خودایینگ سایلاپ-سِچِن خالقی
۹
۱-۲ مِنینگ اولی قایغیم، یورِگیمده هِمیشه‌لیک آغیریم بار. مونونگ حاقیقاتدیغینا، یالان آیتمایاندیغیما عیسی مسیحینگ آدیندان شاهات گِچیَرین. سُزلِریمه مُقادِّس روحونگ اوستو بیلِن وِجدانیم-دا شاهاتدیر.
۳-۴ هاووا، مِن قانیبیر دُغانلاریم بُلان یَعنی اسرائیل خالقینینگ عیسی مسیحدِن داش دوشِنیندِن، اُزومینگ لَعنِته قالیپ، اُلارینگ خاطیراسینا مسیحدِن داش دوشمَگه-ده راضی بُلاردیم. خودای اُلاری اُغولّیغا آلدی، اُلارا اُز بِییکلیگینی بِلّی اِدیپ، اُلار بیلِن عَهد باغلاشدی. اُل شِریغاتی و عیباداتخاناداقی خیدماتی اُلارا ایناندی، واعدالارینی هِم اُلارا بِردی.
۵ اُلار بِییک آتا-بابالاریمیزینگ نِسلیدیر. عیسی مسیح هِم اینسان طِبیغاتی بُیونچا اُلاردان گِلیپ چیقاندیر. هِمّه زاتدان یُقاری بُلان خودایا اِبِدی بِییکلیک بُلسون! اَمین!
۶ مِن خودای اُز واعداسیندا دورمادی دییِمُق. سِبَبی آصلی اسرائیل بُلانلارینگ باری حاقیقی اسرائیل دَلدیر.
۷ ابراهیمینگ نِسلیندِن بُلانلارینگ-دا باری اُنونگ حاقیقی فِرزِنتلِری دَلدیر. سِبَبی مُقادِّس یازغیلاردا: «سِنینگ آدینگ اسحاقینگ نِسلینینگ اوستو بیلِن دُوام اِدِر» دییّپ یازیلاندیر.*
۸ دییمِک، ابراهیمینگ نِسلیندِن بُلانلارینگ بارینا خودایینگ فِرزِنتلِری دییّپ بُلماز. دینگه واعدا گُرَه دُغولانلار ابراهیمینگ حاقیقی نِسلی حاساپلانیاندیر.
۹ چونکی: «بِلِّنِن واقتدا دُلانیپ گِلِنیمده، سارانینگ بیر اُغلی بُلار» دییلیپ ابراهیما واعدا بِرلیپدی.*
۱۰ موندان باشغا-دا، رِبِکانینگ اِکیز فِرزِنتلِری بیر آتادان، یَعنی جِدّیمیز اسحاقدان دُغولوپدی.
۱۱-۱۲ یُنه اِکیز فِرزِنتلِر هِنیز دُغولمانقا، هِنیز یامانلیق یا یاخشیلیق ایش اِتمَکَه، خودای رِبِکا «اولوسی کیچیسینه خیدمات اِدِر» دییّپ آیدیپدی.* بو سُزلِر سایلانیپ-سِچیلمَنینگ اینسان ایشلِرینه دَل-ده، دینگه چاغیرانا باغلیدیغینی معلیم اِتمِک اوچین آیدیلیپدی.
۱۳ هاووا، مُقادِّس یازغیلاردا: «مِن یعقوبی سُیدوم، اِمّا عیسووی ییگرِندیم» دییّپ یازیلاندیر.*
۱۴ مونگا نَمه دییِیلی؟ اُندا خودای عادالاتسیزمی نَمه؟ اِلبِتّه، یُق!
۱۵ سِبَبی اُل موسی: «مِن مِرحِمِت اِدِنیمه مِرحِمِت و رِحم-شِپاقات اِدِنیمه رِحم-شِپاقات اِدِرین» دییّپ آیدیپدی.*
۱۶ شُنونگ اوچین-ده، سایلانیپ-سِچیلمه آدامینگ ایسلِگینه یا-دا تاقالّاسینا دَل-ده، خودایینگ مِرحِمِتینه باغلیدیر.
۱۷ خودای مُقادِّس یازغیلاردا مصرینگ فِرعونینا: «مِن اُز گویجومی سِنده گُرکِزیپ، آدیمی هِمّه دونیَه اِعلان اِتمِک ماقصادی بیلِن سِنی پادیشاه اِتدیم» دییّپ آیدیپدی.*
۱۸ شِیلِلیکده، خودای ایسلَنینه مِرحِمِت اِدیَر و ایسلَنینینگ یورِگینی قاتیدیار.
