پولس تِسالونیکیده واغیظ اِدیَر
۱۷
پولس بیلِن سیلاس آمفیپولیس و آپولونیا شَهرلِرینینگ ایچیندِن گِچیپ، تِسالونیکیَه گِلدیلِر. اُل یِرده یَهودیلِرینگ بیر کِنیسه‌سی باردی.
۲ پولس عاداتینا گُرَه کِنیسه گیتدی و اوچ سَبَّت گونی اُلار بیلِن مُقادِّس یازغیلارا گُرَه گورّونگ اِتدی.
۳ اُل مسیحینگ زَحمِت گُرمِگینینگ و سُنگرا اُلومدِن دیرِلمِگینینگ گِرِک بُلاندیغینی دوشوندیریپ بِلّی اِتدی. اُل: «مِنینگ سیزه واغیظ اِدیَن عیسام، اُل مسیحدیر» دییدی.
۴ اُلاردان کَبیری پولس بیلِن سیلاسا اینانیپ، اُلارا قُشولدیلار. شِیله هِم خودایا عیبادات اِدیَن کَن سانلی یونانیلار و اولی مِرتِبه‌لی اِنچِمه آیال‍لار اُلارا قُشولدیلار.
۵ اِمّا یَهودیلِر باخیلچیلیق اِتدیلِر، اُلار بازاردا بیکَر گِزیپ یُرِن یامان آداملارینگ بیرنَچه‌سینی یانلارینا جِملَپ، شَهرده قالماغال توروزدیلار. پولس بیلِن سیلاسی تاپیپ، جِماغاتینگ اُوونه چیقارماق اوچین، یاسونینگ اُیونه دُکولدیلِر.
۶ اِمّا اُلاری تاپیپ بیلمِدیلِر. اُنسُنگ یاسون بیلِن بیرنَچه دُغانلاری شَهر باشچیلارینینگ اُوونه سویرَپ گِتیریپ: «بو آداملار هِمّه دونیَه‌ده قالماغال تورزوپ، بیزینگ شَهریمیزه هِم گِلدیلِر.
۷ یاسون اُلارا اُیوندِن جای بِردی. اُلارینگ هِمّه‌سی عیسی دییِن پادیشاه بار دییّپ، ایمپِراطُرینگ دِستورلارینا قارشی چیقیارلار» دییّپ قیغیردیلار.
۸ خالق و شَهر باشچیلاری بو خاباری اِشیدیپ آلدیرادیلار.
۹ اُنسُنگ یاسون بیلِن بِیلِکیلِردِن ضامانات آلیپ بُشادیپ گُیبِردیلِر.
پولس بیلِن سیلاس بیریه شَهرینده
۱۰ ایماندارلار شُل گیجَه‌نینگ اُزونده پولس بیلِن سیلاسی بیریه شَهرینه ایبِردیلِر. اُلار شَهره گِلیپ، یَهودیلِرینگ کِنیسه‌سینه باردیلار.
۱۱ بیریه‌دَکی یَهودیلِرینگ تِسالونیکیدَکی یَهودیلِره باقانلاریندا کَن آصیلّیدیلار. اُلار عیسی حاقینداقی خاباری خاص گُوونلیلیک بیلِن قابول اِدیپ، پولسینگ آیدانلارینینگ حاقیقاتدیغینی گُرمِک اوچین، مُقادِّس یازغیلاری هِر گون گُزلِشدیریَردیلِر.
۱۲ یَهودیلِرینگ کَنسی، شِیله هِم آد-آبرایلی اِنچِمه یونانی آیال‍لاری و اِرکِکلِری عیسی ایمان گِتیردیلِر.
۱۳ اِمّا تِسالونیکیدَکی یَهودیلِر پولسینگ بیریه‌ده خودایینگ سُزونی واغیظ اِدِندیگینی بیلِنلِرینده، اُل یِره هِم گیتدیلِر. اُلار خالقی کوشگوریپ، قالماغال توروزدیلار.
۱۴ شُندا ایماندارلار پولسی شو واقتدا دِریانینگ کِنارینا اوغراتدیلار. سیلاس بیلِن تیموتاوس بُلسا بیریه‌ده قالدیلار.
۱۵ پولسی اوغرادیانلار اُنی آتِنه چِنلی گِتیردیلِر. سُنگرا اُلار پولسدِن: «سیلاس بیلِن تیموتاوس باسیمراق مِنینگ یانیما گِلسینلِر» دییِن تابشیریغی اُلار آلانلاریندان سُنگ، بیریه شَهرینه دُلانیپ گِلدیلِر.
پولس آتِن‌ده واغیظ اِدیَر
۱۶ پولس آتِن‌ده سیلاس بیلِن تیموتاوسا قاراشیارقا، شَهرینگ بُتلاردان دُلودیغینی گُروپ، اُنونگ یورِگی دیلیندی.
۱۷ شُنونگ اوچین پولس کِنیسه‌ده یَهودیلِر و خودایا عیبادات اِدیَن کَن یونانیلار بیلِن گورّونگلِشدی. شِیله هِم هِر گون بازاردا دوش گِلِن آداملار بیلِن گورّونگ اِتدی.
