Isɩrayɛl Bluu'n Waali (Exode) 7

Gɩ̀-i, Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Ne mǝ̃̀ ji ce ń ba nã́ã́ Dũnnũ-i Misɩra yuuntigǝ̃ngã'n yinɲã nã, nǝ̃ ǹ vũnvũɔ̃ Arɩnãẃ ba ǹ tanhiilw.

2 Mǝ̃̀ mãã mǝ̃̀ ji dii kuu wo kuu ǹ tũɔ̃gɩ nã, yíi ji pɩgaa-gǝ ǹ-ja ǹ vũnvũɔ̃ Arɩnãw. Wù-lǝ wùu ga waa-gǝ ǹ-ja Misɩra yuuntigǝ̃ngãw, wú da ǹ-ya Isɩrayɛl bluubá hlǝ wù yiɛgu.

3 Nǝ̃ mǝ̃n-lǝ, mǝ̃̀ ji ce Misɩra yuuntigǝ̃ngã'n yuugɩ ba gɩ̀ gbǝ̃ǝ̃, nã̀ã ce cɔ̃nnuromcin mã̀ã́ mãã mã̀ pɩgaa mǝ̃̀ fãngããgu Misɩra yiɛgu.

4 Misɩra yuuntigǝ̃ngãw sɩga nɔ̃ ǹ-hã-ɲã́ã̀, gɩ̀-i, mǝ̃̀ ji piɛ mǝ̃̀ fãngãã'n nãkruɔgu Misɩra yiɛgu drɔ, nã̀ã hiil mǝ̃̀ bluuba, Isɩrayɛl bluuba, tɩntãlũnɲã nã nã́ã́ sɩrǝǝsɩba-i, nã̀ã piir Misɩra yiɛntaaba.

5 Mǝ̃-ń ji piɛ mǝ̃̀ nãkrɔbɩblaagu Misɩra yiɛgu drɔ gùú bǝ̃ǝ̃gu, nã̀ã hiil Isɩrayɛl bluuba bà sǝ̃ǝ̃nã, gùú nã-i Misɩra yiɛntaabà ji fǝ̃ǝ̃ wà mã́ã-i Fɩraa-Dũnnũw.»

6 Musaba nǝ̃ Arɩnãw, bá ce-dǝ nã́ã́ Fɩraa-Dũnnũẁ wáalá-dǝ nǝ̃-ba nĩĩguu mãã.

7 Gùú nã mãã Musaba nǝ̃ Arɩnãw, bà kã́ã́ ǹ-ga wanãã nǝ̃ Farawunãw, Musaẁ yáá nǝ̃ bii jiɛtuugɩ-i, nǝ̃ Arɩnãẃ ba nǝ̃ bii jiɛtuu nǝ̃ gà siɛl.

Farawunãẁ hla wù sáa nɔ̃ ǹ-hã Musaba nǝ̃ Arɩnãw

8 Fɩraa-Dũnnũẃ waa nǝ̃ Musaba nǝ̃ Arɩnãw wà:

9 «Farawunãw-ń wa ɲí ce cɔ̃nnorɩmmã ǹ-hã wú ne, waa nǝ̃ Arɩnãẃ tuu wù valblɩri ǹ-nǝ̃ǝ̃ ǹ-kra-dǝ wù yigagɩ nã. Valblɩrɩ ga cin waalw.»

10 Musaba nǝ̃ Arɩnãw, bá kã Farawunã kuugɩ nã ǹ-kãã ce-dǝ nã́ã́ Fɩraa-Dũnnũw wáalá-dǝ nǝ̃-ba nĩĩguu mãã. Arɩnãẁ gáa nǝ̃ǝ̃ ǹ-kra valblɩri, Misɩra yuuntigǝ̃ngãw nǝ̃ wù cokuganãm'n yigagɩ nã, dɩ́ cin waalw.

11 Misɩra yuuntigǝ̃ngãẃ fǝ̃ǝ̃ ǹ-tĩɛ̃ ǹ-be Misɩra fǝ̃ǝ̃kuutaaba nǝ̃ gɩ̀ kaaraaba, bàá yo bá juo ce gùú dɩ dɩndɩ-i nǝ̃ bà guufǝ̃ǝ̃gǝgu.

12 Curo wo curo, wú juo nǝ̃ǝ̃ ǹ-kra wù valblɩri, dɩ́ cin waalw. Nǝ̃ Arɩnã waalẃ fǝ̃ǝ̃ ǹ-suro ǹ-hĩĩ bà waalaaba.

13 Nǝ̃ dɩ̀-lǝ dɩ̀ min nã, Misɩra yuuntigǝ̃ngã'n yuugɩ́ hla nã̀ã ba gɩ̀ gbǝ̃ǝ̃ nã́ã́ Fɩraa-Dũnnũw yáá wùu waa-dǝ nĩĩguu mãã, wù sáa nɔ̃ ǹ-hã Musaba nǝ̃ Arɩnãw.

Nardĩɛ̃lnãw: Hũmmã cin twammã

14 Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Farawunãẁ jáa gbǝ̃ǝ̃ wù yuugu, ǹ-hla wà wú síì ya Isɩrayɛl bluubá maar.

15 Cicuɔ'n ciibǝǝgu, kã Farawunãw nãã, wù mãã wù kã hũm'n nũɔ̃gɩ nã gùú bǝ̃ǝ̃gu. Ga ba ǹ fennãã wù nã lwaa'n nũɔ̃gɩ nã, nǝ̃ ń tuu valblɩri dìí mãã dɩ̀ yáá dìi cin waalẁ ń blǝ ǹ nãkruɔ nã.