۱۹ اُندا مِندِن: «اِگِر شِیله بُلسا، اُندا نَمه اوچین خودای آداملاری کَییَر؟ اُنونگ ایسلِگینه قارشی چیقیپ بیلجِک بارمی؟» دییّپ سُراماغینگ مومکین.
۲۰ هِی آدام، خودایا کِپ قایتارار یالی، سِن کیم بُلوپسینگ؟ هی-دَه بِجِرلِن زات اُزونی بِجِرِندِن: «نَمه اوچین مِنی بِیله بِجِردینگ؟» دییّپ سُراپ بیلِرمی؟*
۲۱ اُندا کویزه‌چینینگ شُل بیر پالچیقدان ایسلَن قابینی: بیرینی مُهِم ایشلِر اوچین، بِیلِکیسینی هِر گونکی ایشلِر اوچین بِجِرمِگه حاقی یُقمی نَمه؟
۲۲ خودای اُز قودراتینی گُرکِزمِک اوچین، هِلَکچیلیگه لاییق بُلان آداملارینگ اوستونه غاضابینی دُکوپ بیلیَر. یُنه اُل اُزونی غاضابلاندیریان آداملارا اولی صابیر طاقاتلیق اِدیَندیر!
۲۳ خودای اُزونینگ اُنگدِن بِییکلیک اوچین تاییارلاپ، مِرحِمِت اِدِنلِرینه اُز اولی بِییکلیگینی بیلدیرمِک اوچین شِیله صابیر-طاقاتلی بُلیاندیر.
۲۴ خودایینگ شِیله مِرحِمِت اِدِنلِرینینگ و چاغیرانلارینینگ آراسیندا دینگه یَهودیلِر دَل، اُندان باشغا میلِّتلِر هِم باردیر. هاووا، بولارینگ آراسیندا بیز هِم باردیریس.
۲۵ خودای هوشَع پیغامبارینگ اوستو بیلِن شِیله دییَّر:
«مِنینگ خالقیم بُلمادیغا ”خالقیم“ دییِرین،
سُیگولی بُلمادیغا ”سُیگولیم“ دییِرین.*
۲۶ اُلارا: ”سیز مِنینگ خالقیم دَلسینگیز“ دییلِن یِرده،
”سیز دیری خودایینگ اُغول‍لاریسینگیز“ دییلِر.»*
۲۷ اِشعیا پیغامبار هِم اسرائیل خالقی بارادا شونی اِعلان اِتدی:
«اسرائیل خالقی دِریا کِنارینداقی چَگه یالی کَن بُلسا-دا،
دینگه بیرنَچه‌سی نِجات تاپارلار.
۲۸ چونکی خودای اُز چیقاران حُکومینی هِمّه یِر یوزونده باسیم و کَمیل یِرینه یِتیرِر.»*
۲۹ اِشعیا پیغامبار هِم اُنگدِن شولاری آیدیپدی:
«اِگِر حُکومران خودای
نِسیل‍لِریمیزی آمان قالدیرمادیق بُلسادی،
سُدوم شَهر یالی بُلاردیق
و غَموره شَهره مِنگزَردیک.»*
اسرائیل خالقینینگ ایمانسیزلیغی
۳۰ اُندا نَمه دییّپ بیلِریس؟ خودایینگ حوضوریندا آقلانماغینگ ایزینا دوشمِدیک یَهودی دَل‍لِر ایمانینگ اوستو بیلِن آقلانماغا یِتدیلِر.
۳۱ اسرائیل خالقی بُلسا شِریغاتی بِرجای اِتمِگینگ اوستو بیلِن آقلانماقچی بُلدی، یُنه مونی باشارمادی.
۳۲ نَمه اوچین؟ سِبَبی اُلارینگ چالیشمالاری ایمانا دَل-ده، شِریغاتا دایاندی. اُلار «بودریمه داشینا» بودریدیلِر.
۳۳ خودای مُقادِّس یازغیلاردا اُلارا بو داش بارادا آیدیپدی:
«اینه، مِن صَهیوندا بودریمه داشینی،
و ییقیان قایا قُییارین؛
و کیم اُنگا بیل باغلاسا هیچ اوتاندیریلماز.»*