Isɩrayɛl Bluu'n Waali (Exode) 11

Narfaalyǝw: byadĩɛ̃lãã'n kuugu

Fɩraa-Dũnnũẃ waa nǝ̃ Musaw wà: «Mǝ̃̀ ji piɛ narfaalyǝw Farawunãw nǝ̃ Misɩra yiɛntaaba drɔ. Dɩ̀-lǝ dɩ-ń ce, wù ji ya ɲí maar, wù ji ɲǝ̃ǝ̃-ɲã́ã̀ nǝ̃ ɲǝ̃ǝ̃m nã-i ɲí hlǝ wù yiɛgu.

2 Kã n ga waa nǝ̃ Isɩrayɛl bluuba wà bibyanãã wo, canãã wo, curo wo curo, wú waa nǝ̃ wù jiratiiw wà wú hã-yǝ nǝ̃ kwaplar'n wariɛgaa nǝ̃ sãnã yaga.»

3 Fɩraa-Dũnnũẁ cíé Misɩra yiɛntaabá ne Isɩrayɛl bluu'n yiɛgu. Farawunã cokuganãmba nǝ̃ Misɩra yiɛntaabá nǝ̃ bàa ce Musaẃ ce cogǝ̃ngã-i.

4 Musaẃ kãã waa nǝ̃ Farawunãw wà: «Fɩraa-Dũnnũẁ wa yisɔvũnvǝ̃ǝ̃gǝgu, wu ji jãn ǹ-waaraa Misɩra yiɛgɩ nã.

5 Wà Misɩra yiɛ'n biidĩɛ̃lããba min ba ji kurǝǝ ǹ-baal. Ǹ-tuu Farawunãw mãã yuuntigǝ̃ngãw, wù byadĩɛ̃lw nã fuwɔ ǹ-ga kra wacijal'n byadĩɛ̃lw nã. Kwasǝnɲin'n biidĩɛ̃lãã yo, bà min bà ji kurǝǝ.

6 Gùú kúú'n kaaluuguu mãã gɩ̀ ji ba Misɩra yiɛgu gɩ̀ yuugu, curo'n sáa hi nɔ̃ gɩ̀ kaaluu'n plǝrɩ nã ǹ-da, curo'n síì nɔ̃ gɩ̀ nã ǹ-da yo.

7 Nǝ̃ Isɩrayɛl bluuba sǝ̃ǝ̃nã, halle tafĩɛ̃'n síì kaal curo'n yuunã, yindagǝ nã kwasǝnkuu'n yuunã, ɲí da ǹ-fǝ̃ǝ̃ wà Fɩraa-Dũnnũw pyáríɛ Misɩra yiɛntaaba Isɩrayɛl bluuba nã.»

8 Musaw nã̀ã ver ǹ-ba wù waa nǝ̃-yǝ wà: «Gɩ̀-lǝ gɩ̀ bǝ̃ǝ̃gu, ǹ cokuganãmba min mãã nnĩĩ, bà ji hiirǝǝ ǹ-juo kuulǝǝ mǝ̃̀ yigagɩ nã ǹ-ba bà waa nǝ̃-m wà mǝ̃́ hlǝ Misɩra yiɛgu nǝ̃ cwaaba min mãã bà duu mǝ̃̀ nã. Dɩ̀-lǝ dìí furũũgɩ nã-i, mǝ̃̀ ji hlǝ Misɩra yiɛgu.» Musaẃ fǝ̃ǝ̃ ǹ-piirǝǝ ǹ-hlǝ Farawunã kuugɩ nã.

9 Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Farawunãẁ síì nɔ̃ ǹ-hã-ɲã́ã̀, gùú ji ce mǝ̃́ da ǹ-ce cɔ̃nnuromcin.»

10 Musaba nǝ̃ Arɩnãw, bà cíé cɔ̃nnurom mã́ã́ min Farawunã yigagɩ nã, nǝ̃ Fɩraa-Dũnnũẁ yáá wùu ce Farawunã yuugɩ́ ba gɩ̀ gbǝ̃ǝ̃, wù sáa hũɔ̃ ǹ-ya Isɩrayɛl bluubá hlǝ wù yiɛgu.