛ gùú yiɛguu mãã bà kã́ã́ ǹ-ga ŋmã ǹ-dǝ̃́ǝ̃̀-gǝ Isɩrayɛl bluu'n yinɲã nã wà: «Yi kã́ã́ ǹ-ga waaraa ǹ-ŋmã ǹ-dǝ̃́ǝ̃̀ gùú yiɛgu mãã, gɩ̀ wuu cwaabaa mãã bà kã bà jiraa gɩ̀ nã. Yi díɛ́ gùú cwaabaa mãã, bà danãã.

33 Yi díɛ́ cokukuraaba. Anakɩ kukurayǝ'n furũntaa-i. Yi yáá yì da yì hla nã́ã́ ŋmǝ̃ǝ̃rǝ̃nãã-i bà yigagɩ nã. Bàá yo bà yáá da-yáà nĩĩgɩ-i.»