Isɩrayɛl Bluu'n Waali (Exode) 13

Ta-n-maa hlũũ'n dɩgaliɛw

Fɩraa-Dũnnũẃ waa nǝ̃ Musaw wà:

2 «Kra Isɩrayɛl honãdĩɛ̃linɲã min mãã pũmpɩrbiiba bà dǝ ń hã-m, nǝ̃ gɩ̀ kwasǝnɲinɲã min mãã bliɛba, mã́ã bɩgaa-i nǝ̃-ba.»

3 Musaẃ fǝ̃ǝ̃ ǹ-waa nǝ̃ cwaaba wà: «Kã́nã̀ã jimãyuugɩ nã ɲí ne, gùú nã mãã ɲí hlǝ́rá wasǝrɩ nã Misɩra yiɛgu. Fɩraa-Dũnnũẁ híilá-ɲã́ã̀ nǝ̃ wù fãngããgɩ-i. Gɩ̀ sùɔ́gɩ nã, ɲi-ń ba ɲi ce gɩ̀ paaruugu, ɲi sǝ̃n saa ɲí wuu burw mãã nǝ̃ leviirw.

4 Ɲi suro suro wɩ̀-i jimããgu Habiibuhiraagɩ^a nã.

5 Fɩraa-Dũnnũw-ń ga ce ɲí jãn Kanãã yiɛgu, ɲí ba ɲì ce jimãyuu'n paaruugu blɩ wo blɩ, Habiibuhiraagɩ dɩn gúɔ̀ nã. Hitɩ nũɔ̃ntaaba, nǝ̃ Amoritɩ nũɔ̃ntaaba, nǝ̃ Hivitɩ nũɔ̃ntaaba, nǝ̃ Sebuusɩ nũɔ̃ntaa yo bà yiɛ-i nǝ̃ Kanãã yiɛgu. Fɩraa-Dũnnũẁ plã wù nũɔ̃gu nǝ̃ ɲì tǝvũnvãnããba wà wu ji hã-ɲã́ã̀ nǝ̃-dǝ. Gɩ̀ yiɛgɩ nã ɲi ga ba salli dɩn nã-i, nǝ̃ ɲããvaluu yo gɩ̀ sɩga ca ɲì nã.

6 Bãn nɩrhǝ̃ǝ̃l kusuugɩ nã, ɲi ji ba ɲì wuu burw mãã wù sǝ nǝ̃ leviir, nǝ̃ bãn nɩrhǝ̃ǝ̃lnã yuu gúɔ́, ɲí ce paaruugu ɲí bũũ Fɩraa-Dũnnũw.

7 Gɩ̀-lǝ gɩ̀ bãn nɩrhǝ̃ǝ̃l kusuugɩ nã, ɲi ji ba ɲì wuu burw mãã wù sǝ nǝ̃ leviirw. Ɲì yiɛgɩ min nã, burw mãã nǝ̃ leviirw, yindagǝ nã leviirẁ sǝ̃n saa wú da curo'n suɔ.

8 Paaruu gúɔ́gɩ nã, ɲi ji ba ɲi-ń ce ɲí taa gɩ̀ yuugu ǹ-ja ɲì tãnkuuraaba, wà ɲi ce-gǝ ǹ-da ǹ-ba ɲì kãnãã Fɩraa-Dũnnũẁ cíé dìí ǹ-hã-ɲã́ã̀ ɲi hlǝ́rá Misɩra yiɛgu gùú nã mãã.

9 Fɩraa-Dũnnũẁ mãã wù híilá-ɲã́ã̀ Misɩra yiɛgu nǝ̃ fãngããgu, paaruu gúɔ̀gɩ ji ba nã́ã̀ ba nɩ́sɩrǝ́ ɲì nãkrɔnɲãã nǝ̃ sãnũnɲã nǝ̃ kuu-i, nã̀ã ba gɩ̀ ce ɲí ba ɲì kãnãã cɔ̃m mã́ã́ nã, Fɩraa-Dũnnũ hlũũ'n cɔ̃mmã báa ji da ǹ-tã ɲì nɔ̃nɲã nã.

10 Blɩ wo blɩ, paaruu gúɔ̀gɩ bǝ̃ǝ̃gɩ-ń hi, ɲi saa ɲí ce-gǝ. Bláà ɲì wáà gɩ̀ hlũũgu.»

11 Gɩ̀-lǝ gɩ̀ nã, Fɩraa-Dũnnũw-ń ji kã nǝ̃-ɲã́ã̀ Kanãã yiɛgu, ǹ-hã-ɲã́ã̀ nǝ̃ gɩ̀ yiɛ'n hlɔ̃mmã, nã́ã́ wù plã wù nũɔ̃guu nǝ̃ ɲì tǝvũnvãnããba, nǝ̃ ɲimãã yo nĩĩguu mãã,

12 ɲì biidĩɛ̃lããbaa mãã pũmpɩrbiiba, nǝ̃ kwasǝnɲin'n biidĩɛ̃lãã yo, ɲi saa ɲí nǝ̃nǝ̃ǝ̃ bà nã ǹ-hã Fɩraa-Dũnnũw, wùú bɩgaa-i nǝ̃ bà-lǝ.

