Isɩrayɛl Bluu'n Waali (Exode) 6

Fɩraa-Dũnnũẃ siɛ Musa wà: «Kuɔkuɔgɩ-i, ǹ ji da mǝ̃̀ mãã mǝ̃̀ ji ce dìí mãã Farawunãw nã! Mǝ̃̀ ji piɛ mǝ̃̀ fãngãã'n nãkruɔgu wù drɔ, gɩ̀-lǝ gùú ji guur-yǝ wú nǝ̃nǝ̃ǝ̃ hlũũgɩ nã ǹ-hã Isɩrayɛl bluubá maar. Mǝ̃̀ fãngãã'n nãkruɔguu ji guur-yǝ, wú ɲǝ̃ǝ̃ ǹ-hiil-ba nǝ̃ wù hla.»

Dũnnũẁ waa nǝ̃ Musaw wà wu ji hũɔ̃ Isɩrayɛl bluuba ǹ-nǝ̃nǝ̃ǝ̃ bà nã

2 Dũnnũẃ fǝ̃ǝ̃ ǹ-waa nǝ̃ Musaw hlo wà: «Mã́ã-i Fɩraa-Dũnnũw.

3 Mǝ̃̀ pɩ́gará mǝ̃̀ hla fufodii ǹ-ja Ibramãba nǝ̃ Isiyagaw, nǝ̃ Yakubaw, wà mã́ã-i Fãngããgɩmintii-Dũnnũw, nǝ̃ mǝ̃̀ sáa waa nǝ̃-ba wà mǝ̃̀ yir-i Fɩraa-Dũnnũw.

4 Mǝ̃̀ cíé yi ɲũɔ̃ twammã nǝ̃-ba, nã̀ã pã mǝ̃̀ nũɔ̃gu wà mǝ̃ ji hã-ba nǝ̃ Kanãã yiɛgu, bà yáá norsǝrɩ nã gùú sùɔ́guu mãã.

5 Kuɔkuɔ-lǝ, Misɩra yiɛntaabà mãã bà piɛ gùú ywaruuguu mãã Isɩrayɛl bluuba drɔ, mǝ̃́ nìɛ mǝ̃̀ nɔ̃ bà guusuugɩ nã. Mǝ̃̀ cíé yi ɲũɔ̃ twammã nǝ̃-ba dìí nã mãã, mǝ̃́ nìɛ mǝ̃̀ kãnãã dɩ̀ nã.

6 Gùú cíé mǝ̃́ waa ń kã n ga waa nǝ̃-ba wà mǝ̃n wáalá wà mã́ã-i Fɩraa-Dũnnũw, wà Misɩra yiɛntaaba mãã bà guur bá ba bà ce gùú mããcemmã, mǝ̃ ji hiil-ba mã̀ nã. Mǝ̃̀ ji hũɔ̃-ba ǹ-nǝ̃nǝ̃ǝ̃ fãngããgɩ nã, nã̀ã piir Misɩra yiɛntaaba.

7 Mǝ̃̀ ji ce bá ba mǝ̃̀ bluuba, nǝ̃ mǝ̃n ba bà Dũnnũw. Bà ji fǝ̃ǝ̃ wà mã́ã-i Fɩraa-Dũnnũw, bà Dũnnũw, wùú mãã wù híilá-ba Misɩra yiɛgu mããcegbǝ̃ǝ̃mã nã.

8 Mǝ̃̀ plã mǝ̃̀ nũɔ̃gu ǹ-hã Ibramãba nǝ̃ Isiyagaw, nǝ̃ Yakubaw gùú yiɛ'n cɔ̃mmã nã mãã, mǝ̃̀ ji kã nǝ̃-ba gɩ̀ sùɔ́gɩ nã. Mǝ̃̀ ji hã-ba nǝ̃-gǝ, gɩ́ ba bàá kuugu. Mã́ã Fɩraa-Dũnnũ, mǝ̃n-lǝ mã́ã wáalá-dǝ.»

9 Musaẃ kãã taa-dǝ ǹ-ja Isɩrayɛl bluuba, nǝ̃ mããcegbǝ̃ǝ̃mã nǝ̃ mããjãmmã̀ mãã mã̀ yáá mã̀ã bũũ bà nã, bà sáa nɔ̃ ǹ-hã-yǝ.

10 Fɩraa-Dũnnũẃ ver ǹ-waa nǝ̃ Musaw hlo wà:

11 «Kã Farawunãw nãã, Misɩra yiɛntaa'n yuuntigǝ̃ngãw, n ga waa nǝ̃-yǝ wà wu nǝ̃nǝ̃ǝ̃ hlũũgɩ nã ǹ-hã Isɩrayɛl bluuba hlǝ wù yiɛgu.»

12 Musaẃ fǝ̃ǝ̃ ǹ-siɛ-yǝ wà: «Woo Isɩrayɛl bluuba-i bà sáa nɔ̃ ǹ-hã-m, nã̀ã ji wa Farawunã! Mã́ã mãã mǝ̃̀ nãmbendɩ sǝ̃n dwal cãwandɩ nã.»

13 Gɩ̀-i, Fɩraa-Dũnnũẃ fǝ̃ǝ̃ ǹ-ce Musaba nǝ̃ Arɩnãw, bá suro ǹ-kã Isɩrayɛl bluuba nãã, nã̀ã kã Farawunãw nãã, ǹ-da ǹ-da hlũũgu ǹ-hlǝ Misɩra yiɛgu.

