Isɩrayɛl Bluu'n Waali (Exode) 17

Hũmmã̀ juu ǹ-hlǝ tɩntaluugɩ nã Irfidimɩ lǝri

Isɩrayɛl bluuba min bá hlǝ Sin jerkwaarɩ nã ǹ-tuu bà hlũũgu ǹ-ba bà maar bà waali nã́ã́ Fɩraa-Dũnnũw wáalá bá ce-dǝ nĩĩguu mãã. Bá kãã nǝ̃ǝ̃ bà kuɔyaga Irfidimgɩ nã, nǝ̃ hũnɲũɔ̃mã̀ sáá dàa cwaabá ba bà ga ɲũɔ̃.

2 Gɩ̀-i, bá du Musaw wà wú hã-ba nǝ̃ hũmmã bá ɲũɔ̃. Musaẃ waa nǝ̃-ba wà: «Ɲi gãnãã nǝ̃ mǝ̃n-lǝ bincɔ̃m nã-ì? Danii ɲí ba ɲì dǝ̃ǝ̃ Fɩraa-Dũnnũw?»

3 Hũnɲũɔ̃sǝrɩ̀ gáa huu bà yigasǝri, bá ba bà waa nǝ̃ Musaw wà: «Ǹ híilá-yáà Misɩra yiɛgu wanĩĩ? Dàa ǹ wa ń jo nǝ̃-yáà hũnɲũɔ̃sǝrɩ ji ko-yáà jerkwaarɩ nã, nǝ̃ yì tãnkuuraaba, nǝ̃ yì kwasǝnɲinɲã-ì?»

4 Musaẃ kãã ba wù jiɛriɛ nǝ̃ Fɩraa-Dũnnũw wà: «Mǝ̃̀ ji ce bluu báà danii? Gɩ-ń ce fiyãã, bà ji nǝ̃ǝ̃ ǹ-ko-m nǝ̃ tɩntrãga.»

5 Fɩraa-Dũnnũẃ siɛ Musaw wà: «Ta bà yigagɩ nã, nǝ̃ ń be Isɩrayɛl bluu'n vũnvãnããdaba bá ba bà duu ǹ nã. Ǹ mṹũlã́ Misɩra lwaagu nǝ̃ gùú valblɩrii mãã, tuu-dǝ ń blǝ ǹ nãkruɔ nã, ɲí ta!

6 Mǝ̃n ga hiraa ǹ yigagɩ nã, Horɛbɩ tãnũũ'n tɩntãndarǝ drɔ. Ń mũũ tɩntãn díɛ̀ nǝ̃ ǹ valblɩri, hũmmã ga juu ǹ-hlǝ, ǹ bluuba ɲũɔ̃.» Musaẃ ce-dǝ Isɩrayɛl bluu'n vũnvãnãã'n yinɲã nã.

7 Gɩ̀-i, bá suu gɩ̀ sùɔ́'n yiiri wà Masa nǝ̃ Meriba. Isɩrayɛl bluubà dǝ̃́ǝ̃lã́ Fɩraa-Dũnnũw ǹ-ne gùú sùɔ́gɩ-i ǹ-ba bà waa nǝ̃-yǝ wà: «Fɩraa-Dũnnũẃ nìɛ yì sǝ̃ǝ̃nã-i dàa wù sɩriɛ-ì?» Nã̀ã fǝ̃ǝ̃ ǹ-ba bà gãnãã nǝ̃ Musaw. Gùú cíé bá suu-gǝ nĩĩgu. Gɩ̀ yuugɩ-i wà: «Ǹ-dǝ̃ǝ̃ curo ǹ-ne, nǝ̃ byaari.»

Amalɛsɩbà juo du Isɩrayɛl bluuba nã nǝ̃ byaari

8 Ǹ ya bá ba Irfidimgɩ nã, Amalɛkɩ nũɔ̃ntaabá juo du bà nã nǝ̃ byaari.

9 Gɩ̀-i, Musaẃ fǝ̃ǝ̃ ǹ-waa nǝ̃ Sosuwew wà: «Ne ń hiil cwaadaba, bàá mãã bà ji gbǝ̃ǝ̃ ǹ-ce byaari, ń hlǝ nǝ̃-ba ɲi ga da ɲì ɲĩɛ̃ nǝ̃ Amalɛkɩ bluuba. Cicuɔgu, mǝ̃̀ ga ba tãmblɩ'n yuugɩ nã nǝ̃ Dũnnũ valblɩri mǝ̃̀ nãkruɔgɩ nã.»

10 Sosuweẃ fǝ̃ǝ̃ ǹ-hlǝ ǹ-ta byarciegu Amalɛkɩ bluuba yuunã, nã́ã́ Musaẁ wáalá-dǝ nǝ̃-yǝ nĩĩguu mãã. Nǝ̃ Musaw, nǝ̃ Arɩnãw, bá nǝ̃ Hurw, bá yuguraa tãmblɩ'n yuugɩ nã.

11 Musa nãkruɔgɩ̀ yáá gɩ-ń siɛ ǹ-ba haarɩmmã nã, Isɩrayɛl bluubà gbǝ̃ǝ̃ Amalɛkɩ bluuba nã-i, nǝ̃ gɩ-ń hɩr, Amalɛsɩ bluuba-ń ce bá gbǝ̃ǝ̃ bà nã.

12 Musa nãkrɔnɲã ga juo hyãl, Arɩnãba nǝ̃ Hurw, bá fǝ̃ǝ̃ ǹ-tuu tɩntãndarǝ ǹ-juo kra wù taaragu, wú jiraa dɩ̀ drɔ, nǝ̃ bà-lǝ bá fǝ̃ǝ̃ ǹ-hiraa ǹ-dii-yǝ sǝ̃ǝ̃gɩ nã, wáà yiɛ gúɔ̀, nǝ̃ wudiɛw yiɛdaa gúɔ̀, ǹ-blǝ wù nãkrɔnɲã́ ba haarɩmmã nã kwelle fuwɔ ǹ-ji da bǝ̃ǝ̃gɩ̀ jãn.

13 Sosuweba nǝ̃ wù bluubá paa ǹ-gbǝ̃ǝ̃ Amalɛkɩ bluuba nã nǝ̃ bà dãngunãba pew.

14 Gùú nã-i, Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Yal-dǝ sɛbɛw nã ń kra, cwaaba báa ji sĩĩnǝ̃ǝ̃ dɩ̀ nã. Nǝ̃ ń waa nǝ̃ Sosuwew wà mǝ̃ ji guu Amalɛkɩ bluu'n dũl nã ɲũũrũũgu, fuwɔ cwaaba ba bà síì ba bà kãnãã bà cɔ̃mmã nã hlo.»

15 Musaẃ fǝ̃ǝ̃ ǹ-mã siijãnsuɔdagǝ gɩ̀ sùɔ́gɩ nã nã̀ã suu gɩ̀ yiiri wà Fɩraa-Dũnnũw-i mǝ̃̀ drapow.

16 Nã̀ã ver ǹ-waa wà: «Amalɛkɩ bluubà cíɛlá ń haar bà nãkruɔgu Fɩraa-Dũnnũ yuuntasǝ'n guujirakuugu yuunã, gùú cíé Fɩraa-Dũnnũw ji ba byaar nã nǝ̃ bà nũɔ̃ntaaba min.»