نیکاح بارادا
۷
ایندی بُلسا سیزینگ مانگا: «اِرکِگینگ آیالا قُلایلاشمازلیغی یاخشیدیر» دییّپ یازانلارینگیز بارادا آیتماقچی.
۲ زینالیغا یُل بِرمِزلیک اوچین، قُی، هِر اِرکِک اُز آیالی و هِر آیال-دا اُز اَری بیلِن یاشاسین.
۳ اَر اُز آیالی باباتدا و آیالی-دا اُز اَری باباتدا اَر-آیال‍لیق وِظیفه‌لِرینی بِرجای اِتمِلیدیرلِر.
۴ آیالینگ بِدِنی اُزونینگکی دَل-ده، اَرینینگ ایختییاریندادیر. اَری باباتدا هِم شِیلِدیر: اَرینینگ بِدِنی اُزونینگکی دَل-ده، آیالینینگ ایختییاریندادیر.
۵ دینگه آرازا توتیان و دُغا اِدیَن واقتینگیز بُلایماسا، باشغا واقت بیری-بیرینگیزی اَر-آیال‍لیق حاقیندان ماحروم اِتمَنگ. بو هِم اُزآرا راضیلاشیغا گُرَه دینگه واقتلایین بُلسون. سُنگرا قایتادان بیرلِشینگ. یُغسا اُز نِفسینگیزی ساقلاپ بیلمِیَنلیگینگیزدِن پِیدالانیپ، شِیطان سیزی وِسوِسه دوشورایماسین.
۶ مِن بولاری دِستور دَل-ده، دُغری گِلیَن حُکمونده آیدیارین.
۷ اِلبِتّه، هِر کیمینگ مِن یالی بُلماغینی ایسلِیَرین. اِمّا یُنه هِر کیمینگ خودایدان آلان اُز ناغماتی باردیر: بیرینینگ ناغماتی بِیلِدیر، باشغانینگ ناغماتی اِیلِدیر.
۸ اُندا دول قالان اِرکِکلِره و آیال‍لارا شِیله دییَّرین: اُلارا مِن یالی اُیلِنمِزلیک قاویدیر.
۹ اِمّا اِگِر اُز نِفسلِرینی ساقلاپ بیلمِیَن بُلسالار، اُندا اُیلِنسینلِر. چونکی هُوِس اُدونا یاناندان، اُیلِنمِک قاویدیر.
۱۰ اُیلِنِنلِره بُلسا مِن دَل-ده، مسیح حُکوم اِدیَندیر: آیال اُز اَریندِن آیریلماسین.
۱۱ اِگِر آیریلان بُلسا، باشغا اَره بارماسین یا-دا اُز اَری بیلِن یاراشسین. اَر-ده اُز آیالینی طالاق بِرمِسین.
۱۲ بِیلِکیلِره بُلسا مسیح دَل-ده، مِن دییَّرین: اِگِر کیمدیر بیر ایمانلی آدامینگ ایمان گِتیرمِدیک آیالی بار بُلسا، اُل آیال هِم اُنونگ بیلِن یاشاماغا راضی بُلسا، اُندا بو آدام اُز آیالینی طالاق بِرمِسین.
۱۳ اِگِر ایمانلی آیالینگ ایمان گِتیرمِدیک اَری بار بُلسا، اَری-ده اُنونگ بیلِن یاشاماغا راضی بُلسا، بو آیال اَرینی طالاق بِرمِسین.
۱۴ چونکی ایمان گِتیرمِدیک اَر اُز آیالینینگ اوستو بیلِن مُقادِّس حاساپ بُلیاندیر. ایمان گِتیرمِدیک آیال-دا اُز ایمان گِتیریَن اَرینینگ اوستو بیلِن مُقادِّس حاساپلیدیر، یُغسا سیزینگ فِرزِنتلِرینگیز پَک حاساپ بُلمازدیلار. اِمّا ایندی اُلار مُقادِّس حاساپلیدیر.
۱۵ اِمّا ایمان گِتیرمِدیک یانیُلداش طالاق آلجاق بُلسا، قُی، طالاق آلسین. ایماندار اَر یا-دا آیال شِیله یاغدایلاردا بِرگیلی دَلدیر. یُنه خودای بیزی بیلِلیکده پاراحاتلی یاشاماغا چاغیراندیر.
۱۶ اِی آیال، نیرِدِن بیلیَنگ، بِلکی اَرینگ سِنینگ اوستونگ بیلِن نِجات بِریلِر. اِی اَر، نیرِدِن بیلیَنگ، بِلکی آیالینگ سِنینگ اوستونگ بیلِن نِجات بِریلِر.
۱۷ یُنه هِر هیلی بُلسا-دا، هِر کِس خودایینگ اُنگا بِلِّیشی یالی، خودای اُنی هایسی حالدا چاغیران بُلسا، شُنگا گُرَه-ده یاشاسین. مِن مونی هِمّه کِلیسالارا تابشیریارین.
۱۸ اِگِر بیری سونِّتلیکَه چاغیریلان بُلسا، قُی، سونِّتلیگینی سونِّتسیزلیگه اُوورجِک بُلوپ عاذاپا قالماسین. اِگِر بیری سونِّتسیزکَه چاغیریلان بُلسا، سونِّتلِنجِک بُلماسین.