13 Kǝkũm blɩdĩɛ̃l wo blɩdĩɛ̃l mãã lɔw, híilà tũmblɩw wù suɔnã ɲí jãn-yǝ nǝ̃ siimã ɲí hã Fɩraa-Dũnnũw, nã̀ã wa gɩ-ń ba gɩ̀ sǝ dìí sǝ, ɲí mũũ ɲí ko gɩ̀ kǝkũmblɩw wù kaarɩ nã. Cwaa yo, bà honãdĩɛ̃lũũ wo honãdĩɛ̃lũũ, gɩ-ń ba pũmpɩrblɩ nǝ̃n ba, bá pã jinɲã wù suɔnãw.

14 Nǝ̃ cicuɔdagǝ, ɲì tãnkuuraaba-ń ji yugu-ɲã́ã̀ gùú yuugu, wà dɩ̀-lǝ dɩ̀ yuugɩ-i wanĩĩ, ɲí siɛ-ba wà Fɩraa-Dũnnũw híilá-ɲã́ã̀ wasǝrɩ nã Misɩra yiɛgu nǝ̃ wù fãngããgu.

15 Wà sulammã nã, Farawunãẁ yáá wùu hla wà wu síì nǝ̃nǝ̃ǝ̃ ɲì nã, ɲí maar. Gɩ̀-i, Fɩraa-Dũnnũẃ fǝ̃ǝ̃ ǹ-ko Misɩra yiɛ honãdĩɛ̃linɲã min mãã pũmpɩrbiiba, ǹ-ga hlǝ gɩ̀ kwasǝnɲin'n biidĩɛ̃lããba nã. Wà gùú cíé kwasǝnɲin'n biidĩɛ̃lããba min mãã lwɛba, ɲí ba ɲì jãn Fɩraa-Dũnnũw nǝ̃-ba. Nǝ̃ curo curo mãã wu-ń huu wù byadĩɛ̃lw, ɲí ba ɲi-ń ce ɲí pã jinɲã ǹ-hã Fɩraa-Dũnnũw wù suɔnãw.

16 Fɩraa-Dũnnũẁ mãã wù híilá-ɲã́ã̀ Misɩra yiɛgu nǝ̃ wù fãngããgu, gɩ̀ cɔ̃mmã ji ba nã́ã́ kuudagǝ-i gùu nɩsɩ ɲì nãkrɔnɲãã nǝ̃ ɲì sãnũnɲã nã, ɲí da ǹ-ba ɲì kãnãã mã̀ nã.

Dũnnũẁ ta wù bluu'n yigagɩ nã

17 Farawunãẁ gáa nǝ̃nǝ̃ǝ̃ hlũũgɩ nã ǹ-hã Isɩrayɛl bluubá ta gùú nã, Dũnnũẁ sáa ya bá tuu Filisɩ yiɛ'n hlũũgu, nã̀ã da gɩ̀-lǝ gùú píɛlà nã. Dũnnũẃ da wà byaarɩ-ń ga huulaa, cwaaba ga hla nã̀ã ver ǹ-maar Misɩra yiɛgu.

18 Dũnnũẃ fǝ̃ǝ̃ ǹ-ce wù bluubá cinĩĩ ǹ-ta ǹ-hlǝ jerkwaarɩ nã, ǹ-ba bà maar Baabũmbɛ̃m'n yiɛgu. Isɩrayɛl bluubá tɩgɩnǝ̃ǝ̃ ǹ-hlǝ Misɩra yiɛgu sɩrǝǝsɩba tammã.

19 Yisefuẁ mãã wù yáá wùu hla nã̀ã ce bá waasǝ bà nũɔ̃gu nǝ̃-yǝ wà Dũnnũw-ń ga juo pɛ bà nã, wà ba-ń ji ba bà kũũ, bá kũũ nǝ̃ wù kukuunɲã min ǹ-hal nǝ̃-ɲã níɛ́ nã. Gɩ̀-i, Musaẃ fǝ̃ǝ̃ ǹ-kaala Yisefu kukuunɲã bá ta.

20 Bá fǝ̃ǝ̃ ǹ-suro Sukɔtɩgu ǹ-kãã sa bà kuɔbiiga jerkwar'n nũɔ̃gɩ nã, Etamgɩ nã.

21 Fɩraa-Dũnnũẃ fǝ̃ǝ̃ ǹ-ta bà yigagɩ nã. Bǝ̃ǝ̃nãgu wù ba yiiluudagǝ kusunã-i bà yigagɩ nã, yisuɔgu wú ba dǝ̃mpirdarǝ nã ǹ-ba hiil gbɩgbaamã wù hã-ba, bá da ǹ-ba bà wáà bǝ̃ǝ̃nã nǝ̃ yisuɔ.

22 Yiiluu gúɔ́gɩ̀ sáa gɩ̀ hal Isɩrayɛl bluu'n yigagɩ nã bǝ̃ǝ̃nãgu, dǝ̃ǝ̃m mã́ã́ yo mã̀ sáa mã̀ hal bà yigagɩ nã yisuɔgu.