پِطرُس بیلِن یوحنا مِجلِسینگ اُوونده
۴
پِطرُس بیلِن یوحنا خالقا گورّونگ بِریپ دورقالار، بیرنَچه کاهین، عیباداتخانا ساقلاوچیلارینینگ سِرداری و صادّوقی‌لار اُلارا قارشی چیقدیلار.
۲ اُلار قاهار-غاضابا میندیلِر، سِبَبی بو ایکی رِسول خالقا تَعلیم بِرمِک بیلِن عیسادا اُلولِرینگ دیرِلیشینی اِعلان اِدیَردیلِر.
۳ اُلار پِطرُس بیلِن یوحنانی توتدولار و آغشام دوشِندیگی اوچین، اُلاری اِرتیره چِنلی زینداندا ساقلادیلار.
۴ اِمّا بو گورّونگلِری دینگلَنلِرینگ اِنچِمه‌سی عیسی ایمان گِتیردی. شُندا ایمان گِتیرِن اِرکِکلِرینگ سانی بَش مونگه قُلایا یِتدی.
۵ اِرتیسی گون یَهودیلِرینگ یُلباشچیلاری، یاشولیلاری و دین عُلَمالاری اورشلیمه ییغناندیلار.
۶ باش کاهین حَنّا، قیافا، یوحنا، اسکندر و باش کاهینینگ قارینداشلاری شُل یِردِدیلِر.
۷ اُلار پِطرُس بیلِن یوحنانی اُرتادا دورزوپ: «سیز مونی هایسی قودرات بیلِن، کیمینگ آدیندان اِتدینگیز؟» دییّپ سُرادیلار.
۸ شُندا پِطرُس مُقادِّس روحدان دُلوپ، اُلارا شِیله دییدی: «اِی خالقینگ یُلباشچیلاری و یاشولیلاری!
۹ بیز بو گون بیر مِریضه یاخشیلیق اِدِندیگیمیز و اُنونگ شِفا تاپاندیغی اوچین سُراغا چِکیلیَن بُلساق،
۱۰ اُندا سیزینگ هِمَّه‌نگیز، تامام اسرائیل خالقی شونی بیلیپ قُیونگ: اینه، بو آدام ناصِره‌لی عیسی مسیحینگ آدی بیلِن شِفا تاپیپ، ساغ-سالامات اُنگونگیزده دور. سیز عیسانی صلیبه چویلِدینگیز، اِمّا خودای اُنی اُلومدِن دیرِلتدی.
۱۱ عیسی حاقدا مُقادِّس یازغیلاردا شِیله یازیلاندیر:
”سیز بِنّالارینگ رِد اِدِن بو داشی
بینانینگ بورچ داشی بُلدی“.*
۱۲ اُندان باشغا نِجات بِرجِک یُقدور. اُنونگ آدی هِمّه عالِمده آدامزادی نِجات بِریپ بیلیَن یِکه آددیر.»
۱۳ مِجلِسینگ آداملاری پِطرُس بیلِن یوحنانینگ باتیرلیغینی گُرِنلِرینده و اُلارینگ دِرس اُقیمادیق بیر یُنِکِی آداملاردیغینی بیلِنلِرینده حایران قالدیلار، اُلارینگ عیسانینگ شَگیرتلِریدیگینه گُز یِتیردیلِر.
۱۴ شِفا تاپان آدام هِم بو ایکی رِسول بیلِن بیله دوردی. شُنونگ اوچین اُلارینگ قارشیسینا هیچ زات آیدیپ بیلمِدیلِر.
۱۵ شِیلِلیکده، اُلارا مِجلِسدِن داشاری چیقماغی تابشیردیلار-دا، اُزآرا ماصلاحات اِتمَگه باشلادیلار:
۱۶ «بو آداملاری نَمه اِدِیلینگ؟ اورشلیمده یاشایانلارینگ هِر بیری بولارینگ مُعجِزه گُرکِزِندیگینی بیلیَر. بیز مونی اینکَر اِدیپ بیلمِیَریس.
۱۷ اِمّا بو خابار خالق آراسیندا خاص-دا کَن یایراماز یالی اُوونی ساقلایلینگ و موندان بِیلَک عیسانینگ آدی بیلِن هیچ کیمه هیچ زات آیتمازلیقلاری اوچین، اُلارا قاتی بیلدیریش بِرِیلینگ.»
۱۸ اُنسُنگ اُلاری چاغیریپ، موندان سُنگرا عیسانینگ آدی بیلِن کِپلِمِک و واغیظ اِتمَگَه حاقّینگیز یُق.
