پولس قُرِنتُس شَهرینده
۱۸
موندان سُنگ پولس آتِنی قُیوپ، قُرِنتُسا گیتدی.
۲ اُل یِرده پولس آکیلا آدلی بیر یَهودی بیلِن تانیشدی. آکیلا آصلی پونتوسلی بُلوپ، آیالی پریسکیلا بیلِن تَزه‌لیکده ایتالیادان گِلیپدی. سِبَبی ایمپِراطُر کلودیوس هِمّه یَهودیلِرینگ رومدان چیقماقلاری بارادا دِستور چیقاریپدی. پولس بو ماشغالانی گُرمَگه گیتدی.
۳ اُلار هِم پولس یالی چادیر تیکمِک بیلِن مِشغولّانیاردیلار، شُنونگ اوچین پولس اُلار بیلِن یاشاپ، بیله ایشلِدی.
۴ پولس هِر سَبَّت گونی کِنیسه‌ده خوش خابار حاقدا فیکر آلشیپ، یَهودیلِری و یونانیلاری ایناندیرماغا چالیشیاردی.
۵ سیلاس بیلِن تیموتاوس مَقدونیه‌دِن گِلِنلِریندِن سُنگ، پولس تامام واقتینی عیسی حاقدَکی خاباری واغیظ اِتمَگه باغیشلادی. اُل یَهودیلِره عیسانینگ مسیحدیگی بارادا شاهاتلیق اِتدی.
۶ اِمّا اُلار پولسه قارشی چیقیپ، اُنگا سِومَگه باشلادیلار. شُندا پولس اُلاردان ناراضی بُلوپ، لِباسینینگ چانگینی قاقیپ: «قانینگیز اُز بُینونگیزا بُلسون، مِنده عاییپ یُق. موندان بِیلَک مِن باشغا میلِّتلِرینگ یانینا گیتجِک» دییدی.
۷ اُنسُنگ پولس اُل یِردِن چیقیپ، تیتوس یوستوس آدلی بیر آدامینگ اُیونه باردی. تیتوس یوستوس خودایا عیبادات اِدیَن آدام بُلوپ، اُنونگ اُیی کِنیسه بیلِن یاناشیقدی.
۸ کِنیسه باشلیغی کریسپوس هِمّه اُی-ایچِرسی بیلِن بیله خودایا ایمان گِتیردی. پولسی دینگلَن اِنچِمه قُرِنتُس‌لیلار هِم ایمان گِتیریپ، تَعمید آلدیلار.
۹ بیر گیجه خودای رویانینگ اوستو بیلِن پولسه شِیله دییدی: «قُرقما، کِپله، سِسّیز بُلما!
۱۰ مِن سِنینگ بیلِندیرین، هیچ کیم سانگا آزار بِرمِز، یامانلیق اِتمِز، سِبَبی بو شَهرده مِنینگ خالقیمینگ سانی کَندیر.»
۱۱ شِیلِلیکده، پولس بیر ییل یاریم اُلارینگ آراسیندا قالیپ، خودایینگ سُزونی تَعلیم بِردی.
۱۲ آخائیه وِلایاتینینگ حاکیمی غالیونینگ زاماندا یَهودیلِر بیرلِشیپ، پولسه قارشی چیقدیلار و اُنی مَحکِمَه گِتیردیلِر.
۱۳ اُلار: «بو آدام شِریغاتا قارشی یُل‍لار بیلِن خالقی خودایا عیبادات اِتمَگه چِکیَر» دییدیلِر.
۱۴ پولس شو واقت سُزه باشلاماقچی بُلوپ دورقا، غالیون یَهودیلِره یوزلِنیپ: «اِی یَهودیلِر! اِگِر داعوانگیز بیر عادالاتسیزلیق یا آغیر جِنایات حاقدا بُلان بُلسادی، سیزی صابیرلیق بیلِن دینگلِمِگی دُغری بیلِردیم.
