Isɩrayɛl Bluu'n Waali (Exode) 20

Dũnnũ hlũũ'n nǝ̃ǝ̃ya nũɔ̃sɔ̃w

Dũnnũẃ fǝ̃ǝ̃ ǹ-waa nǝ̃ Isɩrayɛl bluuba wà:

2 «Mã́ã-i Fɩraa-Dũnnũw, ɲì Dũnnũw, mã́ã híilá-ɲã́ã̀ wasǝrɩ nã Misɩra yiɛgu.

3 «Ɲi sǝ̃n saa ɲí bũũ dũnnũdiɛ nã́ã́ mã́ã sǝ.

4 «Ɲi sǝ̃n saa ɲí ce kuuw. Ɲi sǝ̃n saa ɲí mǝ̃gaa kuu nǝ̃ ɲì nãkruɔgu, gùú mãã gɩ̀ hlǝ drɔkuudagǝ, yindagǝ nã ɲũũrũũkuu, yindagǝ nã hũm'n kusunãkuu.

5 Ɲi sǝ̃n saa ɲí kuulǝǝ gɩ̀ ɲin'n yigagɩ nã, ɲi sǝ̃n saa ɲí bũũ-ɲã yo. Mã́ã-i Fɩraa-Dũnnũw, mã́ã dɩn-i ɲì Dũnnũw, mǝ̃n sǝ̃n hũɔ̃ ɲí piɛ kuudagǝ mǝ̃̀ drɔ. Gùú tii nǝ̃n hla mǝ̃̀ yalli, mǝ̃̀ ji pã-yǝ nǝ̃-dǝ, fuwɔ ǹ-ga hi wù honãã'n nɔ̃nɲã nnǝ̃ǝ̃nãw nã.

6 Nǝ̃ gùú tii nǝ̃n nɔ̃ ǹ-hã-m, nã̀ã hũɔ̃ mǝ̃̀ cãwandi, mǝ̃̀ ji pɩgaa-yǝ nǝ̃ mǝ̃̀ kusufɩnfaagu, nã̀ã pɩgaa-gǝ ǹ-ja wù furũntaaba fuwɔ nɔ̃n tonnũɔ̃sɔ̃ trãngwaahǝ̃ǝ̃l.

7 «Mã́ã-i Fɩraa-Dũnnũw, ɲì Dũnnũw, ɲi sǝ̃n saa ɲí ba ɲì paaraa nǝ̃ mǝ̃̀ yiiri. Yíi nǝ̃n ce-dǝ, mǝ̃̀ síì yaa-n.

8 «Ɲi saa ɲí blǝ Hebruba fiisaa'n yuugu. Híilà-gǝ gɩ́ ba gɩ̀ dǝ ǹ-ba mã́ã Fɩraa-Dũnnũ kuugu.

9 Ɲi-ń ba ɲì caa ɲí ce kuu wo kuu, ɲi ji gbǝ̃ǝ̃ ǹ-ce-gǝ bãn nãndien kusuugɩ nã.

10 Nǝ̃ bãn nɩrhǝ̃ǝ̃lnã yuu-lǝ, Fɩraa-Dũnnũ mã́ã mãã ɲì Dũnnũw, mã́ã yuu-i nǝ̃ gɩ̀-lǝ, fiisaa'n yuu-i. Curo'n sǝ̃n saa wú ce mããcem gɩ̀ yuugu. Ɲimãã yo, ɲì tãnkuur yo, ɲì mããcier yo, ɲì kwasǝnkuu yo, halle norii mãã wù juo ǹ-ji hyar ɲì suɔgu. Curo'n sǝ̃n saa wú ce mããcem.

11 Mǝ̃̀ nǝ̃́ǝ̃lã́ drɔkuɔlii nǝ̃ ɲũũrũũgu, nǝ̃ lwaakɩnkandi, nǝ̃ ɲã̀ kusunã ɲinɲã min bãn nãndien kusuugɩ nã, bãn nɩrhǝ̃ǝ̃lnã yuugu, mǝ̃́ fiisa. Gùú cíé Fɩraa-Dũnnũ mã́ã̀, mǝ̃́ hiil gɩ̀-lǝ gɩ̀ yuugu gɩ̀ dǝ, ǹ-piɛ mǝ̃̀ nãkrɔfɩnfaagu gɩ̀ drɔ, nã̀ã ce gɩ́ ba mã́ã yuugu.