16 Ga waa nǝ̃-yǝ wà mã́ã Fɩraa-Dũnnũ mã́ã̀, mã́ã mãã Hebru Dũnnũw, mǝ̃ tĩ́ɛ̃lã́-n wà n juo waa nǝ̃-yǝ wà wú ya mǝ̃̀ bluubá maar ǹ-ga bũũ-m jerkwaarɩ nã, nǝ̃ wu sǝ wùu nɔ̃ ǹ-hã-m ǹ-ji vaa nǝ̃ kuɔkuɔgu.

17 Gùú cíé mã́ã Fɩraa-Dũnnũ mã́ã̀, mǝ̃́ wa gùú mãã gɩ̀ ji ce wú fǝ̃ǝ̃ mǝ̃̀ mãã gùú tiiw, wà gɩ̀-i nnĩĩ: mǝ̃̀ ji mũũ nil lwaa'n hũmmã nǝ̃ valblɩri mãã mǝ̃̀ nãkruɔgɩ nã, mã́ cin twammã.

18 Tɩtraabaa mãã lwaagɩ nã, bà ji kurǝǝ nǝ̃ nil lwaa'n hũmmã́ hwar ǹ-ba mã̀ hɔ̃ fuwɔ Misɩra yiɛntaaba ji ba bà síì gbǝ̃ǝ̃ ǹ-ɲũɔ̃ hũm mã́ã̀.»

19 Fɩraa-Dũnnũẃ waa nǝ̃ Musaw hlo wà: «Waa nǝ̃ Arɩnãw wà wú tuu wù valblɩri ń hǝ̃gãã-dǝ Misɩra hũm'n sɔsǝrɩ min nã, kwasǝri, vãliɛga, nǝ̃ nulwanɲã, ɲã̀ min ɲã̀ hũmmã cin twammã. Twammã̀ ji ba sɔnɲã min, halle hũndiiɲinɲãã mãã dan'n ɲinɲã, nǝ̃ tɩntrã'n ɲinɲã.»

20 Fɩraa-Dũnnũẁ wáalá-dǝ nĩĩgu, Musaba nǝ̃ Arɩnãw bá ce-dǝ gùú tammã. Arɩnãẃ haar valblɩri ǹ-mũũ lwaa'n hũmmã, Farawunãẃ nǝ̃ wù bluu'n yinɲã nã, lwaa'n hũmmã min mã́ cin twammã.

21 Tɩtraabá kurǝǝ ǹ-piɛ kuu hũm'n hwarɩmmã nã, fuwɔ Misɩra yiɛntaabá ba bà síì gbǝ̃ǝ̃ ǹ-ɲũɔ̃-mã hlo. Hũmmã̀ yáá sùɔ́ wo sùɔ́ mã̀ min mã́ cin twammã.

22 Nǝ̃ Misɩra fǝ̃ǝ̃kuutaa yo, bá juo ce gùú dɩ̀ dɩndɩ-i nǝ̃ bà guufǝ̃ǝ̃gǝgu. Farawunãẃ fǝ̃ǝ̃ ǹ-ba wù yugbǝ̃ǝ̃gǝgɩ nã, wù sáa nɔ̃ ǹ-hã Musaba nǝ̃ Arɩnãw, nã́ã́ Fɩraa-Dũnnũw yáá wùu waa-dǝ nĩĩguu mãã.

23 Farawunãẃ ver ǹ-ta wù kũũ wù sáa ne dɩ́ ba cɔ̃m yo sa.

24 Misɩra yiɛntaabà mãã bà sáá bà ji gbǝ̃ǝ̃ ǹ-ɲũɔ̃ lwaa'n hũmmã sǝ, gɩ̀-i, bà min bá ka hũnfosǝri lwaa gúɔ̀ nũɔ̃gɩ nã, ǹ-da ǹ-ba bà da hũnɲũɔ̃mã.

25 Fɩraa-Dũnnũẁ mṹũlã́ Nil lwaa'n hũmmã́ cin ǹ-ce bãn nɩrhǝ̃ǝ̃l.

Narba hǝ̃ǝ̃lnãw: Maalagbarnããba

26 Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Kã Farawunãw nãã n ga waa nǝ̃-yǝ wà mã́ã Fɩraa-Dũnnũ mǝ̃n wa wú nǝ̃nǝ̃ǝ̃ mǝ̃̀ bluuba nã, bá da ǹ-kãã bũũ-m.

27 Wà wu-ń hla wà wu síì hã-ba nǝ̃ hlũũgu bá maar, mǝ̃ ji ce maalagbarnããbá juo suu wù yiɛgɩ nã.

28 Wà lwaagɩ ji yu nǝ̃ maalagbarnããba. Wà ba ji hlǝ lwaagɩ nã ǹ-kãã jãn wù suɔgu, ǹ-jãn wù docɔgǝgɩ nã, fuwɔ ǹ-ga yugo wù guumǝ̃rãkuugu drɔ. Wà ba ji jãn wù cokuganãmbaa drɔ, nǝ̃ wù yiɛntaaba min drɔ. Wà ba ji yurǝǝ yigasǝrɩ nã nǝ̃ wù wariɛga nã.

29 Wà maalagbarnããba ga juo yugo wù drɔ, ǹ-yugo wù cokuganãmba drɔ, nã̀ã yugo wù yiɛntaaba min drɔ.»