یاشاییش بِریَن روح
۸
شِیلِلیکده، عیسی مسیحه دِگیشلی بُلانلار ایندی آصلا مَحکوم بُلماز.
۲ سِبَبی یاشاییش بِریَن روحونگ قانونی بیزی عیسی مسیحینگ اوستو بیلِن گونَه‌نینگ و اُلومینگ قانونیندان آزاد اِتدی.
۳ شِریغات اینسان هُوِسلِریمیزینگ چاره‌سیندِن گِلیپ بیلمَنسُنگ، بیزی آزاد اِدیپ بیلمِدی. شِریغاتینگ باشارمادیق ایشینی خودای یِرینه یِتیردی. خودای دونیَه‌دَکی گونَه سِبَپلی اُز اُغلونی بیر گونَه‌کَر اینسان کیمین ایبِردی-ده، اُنونگ اوستو بیلِن گونَه‌نی مَحکوم اِتدی.
۴ خودای مونی شِریغاتینگ عادالاتلی ایسلِگلِرینینگ بیزده بِرجای بُلماغی اوچین عِمِل اِتدی. شونلوقدا، بیز ایندی اینسان هُوِسلِریمیزه گُرَه دَل-ده، روحا گُرَه یاشایاریس.
۵ چونکی اینسان هُوِسلِرینه گُرَه یاشایانلار بو هُوِسلِرینگ حالایان زاتلاری بارادا فیکر اِدیَرلِر. اِمّا روحا گُرَه یاشایانلار بُلسا اُنونگ حالایان زاتلاری بارادا فیکر اِدیَندیر.
۶ اینسان هُوِسلِریندِن دُرِیَن فیکرلِر آدامی اُلومه اِلتیَر. اِمّا روحدان دُرِیَن فیکرلِر بُلسا یاشاییش و پاراحاتلیق بِریَر.
۷ اینسان هُوِسلِریندِن دُرِیَن فیکرلِر خودایا دوشماندیر. سِبَبی اُلار خودایینگ شِریغاتینا موطیع دَلدیر، آصلیندا موطیع بُلماغی هِم باشاریان دَلدیر.
۸ شُنونگ اوچین-ده، اینسان هُوِسلِرینه گُرَه یاشایانلار، خودایی خُشنود اِدیپ بیلمِز.
۹ اِگِر خودایینگ روحی دُغرودان-دا قالبینگیزدا مِسکِن توتان بُلسا، سیز اینسان هُوِسلِرینینگ ایختییاریندا دَلسینگیز، سیز روحونگ ایختییارینداسینگیز. کیمده مسیحینگ روحی بُلماسا، اُل مسیحه دِگیشلی دَلدیر.
۱۰ اِگِر عیسی مسیح قالبینگیزدا مِسکِن توتان بُلسا، اُندا گونَه سِبَپلی اُلمِلی بُلسانگیز-دا، روح سیزه یاشاییش بِرِر، سِبَبی سیز خودایینگ حوضوریندا آقلانانسینگیز.
۱۱ اِگِر عیسی مسیحی اُلومدِن دیرِلدِنینگ روحی قالبینگیزدا یاشایان بُلسا، مسیحی اُلولِردِن دیرِلدِن خودای حتّیٰ فانی بِدِنلِرینگیزه-ده یاشاییش بِرِر. اُل مونی سیزده یاشایان روحونینگ اوستو بیلِن اِدِر.
۱۲ شُنگا گُرَه-ده، اِی عزیزلِر، بیز ایندی اینسان هُوِسلِرینینگ ایسلِگلِرینه گُرَه یاشاماغا بِرگیلی دَلدیریس.
۱۳ اِگِر سیز اینسان هُوِسلِرینینگ ایسلِگلِرینه گُرَه یاشاسانگیز، اُلِرسینگیز. اِمّا اینسان هُوِسلِرینینگ تِلِکه ایشلِرینی روحونگ گویجینینگ اوستو بیلِن یُق اِتسِنگیز، یاشارسینگیز.
۱۴ سِبَبی خودایینگ روحونونگ طارافیندان هِدایت بُلیان آداملار خودایینگ فِرزِنتلِریدیر.
۱۵ خودای بیزه اُز روحونی بِردی، اُل مونی قایتادان قول بُلوپ، قُرقودا یاشاماغیمیز اوچین دَل، شِیله بُلسا اُنونگ فِرزِنتلِری بُلوپ، روحونگ اوستو بیلِن «آبّا،* آتا» دییّپ چاغیرماغیمیز اوچین اِتدی.
۱۶ شُل روح بیزینگ روحومیز بیلِن بیرلیکده خودایینگ فِرزِنتلِریدیگیمیزه شاهادات بِریَر.
۱۷ شِیلِلیکده، اِگِر فِرزِنتلِری بُلان بُلساق، اُندا میراثداری هِم بُلیاندیریس. خودایینگ میراثدارلاری بُلیان بُلساق، اُندا عیسی مسیح بیلِن هِم میراثدار بُلیاندیریس. بیز عیسی مسیحینگ گُرِن عاذاپلارینا شِریک بُلیان بُلساق، اُندا اُنونگ بِییکلیگینَه هِم شِریک بُلاریس.
قینچیلیقلار و گِلِجِگینگ بِییکلیگی
۱۸ مِنینگ فیکریمچه، شو واقتقی قینچیلیقلاریمیزی بیزه آیان بُلجاق گِلِجِکّی بِییکلیک بیلِن دِنگِشدیریپ-ده بُلماز.
۱۹ خودایینگ اُز فِرزِنتلِرینینگ بِییکلیگینی آیان اِتجِک واقتینا هِمّه یارادیلیش هِم صابیرسیزلیق بیلِن قاراشیار.