۱۹ سونِّتلیک-ده و سونِّتسیزلیک-ده هیچدیر. اینگ مُهِم زات خودایینگ حُکوملِرینی بِرجای اِتمِکدیر.
۲۰ کیم هایسی بیر حالدا چاغیریلان بُلسا، شُندا-دا قالسین.
۲۱ سِن قول واقتینگ چاغیریلدینگمی؟ قُی، بو سِنی ناراحات اِتمِسین. یُنه آزاد بُلوپ بیلیَن بُلسانگ، فُرصَتی اِلدِن بِرمه.
۲۲ چونکی قول واقتی خودای طارافیندان چاغیریلان کیشی اُنونگ آزاد بِنده‌سیدیر. شُنونگ یالی، آزاد واقتی خودای طارافیندان چاغیریلان کیشی مسیحینگ قولودیر.
۲۳ سیز باهالی ساتین آلیندینگیز. اُندا آداملارینگ قولی بُلمانگ!
۲۴ اِی عزیزلِر، هِر کِس خودای طارافیندان نَهیلی حالدا چاغیریلان بُلسا، قُی، شُل حالدا-دا خودایینگ حوضوریندا قالسین.
نِشانلانما، اُیلِنمه و اُیلِنمِزلیک بارادا
۲۵ اُیلِنمِدیک یاشلار باباتدا مسیحدِن آلان حُکموم یُق. یُنه خودایینگ مِرحِمِتینینگ اوستو بیلِن وِفادار کیشی حُکمونده ماصلاحات بِریَرین.
۲۶ شو قینچیلیق زاماندا هِر کِسینگ اُوالقی حالیندا قالانی قاویدیر.
۲۷ اِگِر اُیلِنِن بُلسانگ، نیکاحنگی پُزما. و اِگِر هِنیز اُیلِنمِدیک بُلسانگ، اُندا گِلین-قیز گُزلِمه.
۲۸ یُنه اُیلِنسِنگ-ده، بو گونَه دَلدیر. گِلین بُلمادیق قیز هِم دورموشا چیقسا گونَه دَلدیر. اِمّا دورموش قورانلار بو دورموشدا کَن قینچیلیقلارا دوچار بُلارلار. مِن سیزی شُلاردان قُریماق ایسلِیَرین.
۲۹ اِی عزیزلِر، مِن سیزه شونی هِم آیتماقچی: بِلّی بُلان واقت خاص قُلایلاندیر. شُنگا گُرَه-ده، آیالی بُلانلار اِدیل آیالی یُق آداملار یالی بُلسون.
۳۰ آغلایانلار هِم آغلامایانلار یالی، شاتلانیانلار هِم شاتلانمایانلار یالی، اِملَک اِدینیَنلِر هِم اِدیل مال-مولکی بُلمادیقلار یالی یاشاسین.
۳۱ بو دونیَه‌نینگ ایشلِرینه مِشغول کیشیلِر-ده اُز واقتینی اُلارا گِچیرمِسین. چونکی بو دونیَه‌نینگ یاغدایی گِچیپ باریاندیر.
۳۲ مِن سیزینگ قایغیدان آزاد بُلماغینگیزی ایسلِیَرین. اُیلِنمِدیک کیشی خودایی راضی اِتجِک بُلوپ، خودایینگ ایشلِرینی فیکر اِدیَندیر.
۳۳ اِمّا اُیلِنِن کیشی اُز آیالینی راضی اِتجِک بُلوپ، بو دونیَه‌نینگ ایشلِرینی فیکر اِدیَندیر.
۳۴ شِیدیپ، اُنونگ قالبی ایکی بُلونِندیر. اَرسیز آیال یا-دا طُوی اِتمِدیک قیز خودایینگ ایشلِرینینگ فیکرینی اِدیپ، تِنده و هِم روحدا مُقادِّس بُلار یالی اُزونی خودایا تابشیریاندیر. اِمّا اَرلی آیال اُز اَرینی راضی اِتجِک بُلوپ، بو دونیَه‌نینگ ایشلِرینَه فیکر اِدیَندیر.
۳۵ مِن بولاری سیزینگ اِل-آیاغینگیزی باغلاماق اوچین آیتمایارین. تِرسینه، هِمّه قالبینگیزی خودایا تابشیریپ، دُغری یاشارینگیز یالی و سیزینگ پِیدانگیزا آیدیارین.
۳۶ اِگِر ییگیت آدام هُوِس اُدونا جیدامان، اُز نِشانلانان قیزینا بُلمالیسی یالی بُلماسا و اُیلِنمِک قارارینا گِلسه، قُی، اُیلِنیبِرسین، بو گونَه دَلدیر.
۳۷ اِمّا اُل اُیلِنمِزلیگی یورِگینه دووِن بُلسا، بو باباتدا مَحتَجلیگی بُلمان، اُز هُوِسینی ساقلاماغی باشاریپ و قاییم قارارا گِلِن بُلسا، اُندا اُل قاوی ایش اِدیَر.
۳۸ شونلوقدا، نِشانلیسی بیلِن اُیلِنیَن قاوی ایش اِدیَندیر، یُنه اُیلِنمِیَن بُلسا اُندا-دا قاوی ایش اِدیَندیر.