Isɩrayɛl Bluu'n Waali (Exode) 15

Musaba nǝ̃ Isɩrayɛl bluubá hyar hlǝ̃ǝ̃gu

Gùú nã-i, Musaba nǝ̃ Isɩrayɛl bluubá hyar hlǝ̃ǝ̃ gúɔ̀ ǹ-bũũ Fɩraa-Dũnnũw wà: Mǝ̃̀ ji hyar hlǝ̃ǝ̃ gúɔ̀ ǹ-bũũ Fɩraa-Dũnnũw, wù pɩ́gará wù yuuntasǝ'n fãngããgu ǹ-ja-yáà. Wù ɲĩ́ɛ̃lã́ sǝ̃nsonããba, nǝ̃ sǝ̃nsonããntaaba lwaakɩnkandɩ nã.

2 Fɩraa-Dũnnũw-i mǝ̃̀ fãngããgu, mǝ̃̀ hyar wɩ̀-i nǝ̃ hlãnɲã mǝ̃̀ bɩnǝ̃ǝ̃ wù nã. Wù-lǝ wùú kórrá-m, wɩ̀-i mǝ̃̀ Dũnnũw, mǝ̃̀ ji bũũ-yǝ wù-lǝ wɩ̀-i mǝ̃̀ tǝ Dũnnũw, mǝ̃̀ ji bɩnǝ̃ǝ̃ wù nã.

3 Fɩraa-Dũnnũw-i nũɔ̃sǝn sɩrǝǝsɩw, wù yiir saa nǝ̃-yǝ: wà Fɩraa-Dũnnũw.

4 Wù nǝ̃́ǝ̃lã́ ǹ-dii Farawunã byarcewotoroba nǝ̃ sɩrǝǝsɩba kurɔnɲã lwaakɩnkandɩ nã, nã̀ã ce lwaakɩnkanbũmbɛ̃m'n hũmmã́ wuu wù sɩrǝǝsɩba tɩrbliɛba.

5 Hũnpiir mṹũlã́ ǹ-suu bà nã; bá nĩĩrǝ̃ǝ̃ nã́ã́ tɩntrã-i taarɩ nã.

6 Fɩraa-Dũnnũ, ǹ nãdĩĩgɩ̀ pɩ́gará ǹ fãngããgu, ǹ nãdĩĩgɩ̀ kárrá ǹ ɲããtaaba nã.

7 Ǹ juu ǹ ka ǹ collaa ǹ kuurǝǝba nã nǝ̃ ǹ yuuntasǝ'n fãngããgu. Ǹ hyadũpiirǝgɩ-ń ce gɩ́ caa-ba nã́ã́ dǝ̃ǝ̃m cáalá yisɩ.

8 Ǹ fíisá nǝ̃ fãngããgu ǹ mĩɛ̃'n saluugɩ́ juo buruɔ hũmmã nã tiɛmã hǝ̃ǝ̃lmã, ǹ-hiraa nã́ã́ dofũya-i. Saluugɩ̀ mãã gɩ̀ ce gùú hũmmãã mãã mã́ ba mã̀ mũũ, mã́ kuɔl ǹ-hiraa lwaakɩnkan'n sǝ̃ǝ̃gɩ nã.

9 Yì ɲããtaabà yáá bà waa bà hiɛga nã wà ba ji ɲǝ̃ǝ̃ ǹ-duu yì nã, ǹ-ga hi-yáà, ǹ-ɲǝ̃ǝ̃ ǹ-hũɔ̃ yì nãkruɔɲinɲã, nã́ã́ bà mãã bà caa bá hũɔ̃-ɲã nĩĩguu mãã. Nã̀ã fa ǹ-hiil bà dãngunãba ǹ-piɛ bà nãkruɔgu yì drɔ.

10 Nǝ̃ yíǹ fǝ̃ǝ̃ ǹ-juo hulii ǹ saluugu, lwaakɩnkandɩ́ suro ǹ-suu bà nã. Bá nĩĩrǝ̃ǝ̃ nã́ã́ kwatrã-i hũm'n taarɩ nã.

11 Fɩraa-Dũnnũ, ɲinɲã min mãã yí jãn-ɲã ɲã̀ sǝ̃ǝ̃nã, hagu ji kã ɲã́ fi ɲã̀ ɲĩɛ̃ nǝ̃ yíì? Halii yíi tammã? Halii yuuntasǝ'n gbɩgbaam-i mã̀ fa mã̀ dǝ yíi mǝ̃gãm'n tammã? Halii cíyà cɔ̃nnorɩmmã, nã̀ã ba wù saa nǝ̃ bũũmã yíi tammã?

12 Bàá nǝ̃n yáá bà ɲǝ̃ǝ̃ bà duu yì nã, ǹ fɩ́ráa ǹ nãdĩĩgɩ nã, hlɔ̃mmã́ fǝ̃ǝ̃ ǹ-wuu-ba.

13 Ǹ hṹɔ̃lã́ ǹ bluuba ǹ-nǝ̃nǝ̃ǝ̃ bà nã. Ǹ kusufɩnfaagɩ nã, ǹ tíɛ́ bà yigagɩ nã. Ǹ fãngããgu kã́ã̀ nǝ̃-ba ǹ yiɛgu.

14 Coplaagà ji nɔ̃ gɩ̀ cɔ̃mmã nã, ǹ-ba bà ɲãnãã. Gbǝrsǝrɩ̀ ji blǝ Filisɩ yiɛntaabá ba bà ɲãnãã.

15 Edɔ̃m mũɔ̃rãã'n hiɛgà ji yuɔ. Mohabɩ yigantaabà ji ba bà ɲãnãã. Kanãã yiɛntaaba min bà hiɛgà ji tii, bá ba bà síì fǝ̃ǝ̃ bà diicerǝdi.

