Isɩrayɛl Bluu'n Waali (Exode) 10

Nar nɩrsiɛlnãw: Jisɔ̃nããba

Fɩraa-Dũnnũẃ waa nǝ̃ Musaw wà: «Kã Farawunãw nãã, mǝ̃n-lǝ mã́ã cíé wùú nǝ̃ wù cokuganãm'n yunɲã́ ba ɲã̀ gbǝ̃ǝ̃, ǹ-ji da ǹ-pɩgaa-ba nǝ̃ cɔ̃nnurom mã́ã̀ min mãã mǝ̃̀ ce-mã.

2 Nǝ̃ n ji da ǹ taa-dǝ ǹ ja ǹ tãnkuuraaba, nǝ̃ ǹ huɔnbiiba, mǝ̃̀ mãã mǝ̃̀ páaráa nǝ̃ Misɩra yiɛntaaba nĩĩguu mãã, nǝ̃ mǝ̃̀ cíé gùú cɔ̃nnorɩmmãã mãã mã̀ pɩgaa mǝ̃̀ fãngããgu bà sǝ̃ǝ̃nã. Gɩ̀-lǝ gɩ̀ nã, ɲi ji fǝ̃ǝ̃ wà mã́ã-i Fɩraa-Dũnnũw.»

3 Gùú nã-i, Musaba nǝ̃ Arɩnãw, bá fǝ̃ǝ̃ ǹ-kã Farawunã kuugɩ nã, ǹ-kãã waa nǝ̃-yǝ wà: «Fɩraa-Dũnnũw, Hebru Dũnnũw, wà n ji hũɔ̃ ǹ-ba ǹ nɔ̃ ǹ hã-yǝ bii bǝ̃ǝ̃-i? Wà n nǝ̃nǝ̃ǝ̃ hlũũgɩ nã, ń hã wù bluuba, bá da ǹ-ga bũũ-yǝ.

4 Wà nǝ̃-n hla ǹ sáa hã-ba nǝ̃ hlũũgu, wà cicuɔgu wu ga tĩɛ̃ jisɔ̃nããbá jo ǹ yiɛgu.

5 Wà bá ga juo suu ǹ yiɛ'n hlɔ̃mmã nã, curo'n síì ba wù da-mã nǝ̃ wù yisɩri. Dɔtrããgà júó ǹ-ji ce bǝ̃ǝ̃lǝ̃mmã, nã̀ã ya ɲã̀ã́ mãã ɲã́ ba, wà ba ji wuu ɲã̀ min, bá síì ya kuugɩ́ ba tubikuugu drɔ.

6 Wà ba ji yu ǹ suɔgu, ǹ cokuganãm'n swammã, nǝ̃ Misɩra yiɛntaaba min swammã. Wà ǹ-tuu ǹ tǝvũnvãnãã'n bǝ̃ǝ̃gu ǹ-ji vaa nǝ̃ jimããgu, curo'n síì wa wú híí ǹ-da nar wáà tuugu.» Musabá fǝ̃ǝ̃ ǹ-hlǝ Farawunã suɔgu ǹ-ta.

7 Farawunã cokuganãmbá fǝ̃ǝ̃ ǹ-waa nǝ̃-yǝ wà: «Ǹ mãã ǹ da biɛ wáà síì ya wù gaabɩbliɛgá ba, ya Isɩrayɛl bluubá maar ǹ-ga bũũ Fɩraa-Dũnnũw, bà Dũnnũw. Yíǹ sǝ̃n da wà Misɩra yiɛgɩ́ bǝ̃ǝ̃lǝ̃ǝ̃ gɩ̀ maar-ì?»

8 Bá tĩɛ̃ ǹ-be Musaba nǝ̃ Arɩnãw, bá kã Farawunãw nãã. Farawunãẃ kãã waa nǝ̃-ba wà: «Ɲi ji gbǝ̃ǝ̃ ǹ-maar ǹ-ga bũũ Fɩraa-Dũnnũw ɲì Dũnnũw. Nǝ̃ haba sáalà bá maar-lǝ?»

