Isɩrayɛl Bluu'n Waali (Exode) 12

Ta-n-maa Paaruugu

Fɩraa-Dũnnũẃ waa nǝ̃ Musaba nǝ̃ Arɩnãw Misɩra yiɛgu wà:

2 «Hiraa gúɔ́ ji ba blɩ'n hiradĩɛ̃lããgu ɲì saa.

3 Kã́ã̀ ɲi ga waa nǝ̃ Isɩrayɛl bluuba min wà hiraa gúɔ̀ bãn nũɔ̃sɔ̃nã yuugu, suɔ wo suɔgɩ́ caa tũmblɩw.

4 Gùú suɔgɩ-ń ba gɩ̀ sǝ dugɔ, ǹ-ba gɩ̀ síì gbǝ̃ǝ̃ ǹ-wuu kwasǝnkukuukuugɩ́ tã, gɩ́ ne bà suɔntaa'n nũɔ̃gu, nã̀ã kã bá plii ǹ-gbǝ nã nǝ̃ bà sɔgamntaadaba, nã̀ã blǝ gùú tũmblɩw mãã wù ji tã bà nã.

5 Wú ba tugɔlaw yindagǝ nã kaamǝ̃gǝw mãã nǝ̃ blɩrɩ dɩndi, nã̀ã ba wù sǝ nǝ̃ dor.

6 Ɲí suu wù nã ǹ-ji da hiraa'n bãn nũɔ̃sɔ̃ nǝ̃ ɲã̀ nnǝ̃ǝ̃nã yuugu. Gɩ̀-lǝ gɩ̀ yuugu, bǝ̃ǝ̃'n jãnɩm'n bǝ̃ǝ̃gu, Isɩrayɛl bluuba min bá ko bà kwasǝnɲinɲã.

7 Bà mãã bà ga wuu-ɲã gùú swammã nã mãã, bá tuu ɲã̀ twammã ǹ-mɛ̃sã ǹ-tũn gɩ̀ don'n dũndɔ̃lĩɛ̃'n gbɩgasǝrɩ nã, nǝ̃ ɲã̀ drɔ bɩmbãnĩɛ̃ga drɔ.

8 Nã̀ã hyã kũɔ̃mãã gùú yisuɔgɩ dɩngu, ǹ-wuu nǝ̃ burw mãã wù sǝ nǝ̃ leviirw nǝ̃ hyãnɲãã mãã ɲã̀ ca.

9 Bláá wuu kũɔ̃mãã mãã mã̀ sáa mǝ̃gaa ǹ-be, bláá taa-mã yo. Ɲi saa ɲí hyã mã̀ min-i: yunɲã, kwarnkwanɲã nǝ̃ puriɛ yo.

10 Ɲi báa ya kuugɩ́ cɔ. Mã̀ã́ nǝ̃n cɔ, ciibǝǝgu ɲí ye-mã.

11 Ɲi-ń wa ɲi wuu-mã, Curo wo curo, wú tɩgɩnǝ̃ǝ̃ tallɩ nã, viɛtaantaabá dii bà viɛtaanɲã, nǝ̃ guruntaabá tuu bà gurunɲã, nǝ̃ ɲi wuu-mã warga-warga. Gɩ̀-lǝ gɩ̀ tammã, ɲi ce Fɩraa-Dũnnũ Ta-n-maa paaruu-i.

12 «Gùú yisuɔgɩ-i mǝ̃̀ ga kãã waaraa Misɩra kusuugɩ min nã ǹ-ko ǹ-baal honããdĩɛ̃lãnɲã min. Ǹ-tuu cwaanbiiba nã fuwɔ ǹ-ga kra kwasǝnɲin'n biiba nã. Misɩra yiɛntaabà mãã bà bũũ kuu wo kuu nã́ã́ Dũnnũ-i, mã́ã Fɩraa-Dũnnũ, mǝ̃̀ ji dii-gǝ gɩ̀ fuugɩ nã.

13 Mǝ̃n ga ba mǝ̃̀ ce dɩ̀-lǝ gùú nã mãã, nã̀ã da twammã gùú dũndɔ̃llɩ nã, mǝ̃̀ fǝ̃ǝ̃ wà ɲí nàa gùú duugɩ nã-i mǝ̃́ ta ǹ-maa-gǝ, cɔ̃m'n síì hi ɲimãã-lǝ.

14 Blɩ wo blɩ ɲimãã nǝ̃ ɲì furũntaaba, ɲi ji ba ɲì ce paaruu gúɔ̀ ɲì bũũ mã́ã Fɩraa-Dũnnũ mã́ã̀, ǹ-da ǹ-ba ɲì kãnãã cɔ̃m mã́ã́ nã. Ɲimãã nǝ̃ ɲì furũntaaba ɲí saa ɲí ba ɲì ce paaruu gúɔ̀ fɩraa.