۱۸ بیرنَچه اِپیکورین و رَواقین فیلسوفلار هِم پولس بیلِن جِدِلِّشدیلِر. کَبیرلِری: «بو بُش سُزلی آدام نَمه دییجِک بُلیار؟» کَبیرلِری: «اُل بیگانه خودایلار بارادا واغیظ اِدیَر» دییَّردی. پولس عیسانینگ خوش خابارینی و دیرِلیشینی واغیظ اِدیَندیگی اوچین، اُلار شِیله دییَّردیلِر.
۱۹ اُلار پولسی توتوپ، آریوپاگوس مِجلِسینه گِتیریپ، شِیله دییدیلِر: «سِنینگ اُورِدیَن بو تَزه تَعلیماتینگ نَمِدیگینی بیز هِم بیلسِک بُلارمی؟
۲۰ سِن بیزینگ اُنگ اِشیتمِدیک کَبیر گِنگ زاتلاریمیز بارادا گورّونگ اِدیَرسینگ. بیز ایندی بو زاتلارینگ نَمه دوشوندیریَندیگینی بیلمِک ایسلِیَریس.»
۲۱ هِمّه آتِن‌لیلِر و اُل یِرده یاشایان بیگانه‌لِر هِمّه واقتلارینی تَزه دوشونجِلِر بارادا گورّونگ اِتمِک یا-دا دینگلِمِک بیلِن گِچیریَردیلِر.
۲۲ سُنگرا پولس آریوپاگوس مِجلِسینینگ اُرتاسیندا دوروپ، شِیله دییدی: «اِی آتِن‌لیلِر! مِن سیزینگ هِر باباتدان قاتی دینداردیغینگیزی گُریَرین.
۲۳ مِن هِمّه شَهره آیلانیپ چیقیپ، سیزینگ عیبادات اِدیَن زاتلارینگیزی گُزدِن گِچیردیم. بو زاتلارینگ آراسیندان ”تانیلمادیق خودایا“ دییِن یازغیلی بیر قربانلیق جایینی گُردوم. اینه، مِن سیزه اُزونگیزینگ تانیمازدان عیبادات اِدیَن خودایینگیز بارادا گورّونگ بِرمِکچی.
۲۴ «عالِم-جاهانی و اُنداقی تامام زاتلاری یارادان خودای یِرینگ-آسمانینگ حُکومداری بُلوپ، اینسان اِلی بیلِن یاسالان عیباداتخانالاردا یاشامایار.
۲۵ اُنگا آدامینگ خیدماتینینگ گِرِگی یُق، اُل هیچ زادا مَحتَج دَل، سِبَبی هِر بیر اینسانا یاشاییش، دِم و تامام زادی بِریَن اُنونگ اُزودیر.
۲۶ خودای هِمّه میلِّتلِری بیر آدامدان یارادیپ، اُلاری هِمّه یِر یوزونه یایراتدی. اُلارینگ یاشاجاق واقتینی و زامانینی اُووندِن بِلَّپ بِردی.
۲۷ اُل بولاری اُزونی آغتارسینلار، گُزلَپ تاپسینلار دییّپ اِتدی. حاقیقاتدانام، خودای بیزینگ هیچ بیریمیزدِن اوزاقدا دَلدیر.
۲۸ بیز اُنونگ بیلِن یاشایاندیریس، حِرِکِت اِدیَندیریس و باردیریس. کَبیر شاهیرلارینگیزینگ آیدیشی یالی: ”بیز اُنونگ نِسلیندِندیریس“.
۲۹ شُنونگ اوچین هِم خودایینگ نِسلیندِندیگیمیزه گُرَه، بیز اُنی اینسان صانعاتی و هونَری بیلِن قیزیلدان، کوموشدِن یا-دا داشدان یاسالان مُجِسِّمه مِنگزِتمِلی دَلدیریس.
۳۰ خودای گِچمیشده اینسانلارینگ بو دوشونمِزلیکلِرینی اینکَر اِتمِسینه گُز یومدی. ایندی بُلسا اُل هِمّه یِرده تامام آداملارینگ توبا اِتمِگینی اِمر اِدیَر.
۳۱ چونکی خودای اُز بِلَّن اینسانی بیلِن دونیَه‌نی عادالاتلی حُکوم اِتجِک گونونی بِلِّدی. اُنی اُلومدِن دیرِلتمِک بیلِن اُنی بِلَّندیگینی تامام اینسانلارا تاصدیق اِتدی.»
۳۲ اُلار پولسینگ اُلومدِن دیرِلیش باراداقی کِپینی اِشیدِنلِرینده، کَبیرلِری اُنی ماسغارا اِتدی، کَبیرلِری بُلسا: «بو حاقدا سِنی یِنه دینگلَریس» دییدیلِر.
۳۳ شِیلِلیکده، پولس اُلارینگ آراسیندان چیقیپ گیتدی.
۳۴ بیرنَچه آدام اُنگا قُشولیپ ایمان گِتیردیلِر. اُلارینگ آراسیندا مِجلِسینگ آدامی دیونیسیوس، شِیله هِم، داماریس آدلی بیر آیال و باشغا-دا اِنچِمه آداملار باردی.