Isɩrayɛl Bluu'n Waali (Exode) 14

Farawunãẃ ɲǝ̃ǝ̃ ǹ-duu Isɩrayɛl bluuba nã

Fɩraa-Dũnnũẃ waa nǝ̃ Musaw wà:

2 «Ce Isɩrayɛl bluubá ver ǹ-juo nǝ̃ǝ̃ bà kuɔyaga Pi-Hayirogu tuɔra, Migɩdɔl yiɛgu nǝ̃ lwaakɩnkan'n sǝ̃ǝ̃gɩ nã. Ɲi saa ɲí nǝ̃ǝ̃ ɲì kuɔyaga gùú sùɔ́guu mãã bà be-gǝ Baal-Sefɔ̃, gɩ̀ yigagɩ nã, lwaakɩnkandi tuɔra.

3 Farawunãẁ ga kãn wà jerkwaarɩ súulǝ́ ɲì nã ɲí vaalaa ǹ-ba ɲi vĩɛ̃ gɩ̀ sùɔ́gɩ nã.

4 Mǝ̃̀ ga ce wù yuugɩ́ ba gɩ̀ gbǝ̃ǝ̃, wú suro ǹ-ɲǝ̃ǝ̃ ǹ-duu ɲì nã. Gùú nã-i, mǝ̃̀ yiirɩ̀ ji da bũũmã Farawunãw nǝ̃ wù bluuba min cɔ̃mmã nã. Gɩ̀-lǝ gɩ̀ nã, Misɩra yiɛntaabà ji fǝ̃ǝ̃ wà mã́ã-i Fɩraa-Dũnnũw.» Isɩrayɛl bluubá hũɔ̃ wù yalli.

5 Bà gáa juo waa nǝ̃ Farawunãw wà Isɩrayɛl bluuba tíɛ́, wù-lǝ nǝ̃ wù cokuganãmbá ver bà nɔ̃nɲã wà: «Bii cíé yí nǝ̃nǝ̃ǝ̃ Isɩrayɛl bluubá ta. Yi síì da bá ce mããcemmãã hlo.»

6 Farawunãẃ ce bá vaa wù byarcewotorow bá suro nǝ̃ wù sɩrǝǝsɩba.

7 Wú ne byarcewotorohuhoraaba sǝ̃ǝ̃nã ǹ-tũɔ̃l ǹ-hiil wotoro tũndii trãngwaahǝ̃ǝ̃l^a, nã̀ã ce bà dɩgaliɛẃ ba wù duu nã. Sɩrǝǝsɩba yuntaabà yáá wotoroba min nã.

8 Misɩra yuuntigǝ̃ngãw mãã Farawunãw, wùú yáá wùu hã Isɩrayɛl bluuba nǝ̃ hlũũgu bá hlǝ Misɩra yiɛgu fiɛya, nǝ̃ Fɩraa-Dũnnũw ga juo ce Farawunã yuugɩ́ ba gɩ̀ gbǝ̃ǝ̃, wú ver ǹ-suro ǹ-ba wù ɲǝ̃ǝ̃ wù duu bà nã hlo.

9 Misɩra sɩrǝǝsɩba, nǝ̃ bà sǝ̃nsonããtaaba min, nǝ̃ bà wotorotaaba min, bá ɲǝ̃ǝ̃ ǹ-duu Isɩrayɛl bluuba nã ǹ-kãã hi-ba Pi-Hayirogu tuɔra, Baal-Sefɔ̃ yigagɩ nã, bà yáá bàa nǝ̃ǝ̃ bà kuɔyaga gùú sùɔ́gu, lwaakɩnkan'n nũɔ̃gɩ nã.

10 Isɩrayɛl bluubà gáa da wà Farawunãw nǝ̃ wù bluuba ɲǝ̃́ǝ̃lã́ ǹ-juo hi-ba ǹ-tã gùú nã, gbǝrsǝrɩ́ blǝ-ba, bá ba bà kaasǝraa bà be Fɩraa-Dũnnũw.

11 Nã̀ã fǝ̃ǝ̃ ǹ-ba bà wanãã Musaw nã wà: «Pĩɛ̃ndiisɔsǝrɩ̀ sáá dàa Misɩra yiɛgu-ì? Bii cíé ń jo nǝ̃-yáà yi ji kurǝǝ jerkwaarɩ díɛ́ nã níɛ̀? Ǹ híilá-yáà Misɩra-lǝ wanĩĩ?

12 Yi yáá yìi waa dɩ̀-lǝ dɩ̀-i nǝ̃-n wà ń ya yí ba yì ce mããcemmã yì hã Misɩra yiɛntaaba, gùú búɔlá nã yí juo kurǝǝ jerkwaarɩ nã.»

13 Musaẃ waa nǝ̃-ba wà: «Bláá ya gbǝrsǝrɩ́ blǝ-ɲã́ã̀. Hyárrà nǝ̃ ɲí ne Fɩraa-Dũnnũw mãã wù ga juo kor-ɲã́ã̀ nĩĩguu mãã. Ɲi mãã ɲì da Misɩra yiɛntaabaa mãã nnĩĩ, ɲí ne-ba ɲì baal nũɔ̃-i.

14 Hyárrà ɲí ba ɲì ne, Fɩraa-Dũnnũw ji hũɔ̃ ɲì nũɔ̃gu.»

Lwaakɩnkan'n huɔlɩmmã

15 Fɩraa-Dũnnũẃ waa nǝ̃ Musaw wà: «Ǹ be-m wà mǝ̃́ juo pɛ ǹ nã wanĩĩ? Waa nǝ̃ Isɩrayɛl bluuba wà bá suro ǹ-tuu hlũũgu.

16 Nǝ̃ yíǹ-lǝ, yíí tuu ǹ valblɩri ń hiil ǹ nãkruɔgu ń pɩgaa lwaakɩnkandi. Hiil wantammã hũm'n sǝ̃ǝ̃gɩ nã, Isɩrayɛl bluubá wáà ǹ-ta hlɔ̃nkuulammã nã.