۱۹ اِمّا پِطرُس بیلِن یوحنا اُلارا: «خودایینگ سُزلِرینه دَل-ده، سیزینگکَه قولاق آسماق خودایینگ ناظاریندا دُغرومی؟ اُزونگیز نِتیجه آلینگ!
۲۰ بیز-اَ گُروپ-اِشیدِنلِریمیزی آیتمان دوروپ بیلمِریس» دییّپ جُغاپ بِردیلِر.
۲۱ مِجلِسینگ آداملاری اُلارا اینگ سُنگقی بیلدیریش بِرِندِن سُنگ، اُلاری بُشادیپ گُیبِردیلِر. اُلاری جِزالاندیرماق اوچین هیچ هیلی باهانا تاپیپ بیلمِدیلِر، سِبَبی بُلان واقانی هِمّه خالق بیلیپ، خودایی شوکور اِدیَردی.
۲۲ مُعجِزه بیلِن شِفا تاپان آدام تامام عُمرونه، قیرق ییلدان کَن قاوراق بَری فِلِجدی.
ایماندارلارینگ دُغاسی
۲۳ پِطرُس بیلِن یوحنا بُشانلاریندان سُنگ، دُستلارینینگ یانینا قایدیپ باردیلار و یُلباشچی کاهینلارینگ، یاشولیلارینگ اُزلِرینه آیدانلارینینگ بارینی اُلارا خابار بِردیلِر.
۲۴ مونی اِشیدِنلِرینده، اُلارینگ هِمّه‌سی قاتی سِس بیلِن خودایا شِیله دُغا اِتدیلِر: «اِی حاکیم خودای! یِری، آسمانی، دِریانی و اُنداقی هِمّه زاتلاری یارادان سِنسینگ!
۲۵ سِن مُقادِّس روحونگ اوستو بیلِن اُز بِنده‌نگ – آتامیز داوودینگ اوستو بیلِن شِیله دییدینگ:
میلِّتلِر نَمه اوچین غاضابا مینیَر؟
خالقلار نَمه بیدِرِک قالماغال توروزیار؟
۲۶ خودایا و اُنونگ مسیحینه قارشی
دونیَه پادیشاهلاری آیاغا قالیار،
حُکومدارلار بیریگیَر و باش قالدیریار.*
۲۷ حاقیقاتدان-دا، باشغا میلِّتلِر و اسرائیل خالقی بیلِن بیرلیکده هیرودیس و پُنتیوس پیلاتُس بو شَهرده اُز سایلاپ-سِچِن مُقادِّس بِنده‌نگ عیسی قارشی آیاغا قالدیلار.
۲۸ اُلار سِنینگ قودراتینگ و اِرادانگ بیلِن اُوالدان قارارا گِلِن هِر بیر ایشینگی حاقیقاتا اُوورمِک اوچین ییغناندیلار.
۲۹ و ایندی، اِی خودای، اُلارینگ تَهدید اِدیشلِرینی بیر گُرسِنه! ایندی سِنینگ خوش خابارینگی باتیرلیق بیلِن آیتماغا بیز بِنده‌لِرینگه گویچ-غایرات بِر.
۳۰ مُقادِّس بِنده‌نگ عیسانینگ آدی بیلِن مِریضلِری شِفا بِرمِک اوچین و مُعجِزه‌لِر و عالاماتلار گُرکِزمِک اوچین بیزه اِلینگی اوزات!»
۳۱ دُغا اِدیپ بُلانلاریندان سُنگ، اُلارینگ اویشوپ دوران یِری سارسدی. هِمّه‌لِر مُقادِّس روحدان دُلوپ، باتیرلیق بیلِن خودایینگ خوش خابارینی آیتماغا باشلادیلار.
ایماندارلار هِمّه زاتلارینی پایلاشیارلار
۳۲ ایماندارلار بیر یورِک و بیر جاندیلار. اُلارینگ هیچ بیری اُز مال-مولکینه-ده مِنینگکی دییمِیَردی، هِمّه زاتلاری اُرتاقدی.
۳۳ رِسول‍لار بِییک قودرات بیلِن تانگری عیسانینگ دیرِلِندیگینه شاهاتلیق اِدیَردیلِر. خودای اُلارینگ هِمّه‌سینه بِییک مِرحِمِت باغشلادی.
۳۴ آرالاریندا مَحتَج آدام یُقدی. سِبَبی کیمینگ یِری یا اُیی بار بُلسا، اُلاری ساتیاردیلار. ساتیلان زاتلارینگ پولونی بُلسا گِتیریپ،
۳۵ رِسول‍لارینگ اُوونده قُییاردیلار. شِیلِلیکده، هِر کیمه گِرِگینه گُرَه پایلانیاردی.