Isɩrayɛl Bluu'n Waali (Exode) 18

Musaba nǝ̃ wù curɔ Setro cɔ̃mmã

Musa curɔ Setrow, Dũnnũ puruɔntii yáá Mãdiyãgu. Wú nɔ̃ Fɩraa-Dũnnũẁ cíé dìí dɩ̀ min mãã ǹ-hã Musaw nǝ̃ Isɩrayɛl bluuba, wù híilá-ba Misɩra yiɛgu gùú tammã.

2 Musaẁ yáá wùu tĩɛ̃ wù ciɛ Seforaẃ kũũ. Wù tǝ Setroẃ hũɔ̃ wú kãã ba wù nãã,

3 nǝ̃ wù byanããba hǝ̃ǝ̃lba. Musaẁ yáá wùu suu vũnvãyow wà Gɛrsɔ̃m. Dɩ̀ yuugɩ̀ wà norii. Musaẃ wa wu kã́ã́ ǹ-ga ba norsǝrɩ nã niɛriɛ'n yiɛgu.

4 Nã̀ã suu wuusaalw wà Eliyesɛr, wà wù tǝw yáá wù bũũ gùú Dũnnũw wu píɛ́ wù nã ǹ-cii wù nã nǝ̃ Farawunã dãngunãw.

5 Setroẃ suro ǹ-tuu Musa ciɛw, nǝ̃ wù byanããba, ǹ-kã Musaw nãã jerkwaarɩ nã, Dũnnũ tãnũũgɩ nã, wù yáá wùu sa wù kuɔyaga ǹ-jiraa gùú sùɔ́gu Dũnnũ tãnũũgu tuɔra.

6 Wú tĩɛ̃ bá kãã waa nǝ̃ Musaw wà: «Ǹ curɔ Setrow jówà ǹ nãã, nǝ̃ ǹ ciɛw nǝ̃ ǹ byanããba hǝ̃ǝ̃lba.»

7 Musaẃ hlǝ ǹ-jǝ̃ǝ̃lǝ̃ǝ̃ wù nã, ǹ-kã bá kãã mǝ̃gaa ǹ-fyãn bà ɲĩɛ̃ ǹ-yugu bà ɲĩɛ̃ hihinǝ̃m'n cɔ̃mmã, nã̀ã kãã jãn Musa kuɔblɩrɩ nã.

8 Fɩraa-Dũnnũẁ píɛlá dìí mãã Farawunãw nǝ̃ Misɩra yiɛntaaba drɔ, Isɩrayɛl bluu'n cɔ̃mmã nã, nǝ̃ wù kórrá ǹ-hiil-ba gùú gbǝ̃ǝ̃mã nã mãã bà waal nã, Musaẃ taa dɩ̀ min ǹ-ja-yǝ.

9 Wù cíé cɔ̃m wo cɔ̃m ǹ-hã Isɩrayɛl bluuba, ǹ-hiil-ba Misɩra yiɛntaa'n nãkruɔgɩ nã, gɩ́ dwal Setrow nã.

10 Wú fǝ̃ǝ̃ ǹ-hiil wù yalli ǹ-waa wà: «Fɩraa-Dũnnũ yiirɩ́ bũũ, wùú mãã wù híilá-ɲã́ã̀ Farawunãw nǝ̃ Misɩra yiɛntaa'n nãkruɔgɩ nã. Wù kórrá-ɲã́ã̀ Misɩra yiɛntaa'n nãkruɔgɩ nã.

11 Mǝ̃̀ fǝ̃́ǝ̃lã́ yindiɛ wà Fɩraa-Dũnnũw nǝ̃ kiiba min yuugɩ nã. Nã̀ã wa Misɩra yiɛntaa'n blasǝrɩ gáa ver ǹ-vaa nǝ̃ bà-i.»

12 Musa curɔ Setroẃ jãn siimãã mãã bà ye-mã nǝ̃ yellɩ nã ǹ-hã Dũnnũw, nã̀ã ko kwasǝnɲindan ǹ-jãn-yǝ. Arɩnãw nǝ̃ Isɩrayɛl bluu'n vũnvãnããbá jo bá juo wuu Dũnnũ siim'n wuuri bà min nǝ̃-yǝ.

Musaẁ kra yuntaaba nã bá ba bà jar sugolli

13 Gɩ̀ taakaalgu, Musaẃ kãã jiraa cwaa'n byariɛ'n sugojaruugɩ nã, nǝ̃ cwaabá ba hirammã nã wù yigagɩ nã bǝ̃ǝ̃ntã, bà fennãã wù nã.

14 Musa curɔẁ gáa da wù mãã wù ce dìí mãã wù hã cwaaba, wú waa wà: «Ǹ ce bii nnĩĩ-lǝ? Danii ń ba ǹ jar sugolli nǝ̃ ǹ dɩn, fuwɔ ǹ-ce bá ba ba-ń ce bá hiraa ǹ yigagɩ nã ǹ-ba bà fennãã ǹ nã ciibǝǝgu dìi ǹ-ji vaa nǝ̃ bahɛruugu.»