9 Musaẃ siɛ-yǝ wà: «Yi mãã yì kã yi ga ce paaruugu yì bũũ Fɩraa-Dũnnũw, yi ji maar nǝ̃ yì tãnkuuraaba, yì vũnvãtaaba, yì byanããba, yì bisiiba, nǝ̃ yì kwasǝnɲinɲiɲũgɔ̃nɲã, nǝ̃ ɲããgǝ̃ngãnɲã.»

10 Farawunãẃ fǝ̃ǝ̃ ǹ-siɛ-yǝ nǝ̃ jaabe cãwandi wà: «Fɩraa-Dũnnũẃ ba ɲì saa. Ũwũũ, mǝ̃̀ ji ya ɲí maar nǝ̃ ɲì suɔntaabá gba! Nǝ̃ bii cíé ɲí dii diibɩblar díɛ́ tuugu ɲì yunɲã nã?

11 Gbal-i, dɩ̀ síì ce gɩ̀-lǝ gɩ̀ tammã. Bibyanãã'n dɩn ji kãã bũũ Fɩraa-Dũnnũw ɲi sǝ̃n caa dìí sǝ-ì.» Bá fǝ̃ǝ̃ ǹ-ɲǝ̃ǝ̃ ǹ-tĩɛ̃ bá hal Farawunãw tuɔra.

12 Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Haar ǹ nãkruɔgu Misɩra yiɛ'n hlɔ̃mmãã drɔ, ń ce jisɔ̃nããbá juo suu Misɩra yiɛgɩ nã. Dɔtrããgà yíɛ́ kuu wo kuu'n tuugɩ́ ba, bá wuuraa ɲã̀ min nã!»

13 Musaẃ haar wù valblɩri, Fɩraa-Dũnnũẃ ce saluudaagɩ́ hlǝ bǝ̃ǝ̃'n pal'n yiɛgu ǹ-suu Misɩra yiɛgɩ nã bǝ̃ǝ̃ntã ǹ-ji kaal taaga. Ciibǝnũɔ̃gɩ nã, bá da saluugɩ̀ jo nǝ̃ jisɔ̃nããba.

14 Bá juo suu Misɩra yiɛgɩ nã, ǹ-yaaraa sɔnɲã min nã. Ba ji ba fuwɔ curo'n sáa hi ǹ-da bà tùú ǹ-da, curo'n síì da bà tùú yo hlo.

15 Ǹ-ji suu ɲũũrũũgɩ min nã, fuwɔ gɩ ji ba dũũ. Dɔtrããgà mãã gà sáá gàa bǝ̃ǝ̃lǝ̃ǝ̃ gùú hĩɛ̃gɩ nã mãã nǝ̃ gùú tubiɲin'n biiga nã, jisɔ̃nããbá wuu ǹ-baal ɲã̀-lǝ, gɩ ji ba curo'n sǝ̃n da pɩpɩrãnbirĩɛ̃gu tubikuu'n drɔ, nǝ̃ hĩɛ̃birĩɛ̃gu ɲũũrũũgu Misɩra yiɛgɩ min nã.

16 Farawunãẃ ce bá be Musaba nǝ̃ Arɩnãw kaliɛ kaliɛ, ǹ-juo waa nǝ̃-ba wà: «Mǝ̃̀ yúɔrúɔ Fɩraa-Dũnnũw saa, ɲì Dũnnũw, nǝ̃ ɲimãã yo ɲì saa.

17 Cíyà mǝ̃̀ dũndɔ yindiɛgu hlo, nǝ̃ ɲí jiɛriɛ nǝ̃ Fɩraa-Dũnnũw, ɲì Dũnnũw, ɲí hã-m, wú pyar nar wáà mǝ̃̀ yuunã.»

18 Musaẁ gáa hlǝ Farawunã kuugɩ nã, wú jiɛriɛ nǝ̃ Fɩraa-Dũnnũ,

19 wú fǝ̃ǝ̃ ǹ-ce salukɩnkandaarɩ́ hlǝ bǝ̃ǝ̃'n jãnɩm'n yiɛgu, ǹ-juo fiir ǹ-tuu jisɔ̃nããba, ǹ-kãã dii-ba Baabũmbɛ̃m'n hũmmã nã. Jisũɔ̃ dɩnẁ sáa yanãã Misɩra hlɔ̃mmã nã.

