Isɩrayɛl Bluu'n Waali (Exode) 4

Dũnnũẁ pɩgaa Musaw nǝ̃ wù guufǝ̃ǝ̃gǝgu

Musaẃ fǝ̃ǝ̃ ǹ-siɛ-yǝ wà: «Bà sɩga nɔ̃ ǹ-hã-m, bà sɩga hũɔ̃ mǝ̃̀ cãwandi, bà ga hla wà Fɩraa-Dũnnũw sáa caalaa mǝ̃̀ nã.»

2 Fɩraa-Dũnnũẃ fǝ̃ǝ̃ ǹ-yugu-yǝ wà: «Bingǝ-i, ǹ nãkruɔgɩ nã?» Musaẃ siɛ-yǝ wà «valblɩ-i.»

3 Wú fǝ̃ǝ̃ ǹ-waa nǝ̃-yǝ wà: «Nǝ̃ǝ̃ ń kra-dǝ ɲũũrũũgu.» Musaẃ nǝ̃ǝ̃ ǹ-kra dɩ̀ nã, dɩ́ cin waalw, Musaẃ fǝ̃ǝ̃ ǹ-ba wù kwar.

4 Fɩraa-Dũnnũẃ waa nǝ̃-yǝ wà: «Hiil ǹ nãkruɔgu ń blǝ-yǝ wù pluu'n yiɛgu.» Wú hiil wù nãkruɔgu ǹ-blǝ-yǝ, wú ver ǹ-ba valblɩri, dɩ̀ tammã nã.

5 Gɩ̀-i, Fɩraa-Dũnnũẃ fǝ̃ǝ̃ ǹ-waa nǝ̃-yǝ wà: «Nǝ̃-ń ga ce dɩ̀-lǝ, bà ga hũɔ̃ wà Fɩraa-Dũnnũẃ caalaa ǹ nã, wà wɩ̀-i bà tǝvũnvãnãã'n Dũnnũw nã̀ã ba Ibramãw, nǝ̃ Isiyagaw, nǝ̃ Yakuba bà Dũnnũw.»

6 Nã̀ã fǝ̃ǝ̃ ǹ-waa nǝ̃-yǝ hlo wà: «Dii ǹ nãkruɔgu ǹ kuulaadiiyǝw taara.» Wú dii-gǝ sǝ̃nkũnsǝrɩ́ juo nǝ̃ǝ̃rǝ̃ǝ̃ gɩ̀ drɔ, gɩ́ paa ǹ-juo ba cwayii.

7 Dũnnũẃ waa nǝ̃-yǝ hlo wà: «Ver ń dii-gǝ ǹ kuulaadiiyǝw taara.» Musaẃ dii wù nãkruɔgu, wù gáa hiil-gǝ, gɩ̀-lǝ gɩ̀ nã gɩ́ juo ver ǹ-ba gɩ̀ tantammã nã.

8 Dũnnũẃ waa nǝ̃-yǝ: «Isɩrayɛl bluuba-ń ba bà sáa hũɔ̃ ǹ yalli valblɩ'n cɔ̃mmã nã-i yo, sǝ̃nkũnsǝ'n cɔ̃m-lǝ, mã̀ ga ce bá hũɔ̃.

9 Gɩ̀-lǝ gɩ̀ cɔ̃nnorɩmmã hǝ̃ǝ̃lmã min mã-ń ce, nǝ̃ bá ba bà sáa hũɔ̃ ǹ-nɔ̃ ǹ-hã-n, ń kã n ga kaa Nil lwaa'n hũmmã ń tũnũũ mã̀ nã ɲũũrũũgu, ǹ ga da hũm mã́ã̀, mã̀ min mã̀ã cin twammã.»