17 Nǝ̃ mǝ̃n ji ce Misɩra yiɛntaa'n hiɛgá gbǝ̃ǝ̃, bá jãn ǹ-duu ɲì nã hũmmã nã. Gùú nã-i, mǝ̃̀ ji ko Farawunãw, nǝ̃ wù sɩrǝǝsɩba, nǝ̃ wù byarcewotoroba, nǝ̃ wù sǝ̃nsonããba min ǹ-pɩgaa-ba nǝ̃ mǝ̃̀ yir'n bũũmã.

18 Dɩ-ń ce gɩ̀ tammã, Misɩra yiɛntaabà ji fǝ̃ǝ̃ wà mã́ã-i Fɩraa-Dũnnũw.»

19 Dũnnũ mɛlɛgɛw mãã wù yáá wù ta Isɩrayɛl bluu'n yigagɩ nã, wú ver ǹ-kãã ba bà furũnyiɛgu. Ɲũɔ̃sǝ'n yiiluuguu mãã gɩ̀ yáá bà yigagɩ nã, gùú yo, gɩ́ ver ǹ-kãã ba bà furũnyiɛgu.

20 Gɩ́ kãã ba Misɩra yiɛntaaba nǝ̃ Isɩrayɛl bluu'n sǝ̃ǝ̃gɩ nã, ǹ-ba nǝ̃ dudũũmã Misɩra yiɛntaa'n yiɛgu, nǝ̃ Isɩrayɛl bluu'n yiɛ-lǝ, gɩ́ ba gbaa. Gùú cíé Misɩra yiɛntaaba nǝ̃ Isɩrayɛl bluubà sáa gbǝ̃ǝ̃ ǹ-kuganãã bà ɲĩɛ̃ nã yisuɔgɩ min nã.

21 Musaẁ gáa hiil wù nãkruɔgu hũm'n yuugɩ nã, Fɩraa-Dũnnũẃ ce salukɩnkandaarɩ́ hlǝ bǝ̃ǝ̃'n pal'n yiɛgu ǹ-hulii ǹ-buruɔ hũmmã nã.

22 Hlũũgɩ́ hlǝ, Isɩrayɛl bluuba ba bà wáà bà ta hlɔ̃nkuulammãã drɔ bà huɔl. Hũmmã́ ba nã́ã́ dofũya-i nãdĩĩyiɛguu nǝ̃ ɲiɲũɔ̃yiɛgu.

23 Misɩra yiɛntaabá ba bà ɲǝ̃ǝ̃ bà duu bà nã. Farawunã sǝ̃nsonããba min, nǝ̃ bà wotoroba, nǝ̃ sǝ̃nsonããntaabá juo jãn lwaakɩnkan'n sǝ̃ǝ̃gɩ nã.

24 Taajãlũũ'n nũɔ̃gɩ nã, Fɩraa-Dũnnũẃ ba yiiluugɩ nã nǝ̃ dǝ̃ǝ̃mã nã nã̀ã ne Misɩra yiɛntaaba ǹ-dii ǹ-gaala bà nã.

25 Wú ce bà wotoroba vyanɲã́ ba ɲã̀ ɲũɔ̃rɔ̃nãã, waalɩ́ ba dɩ̀ ca bà nã. Bá fǝ̃ǝ̃ ǹ-ba bà waa wà: «Jówà yí kwar yí hal Isɩrayɛl bluuba nã, Fɩraa-Dũnnũẃ nìɛ wù ce byaari wù pɛ bà nã!»

26 Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Hiil ǹ nãkruɔgu hũm'n yuugɩ nã, mã́ ver ǹ-ji suu Misɩra yiɛntaa'n wotoroba, nǝ̃ bà sǝ̃nsonããba nã.»

27 Musaẃ hiil wù nãkruɔgu hũm'n yuugɩ nã. Taa'n kaalɩmmã nã, hũmmã́ juo suu mã̀ tantammã nã. Fɩraa-Dũnnũẃ ce Misɩra yiɛntaabaa nǝ̃n yáá bà kwariɛ, hũmmã́ juo mũũ ǹ-tuu-ba.

28 Hũmmã́ juo wuu Farawunã byarcewotoroba, nǝ̃ wù sǝ̃nsonããntaabaa nǝ̃n yáá bàa jãn hũmmã nã bà ɲǝ̃ǝ̃ bà duu Isɩrayɛl bluuba nã. Curow dɩn yo wù sáa hlǝ.

29 Isɩrayɛl bluu-lǝ, bá huɔl hlɔ̃nkuulammã nã, nǝ̃ hũmmã ba bà nãdĩĩyiɛgu nǝ̃ bà ɲiɲũɔ̃yiɛgu nã́ã́ dofũya-i.

30 Gùú yuugɩ-i, Fɩraa-Dũnnũẁ híilá Isɩrayɛl bluuba Misɩra yiɛntaa'n nãkruɔgɩ nã, nǝ̃ Isɩrayɛl bluubá da Misɩra yiɛntaa'n pĩɛ̃nĩɛ̃ga bɩmblaagɩ nã.

31 Isɩrayɛl bluubà díɛ́ Fɩraa-Dũnnũw híilá-ba nǝ̃ gùú fãngããguu mãã Misɩra yiɛntaa'n nãkruɔgɩ nã. Gɩ̀-i, bá hũɔ̃ wù cɔ̃mmã, nã̀ã ba bà sɔ̃ wù nã, nã̀ã hũɔ̃ wù mããcier Musa yo wù cɔ̃mmã.