Isɩrayɛl Bluu'n Waali (Exode) 3

Musaẁ yáá wù cii wù curɔ Setrow mãã Mãdiyã yiɛntaa'n puruɔntiiw, wù tũmba, nǝ̃ wù wuramba. Yuudagǝ, wú juo cii-ba ǹ-ga maa jerkwaari, fuwɔ ǹ-kãã hi Horɛbɩ tãnũũgu, gùú mãã bà be-gǝ wà Dũnnũ tãnũũgu.

2 Fɩraa-Dũnnũ mɛlɛgɛẃ kãã caalaa wù nã gɩ̀ sùɔ́gɩ nã, partuudagǝ nã dãncaalammã gɩ̀ drɔ. Musaẃ ba wù da dãncaalammã̀ suu partuugɩ nã, nǝ̃ gɩ̀ sǝ nǝ̃ gɩ̀ ye.

3 Wú fǝ̃ǝ̃ ǹ-waa wà wu ji finǝ̃ǝ̃ ǹ-kãã ne cɔ̃nnurom mã́ã́, gùú nǝ̃n cíé partuu gúɔ̀gɩ̀ sǝ nǝ̃ gɩ̀ ye.

4 Fɩraa-Dũnnũẁ gáa da Musaẁ finǝ̃ǝ̃ wù kã wù ga ne, wú ba partuugɩ nã, nã̀ã ba wù be-yǝ wà: «Musa, Musa.» Wú siɛ-yǝ wà: «Mã́ã-i nnĩĩ.»

5 Dũnnũẃ fǝ̃ǝ̃ ǹ-waa nǝ̃-yǝ wà: «Báa kuganãã níɛ́ba nã. Hiil ǹ viɛtaanɲã, ǹ mãã nã̀ã hiraa gùú sùɔ́guu mãã, mǝ̃̀ nũɔ̃sǝn sùɔ́-i.

6 Mã́ã-i ǹ tǝvũnvãnããbaa mãã Ibramãw, Isiyagaw nǝ̃ Yakuba bà Dũnnũw. Mã́ã-i ǹ tǝ yo, wù Dũnnũw.» Gbǝrsǝrɩ́ blǝ Musaw wú suu wù yigagɩ nã, wu báa ji ne ǹ-da Dũnnũw.

7 Fɩraa-Dũnnũẃ ba wù waa nǝ̃-yǝ wà: «Mǝ̃̀ díɛ́ bà mãã bà kãnnã mǝ̃̀ bluuba gùú tuuguu Misɩra yiɛgu. Mǝ̃̀ nṹɔ̃́ bà kaaluugɩ nã bà kãnnãtaa'n nãkruɔgɩ nã, mǝ̃̀ díɛ́ bà ywaruugu.

8 Gùú cíé mǝ̃́ jo mǝ̃̀ ji ɲǝ̃ǝ̃ mǝ̃̀ hũɔ̃-ba Misɩra yiɛntaa'n nãkruɔgɩ nã, bá maar yiɛgǝ̃ngãdudwalgǝdagǝ nã. Gɩ̀ yiɛgɩ nã, ɲi ga ba salli dɩn nã-i, nǝ̃ ɲããvaluu yo gɩ̀ sɩga ca ɲì nã. Nǝ̃ Kanãã yiɛntaaba, nǝ̃ Hivitɩ nũɔ̃ntaaba, nǝ̃ Amoritɩ nũɔ̃ntaaba, nǝ̃ Peresɩ bluuba, nǝ̃ Hitɩ nũɔ̃ntaaba, nǝ̃ Sebuusɩ nũɔ̃ntaaba, bá nǝ̃ gùú sùɔ́gɩ-i.

9 Isɩrayɛl bluu'n kaaluugɩ̀ híí-m, nǝ̃ Misɩra yiɛntaabà mãã bà kãnnã-ba gùú tammãã mãã, mǝ̃̀ díɛ́ dɩ̀ min.

10 Gùú cíé mǝ̃́ wa mǝ̃́ tĩɛ̃-n kuɔkuɔgu ń kã Misɩra yuuntigǝ̃ngãw nãã. Kã n ga hiil Isɩrayɛl bluuba gɩ̀ sùɔ́gɩ nã.»

Dũnnũẁ pɩgaa wù yiiri ǹ-ja Musaw

11 Musaẃ fǝ̃ǝ̃ ǹ-waa nǝ̃ Dũnnũw wà: «Mã́ã tuuguu mãã nnĩĩ, mǝ̃́ kã Misɩra yuuntigǝ̃ngãw nãã. Mǝ̃n ga ce danii nã̀ã hiil Isɩrayɛl bluuba Misɩra yiɛgu?»

12 Dũnnũẃ fǝ̃ǝ̃ ǹ-waa nǝ̃-yǝ wà: «Mǝ̃n nìɛ, mǝ̃̀ ga pɛ ǹ nã. Dìí mãã dɩ̀ ga ce ń fǝ̃ǝ̃ wà mã́ã tĩ́ɛ̃lã́-n dɩ̀-i nnĩĩ: Nǝ̃-ń ga ba nã̀ã hlǝ nǝ̃ mǝ̃̀ bluuba Misɩra yiɛgu, ɲi ji bũũ-m tãnũũ gúɔ́ nã-i nhlíɛ̀.»