16 Bà hiɛgà ji mǝ̃gaa ǹ-yuɔ. Ǹ bluuba-ń ba bà ta, Fɩraa-Dũnnũ, ǹ bluubaa mãã ǹ hṹɔ̃lã́-ba, ba-ń ba bà ta, ǹ nãkruɔ'n fãngããgɩ̀ ji ce bá mǝ̃gãlã ǹ-ba bà síì gbǝ̃ǝ̃ ǹ-saaraa.

17 Yindiɛgu, ǹ ji kãã kra ǹ bluuba nã ǹ tãnũũgɩ nã, bá jiraa dàa. Fɩraa-Dũnnũ, ǹ mǝ̃́gará gùú sùɔ́gɩ-i, ǹ ga jiraa, nã̀ã fũũ ǹ nũɔ̃sǝn sɔhuhorgǝgu nǝ̃ ǹ hla.

18 Fɩraa-Dũnnũẁ ji ba fãngããgɩ nã fɩraa.

19 Gùú nã mãã Farawunã sǝ̃nsonããba, wù wotoroba, nǝ̃ wù sǝ̃nsonããntaabà gáa jãn lwaakɩnkandɩ nã, Fɩraa-Dũnnũẃ ce hũmmã́ juo mũũ ǹ-suu bà nã. Nǝ̃ Isɩrayɛl tãnkuuraa-lǝ, bá wáà ǹ-ta hlɔ̃nkuulammãã drɔ ǹ-huɔl.

20 Gùú nã-i, Arɩnã tǝ̃ǝ̃ Miriyamw, Dũnnũ tanhiil yáá, wú fǝ̃ǝ̃ ǹ-tuu ciraadagǝ ǹ-ba wù mǝ̃ǝ̃l. Isɩrayɛl canããba min bá fǝ̃ǝ̃ ǹ-hlǝ nǝ̃ ciranɲã, ǹ-duu wù nã bá kãã ba bà mǝ̃ǝ̃l bà sa.

21 Miriyamẃ ba wù hyar wù hã bá ba bà siɛ wà: Hyárrà hlǝ̃ǝ̃gu ɲí bũũ Fɩraa-Dũnnũw, wù yuuntasǝ'n fãngãã'n cɔ̃mmã nã. Wù ɲĩ́ɛ̃lã́ sǝ̃nsonããntaaba nǝ̃ bà sǝ̃nsonããba lwaakɩnkandɩ nã.

Mara hũm'n cɔ̃mmã

22 Musaẃ ba Isɩrayɛl bluu'n yuugɩ nã, ǹ-hlǝ nǝ̃-ba Baabũmbɛ̃mw nã, ǹ-tuu Suur jerkwar'n hlũũgu. Bá ce bãnɲã siɛlɲã waal nã, bà sáa da hũm.

23 Bá kãã hi sùɔ́dagǝ, gɩ̀ hũmmã ca, bà sáa gbǝ̃ǝ̃ ǹ-ɲũɔ̃-mã. Gɩ̀ sùɔ́'n yiiri yáá wà Mara. Mara yuugɩ-i wà cicɩgǝm.

24 Cwaabá du nã ǹ-ba bà hugɔ̃nãã Musaw yuunã bà waa nǝ̃-yǝ wà: «Yi ji ɲũɔ̃ binkuu-i?»

25 Gɩ̀-i, Musaẃ kãã jiɛriɛ nǝ̃ Fɩraa-Dũnnũw, wú fǝ̃ǝ̃ ǹ-pɩgaa-yǝ nǝ̃ tubikuudagǝ dũl, Musaẃ tuu gɩ̀ dayiɛdagǝ ǹ-kãã nǝ̃ǝ̃ ǹ-dii hũm mã́ã̀ nã, mã́ fǝ̃ǝ̃ ǹ-cin hũnɲũɔ̃huhorɩmmã. Dũnnũẁ hlã wù bluuba nǝ̃ wù hlũũgu gùú sùɔ́gɩ-i, nã̀ã dǝ̃ǝ̃-ba ǹ-ne.

26 Fɩraa-Dũnnũẃ nã̀ã fǝ̃ǝ̃ ǹ-waa wà: «Mǝ̃̀ píɛlá hlɔncin Misɩra yiɛntaaba drɔ, nǝ̃ ɲimãã-lǝ, ɲi-ń sũɔ̃l mǝ̃̀ yinɲã nã, ɲi-ń ba ɲì wáà mǝ̃̀ hlũũgu, nǝ̃ mǝ̃̀ wáalá kuu wo kuu mãã nǝ̃-ɲã́ã̀ ɲí ba ɲì ce-gǝ, mǝ̃̀ píɛlá gùú hlɔmmãã mãã Misɩra yiɛntaaba nã, mǝ̃̀ síì piɛ-mã ɲì drɔ, nã̀ã wa mǝ̃n-lǝ mã́ã-i Fɩraa-Dũnnũw mãã wù hã-n nǝ̃ hihinǝ̃mmã.»

27 Isɩrayɛl bluubà gáa kãã hi sùɔ́dagǝ bà be-gǝ wà Elim, hũnnaalaa nũɔ̃sɔ̃ nǝ̃ bà hǝ̃ǝ̃l yáá dàa gɩ̀ sùɔ́gɩ nã, nǝ̃ kãllĩɛ̃ gwasiɛl nǝ̃ nũɔ̃sɔ̃. Bá fǝ̃ǝ̃ ǹ-nǝ̃ǝ̃ bà kuɔyaga ǹ-jiraa.