Musaba nǝ̃ Arɩnã bà nũɔ̃'n cɔ̃mmã

14 Isɩrayɛl bluu'n pla'n vũnvãnãã'n yiriɛga-i nnĩĩ: Yakuba byadĩɛ̃l Wurbɛn tãnkuuraabaa yáá nnĩĩ: Hanɔkɩw, Paluw, Hɛsɩrɔ̃w, nǝ̃ Karɩmiw. Bà-lǝ bà-i Wurbɛn plǝr'n vũnvãnããba.

15 Simeyɔ̃ tãnkuuraabaa yáá nnĩĩ: Yemuwɛlw, Yamɛ̃w, Ohadɩw, Yakɛ̃w, Soharw, nǝ̃ Sahulw, wù-lǝ wù ɲũw yà Kanãã yiɛntacijal-i. Bà-lǝ bà-i Simeyɔ̃ plǝr'n vũnvãnããba.

16 Levi nũɔ̃ntaa'n yiriɛga-i nnĩĩ gà duu gà ɲĩɛ̃ nã: Levi díɛ́ pũmpɩrbiiba siɛl: Gɛrsɔ̃mw, Kehatɩw, Merariw. Levi díɛ́ bii gundii nǝ̃ bii gur nǝ̃ nũɔ̃sɔ̃ nǝ̃ nɩrhǝ̃ǝ̃l-i, nã̀ã fǝ̃ǝ̃ ǹ-ku.

17 Gɛrsɔ̃mẃ juo da pũmpɩrbiiba hǝ̃ǝ̃l: Livɩniw, Simeyiw, nǝ̃ bàá nǝ̃n jáa duu bà-lǝ bà furũũgɩ nã.

18 Kehatɩẃ juo da pũmpɩrbiiba nnǝ̃ǝ̃: Amɩramw, Isaarɩw, Hebrɔ̃w, nǝ̃ Husɛlw. Kehatɩẁ díɛ́ bii gundii nǝ̃ bii gur nǝ̃ nũɔ̃sɔ̃ nǝ̃ gà siɛl-i, nã̀ã fǝ̃ǝ̃ ǹ-ku.

19 Merariẃ juo da pũmpɩrbiiba hǝ̃ǝ̃l: Mahiliw, bá nǝ̃ Muusɩw. Levi nũɔ̃ntaaba-i nĩĩgu, bà duu bà ɲĩɛ̃ nã.

20 Amɩramẃ juo taa wù tǝ tǝ̃ǝ̃ Yokebɛdɩw. Bà-lǝ bàá húulá Arɩnãba nǝ̃ Musaw. Amɩramẁ cíé bii gundii nǝ̃ bii gur nǝ̃ nũɔ̃sɔ̃ nǝ̃ nɩrhǝ̃ǝ̃l-i, nã̀ã ji fǝ̃ǝ̃ ǹ-ku.

21 Isaarɩẃ juo da pũmpɩrbiiba siɛl: Koraw, Nɩfew, nǝ̃ Sɩkɩrw.

22 Husɛlẃ suro ǹ-da pũmpɩrbiiba siɛl Mikayɛlw, Elisafãnɩw nǝ̃ Sitɩrw.

23 Arɩnãẃ juo taa Aminadabɩ bisĩɛ̃ Elisǝba. Wù vũnvũɔ̃ yáá nǝ̃ Nãsɔ̃w. Wù-lǝ wú juo huu pũmpɩrbiiba nnǝ̃ǝ̃ ǹ-hã-yǝ; bà-lǝ bà-i: Nadabɩw, Abihuw, Elasaarw nǝ̃ Itamarw.

24 Kora pũmpɩrbiiba siɛl bà-i nnĩĩ: Asiirw, Ɛlɩkãnãw nǝ̃ Abiyasafɩw. Bà-lǝ bà-i Kora plǝr'n nũɔ̃ntaaba.

25 Arɩnã bíɛ́ Elasaarẃ juo taa Putiyɛl bisĩɛ̃diɛ. Bá da pũmpɩrblɩ ǹ-suu-yǝ Pinɩhasɩ. Bà-lǝ bà-i Levitɩba plǝr'n nũɔ̃'n vũnvãnããba.

26 Fɩraa-Dũnnũẁ yáá wùu waa nǝ̃ gùú Arɩnãw-i nǝ̃ gùú Musaw-i wà: «Tɩ́gɩnǝ̃̀ǝ̃ Isɩrayɛl bluuba nã pla pla nã́ã́ sɩrǝǝsɩba-i, ɲí hiil-ba Misɩra yiɛgu.»

27 Musaba nǝ̃ Arɩnãw, bá fǝ̃ǝ̃ ǹ-ta Misɩra yuuntigǝ̃ngã Farawunãw nãã ǹ-kãã waa nǝ̃-yǝ wà wú ya Isɩrayɛl bluubá hlǝ wù yiɛgu.

28 Fɩraa-Dũnnũẁ gáa waa cɔ̃mmã nǝ̃ Musaw Misɩra yiɛgu gùú yuugu,

29 wú waa nǝ̃-yǝ wà: «Mã́ã-i Fɩraa-Dũnnũw, kã n ga ver ǹ-tu mǝ̃̀ cãwanĩɛ̃ga nã ń ja Misɩra yuuntigǝ̃ngã Farawunãw.»

30 Musaẃ siɛ Fɩraa-Dũnnũw wà: «Mǝ̃n nãnbendɩ̀ sǝ̃n dwal cãwandɩ nã, Misɩra yuuntigǝ̃ngãẁ ga hũɔ̃ ǹ-nɔ̃ ǹ-hã mã́ã tam hamã-i?»