Isɩrayɛl Bluu'n Waali (Exode) 2

Musa huumã nǝ̃ wù tãnkuursǝ'n cɔ̃mmã

Yindiɛ, Levi nũɔ̃'n biɛdiɛ wú kãã taa bà gǝ̃ǝ̃ciɛdiɛ.

2 Wú juo tuu kusuugu ǹ-huu pũmpɩrblɩ. Wú fǝ̃ǝ̃ ǹ-ba wù ŋmǝ̃ǝ̃rǝ̃ǝ̃ wù nã ǹ-ji da hyarsǝrɩ siɛl.

3 Gɩ̀ furũũgɩ nã, wù sáá wù ji ba wù ji gbǝ̃ǝ̃ ǹ-ŋmǝ̃ǝ̃rǝ̃ǝ̃, wú tuu gaadiɛ bàa sɔ̃-yǝ nǝ̃ papirisɩtun'n traga^a, ǹ-tĩĩ-yǝ nǝ̃ kuudagǝ nã́ã́ virɲin-i, nã̀ã fǝ̃ǝ̃ ǹ-dii tãnkuurw wù kusunã, ǹ-kra wù nã Nil lwaa'n nũɔ̃gɩ nã hũmmã kusunã, kwaa'n nũɔ̃'n hyãtunɲã sǝ̃ǝ̃nã.

4 Tãnkuur'n tǝ̃ǝ̃ẃ fǝ̃ǝ̃ ǹ-cĩĩ gɩ̀ sùɔ́gɩ nã nã̀ã ba wù maa wù ne dìí mãã dɩ̀ ji ce.

5 Fiyãã, ǹ-da Farawunã bisĩɛ̃ yà hɩr ǹ-kã lwaa'n nũɔ̃gɩ nã wà wú kãã saar wù hla nã, nǝ̃ bisiibaa nǝ̃n yáá bàa duu wù nã, bá ba bà waaraa lwaa'n nũɔ̃gɩ nã. Wú kãã maa ǹ-da gaa wáà hyãtunɲã sǝ̃ǝ̃nã, wú fǝ̃ǝ̃ ǹ-tĩɛ̃ bisiibaa mãã bà ce mããcemmã bà hã-yǝ, wù dɩnẃ kãã tuu-yǝ.

6 Wú juo cugur gaaw, ǹ-da pũmpɩrblɩẁ kaal. Wù hujãndɩ́ fǝ̃ǝ̃ ǹ-blǝ-yǝ, wú dii ǹ-waa wà: «Hebru tãnkuur-i.»

7 Gùú nã-i, tãnkuur'n tǝ̃ǝ̃ẃ fǝ̃ǝ̃ ǹ-waa ǹ-kuganãã, ǹ-juo yugu yuuntii bisĩɛ̃w wà: «Ǹ síì ya mǝ̃́ kãã caa cijaldiɛ Hebru canããba sǝ̃ǝ̃nã, wùú mãã nǝ̃ ŋmǝ̃nhũmmã, ǹ-ji hã tãnkuurẃ ba wù ŋmãsã-ì?»

8 Farawunã bisĩɛ̃ẃ waa nǝ̃-yǝ wà wú maar ǹ-ga caa-yǝ ǹ-jo. Wú fǝ̃ǝ̃ ǹ-ta ǹ-kãã jo nǝ̃ pũmpɩr'n ɲũw nǝ̃ wù hla nã.

9 Farawunã bisĩɛ̃ẃ fǝ̃ǝ̃ ǹ-waa nǝ̃-yǝ wà: «Hũɔ̃ tãnkuur wáà n ga ba ǹ-hã-yǝ nǝ̃ ŋmãmmã nǝ̃ mǝ̃́ ba mǝ̃̀ pã mǝ̃̀ hã-n.» Cijalẃ hũɔ̃ tãnkuurw ǹ-ba wù hã wú ba wù ŋmãsã.

10 Tãnkuur'n yigagɩ̀ gáa kaalaa, wú fǝ̃ǝ̃ ǹ-kã nǝ̃-yǝ Farawunã bisĩɛ̃ nãã. Wù-lǝ wú hũɔ̃ ǹ-ce-yǝ wù hla'n bíɛ́, nã̀ã fǝ̃ǝ̃ ǹ-waa wà wu mãã wù híilá-yǝ hũmmã nã, wú ji suu wù yiiri wà Musa.

Musaẁ kwar ǹ-ta Madiyãgu

11 Musaẁ gáa vǝ̃ǝ̃, yuudagǝ, wú kã wù ga dǝ̃ǝ̃ wù nãhebruba wù ne, ǹ-kãã ne bà mãã bà ce gùú mããcegbǝ̃ǝ̃mã, ǹ-vaa nǝ̃ Misɩra yiɛntabiɛdiɛ wù mũũ Hebru biɛdiɛ.

12 Musaẃ fǝ̃ǝ̃ ǹ-cɔ ǹ-neraa, ǹ-da curo'n sɩraa wù da-ba, wú fǝ̃ǝ̃ ǹ-mũũ ǹ-ko Misɩra yiɛntabiɛw nãã ɲĩɛ̃ ǹ-dii-yǝ hlɔ̃mpierɩ nã, ǹ-suu wù nã.