13 Musaẃ fǝ̃ǝ̃ ǹ-waa nǝ̃ Dũnnũw wà: «Mǝ̃-ń ga kãã waa nǝ̃ Isɩrayɛl bluuba wà bà tǝba Dũnnũw tĩ́ɛ̃lã́ mǝ̃́ jo bà nãã. Nǝ̃ ba-ń ga yugu-m nǝ̃ wù yiiri mǝ̃̀ ga wa danii?»

14 Dũnnũẃ siɛ Musaw wà: «Mã́ã-i wùú mãã fɩraa. Isɩrayɛl bluuba-ń ga yugu-n, ń waa nǝ̃-ba wà wùú mãã bà be-yǝ wà mǝ̃́ nìɛ fɩraa, wà wùú tĩ́ɛ̃lã́-n bà nãã.

15 Nǝ̃ ń waa nǝ̃-ba wà Fɩraa-Dũnnũw tĩ́ɛ̃lã́ ń jo bà nãã. Wà bà tǝba nǝ̃ Ibramãw, nǝ̃ Isiyagaw, nǝ̃ Yakuba bà Dũnnũ wɩ̀-i mã́ã́. Mǝ̃̀ yiirɩ-i nĩĩgu, dìí sáalà dɩ́ ba cwaa'n yunɲã nã, bá da ǹ-ba bà kãnãã mǝ̃̀ cɔ̃mmã nã fɩraa.

16 Kuɔkuɔ-lǝ, maar n ga tɩgii Isɩrayɛl bluu'n vũnvãnããba, nǝ̃ ń waa nǝ̃-ba wà Fɩraa-Dũnnũw, bà tǝba nǝ̃ Ibramãw nǝ̃ Isiyagaw nǝ̃ Yakuba bà Dũnnũw pɩ́gará wù hla ǹ-ja-n, nã̀ã waa nǝ̃-n wà wu díɛ́ bà mãã bà piɛ gùú ywaruuguu mãã bà drɔ Misɩra yiɛgu, wà wu ji ne bà yiɛgu.

17 Wà ba mãã hujãncɔ̃mmã nã Misɩra yiɛgu, wu ji hiil-ba gɩ̀ sùɔ́gɩ nã, ǹ-kã nǝ̃-ba Kanãã yiɛntaaba, nǝ̃ Hitɩ nũɔ̃ntaaba, nǝ̃ Amoritɩ nũɔ̃ntaaba, nǝ̃ Peresɩ bluuba, nǝ̃ Hivitɩ nũɔ̃ntaaba, nǝ̃ Sebuusɩ nũɔ̃ntaa'n yiɛgɩ nã, gɩ̀-lǝ gɩ̀ yiɛgu, ba ga ba salli dɩn nã-i, nǝ̃ ɲããvaluu yo gɩ̀ sɩga ca bà nã.

18 Isɩrayɛl bluu'n vũnvãnããba ga nɔ̃ ǹ-hã-n, gɩ̀-lǝ gɩ̀ nã, ɲí kã ɲì min nǝ̃-ba Misɩra yuuntigǝ̃ngãw nãã, ɲi ga waa nǝ̃-yǝ wà Fɩraa-Dũnnũw Hebruba Dũnnũw, wu pɩ́gará wù hla nǝ̃-ɲã́ã̀, wà wu nã́ã̀ hã-ɲã́ã̀ nǝ̃ hlũũgu ɲí ce bãnɲã siɛl waali, ǹ-maar jerkwaar nã ǹ-kãã jãn-yǝ.

19 Mǝ̃̀ fǝ̃́ǝ̃lã́ wà gɩ-ń ba gɩ̀ sǝ wà mǝ̃̀ nãkruɔ'n fãngãã jáa guur Misɩra yuuntigǝ̃ngãw, wu sɩga hũɔ̃ ɲí maar.

20 Gùú ga ce mǝ̃́ pɩgaa-yǝ nǝ̃ mǝ̃̀ fãngããgu, nã̀ã ce cɔ̃nnorɩmmã wù yiɛgu, gɩ̀-lǝ gùú nã-i wù ga ya ɲí maar.

21 Mǝ̃̀ ga ce Misɩra yiɛntaabá ne ɲì yiɛgu, ɲi báa ga da ǹ-hlǝ nãkwasǝri gɩ̀ sùɔ́gɩ nã.

22 Isɩrayɛl canããbà ga cirǝ̃ǝ̃ kwaplar'n wariɛga nã, nǝ̃ sãnã wariɛga nã, nǝ̃ kuulanãmba nã Misɩra canããbaa mãã bà sɔgamntaaba nǝ̃ bà mãã nǝ̃ bàá mãã suɔgɩ dɩngɩ nã, bà saa. Ba-ń ga hã-ɲã́ã̀ nǝ̃-ga, ɲí piɛ-ga ǹ-hã ɲì byanããba, nǝ̃ ɲì bisiiba tuu-ga ɲí hlǝ nǝ̃ Misɩra gbaasǝ'n ɲinɲã.»