Burw mãã wù sǝ nǝ̃ leviir wù paaruu'n cɔ̃mmã

15 «Bãn nɩrhǝ̃ǝ̃l kusuugɩ nã, curo'n báa wuu burw mãã nǝ̃ leviirw. Ǹ-tuu yudĩɛ̃lããgɩ nã, leviirw báa da curo'n suɔ. Gùú tii nǝ̃n wuu leviirburw, ɲi saa ɲí hiil-yǝ Isɩrayɛl bluuba sǝ̃ǝ̃nã.

16 Yudĩɛ̃lããgu, nǝ̃ bãn nɩrhǝ̃ǝ̃lnã yuugu, gɩ̀ saa ɲí tɩgii gɩ̀ bãnɲã nã ǹ-bũũ Fɩraa-Dũnnũw. Curo'n báa ce mããcem gɩ̀-lǝ gɩ̀ bãnɲã nã, gɩ-ń ba gɩ̀ sǝ̃n wa wuur'n hĩɛ̃m sǝ.

17 Ɲi ji ba ɲì ce Burw mãã wù sǝ nǝ̃ Leviir wù Paaruugu, ǹ-da ǹ-ba ɲi kãnãã ɲì hlǝm'n yuugɩ nã, mǝ̃̀ híilá-ɲã́ã̀ nã́ã́ sɩrǝǝsɩba-i gùú yuuguu mãã Misɩra yiɛgu. Ɲimãã nǝ̃ ɲì furũntaaba, ɲi saa ɲí ba ɲì ce gɩ̀ paaruugu fɩraa.

18 Ǹ-tuu hyardĩɛ̃lãã'n bãn nũɔ̃sɔ̃ nǝ̃ ɲã̀ nnǝ̃ǝ̃nã yuugu, bláà ɲì wuu burw mãã wù sǝ nǝ̃ leviirw fuwɔ ǹ-ga kra gɩ̀ bãn gur nǝ̃ gɩ̀ dɩn nã dɩndǝ̃mbǝ̃ǝ̃gu.

19 Gɩ̀-lǝ gɩ̀ bãn nɩrhǝ̃ǝ̃l kusuugɩ nã, curo'n báa da leviir guguori ɲì suɔgu. Curo wo curo mãã wù ji wuu leviirburw, gɩ́ ba norii-i wo, ǹ-ce ɲimãã curo-i wo, ɲi saa ɲí hiil-yǝ Isɩrayɛl nũɔ̃gɩ nã.

20 Ɲi-ń ba sùɔ́ wo sùɔ́, curo'n báa wuu burw mãã nǝ̃ leviirw. Bláà ɲì wuu burw mãã wù sǝ nǝ̃ leviirw.»

Ta-n-maa wuur'n tɩgɩnǝ̃mmã

21 Musaẃ be ǹ-tɩgii Isɩrayɛl bluu'n vũnvãnããba, ǹ-waa nǝ̃-ba wà: «Suɔ wo suɔ, gɩ́ kãã caa tũmblɩw, ǹ-ko-yǝ, ǹ-ce Ta-n-maaw.

22 Ɲi-ń ko-yǝ ǹ-tã, ɲí tiɛriɛ wù twammã nã kuudagǝ kusunã nǝ̃ ɲí ka partuuguu mãã bà be-gǝ wà isope ɲí ba ɲi-ń ce ɲí ɲĩɛ̃-gǝ twam mã́ã́ nã, ǹ-mɛ̃sã ǹ-piɛ dobɩmbãndɩ nã, nǝ̃ dũndɔ̃l'n gbɩgasǝrɩ hǝ̃ǝ̃l dɩ̀ nã, nǝ̃ ɲì min ɲí ba duuguu kusunã. Curo'n báa hlǝ taasǝ̃ǝ̃nǝ̃ǝ̃gu fuwɔ ciibǝǝgu.

23 Fɩraa-Dũnnũw-ń ga suro Misɩra yiɛntaaba yuunã gùú bǝ̃ǝ̃gu, wu-ń da twammã gùú suɔgɩ nã, wù ta ǹ-maa-gǝ-i, wù síì ya wù mɛlɛgɛw mãã wù ko cwaaba wú jãn gɩ̀ suɔgɩ nã.

24 Ɲimãã, nǝ̃ ɲì furũntaaba min, ɲi saa ɲí ba ɲì ce gɩ̀ cɔ̃mmã fɩraa.

25 Fɩraa-Dũnnũẁ plã wù nũɔ̃gu wà wu ji hã-ɲã́ã̀ nǝ̃ gùú sùɔ́guu mãã, ɲi-ń ga ba ɲĩ̀ĩ hi gɩ̀ sùɔ́gɩ nã, ɲí ba ɲì ce gɩ̀ cɔ̃mmã.