13 Gɩ̀ taakaalgu, wú fǝ̃ǝ̃ ǹ-juo da Hebruba cwaaba hǝ̃ǝ̃ldaba bà ko. Wú fǝ̃ǝ̃ ǹ-waa nǝ̃ yuɔrɔtiiw wà: «Mǝ̃n wa ǹ cwanĩĩ-ì? Danii ń ba ǹ jã byaari nǝ̃-yǝ?»

14 Biɛẃ fǝ̃ǝ̃ ǹ-waa nǝ̃-yǝ wà: «Halii kárrá ǹ nã gɩ̀ mũɔ̃rsǝrɩ nã, nǝ̃ ń ba ǹ jo ǹ ji jar yì sugolli? Dàa, ǹ caa ń mũũ ǹ ko mã́ã yo, nã́ã́ ǹ mãã ǹ mṹũlã́ ǹ-ko Misɩra yiɛntabiɛw gùú tammã-ì?» Musaẃ fǝ̃ǝ̃ gùú nã-i, wà cɔ̃m mã́ã̀ mã hlǝ́rá, gbǝrsǝrɩ́ fǝ̃ǝ̃ ǹ-blǝ-yǝ.

15 Farawunã yo, wú nɔ̃ cɔ̃m mã́ã̀, wú ba wù caa wú blǝ Musaw ǹ-ko-yǝ. Musaẃ fǝ̃ǝ̃ ǹ-kwar ǹ-ta Mãdiyãgu. Wù gáa hi gɩ̀ sùɔ́gɩ nã, wú kãã ba hũnfuudagǝ tuɔra.

16 Mãdiyã yiɛntaa'n puruɔntiiẁ yáá nǝ̃ bisii nɩrhǝ̃ǝ̃l. Bá kãã jo wà bá juo hu hũmmã, nã̀ã nǝ̃ǝ̃ mãdamã hlo, ǹ-hã bà tǝ tũmba, nǝ̃ wù wurambá ɲũɔ̃.

17 Wanciinããbá kãã jo, ǹ-juo ba bà ɲǝ̃ǝ̃ bà tĩɛ̃-ba. Gɩ̀-i, Musaẃ fǝ̃ǝ̃ ǹ-hũɔ̃ bà nũɔ̃gu, nã̀ã nǝ̃ǝ̃ hũmmã ǹ-hã bà kwasǝnɲinɲã́ ɲũɔ̃.

18 Bà gáa ver ǹ-kũũ, bà tǝ Eruwɛlẃ fǝ̃ǝ̃ ǹ-yugu-ba wà: «Danii ɲí gǝǝ ǹ-ver jimãã-lǝ?»

19 Bá siɛ-yǝ wà Misɩra yiɛntabiɛdiɛ hṹɔ̃lã́ bà nũɔ̃gu wanciinããbaa saa, nã̀ã nǝ̃ǝ̃ hũm yo ǹ-hã kwasǝnɲinɲã́ ɲũɔ̃.

20 Bà tǝẃ fǝ̃ǝ̃ ǹ-waa nǝ̃-ba wà: «Nǝ̃ gɩ̀ biɛ wɩ̀-i haa-ì? Danii ɲí ba ɲì sáa jo nǝ̃-yǝ suɔgɩ nã? Kã́ã̀ ɲi ga ce wú juo ɲũɔ̃ hũmmã.»

21 Musaẃ fǝ̃ǝ̃ ǹ-kãã jiraa biɛ wáá kuugɩ nã. Biɛẃ fǝ̃ǝ̃ ǹ-tuu wù bisĩɛ̃ Seforaw ǹ-hã Musaẃ taa-yǝ.

22 Wú juo huu pũmpɩrblɩ. Musaẃ fǝ̃ǝ̃ ǹ-waa wà: «Mǝ̃̀ mãã norsǝrɩ nã, mǝ̃̀ ji suu tãnkuur'n yiiri Gɛrsɔ̃m wà norii.»

Dũnnũẁ ne ǹ-hiil Musaw

23 Gɩ̀ gáa hǝ̃ǝ̃sǝ, Misɩra yuuntigǝ̃ngãẃ kãã ku, nǝ̃ Isɩrayɛl bluubá ba ywaruugɩ nã wasǝrɩ nã, fuwɔ bà guusuugu, nǝ̃ bà kaaluugu, ɲã́ ba ɲì kã ɲã̀ hi Dũnnũw.

24 Dũnnũẃ nɔ̃ bà guusuugɩ nã, nã̀ã kãnãã wù yáá wùu ce bá ɲũɔ̃ gùú twammãã mãã nǝ̃ Ibramãw, Isiyagaw nǝ̃ Yakubaw, mã̀ cɔ̃mmã nã.

25 Dũnnũẁ gáa blǝ Isɩrayɛl bluu'n cɔ̃mmã ǹ-ne, bà hujãndɩ́ blǝ-yǝ.