20 Nǝ̃ Fɩraa-Dũnnũẃ ce Farawunãẃ gbǝ̃ǝ̃ wù yuugu, wù sáa nǝ̃nǝ̃ǝ̃ Isɩrayɛl bluuba nã.

Nar densǝnãw: yirbyaari

21 Nã̀ã fǝ̃ǝ̃ ǹ-waa nǝ̃ Musaw wà: «Haar ǹ nãkruɔgu drɔgu, yirbyaarɩ́ suu Misɩra yiɛgɩ nã, fuwɔ cwaabá ba bà tɔ̃n nǝ̃ tɔ̃nɩmmã nã.»

22 Musaẃ fǝ̃ǝ̃ ǹ-haar wù nãkruɔgu drɔgu, yirbyaarɩ́ juo suu Misɩra yiɛgɩ min nã, ǹ-ji da bãnɲã siɛlɲã.

23 Gɩ̀-lǝ gɩ̀ bãnɲã siɛl kusuugɩ nã, curow-ń ba wù ne wù nãcurow, wù sǝ̃n da-yǝ, curo wo curo, wú ba wù wanjirammã nã. Nǝ̃ Isɩrayɛl bluu-lǝ, bà yáá gùú sùɔ́gu, kuugɩ́ ba gbaa gɩ̀-lǝ gɩ̀ sùɔ́gɩ nã.

24 Farawunãẃ fǝ̃ǝ̃ ǹ-be Musaw ǹ-juo waa nǝ̃-yǝ wà: «Máarà ɲi ga jãn ɲì Fɩraa-Dũnnũw, ɲì Dũnnũw. Ɲi ji gbǝ̃ǝ̃ ǹ-maar nǝ̃ ɲì tãnkuuraa yo, nǝ̃ ɲì kwasǝnɲin-lǝ, ɲã́ ba dìɛ.»

25 Musaẃ waa nǝ̃-yǝ wà: «Dɩ̀-lǝ dɩ̀ síì gbǝ̃ǝ̃ ǹ-ce. Yì mãã yi ga jãn Fɩraa-Dũnnũw nǝ̃ gùú kwasǝnɲinɲã, nǝ̃ ɲã̀ã́ mãã bà ga ye-ɲã nǝ̃ yellɩ nã, ǹ ji hã-yáà nǝ̃ ɲã̀ min.

26 Nǝ̃ hãmĩĩ yo, yì kwasǝnkuugɩ dɩngɩ̀ síì ba, yi ji maar nǝ̃ ɲã̀ min min. Yi ga ne ǹ-hiil ɲã̀ã́ sǝ̃ǝ̃nã-i ǹ-jãn Fɩraa-Dũnnũw, yì Dũnnũw. Nǝ̃ yi-ń ba yì sáa hi gɩ̀ sùɔ́gu, yì síì fǝ̃ǝ̃ yì mãã yì saa yí jãn-yǝ nǝ̃ gùú mãã.»

27 Fɩraa-Dũnnũẃ ce Farawunãẃ ba wù yugbǝ̃ǝ̃gǝgɩ nã, wù sáa nǝ̃nǝ̃ǝ̃ bá maar.

28 Nã̀ã waa nǝ̃ Musaw wà wú hlǝ wù suɔgu, wà wu-ń da-yǝ wù yigagɩ nã gùú yuugu, wú ko-yǝ-i.

29 Musaẃ fǝ̃ǝ̃ ǹ-waa nǝ̃ Farawunãw wà: «Ǹ wáalá sulam-i, mǝ̃̀ síì da ǹ yigagɩ nã hlo.»