ایماندارلارینگ آراسینداقی داعوالار
۶
سیز باشغا بیری بیلِن داعوالاشانینگیزدا، نَمه اوچین اُنونگ مِسِله‌سینی ایمانسیزلارینگ اُوونده بِیان اِدیَرسینگیز؟ اُندا سیز مونی ایماندارلارینگ اُوونده چُزمِلی دَلمی؟
۲ سیز ایماندارلارینگ بو دونیَه قاضیلیق اِتجِکدیگینی بیلمِیَرسینگیزمی؟ اِگِر سیز دونیَه قاضیلیق اِتجِک بُلسانگیز، اُندا اَهمییِتسیز داعوالاری چُزوپ بیلمِرسینگیزمی؟
۳ سیز بیزینگ حتّیٰ پِریشده‌لِره-ده قاضیلیق اِتجِکدیگیمیزی بیلمِیَرسینگیزمی؟ گونلیک دورموشینگ ایشلِری باراسیندا خاص بِتِر.
۴ شِیله داعوالارینگیز بار بُلسا، نَمه اوچین اُلاری کِلیسایا دِگیشلی بُلمادیقلارینگ قاضیلیغینا تابشیریارسینگیز؟
۵ شِیله اِتمَگه اوتانمایارسینگیزمی؟ اُندا آرانگیزدا ایماندارلارینگ داعواسینی چُزوپ بیلجِک بیر دانا آدام-دا یُقمی نَمه؟
۶ تِرسینه، ایماندار، ایماندار بیلِن مَحکِمه‌ده داعوالاشیار. مونونگ اوستونه-ده، اُلار مونی ایمانسیزلارینگ اُوونده اِدیَرلِر!
۷ آصلیندا بیری-بیرینگیز بیلِن مَحکِمه‌ده داعوالاشماغینگ اُزی سیزینگ کِمچیلیگینگیزی خابار بِریَر. شِیله بُلسا عادالاتسیزلیغا طاقاتلی بُلماغینگیز قاوی دَلمی؟ زییان چِکمَگه جیداملی بُلماغینگیز قاوی دَلمی نَمه؟
۸ سیز بُلسا ظولوم اِدیَرسینگیز، آلدایارسینگیز، اُدا کیمی؟ اُز ایماندارلارینگیزی!
۹ اُندا سیز، ظالیم آداملار خودایینگ پادیشاهلیغینی میراث آلماجاقدیغینی بیلمِیَرسینگیزمی نَمه؟ اُز-اُزونگیزی آلدامانگ! نه آخلاقسیزلار، نه-ده بُت‌پَرَستلِر، نه زیناکَرلِر، نه-ده بیری-بیری بیلِن تِلِکه ایش اِدیَن اِرکِکلِر،
۱۰ نه-ده اُغریلار، نه آچگُزلِر، نه-ده عاراقخُرلار، نه سِویَنلِر، نه-ده یالانچیلار شولارینگ بیری-ده خودایینگ پادیشاهلیغینی میراث آلماز.
۱۱ سیزینگ-ده کَبیرلِرینگیز اُزال شُلار یالیدینگیز. یُنه سیز تانگریمیز عیسی مسیحینگ آدی بیلِن و خوداییمیزینگ روحونینگ اوستو بیلِن یووولدینگیز و خودایینگ تاقوالی خالقی بُلوپ، پَکلِندینگیز.
ایماندارلارینگ آراسینداقی زیناکَرلیک
۱۲ سیز: «ایسلِیَن زادیمی اِتمَگه حاقیم بار» دییَّرسینگیز. هاووا، یُنه هِر زات سیزینگ اوچین پِیدالی دَلدیر. «ایسلِیَن زادیمی اِتمَگه حاقیم بار»، یُنه هیچ زات مِنینگ اوستومدِن حُکوم سورمِلی دَلدیر.
۱۳ سیز: «اییمیت قارین اوچین، قارین-دا اییمیت اوچیندیر و خودای اُلارینگ ایکیسینی هِم یُق اِدِر» دییّپ دُغری آیدیارسینگیز. اِمّا بِدِن زینا اِتمِک اوچین دَل-ده، مسیحه خیدمات اِتمِک اوچین بِرلِندیر و مسیح هِم بِدِنیمیز اوچین ایشلِیَندیر.
۱۴ خودای اُز گویجینینگ اوستو بیلِن مسیحی دیرِلتدی و بیزی هِم دیرِلدِر.
۱۵ اُندا سیز اُز بِدِنینگیزینگ مسیحینگ بِدِنینینگ اعضاسیدیغینی بیلمِیَرسینگیزمی؟ ایندی مسیحینگ اعضاسینی آلیپ، اُنی بیر فاحیشه بیلِن بیریکدیرِیینمی؟ هِرگِز اِتمِرین!
۱۶ اُندا هِر کیم اُزونی فاحیشه بیلِن بیرلِشدیرسه اُنونگ بیلِن بیر تِن بُلیاندیغینی بیلمِیَرسینگیزمی نَمه؟ چونکی تُورات‌دا: «ایکیسی بیر تِن بُلیار»* دییّپ یازیلاندیر.
۱۷ اِمّا مسیح بیلِن بیرلِشِن هِم روحدا اُنونگ بیلِن بیر بُلار.
۱۸ زینادان قاچینگ. آدام هِر هیلی گونَه اِتسه-ده، اُل اُنونگ بِدِنینینگ داشیندادیر. اِمّا زینا اِدیَن اُز بِدِنینه قارشی گونَه اِدیَندیر.
۱۹ اُندا سیز اُز بِدِنینگیزینگ مُقادِّس روحونگ یاشایان عیباداتخاناسیدیغینی بیلمِیَرسینگیزمی؟ سیز بو روحی خودایدان آلدینگیز و سیز دینگه اُزونگیزینگکی دَلسینگیز.
۲۰ چونکی سیز باهالی ساتین آلنانسینگیز. شُنگا گُرَه-ده، اُز بِدِنینگیز بیلِن خودایی بِییکلِندیرینگ.