15 Musaẃ fǝ̃ǝ̃ ǹ-waa nǝ̃-yǝ wà: «Ǹ sáa da-i, cwaa jówà mǝ̃̀ nãã, bà jo bà yugu bà fǝ̃ǝ̃ Dũnnũ kusuugu.

16 Cincaruugɩ-ń jãn bà sǝ̃ǝ̃gɩ nã, bà jo mǝ̃̀ nãã mǝ̃́ juo jar-dǝ ǹ-hã-ba, ǹ-buruɔ bà nã, ǹ-pɩgaa-ba nǝ̃ Dũnnũ hlũsǝri, nǝ̃ wù kárrá dìí nã mãã ǹ-hã-yáà.»

17 Wú waa nǝ̃-yǝ wà: «Ǹ diicerǝ sǝ̃n fa.

18 Yíì, nǝ̃ bàá mãã bà jo ǹ nãã, ɲì min ɲi ga juo ywarriɛ. Mããcem mã́ã́ mã̀ ɲirǝ̃ǝ̃ ǹ-dɩsɩrǝǝ ǹ nã ǹ-car, ǹ síì hi mã̀ nã nǝ̃ ǹ dɩn.

19 Yindiɛ, jǝ̃ǝ̃ ǹ tũɔ̃gu ń nɔ̃ ń hã-m, mǝ̃̀ ji hã-n nǝ̃ cɔ̃nfǝ̃ǝ̃gǝdagǝ. Dũnnũẃ pɛ ǹ nã. Yíì, ba cwaa'n tanhiilw Dũnnũw nãã, ń ba ǹ kã ǹ waa bà yuunã yaga ǹ-ja-yǝ.

20 Kal-ba nǝ̃ Dũnnũ hlũsǝri, nǝ̃ wù mãã wù kárrá dìí nã ǹ-hã-yáà, nǝ̃ ń pɩgaa-ba nǝ̃ bà mãã bà saa bá ba bà wáà gùú hlũũguu mãã, nǝ̃ gɩ̀ waal'n tammã.

21 Nǝ̃ ń fǝ̃ǝ̃ ń ne hiil cwaaba min sǝ̃ǝ̃nã, nũɔ̃sǝn cwaabaa mãã bà sɔ̃ Dũnnũw nã, bà saa ń piɛ ǹ nãkruɔgu bà drɔ, nã̀ã ba bà sǝ̃n hũɔ̃ curoẃ vuuraa bà nã nǝ̃ wù nãkrɔkuu, kra badaaba nã cwa tonnũɔ̃sɔ̃ trãngwaahǝ̃nhǝ̃l^a yunɲã nã, badaaba ba cwa gundɩndii yunɲã nã, badaaba ba cwa gwaahǝ̃ǝ̃l nǝ̃ nũɔ̃sɔ̃ nũɔ̃sɔ̃ yunɲã nã, nǝ̃ badaaba ba cwa nũɔ̃sɔ̃ nũɔ̃sɔ̃ yunɲã nã.

22 Bàá ji ba sugojaruugɩ nã bǝ̃ǝ̃ wo bǝ̃ǝ̃. Mã̀ã́ mãã nũɔ̃sǝn cɔ̃mmã, bà ga jo nǝ̃-mã ǹ nãã. Nǝ̃ mã̀ã́ mãã mã̀ sǝ nũɔ̃sǝn cɔ̃m, bà ga ba bà jar mã̀-lǝ dàa nǝ̃ bà hla. Gɩ̀-lǝ gɩ̀ tammã, ǹ mããcemmã̀ ji dɩganãã ǹ nã.

23 Nǝ̃-ń ce dɩ̀-lǝ, nǝ̃ gɩ-ń ba gùu ba wà Dũnnũẃ hlã-n nǝ̃-dǝ wà ń ce-dǝ, ǹ síì ywar, nǝ̃ bluu báà min mãã nnĩĩ, bà min bà ga hi bà swammã duɔle.»

24 Musaẃ hũɔ̃ wù curɔ yalli, nã̀ã ce-dǝ nã́ã́ wù wáalá nǝ̃-yǝ nĩĩguu mãã.

25 Musaẃ ne ǹ-hiil nũɔ̃sǝn cwaaba Isɩrayɛl bluuba sǝ̃ǝ̃nã, ǹ-kra bà nã cwaa'n yuugɩ nã. Wú kra cwa tonnũɔ̃sɔ̃ trãngwaahǝ̃nhǝ̃l yuntaaba nã, cwa gundɩndii yuntaaba nã, cwa gwaahǝ̃ǝ̃l nǝ̃ nũɔ̃sɔ̃ nũɔ̃sɔ̃ yuntaaba nã, nǝ̃ cwa nũɔ̃sɔ̃ nũɔ̃sɔ̃ yuntaaba nã.

26 Bà yáá bà jar sugolli bǝ̃ǝ̃ wo bǝ̃ǝ̃. Dìí nǝ̃n yáá dɩ-ń ywar-ba, bá kã nǝ̃-dǝ Musaw nãã. Nǝ̃ gaaɲũɲũgɔ̃ya-lǝ bà yáá bà jar-ga nǝ̃ bà hla.

27 Musaẃ nã̀ã fǝ̃ǝ̃ ǹ-hã wù curɔw nǝ̃ hlũũgu wú ver ǹ-ta wù kũũ wù yiɛgu.