Dũnnũẁ piɛ Arɩnãw, Musaw drɔ

10 Musaẃ fǝ̃ǝ̃ ǹ-waa nǝ̃ Fɩraa-Dũnnũw wà: «Mǝ̃̀ tii, ce mǝ̃̀ kafal, mǝ̃n nũɔ̃gɩ̀ sǝ̃n dwal cãwandɩ nã kuɔkuɔ cɔ̃m sǝ, mǝ̃̀ tãnkuuram nã-i dìi, fuwɔ ǹ-ji hi ǹ mãã ǹ dúú nã ǹ waa cɔ̃mmã nǝ̃-m gùú nã mãã, mǝ̃̀ nũɔ̃gɩ sǝ gùu dɩganãã.»

11 Dũnnũẃ fǝ̃ǝ̃ ǹ-waa nǝ̃-yǝ wà: «Halii hlã́ã̀ curow nǝ̃ nũɔ̃gu? Halii cíyà curoẃ ba kũnkunĩĩw, yindagǝ nã tɔ̃njǝrw? Halii cíyà daratiiw nǝ̃ yɩrnĩĩ-lǝ? Fɩraa-Dũnnũ mã́ã sǝ-ì?

12 Yíí maar, mǝ̃̀ ga ciɛl ǹ nũɔ̃gu. Ǹ mãã ǹ saa ń waa dìí mãã, mǝ̃̀ ga pɩgaa-n nǝ̃-dǝ.»

13 Musaẃ hla nã̀ã waa wà: «Mǝ̃̀ tii, ce kukuɔya nǝ̃ ń tĩɛ̃ wudiɛ!»

14 Fɩraa-Dũnnũ hiɛgá fǝ̃ǝ̃ ǹ-dũ nǝ̃ Musaw, wú waa nǝ̃-yǝ wà: «Ǹ vũnvũɔ̃ Arɩnãẁ mãã Levi nũɔ̃ntiiw, wù sɩraa-ì? Wù-lǝ wù fǝ̃́ǝ̃lã́ cãwandi. Wú nàa hlũũgɩ nã wù jo. Wu-ń ji da-n, gɩ̀ ji dwal wù nã.

15 Wù mãã wù sáalá wú waa dìí mãã, yíi ji waa-dǝ ǹ-ja-yǝ. Nǝ̃ ɲi mãã ɲì saa ɲí waa cɔ̃m wo cɔ̃m, mǝ̃n ga dii-mã ɲì nũɔ̃gɩ nã. Cɔ̃m wo cɔ̃mmã ɲi sáalá ɲí ce-mã, mǝ̃̀ ga pɩgaa-ɲã́ã̀ nǝ̃-mã.

16 Wù ga ba wù hiil ǹ cãwandɩ nã wù ja cwaaba, nǝ̃ yíǹ ba ǹ dii cãwanĩɛ̃ga wù nũɔ̃gɩ nã́ã́ Dũnnũ-i bá nǝ̃ wù tanhiilw.

17 Nǝ̃ yíí blǝ valblɩ díɛ̀ ǹ nãkruɔgɩ nã, ǹ ga ba ǹ ce cɔ̃nnorɩmmã nǝ̃ dɩ̀-i.»

Musaẁ ver ǹ-kã Misɩra yiɛgu

18-19 Gɩ̀ furũũgɩ nã, Fɩraa-Dũnnũẃ waa nǝ̃ Musaw Mãdiyãgu wà: «Suro ń ver ń maar Misɩra yiɛgu. Bà min mãã bà yáá bà caa bá ko-n, bà kurǝǝ ǹ-baal.» Gɩ̀-i, Musaẃ fǝ̃ǝ̃ ǹ-kã wù curɔ Setrow nãã, ǹ-kãã waa nǝ̃-yǝ wà: «Mǝ̃̀ caa mǝ̃́ kãã dǝ̃ǝ̃ mǝ̃̀ cwanããba Misɩra yiɛgu ǹ-ne fíí bá nàa nũmǝ̃nã yo.» Setroẃ fǝ̃ǝ̃ ǹ-waa nǝ̃-yǝ wà: «Hlũũgɩ́ dii-ɲã́ã̀.»

20 Musaẃ fǝ̃ǝ̃ ǹ-tuu wù ciɛw, ba nǝ̃ wù tãnkuuraaba ǹ-piɛ kǝkũmnããba drɔ, nã̀ã blǝ wù valblɩri wù nãkruɔgɩ nã, nǝ̃ bá fǝ̃ǝ̃ ǹ-tuu Misɩra hlũũgu.