۱۵ اِمّا مِسِلَنگیز سُزلِر، آدلار و اُز شِریغاتینگیز بارادا میشدیق، بولاری اُزونگیز چُزونگ. مِنینگ بولارا قاضیلیق اِدِسیم گِلِنُق» دییدی.
۱۶ شِیلِلیکده، اُلاری مَحکِمه‌دِن قُووپ گُیبِردی.
۱۷ اُنسُنگ اُلار کِنیسه‌نینگ باشلیغی سوستِنِسی مَحکِمَه‌نینگ اُوونده توتوپ یِنچدیلِر. اِمّا غالیون بولارینگ هیچ بیرینه اَهمییِت هِم بِرمِدی.
پولس انطاکیَه دُلانیار
۱۸ پولس قُرِنتُس‌دا یِنه بیرنَچه گونلَپ قالدی. سُنگرا دُغانلار بیلِن خوشلاشیپ، کِشتی بیلِن سوریَه گیتدی. پریسکیلا بیلِن آکیلا هِم اُنونگ بیلِن گیتدیلِر. پولس خودایا اِدِن واعداسینی ساقلاپ، کِنخریه طاراف یُلا دوشمِزدِن اُنگ، ساچینی سیردیردی.
۱۹ اِفِسُسا گِلِنلِرینده، پولس پریسکیلا بیلِن آکیلانی شُل یِرده قالدیردی. اُزی بُلسا کِنیسه گیدیپ، یَهودیلِر بیلِن فیکر آلیشدی.
۲۰ آداملار پولسدِن اُز یانلاریندا کَنرَک قالماغینی خاییش اِتدیلِر، اِمّا پولس راضی بُلمادی.
۲۱ خوشلاشمازدان اُنگ، اُلارا سُز بِریپ: «خودای ایسلِسَه، یانینگیزا یِنه گِلِرین» دییدی. شوندان سُنگ اِفِسُسی قالدیریپ، کِشتی بیلِن یُلا دوشدی.
۲۲ پولس قیصریه گِلِنده، اورشلیمه گیدیپ، ایماندارلارینگ هِمّه‌سی بیلِن گُروشدی. سُنگرا انطاکیَه گیتدی.
۲۳ اُل یِرده بیرنَچه واقت قالاندان سُنگ، یِنه یُلا دوشدی، غَلاطیه و فریجیه یورتلارینی آیلانیپ، هِمّه شَگیرتلِری ایماندا گویچلِندیردی.
آپولُس واغیظ اِدیَر
۲۴ شُل واقت آپولُس آدلی بیر یَهودی اِفِسُسا گِلدی. اُنونگ آصلی اسکندریه‌لیدی. دیلِوار آپولُس مُقادِّس یازغیلاری خاص قاوی بیلیَردی.
۲۵ عیسانینگ یُلوندا تَعلیم آلان بو آدام قیزقینلیق روحی بیلِن کِپلِیَردی. دینگه یحیانینگ تَعمیدلِنیش تَعلیماتینی آلان هِم بُلسا، عیسی باراداقی حاقیقاتلاری دُغری اُورِدیَردی.
۲۶ اُل کِنیسه‌ده باتیرلیق بیلِن کِپلِمَگه باشلادی. پریسکیلا بیلِن آکیلا آپولُسینگ واغظینی اِشیدِنلِرینده، اُنی اُز اُیلِرینه چاغیریپ، اُنگا خودایینگ یُلونی خاص قاوی دوشوندیریپ بِردیلِر.
۲۷ آپولُس آخائیه گیتمِگی یورِگینه دوودی. اِفِسُسداقی دُغانلار اُل یِردَکی شَگیرتلِره اُنی قاوی قارشی آلماقلارینی ایسلَپ، نامه یازدیلار. آپولُس آخائیه گِلیپ، خودایینگ مِرحِمِتی بیلِن ایمان گِتیرِنلِره اولی کُمِک اِتدی.
۲۸ اُل مُقادِّس یازغیلار اِساسیندا عیسانینگ مسیحدیگینی تاصدیق اِدیپ، یَهودیلِرینگ ناحاقدیغینی خالقینگ اُوونده آچیق آیان اِدیَردی.