۷
اِی سُیگولی دُستلاریم، خودای بیزه، اینه، شِیله واعدالاری بِریپدیر! شُنونگ اوچین-ده، گِلینگ، بِدِنیمیزی و روحومیزی زییان یِتیریَن هِمّه زاتدان پَک اِدِیلینگ. خودایدان قُرقوپ، کَمیل مُقادِّس بُلماغا چالیشایلینگ.
پولسینگ شاتلیغی
۲ بیزی یورِگینگیزده جای بِرینگ. بیز هیچ کیمه حاقسیزلیق اِتمِدیک، هیچ کیمی آزدیرمادیق و هیچ کیمدِن پِیدالانمادیق.
۳ مِن بولاری سیزی عاییپلاماق اوچین آیدامُق. سِبَبی اُزال هِم آیدیشیم یالی، یورِگیمیزینگ دویبونده جایینگیز باردیر، بیز یاشاساق-دا، اُلسِک-ده بیله بُلاریس.
۴ سیزه قاتی اینانیارین و قاتی قووانیارین! مِن شِیله اولی تِسِلّی تاپدیم. قینچیلیقلاریمیز هِر هیلی آغیر بُلسا-دا، شاتلیغیمینگ اِندازاسی یُقدور.
۵ بیز مَقدونیه بارانیمیزدا-دا، هیچ بیر راحاتلیق تاپمادیق. قایتام، داش-تُوِرِگیمیزده داعوا-جِنجِل‍لِر، یورِگیمیزده قُرقی بُلوپ، هِر یاندان قیسیلدیق.
۶ اِمّا خودای غامگینلارا تِسِلّی بِریَندیر. اُل تیتوسی یانیمیزا ایبِریپ، بیزه هِم تِسِلّی بِردی.
۷ بیز دینگه تیتوسینگ گِلمِگیندِن دَل، شِیله بُلسا اُنگا بِرِن تِسِلّینگیز بارادا اِشیدیپ-ده، تِسِلّی تاپدیق. اُل سیزینگ مِنی کویسِیَندیگینگیز، هِیوِره کَن قینانجینگیز و مانگا بُلان اولی ایخلاصینگیز بارادا گورّونگ بِرِنده، شاتلیغیم اُنگکودِن-ده آرتدی.
۸-۹ مِن سیزی اُز نامه‌ام بیلِن قیناندیران-دا بُلسام، اُنی یازانیما اُکونِمُق. هاووا، اُنگ بیرآز اُکونیپدیم، یُنه بو نامه‌نگ سیزی دینگه آز واقتلیق قیناندیرانینی بیلیپ، ایندی شاتلانیارین. مِن سیزینگ قینانانینگیزا دَل-ده، شُل قینانمانگیزینگ اوستو بیلِن توبا گِلِنینگیزه شاتلانیارین. سیزینگ قینانماغینگیز خودایداندیر، بیزدِن زییان گُرِن دَلسینگیز.
۱۰ چونکی خودایدان بُلان قینانچ آدامی توبا گِتیریپ، اُنونگ نِجات تاپماغینا سِبَپ بُلیار. بو توبا اُکوندیریَن دَلدیر. اِمّا دونیَه‌دِن بُلان قینانچ اُلومه اِلتیَندیر.
۱۱ خودایدان بُلان قینانجینگ سیزده اِدِنلِرینی بیر گُرونگ! اُل سِبَپلی سیزده نَهیلی غایرات، اُزونگیزی پَکلِمَگه نَهیلی ایخلاص دُرِتدی! اُل سیزده، گُر، نَهیلی ناراضیچیلیق، قُرقی، نَهیلی کویسِمِک، ایخلاص و عادالاتا بُلان ایسلِگی توروزدی. سیز بو مِسِله‌ده هِمّه طارافلایین تاقصیرسیزدینگیزی گُرکِزدینگیز.
۱۲ شونلوقدا، مِن شُل نامه‌نی یازان هِم بُلسام، اُنی نه اِذیِت بِرِنی عاییپلاماق اوچین، نه-ده اِذیِت بِرلِنینگ طارافینی توتماق اوچین یازیپدیم. مِن اُنی بیزه اِدیَن ایخلاصینگیز خودایینگ حوضوریندا اُزونگیزه-ده آیان بُلسون دییّپ یازیپدیم.
۱۳ بولارینگ باری بیزه تِسِلّی بِردی. سیز تیتوسی شاتلاندیریپ، اُنونگ یورِگینه تِسِلّی بِریپسینگیز. بیز اُنونگ شاتلیغینی گُرِنیمیزده، مونگا اُز شاتلیغیمیزدان-دا کَن بِگِندیک.
۱۴ مِن اُنونگ یانیندا سیز باباتدا قووانیپدیم، سیز-ده مِنینگ یوزومی یِره سالمادینگیز. سیزه آیدانلاریمیزینگ اِلمیداما حاقیقات بُلشی یالی، تیتوسینگ اُووندَکی قووانجیمیزینگ هِم حاقیقاتدیغی بِلّی بُلدی.
۱۵ اُل هِمَّه‌نگیزینگ موطیع بُلاندیغینگیزی، اُنی قُرقی و حُرمات بیلِن قابول اِدیشینگیزی یادلاندا، سیزه بُلان سُیگوسی خاص هِم آرتیار.
۱۶ شونلوقدا، مِن هِر زاتدا سیزه بیل باغلاپ بیلیَندیگیمه خاص شاتلانیارین.