۲۰-۲۱ سِبَبی یارادیلیش اُز ایسلِگینَه گُرَه دَل-ده، خودایینگ ایسلِگینَه گُرَه پوچلیغا موطیع بُلوپدی. ایندی بُلسا خودایینگ فِرزِنتلِرینینگ بِییکلیگینَه قاوشان واقتیندا یارادیلیش اُزونینگ هِم چویریمه لَعنِتیندِن آزاد اِدیلیپ، شُل بِییکلیگَه قاوشارین دییّپ اومید اِدیَر.
۲۲ بیز هِمّه یارادیلیشینگ شو واقتا چِنلی آخی-ناله چِکیپ، چاغا دُغورما دِردلِر یالی دِرد چِکیَندیگینی بیلیَریس.
۲۳ دینگه بیر یارادیلیش دَل-ده، شِیله بُلسا خودایینگ روحونونگ اَوَّلکی میوه‌سی بُلان بیز هِم ایچیمیزده آخی-ناله چِکیَریس. سِبَبی بیز اُزومیزینگ اُغولّیغا آلنیپ، بِدِنیمیزینگ چویریمِدِن آزاد اِدیلمِگینه صابیرسیزلیق بیلِن قاراشیاریس.
۲۴ بیز نِجات تاپیلانیمیز اوچین، ایندی بو اومیدیمیز باردیر. یُنه گُزه گُرنوپ دوران اومید آصلا اومید دَلدیر. گُروپ دوران زادینا اومید باغلایان آدام بارمی نَمه؟
۲۵ اِگِر بیز گُرمِیَن زادیمیزا اومید باغلاساق، اُندا صابیرلیق بیلِن قاراشیاندیریس.
۲۶ روح هِم اِجیزلیگیمیزده بیزه کُمِک بِریَر، سِبَبی بیز حتّیٰ نَهیلی و نَمه بارادا دُغا اِتمِلیدیگیمیزی هِم بیلمِیَریس. اِمّا روحونگ اُزی سُز بیلِن بِیان اِدیپ بُلماجاق ناله‌لِر بیلِن بیزینگ اوچین تُوِلّا اِدیَر.
۲۷ اینسان یورِگینی بارلایان خودای روحونگ فیکرلِرینه دوشونیَندیر. سِبَبی مُقادِّس روح خودایینگ ایسلِگینه گُرَه اُنونگ خالقی اوچین تُوِلّا اِدیَندیر.
۲۸ بیز خودایی سُییَنلِر و اُنونگ ماقصادینا گُرَه چاغیریلانلار اوچین هِمّه زاد پِیداسینا اِدیلیَندیگینی بیلیَریس.
۲۹ چونکی خودای اُلاری اُووندِن سایلاپ-سِچدی و «مِنینگ اُغلوما مِنگزِسینلِر» دییّپ، اُنگدِن بِلَّپ قُیدی. اُل مونی عیسی مسیحینگ کَن اِرکِک و آیال دُغانلارینینگ آراسیندا باشداقی بُلماغی اوچین عِمِل اِتدی.
۳۰ خودای اُنگدِن بِلَّنلِرینی چاغیردی، چاغیرانلارینی آقلادی و آقلانلارینی بِییکلیگَه گِییندیردی.
خودایینگ سُیگوسی
۳۱ بولاردان باشغا آیدارا زات قالدیمی نَمه؟ خودای بیز بیلِن بُلسا، کیم بیزه قارشی چیقیپ بیلِر؟
۳۲ خودای حتّیٰ اُز اُغلونی قایغیرمان، اُنی بیزینگ گونَه‌لِریمیز اوچین اُلومه تابشیران بُلسا، اُندا اُنونگ بیلِن بیرلیکده بِیلِکی زاتلارینگ بارینی هِم باغیشلامازمی نَمه؟
۳۳ خودایینگ سایلاپ-سِچِنلِرینی عاییپلاماغا کیم دِگیپ بیلِر؟ هیچ کیم، سِبَبی اُلاری خودایینگ اِدیل اُزی آقلایار!
۳۴ بیزی کیم مَحکوم اِدیپ بیلِر؟ هیچ کیم، سِبَبی اُلوپ دیرِلِن عیسی مسیح خودایینگ ساغیندا اُتوریپ، بیزینگ اوچین تُوِلّا اِدیَر.
۳۵ بیز عاذاپ و قینچیلیقلاری گُریَریس، جِفالارا، آچلیغا، مَحتَجلیگه دوچار بُلیاریس، خاطارا و اُلومه سِزاوار اِدیلیَریس. اُندا بولارینگ باری بیزی عیسی مسیحینگ سُیگوسیندِن آیریپ بیلِرمی نَمه؟ اِلبِتّه، یُق!
۳۶ سِبَبی مُقادِّس یازغیلاردا:
«بیز هِر گون سِنینگ اوچین اُلدوریلیَریس،
داماغی چالینجاق قُیون یالی حاساپلانیاریس» دییّپ یازیلاندیر.*
۳۷ یُنه بیز اُزومیزی سُییَنینگ اوستو بیلِن بو قینچیلیقلارینگ بارینی یِنگیَریس.
۳۸ سِبَبی مِن نه اُلومینگ، نه-ده یاشاییشینگ، نه پِریشده‌لِرینگ، نه-ده جینلارینگ، نه حَضیرکی، نه گِلِجِکّی یاغدایلارینگ، نه-ده هیچ بیر گویچلِرینگ،
۳۹ نه بِییکلیگینگ، نه-ده آشاقلیغینگ و یارادیلان زاتلارینگ بیرینینگ-ده بیزی تانگریمیز عیسی مسیحینگ اوستو بیلِن آیان بُلان خودایینگ سُیگوسیندِن آیریپ بیلمِجِکدیگینه قاتی اینانیارین.