Isɩrayɛl Bluu'n Waali (Exode) 19

Dũnnũẁ ce bá ɲũɔ̃ twammã nǝ̃ Isɩrayɛl bluuba Sinayi tãnũũgɩ nã

1-2 Bá suro Irfidimgu ǹ-waa, bà hlǝm'n hyarsǝrɩ siɛlnã yudĩɛ̃lããgu Misɩra yiɛgu, bá kãã jãn Sɩnãyi jerkwaarɩ nã. Bá fǝ̃ǝ̃ ǹ-nǝ̃ǝ̃ bà kuɔyaga jerkwaarɩ nã Sɩnãyi tãnũũ'n yigagɩ nã.

3 Nǝ̃ Musaẃ fǝ̃ǝ̃ ǹ-yuguraa ǹ-kã Dũnnũw nãã. Fɩraa-Dũnnũẃ be-yǝ tãnũũ'n yuugɩ nã, ǹ-ba wù waa nǝ̃-yǝ wà: «Ǹ saa ń pɩgaa Isɩrayɛl bluuba nǝ̃ mǝ̃̀ mãã mǝ̃̀ ji waa dìí nǝ̃-n, Yakuba nũɔ̃ntaaba

4 wà bàá nǝ̃ bà hla ba díɛ́ mǝ̃́ cíé dìí mãã Misɩra yiɛgɩ nã, wà ba díɛ́ mǝ̃ túulá ǹ-jo nǝ̃-ba mǝ̃̀ tuɔra nĩĩguu mãã.

5 Nǝ̃ yindiɛ, mǝ̃̀ cíé yí ɲũɔ̃ twammã nǝ̃-ba dìí nã mãã, ba-ń mǝ̃gaa ǹ-ɲãl dɩ̀ nã bà hiɛga nã, nã̀ã ba bà nɔ̃ bà hã-m, bàá ji ba mǝ̃̀ bɩgaaba cuu coplaaga min sǝ̃ǝ̃nã. Nã̀ã wa cuu hlɔ̃mmã min, mã́ nǝ̃ mã́ã saa-i.

6 Gɩ̀-lǝ gɩ̀ nã, ɲì nũɔ̃ntaabà ji ba mǝ̃̀ puruɔntaa-i, nǝ̃ ɲì plǝrɩ ba dɩ̀ dǝ ǹ-ba mã́ã dǝlli. Ǹ saa ń ja Isɩrayɛl bluuba nǝ̃ dɩ̀-i.»

7 Musaẃ fǝ̃ǝ̃ ǹ-ver ǹ-juo be Isɩrayɛl bluu'n vũnvãnããba, ǹ-juo pɩgaa-ba nǝ̃ cãwanĩɛ̃ gáà min, nã́ã́ Fɩraa-Dũnnũw pɩ́gará-yǝ nǝ̃-ga nĩĩguu mãã.

8 Bà min bá siɛ-yǝ nǝ̃ yal dɩndi wà: «Fɩraa-Dũnnũẁ wáalá kuu wo kuu, yi ji wáà gɩ̀ hlũũgu.» Musaẃ ver ǹ-ta wù ga ja Fɩraa-Dũnnũw nǝ̃ bà yalli.

9 Fɩraa-Dũnnũẃ fǝ̃ǝ̃ ǹ-waa nǝ̃ Musa wà: «Mǝ̃̀ ga hiirǝǝ ǹ-jo ǹ nãã yiiluugu kusunã ǹ-ji waa cɔ̃mmã nǝ̃-n, Isɩrayɛl bluubà da ǹ-nɔ̃ mǝ̃̀ waa cɔ̃mmã nǝ̃-n, nã̀ã da ǹ-hũɔ̃ ǹ cɔ̃mmã fɩraa.» Musaẃ fǝ̃ǝ̃ ǹ-ja Fɩraa-Dũnnũw nǝ̃ Isɩrayɛl bluu'n yalli.

Dũnnũẃ hiirǝǝ ǹ-kã Sɩnãyi tãnũũgɩ nã

10 Fɩraa-Dũnnũw waa nǝ̃ Musaw wà: «Ver n ga kra Isɩrayɛl bluuba nã bà dǝ jimããgu nǝ̃ cicuɔgu ń hã-m, bá saar bà kuulanãm yo,

11 wà bá tɩgɩnǝ̃ǝ̃ ǹ-ba bà fennãã bãnɲã siɛlnã yuugɩ nã, nã̀ã wa Fɩraa-Dũnnũẁ ga hiirǝǝ gùú yuugɩ-i ǹ-jo Sɩnãyi tãnũũgɩ nã, bà min yinɲã nã.

12 Caa ɲinɲã ń fã ń caliɛ tãnũũgɩ nã, nǝ̃ ń gbǝ bà nã wà curo'n báa yugo tãnũũ gúɔ̀, halle curo'n báa kuganãã gɩ̀ nã yo. Curo wo curo mãã wù ji yugo tãnũũgu, wù saa wú ku.

