۲
شونلوقدا، مِن یِنه غاملی بُلمایین دییّپ، یانینگیزا بارمازلیغی یورِگیمه دوودوم.
۲ اِگِر مِن سیزی غاملاندیریان بُلسام، مِنی کیم شاتلاندیرسین؟ مِنینگ غاملی اِدِنلِریمّی؟
۳ شُنگا گُرَه-ده، بارانیمدا مِنی شاتلاندیرمالی آداملار گُونومی غاملاندیرماسین دییّپ، شُل نامه‌نی یازدیم. مِنینگ شاتلیغیما سیزینگ-ده شاتلانجاقدیغینگیزا قاتی اینانیارین.
۴ مِن شُل نامه‌نی غاملی یورِکدِن و قینچیلیقدا و یاشلی گُزلِر ایچینده یازیپدیم. یُنه مِنینگ نییِتیم سیزی قیناندیرماق دَل-ده، سیزه بُلان اولی سُیگیمی گُرکِزمِکدی.
گونَه‌کَری باغیشلانگ
۵ مِنی غاملاندیران آدام دینگه مِنی دَل-ده، اولالتمایین، اِمّا بِلّی بیر دِرِجه‌ده هِمَّه‌نگیزی غاملاندیراندیر.
۶ کَنلِرینگیزینگ اُنی گونَه‌کَرلِمِگی اُنونگ اوچین بِرلِن جِزا بِسدیر.
۷ اُل اولی غاما باتماز یالی، ایندی اُنی باغیشلامالیسینگیز و تِسِلّی بِرمِلیسینگیز.
۸ خاییش اِدیَرین: اُنی دُغرودان-دا سُییَندیگینگیزی تاصدیقلانگ.
۹ شُنگا گُرَه-ده، مِن شُل نامه‌نی سیزی ایمتِحان و هِر بیر زاتدا موطیع بُلوپ-بُلمایانیلیغینگیزی بیلمِک اوچین یازدیم.
۱۰ سیزینگ باغیشلان کیشینگیزی مِن هِم باغیشلایارین، سِبَبی مِن هِم بیرینی بیر زاتدا باغیشلان بُلسام، اِلبِتّه اِگِر باغیشلاماغا دِلیل بُلسا باغیشلانیمی مسیحینگ حوضوریندا و سیزینگ خاطیرانگیز اوچین باغیشلادیم.
۱۱ مِن مونی شِیطان بیزدِن اوستون چیقماسین دییّپ اِتدیم، چونکی اُنونگ مِکرلیگی بیزه معلیم آخیرین.
تَزه عَهدینگ خیدماتچیلاری
۱۲ مِن مسیحینگ خوش خابارینی واغیظ اِتمَگه تروآس شَهرینه بارانیمدا، مانگا خودای طارافیندان بیر قاپی آچیلدی.
۱۳ مونگا باقمازدان، روحوم راحات دَلدی، سِبَبی مِن اُل یِرده دُغانیم تیتوسی تاپمادیم. شُنونگ اوچین-ده، اُلار بیلِن خوشلاشیپ، مَقدونیه طارافا گیتدیم.
۱۴ یُنه خودایا شوکور! اُل مسیحینگ اوستونلیک یُلوندان بیزی اِلمیداما یُریدیَر. خودای اُزی باراداقی بیلیمی بیزینگ اوستومیز بیلِن هِمّه یِره عاطیر کیمین یایراتیار.
۱۵ چونکی بیز نِجات تاپانلارینگ آراسیندا-دا و هِم هِلَکچیلیک یُلوندان باریانلارینگ آراسیندا-دا، خودای اوچین مسیحینگ ایسلی عاطیرلاریدیریس.
۱۶ اِمّا بیز هِلَکچیلیک یُلوندان باریانلار اوچین اُلوم ایسی بُلساق، نِجات تاپانلار اوچین یاشاییش عاطیرلاریدیریس. بِیله ایشینگ چاره‌سیندِن گِلجِک بارمی نَمه؟
۱۷ بیز کَن آداملار یالی خودایینگ سُزونی اُز پِیداماز اوچین آرزان ساتمایاریس. تِرسینه، خودای طارافیندان ایبِریلِن و مسیحه خیدمات اِدیَن آداملار یالی خودایینگ حوضوریندا پَک یورِکدِن کِپلِیَریس.