26 Ɲì tãnkuuraaba-ń yugu-ɲã́ã̀ wà dɩ̀-lǝ dɩ̀ cel'n yuugɩ-i hadɩ-i,

27 síɛlà-ba wà yi jã́nnã́ Fɩraa-Dũnnũ-i nǝ̃ Ta-n-maa Paaruu'n siimã. Gùú nã mãã yì bluubà yáá Misɩra yiɛgu, Fɩraa-Dũnnũẃ suro ǹ-piir Misɩra yiɛntaaba, nã̀ã kor hãmĩĩ swammã. Wù sáa jãn mã̀ nã.» Gɩ̀-i, bá fǝ̃ǝ̃ ǹ-kuulǝǝ ǹ-bũũ Fɩraa-Dũnnũw.

28 Fɩraa-Dũnnũẁ wáalá cɔ̃m wo cɔ̃m nǝ̃ Musaba nǝ̃ Arɩnãw, Isɩrayɛl bluubá kãã ce mã̀ min.

Nar nũɔ̃sɔ̃nãw: Misɩra yiɛntaa'n biidĩɛ̃lãã'n kuugu

29 Taagà jáa vǝ̃ǝ̃ gùú nã, Fɩraa-Dũnnũẃ juo ko ǹ-baal Misɩra biidĩɛ̃lããba. Ǹ-tuu Farawunãw nã mãã bà yuuntigǝ̃ngãw, fuwɔ ǹ-kãã kra wùú mãã kasoduugɩ nã, bà biidĩɛ̃lããba. Halle kwasǝnɲin'n biidĩɛ̃lããba min.

30 Farawunãẃ suro gɩ̀ yisuɔgɩ nã nǝ̃ wù cokuganãmba, nǝ̃ Misɩra yiɛntaaba min. Suɔdagǝ'n sáa yanãã gùú suɔguu mãã curo'n sáa ku gɩ̀ nã. Gùú yáá gùu ce kúú'n kaaluugɩ́ ba huuu Misɩra yiɛgɩ min nã.

31 Yisɔvũnvǝ̃ǝ̃gǝgu, Farawunãẃ tĩɛ̃ ǹ-be Musaba nǝ̃ Arɩnãw ǹ-kãã waa nǝ̃-ba wà: «Hlǝ́rà mǝ̃̀ yiɛgu, ɲí nǝ̃ Isɩrayɛl bluuba min, ɲí maar ɲi ga jãn Fɩraa-Dũnnũw, ɲi mãã ɲì caa-dǝ nĩĩguu mãã.

32 Máarà nǝ̃ ɲì kwasǝnɲinɲã min, ɲí wáalá-dǝ gùú tammã, bláà ɲì kã! Ɲi-ń ga ce ɲí cirǝ̃ǝ̃ ɲì Dũnnũw nã wà wu piɛ wù nãkrɔfɩnfaagu mã́ã yo mǝ̃̀ drɔ.»

33 Misɩra yiɛntaabà mãã bà yáá bà ne wà ba ji kurǝǝ, bá fǝ̃ǝ̃ ǹ-ba bà waa nǝ̃ Isɩrayɛl bluuba wà bá maar bà gbɩraanã.

34 Gùú cíé Isɩrayɛl bluuba yáá bàa du gùú burjũmmãã mãã, mã̀ sáa hi ǹ-ɲǝ̃ǝ̃, bá tuu-mã nĩĩgu, nǝ̃ bà mãã bà du-mã gùú kondonããba nã, ǹ-fuɔ-ba kuulanãmba nã ǹ-nǝ̃ǝ̃ ǹ-piɛ-ba bà bɔ̃nɲã nã ǹ-ba bà maar.

35 Musaẁ yáá wùu waa dìí mãã, Isɩrayɛl bluubá ce-dǝ nĩĩgu. Bá cirǝ̃ǝ̃ kwaplar'n wariɛga nã, nǝ̃ sãnã wariɛga Misɩra yiɛntaabaa saa, nǝ̃ kuulanãm yo.

36 Fɩraa-Dũnnũẃ ce Misɩra yiɛntaaba ne Isɩrayɛl bluu'n yiɛgu. Bà círǝ̃́ǝ̃ kuu wo kuu nã, bà sáa gbǝ̃ǝ̃ ǹ-vũɔ̃-ba nǝ̃-gǝ. Bà hlǝ́rá nǝ̃ Misɩra nãkruɔɲinɲã min nĩĩgɩ-i piyɛ̃.

37 Bá suro Aramsɛsɩ yiɛgu, ǹ-tuu Sukɔtɩ hlũũgu. Bibyanããba dɩndɩn bà yáá nã́ã́ cwa toyur tũndii gundii bà siɛl^a, canããba nǝ̃ tãnkuuraa'n nũɔ̃gɩ sɩraa.