12 «Ɲi saa ɲí ba ɲì bũũ ɲì tǝba nǝ̃ ɲì ɲũba, gùú ji ce ɲí da biicin gùú hlɔ̃mmã nã mãã mǝ̃̀ plã mǝ̃̀ nũɔ̃gu wà mǝ̃ ji hã-ɲã́ã̀ nǝ̃-mã.

13 «Ɲi sǝ̃n saa ɲí ko curo.

14 «Ɲi sǝ̃n saa ɲí mǝ̃rǝ̃ǝ̃ nǝ̃ curodiɛ nã́ã́ ɲì hla'n ciɛ yindagǝ nã ɲì hla'n bla sǝ.

15 «Ɲi sǝ̃n saa ɲí ŋmã.

16 «Ɲi sǝ̃n saa ɲí bǝr kwasǝri ǹ-dii curo nã.

17 «Ɲì yinɲã̀ sǝ̃n saa ɲí hlǝ ɲì nãcuro'n kuu nã, wù suɔ-i wo, ǹ-ce wù ciɛ-i wo, wù mããcier-i wo, wù nǝ̃ǝ̃-i wo, ǹ-ce wù kǝkũm nǝ̃n ba wo, ɲì yinɲã báa hlǝ wù nã.»

18 Isɩrayɛl bluuba min bá ba bà nɔ̃ Dũnnũ nãlɛ̃mmã nã nǝ̃ yen'n dullɩ nã. Bá ba bà da Dũnnũ ɲĩɛ̃sǝmmã nǝ̃ tãnũũgɩ̀ huur kalalla. Gbǝrsǝrɩ́ blǝ-ba bá ba bà ɲãnãã, bá fǝ̃ǝ̃ ǹ-hiraa halbaa,

19 nã̀ã ba bà waa nǝ̃ Musaw wà: «Waa nǝ̃ Dũnnũw wà wu yaala nǝ̃ yíǹ ba ǹ-waa yí ba yì nɔ̃. Wù-lǝ wu-ń wa wú wanãã nǝ̃-yáà nǝ̃ wù hla, yi ji kurǝǝ.»

20 Musaẃ fǝ̃ǝ̃ ǹ-waa nǝ̃-ba wà: «Bláá sɔ̃, Dũnnũẁ júó wù ji dǝ̃ǝ̃-ɲã́ã̀ wù ne-i. Wù caa ɲí ba ɲì sɔ̃ wù nãã, ɲí báa ji da ǹ-ce diicĩɛ̃rǝdi.»

21 Cwaabá hiraa halbaa nǝ̃ Musaw nǝ̃ wù dɩn wú wáà ǹ-kuganãã ɲũɔ̃sǝ díɛ́dɩ nã, Dũnnũẁ yáá gùú sùɔ́gu.

Dũnnũẁ pɩgaa bà mã wù jãnɩm'n sùɔ́gu

22 Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Waa nǝ̃ Isɩrayɛl bluuba wà ba díɛ́ mǝ̃ bla drɔkuɔlɩ nã-i nã̀ã ba mǝ̃̀ waa cɔ̃mmã nǝ̃-ba.

23 Ɲí sǝ̃n saa ɲí ce sãnãw yindagǝ nã kwaplaari ǹ-mǝ̃gaa kiidaba ǹ-ba ɲì bũũ-ba ǹ-pya mǝ̃n nã.

24 Ɲi ji mã siijãnsuɔdagǝ nǝ̃ jaari, ǹ-ji ba ɲì jãn-m nǝ̃ siimãã mãã bà ye-mã nǝ̃ yellɩ nã, nǝ̃ paaruu'n siimã, gɩ̀ drɔ, ɲi ji ba ɲì jãn-m nǝ̃ tũmba nǝ̃ wuramba, nǝ̃ ninɲã. Mǝ̃-ń hillaa ɲì nã sùɔ́ sùɔ́, ɲí mã-gǝ nǝ̃ mǝ̃́ piɛ mǝ̃̀ nãkrɔfɩnfaagu ɲì drɔ.

25 Ɲi-ń wa ɲí mã-gǝ nǝ̃ tɩntrãga, ɲi báa cesǝ-ga, ɲi-ń cesǝ-ga, siijãnsuɔ gúɔ̀gɩ̀ síì pyar dugɔ mǝ̃n cɔ̃mmã nã.

26 Gɩ̀ sǝ̃n saa gɩ́ haar fuwɔ ɲí ba ɲì yugo-gǝ nǝ̃ tɩnɩw. Gɩ-ń haar nǝ̃ curoẃ yugo-gǝ, bà ji da wù turkwaari.»