21 Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Mǝ̃̀ pɩ́gará ǹ-ja-n nǝ̃ cɔ̃nnorɩm'n plaaga min cel'n tammã. Nǝ̃-ń ga ba nã̀ã hi Misɩra yiɛgu, ń ce gà min Farawunã yigagɩ nã. Nǝ̃ mǝ̃̀ ga ce wù yuugɩ ba gɩ̀ gbǝ̃ǝ̃, wú báa da ǹ-nǝ̃nǝ̃ǝ̃ Isɩrayɛl bluubá maar.

22 Gɩ̀-lǝ gɩ̀ nã, ń waa nǝ̃-yǝ wà Fɩraa-Dũnnũẃ wa hããw, wà Isɩrayɛl bluubá nǝ̃ nã́ã́ wù bíɛ́-i, wù byadĩɛ̃lw,

23 wà wu wáalá nǝ̃-yǝ wà wú nǝ̃nǝ̃ǝ̃ bá maar ǹ-ga jãn-yǝ, wú hla, wà gɩ̀-lǝ gɩ̀ nã, wù ji ko wùú yo wù bíɛ́w, wù byadĩɛ̃lw.»

24 Musaẃ ba waal nã, wù gáa hi yiɛdagǝ wú hiraa wà wú cɔ gɩ̀ sùɔ́gɩ nã, Fɩraa-Dũnnũẃ juo blǝ-yǝ, ǹ-ba wù caa wu ji ko-yǝ.

25 Gùú nã-i, wù ciɛ Seforaẁ tuu tɩntãnyiɛguu mãã gɩ̀ jã, ǹ-bǝr wù bíɛ́'n mãbarw ǹ-jĩɛ̃ Musa vyanɲã nã nǝ̃-yǝ nã̀ã fǝ̃ǝ̃ ǹ-waa wà: «Ǹ cíé twam'n blanĩĩ mǝ̃̀ saa.»

26 Dũnnũẃ fǝ̃ǝ̃ ǹ-ya Musaẃ ba. Gɩ̀-lǝ gùú siim'n cɔ̃mmã cíé Seforaẃ waa wà Musaw twam'n blanĩĩ-i wù-lǝ wù saa.

27 Ǹ-vaa nǝ̃ Fɩraa-Dũnnũẁ yáá wùu waa nǝ̃ Arɩnãw wà wú kãã jǝ̃ǝ̃lǝ̃ǝ̃ Musaw jerkwaar nã. Wú maar ǹ-kãã jal nǝ̃-yǝ Dũnnũ tãnũũgɩ nã. Wù gáa da-yǝ, wú sɔ̃ ǹ-kãã pɩpɩrĩɛ̃ wù nã.

28 Fɩraa-Dũnnũẁ tĩ́ɛ̃lã́ Musaw nǝ̃ gùú tĩɛ̃rii mãã, wú taa-dǝ ǹ-ja-yǝ. Nǝ̃ wù mãã wù yáá wa wú ga ce gùú cɔ̃nnorɩmmãã mãã, wú taa mã̀ã́ yo ǹ-ja-yǝ.

29 Bá fǝ̃ǝ̃ ǹ-maar bà min ǹ-kãã tɩgii Isɩrayɛl bluu'n vũnvãnããba.

30 Fɩraa-Dũnnũẁ wáalá gàá mãã nǝ̃ Musaw, Arɩnãẃ tuu ǹ-ja-ba nǝ̃-ga min, nã̀ã ce cɔ̃nnurom mã́ã́ yo bà yinɲã nã.

31 Cwaabá hũɔ̃ wà gɩ̀ cɔ̃mmã sulam-i. Bà gáa fǝ̃ǝ̃ wà Fɩraa-Dũnnũw níé bà ywaruugu, nã̀ã jo wù ji pɛ bà nã, bà min bá fǝ̃ǝ̃ ǹ-kuulǝǝ ɲũũrũũgu ǹ-bũũ-yǝ.