38 Cohuɔdaagɩ́ hlǝ pla pla ǹ-kã bá ta bà min nǝ̃ Isɩrayɛl bluuba. Bà tũmba, nǝ̃ wuramba nǝ̃ bà ninɲã, ɲã̀ yáá kwasǝnɲin'n kuruɔgǝ̃ngãã-i.

39 Bà mãã bà yáá bàa ɲǝ̃ǝ̃ ǹ-hiil-ba Misɩra yiɛgu, bà sáa hi ǹ-tɩgɩnǝ̃ǝ̃ wuur'n kuu nã, bà yáá bàa hi ǹ-tuu gùú bur jũmmã Misɩra yiɛgu, bà yáá ba-ń ce bá ba bà hĩɛ̃ mã̀-i. Mã̀ mãã mã̀ sáa mã̀ã hi ǹ-ɲǝ̃ǝ̃ sǝ, bá ba bà hĩɛ̃-mã nĩĩgu, mã̀ sáá mã̀ suro, mã̀ yáá pyandiɛ pyandiɛ nã́ã́ ɲinɲǝ̃ǝ̃m-i.

40 Isɩrayɛl furũntaabà yáá bàa ce bii tũndii nǝ̃ bii gur nǝ̃ nũɔ̃sɔ̃-i^b Misɩra yiɛgu.

41 Gɩ̀-lǝ gɩ̀ bii tũndii nǝ̃ bii gur nǝ̃ nũɔ̃sɔ̃ẁ jáa suu, Ta-n-maa yuugu, Fɩraa-Dũnnũ bluubá hlǝ Misɩra yiɛgu, bà duu bà ɲĩɛ̃ nã nã́ã́ sɩrǝǝsɩba-i.

42 Bà hiilɩm'n cɔ̃mmã Misɩra yiɛgu, mã̀ cíé Fɩraa-Dũnnũẃ ba nǝ̃-ba yisuɔgɩ min. Gɩ̀-lǝ gɩ̀ yisuɔgɩ̀ ji ba Dũnnũ kuu-i. Gùú cíé Isɩrayɛl bluubaa mãã bà ji duu nã furũũgɩ nã, bà ji ba ba-ń ce bá ce paaruugu ǹ-cɔ gɩ̀ yisuɔgu ǹ-bũũ Fɩraa-Dũnnũw.

Ta-n-maa hlũũgɩ mãã gɩ̀ saa gɩ́ wáà gùú tammã

43 Fɩraa-Dũnnũẃ fǝ̃ǝ̃ ǹ-waa nǝ̃ Musaba nǝ̃ Arɩnãw wà: «Dìí mãã Ta-n-maa cɔ̃mmã nã, dɩ̀-i nnĩĩ: curow mãã tatiiw, wù sǝ̃n da wù wuu gɩ̀ wuuri.

44 Wabiɛw mãã bàa sǝ̃ǝ̃-yǝ nǝ̃ wú ba yà síì, wù ji da ǹ-wuu.

45 Tatiiw-ń ba dàa yà jiraa ɲì kuugɩ nã, nǝ̃ mããcierw mãã ɲi pã-yǝ, bàá yo bà sǝ̃n da bà wuu.

46 Wuur díɛ̀, dɩ̀ min dɩ̀ wuu suɔ'n kusunã-i, kuu'n sǝ̃n da gɩ̀ hlǝ taasǝ̃ǝ̃nǝ̃ǝ̃gu. Curo'n sǝ̃n saa wú duu ǹ-ka kukuugǝ.

47 Isɩrayɛl nũɔ̃ntaaba min, bà saa bá ce paaruu gúɔ̀.

48 Noriiẁ mãã yà jiraa ɲì kuugɩ nã, wu-ń wa wú dii wù nũɔ̃gu Fɩraa-Dũnnũ cɔ̃mmã nã, wù suɔ'n bibyanããba min bà saa bá síì, nǝ̃ bá da ǹ-wuu gɩ̀ wuuri. Bibiɛ wo bibiɛ mãã wù sáa sii, wù sǝ̃n da wù wuu gɩ̀ wuuri.

49 Isɩrayɛl bluuba nǝ̃ noraabaa mãã bàa jiraa bà sǝ̃ǝ̃nã, bà min bà saa bá blǝ cɔ̃m mã́ã̀ tammã dɩn-i.»

50 Fɩraa-Dũnnũẁ wáalá cɔ̃m wo cɔ̃m nǝ̃ Musaba nǝ̃ Arɩnãw, Isɩrayɛl bluubá ce mã̀ min.

51 Gùú yuugɩ-i, Fɩraa-Dũnnũẃ hiil Isɩrayɛl bluuba Misɩra yiɛgu, bá ba bà duu bà ɲĩɛ̃ nã nã́ã́ sɩrǝǝsɩba-i.