13 Halle gɩ-ń ba curo-i wo, yindagǝ nã kwasǝnkuu-i wo, wù sǝ̃n saa wú ba nũmǝ̃nãw. Nǝ̃ curo'n báa haar wù nãkruɔgu ǹ-mũũ-yǝ, gɩ̀ saa bá nǝ̃ǝ̃ ǹ-ko-yǝ nǝ̃ tɩntrãga yindagǝ nã, bá fã ǹ-kǝ̃ǝ̃lǝ̃ǝ̃ wù nã nǝ̃ pugɔlɔnɲã. Yendɩ-ń ji hul gùú nã mãã, badaaba ji gbǝ̃ǝ̃ ǹ-yugo tãnũũgu drɔ.»

14 Musaẃ hiirǝǝ tãnũũgɩ nã ǹ-ba wù kã wù ga kra Isɩrayɛl bluuba nã bà dǝ ǹ-hã Fɩraa-Dũnnũw, nǝ̃ bá saar bà kuulanãmba.

15 Nã̀ã fǝ̃ǝ̃ ǹ-waa nǝ̃-ba wà: «Tɩ́gɩnǝ̃̀ǝ̃ ɲí ba ɲì fennãã cicuɔ'n taakaal cɔ̃mmã nã. Blǝ́rà ɲì hla nã, curo'n báa kuganãã cijal nã.»

16 Gɩ̀ bãnɲã siɛlnã yuu'n taa'n kaalammã nã, Dũnnũẃ juo ba wù nãlĩɛ̃ nã̀ã ba wù ɲĩɛ̃sǝ. Ɲũɔ̃sǝncindaarɩ́ juo ba tãnũũgɩ nã, nǝ̃ yendaarɩ́ juo ba dɩ̀ du nǝ̃ fãngããgu kúɔ́lɩ nã, fuwɔ bà min bá ba bà ɲãnãã.

17 Musaẃ hiil Isɩrayɛl bluuba bá ta Dũnnũ jǝ̃ǝ̃lǝ̃mmã. Bá kãã hiraa tãnũũ'n nĩɛ̃lɩ nã.

18 Fɩraa-Dũnnũẁ mãã wù yáá wùu hiirǝǝ ǹ-jo tãnũũgɩ nã dǝ̃ǝ̃mãã kusunã, gɩ̀-i, Sɩnãyi tãnũũgɩ min gɩ́ paa ǹ-ba gɩ̀ yáá ɲũɔ̃sǝkwaari dɩn. Ɲũɔ̃sǝrɩ ga juo ba nã́ã́ dǝ̃nkɩkan'n ɲũɔ̃sǝ-i. Tãnũũgɩ min, gɩ́ juo ba gɩ̀ ɲãnãã.

19 Yendɩ ga juo mǝ̃gaa ǹ-ba dɩ̀ du piyɛ̃ piyɛ̃. Musaẁ yáá wu-ń waa cɔ̃mmã, Dũnnũẃ siɛ-yǝ nãlɛ̃mmã nã.

20 Fɩraa-Dũnnũẃ hɩr ǹ-juo ba Sɩnãyi tãnũũ'n yuugɩ nã, nã̀ã be Musaw, Musaẃ fǝ̃ǝ̃ ǹ-yuguraa ǹ-kã wù nãã.

21 Fɩraa-Dũnnũẃ waa nǝ̃ Musaw wà: «Hiirǝǝ n ga gbǝ Isɩrayɛl bluuba nã, wà curo'n báa wa wú joraa ǹ-jo ǹ-ji ne-m, nã̀ã wa bà cindɩ̀ ji kurǝǝ.

22 Halle mǝ̃̀ puruɔntaabaa mãã bà kuganãã mǝ̃̀ nãã, bà saa bá kra bà nã bà dǝ ǹ-hã-m, mǝ̃ báa ji suro bà yuunã.»

23 Musaẃ fǝ̃ǝ̃ ǹ-siɛ-yǝ wà: «Cwaabà síì gbǝ̃ǝ̃ ǹ-yugo Sɩnãyi tãnũũgu ǹ-jo ǹ nãã. Nã̀ã da yíǹ-lǝ yíi wáalá wà mǝ̃́ caa ɲinɲã, ǹ-fã-ɲã ǹ-caliɛ gɩ̀ nã, gɩ́ da ǹ-ba yíi kuugu gɩ̀ dǝ.»

24 Fɩraa-Dũnnũẃ ver ǹ-waa nǝ̃-yǝ wà: «Maar, hiirǝǝ ń kã, ɲi ga yuguraa ɲí jo ɲì min nǝ̃ Arɩnãw, nǝ̃ mǝ̃̀ puruɔntaaba nǝ̃ cwaa'n dɩgaliɛ-lǝ, ba báa wa ba joraa ǹ-jo mǝ̃̀ nãã, mǝ̃ báa ji da ǹ-suro bà yuunã.»

25 Musaẃ ver ǹ-hɩr ǹ-kã Isɩrayɛl bluuba nã, ǹ-kãã ja-ba nǝ̃-ga.