۶
بیز خودایینگ هِمکَرلِری حُکمونده سیزه یالباریاریس: اُندان آلان مِرحِمِتینگیزی بی‌قادیر توتمانگ.
۲ چونکی خودای شِیله دییَّر:
«مِرحِمِت گُرکِزجِک زامانیمدا سِنی اِشیتدیم،
و نِجات گونونده مِن کُمِک اِتدیم.»*
اینه، شو واقت خودایینگ مِرحِمِت گونودیر، اینه شو گون نِجات گونودیر!
پولسینگ چِکِن قینچیلیقلاری
۳ بیز خیدماتیمیز آبرایدان دوشمِسین دییّپ، هیچ کیمینگ بودریمِگینه سِبَپ بُلامزُق.
۴ تِرسینه، هِمّه زاتدا اُزومیزی خودایینگ لاییق خیدماتچیلاری حُکمونده اَشکَر اِدیَریس. بیز قینچیلیقلاردا، مَحتَجلیکلِرده، چاره‌سیز یاغدایلاردا،
۵ اورلوپ-یِنجیلمِلِرده، زیندان اِدیلمِلِرده، فیتنه‌لِرده، آغیر ایشلِرده، اوقوسیز گیجه‌لِرده و آچلیغدا صابیر-طاقاتلیق بیلِن جیدایاریس.
۶ بیز مونی پَکلیک، بیلیم، صابیرلیلیق، مِهرِبانلیق، مُقادِّس روح بیلِن، صادیق سُیگی،
۷ حاقیقات سُزی بیلِن و خودایینگ گویجینینگ اوستو بیلِن بِلّی اِدیَریس. تاقوالیق یاراغیمیز بیلِن اُنی هِم ساغ، هِم-ده سُل اِلیمیزده گُتِریَریس.
۸ آداملار بیزه حُرماتغُیسالار-دا و کیچِلتسِلِر-ده، تُهمِت اورسالار-دا، اُوسِلِر-ده – بیز هِر حالدا خودایا خیدمات اِدیَریس. اُلار بیزی یالانچی حاساپلایارلار، اِمّا بیز حاقیقاتی آیدیاریس.
۹ بیز تانیلساق-دا، اِمّا رِد اِدیلیَریس. اُلی یالی بُلساق-دا، اِمّا هِنیز دیریدیریس. یارالاندیریلساق-دا، اِمّا اُلدوریلِن دَلدیریس.
۱۰ غامگین، اِمّا اِلمیداما شاتدیریس. قاریپ بُلساق-دا، اِمّا کَن آداملاری باییدیاندیریس. هیچ زادیمیز بُلماسا-دا، اِمّا هِمّه زادا اِیه‌دیریس.
۱۱ اِی قُرِنتُس‌دَکیلِر! بیز سیزینگ بیلِن آچیقجا گورلِشدیک و سیزه یورِگیمیزی آچدیق.
۱۲ سیزدِن سُیگیمیزی قایغیرماساق-دا، سیز بیزدِن اُز سُیگینگیزی قایغیریارسینگیز.
۱۳ مِن سیزه خاص اُز فِرزِنتلِریمه آیدیان یالی آیدیارین: بیز یورِگیمیزی سیزه آچیشیمیز یالی، سیز-ده یورِگینگیزی بیزه آچینگ.
بُت‌پَرَستلیکدِن داش دورونگ
۱۴ ایمان گِتیرمِدیکلِر بیلِن بیر یوغینگ آشاغینا گیرمَنگ! چونکی تاقوالیغینگ تِلِکه‌لیک بیلِن نَمه شِریکلیگی بار؟ یا-دا نور بیلِن قارانگقیلیغینگ نَمه یُلداشلیغی بار؟
۱۵ عیسی مسیح بیلِن شِیطانینگ آراسیندا راضیلاشیق، هِی-ده، بُلوپ بیلجِک زاتمی نَمه؟ ایمانلی بیلِن ایمانسیزینگ نَمه شِریکلیگی بار؟
۱۶ خودایینگ عیباداتخاناسی بیلِن بُتلارینگ، هِی-ده، اُزآرا راضیلاشیغی بُلارمی نَمه؟ چونکی بیز دیری خودایینگ عیباداتخاناسیدیریس. خودای دییَّر:
«مِن اُلارینگ آراسیندا مِسکِن توتارین
و اُلارینگ آراسیندا بُلارین.
مِن اُلارینگ خودایی،
اُلار هِم مِنینگ خالقیم بُلارلار» دییّپدی آخیرین.*
۱۷-۱۸ شِیلِلیکده، قودراتلی-گویچلی خودای شِیله دییَّر:
«اُلارینگ آراسیندان چیقینگ-دا
اُلاردان آیریلینگ.
نِجیس زاتلارا اِل دِگیرمَنگ،
و شُندا مِن سیزی قابول اِدِرین.»
«مِن سیزه آتا بُلارین،
سیز هِم مِنینگ اُغول-قیزلاریم بُلارسینگیز.»*