پِطرُس فِلِج آدامی شِفا بِریَر
۳
بیر گون پِطرُس بیلِن یوحنا اُیلَن ساغات اوچلِرده دُغا واقتی عیباداتخانا گیتدیلِر.
۲ شُل واقت عیباداتخانانینگ اُوادان دییِن دِروِزه‌سینه بیر عُمور بُیی فِلِج آدامی گُتِریپ گِتیردیلِر. عیباداتخانا گیریَنلِردِن صاداقا دیلِمِگی اوچین، اُنی هِر گون شُل یِره گِتیریپ اُتوردیاردیلار.
۳ بو آدام پِطرُس بیلِن یوحنانینگ عیباداتخانا گیریپ باریانینی گُروپ، اُلاردان صاداقا دیلِدی.
۴ پِطرُس بیلِن یوحنا اُنگا دیقّات بیلِن گُزلِدیلِر. سُنگرا پِطرُس اُنگا: «بیزه باق!» دییدی.
۵ یانگقی آدام اُلاردان بیر زات آلارین دییّپ گومَنلَپ، اُلارا دیقّاتلانیپ باقدی.
۶ پِطرُس اُنگا: «مِنینگ کومشوم، قیزیلیم یُق، یُنه اُزومده باریمی سانگا بِریَرین. ناصِره‌لی عیسی مسیحینگ آدیندان دِستور بِریَرین: تور-دا، یُری!» دییدی.
۷ اُنسُنگ پِطرُس اُنونگ ساغ اِلیندِن توتوپ، اُنگا یِریندِن تورماغا کُمِک اِتدی. یانگقی آدامینگ دِرِّو آیاقلارینا ایسغین گِلدی.
۸ اُل یُقاری تاووسدی-دا، یُریپ باشلادی. اُنسُنگ خودایا شوکور اِدیپ، یُریپ هِم تاوسوپ، اُلار بیلِن بیرلیکده عیباداتخانا گیردی.
۹ هِمّه خالق اُنونگ یُرییَندیگینی و خودایی شوکور اِدیَندیگینی گُردیلِر.
۱۰ آداملار اُنونگ عیباداتخانانینگ اُوادان دییِن دِروِزه‌سینده صاداقا دیلَپ اُتوریان آدامدیغینی تانیدیلار. اُنونگ باشدان گِچیرِن بو واقاسینا خاص حایران قالدیلار.
پِطرُسینگ عیباداتخاناداقی سُزی
۱۱ یانگقی شِفا بِریلِن فِلِج پِطرُس بیلِن یوحنانی گُیبِرمَن دورقا، هِمّه خالق حایران قالیپ، اُلارا طاراف، سلیمانینگ اِیوانی دییِن یِره یُرتوپ باردی.
۱۲ پِطرُس مونی گُرِنده، خالقا یوزلِنیپ، شِیله دییدی: «اِی اسرائیل خالقی! نَمه اوچین مونگا حایران قالیارسینگیز؟ نَمه اوچین بیز بو آدامی اُز قودراتیمیز یا تاقوالیغیمیز بیلِن یُرِدِن یالی، بیزه بِیله دیقّات بیلِن گُزلِیَرسینگیز؟
۱۳ آتا-بابالاریمیز ابراهیمینگ، اسحاقینگ و یعقوبینگ خودایی اُز بِنده‌سی عیسانی بِییکلِندیردی. اِمّا سیز اُنی اُلومه تابشیردینگیز، حتّیٰ پیلاتُس اُنی بُشاتماغی یورِگینه دووِنده-ده، سیز اُنی پیلاتُسینگ حوضوریندا اینکَر اِتدینگیز.
۱۴ هاووا، سیز اُل مُقادِّس و دُغری بُلانی اینکَر اِدیپ، بیر قاتلینگ بُشادیلماغینی طالاب اِتدینگیز.
۱۵ سیز یاشاییش باشچِشمِسینی اُلدوردینگیز، اِمّا خودای اُنی دیرِلتدی. بیز مونگا شاهاتدیریس.
۱۶ اینه، سیزینگ گُریَن هِم تانییان بو آدامینگیز عیسانینگ آدینا بُلان ایمانینینگ اوستو بیلِن گُزونگیزینگ اُوونده دویبوندِن شِفا تاپدی. سیزینگ هِمَّه‌نگیزینگ گُرشونگیز یالی، عیسی بُلان بو ایمان اُنی شِفا بِردی.
۱۷ «اِی دُستلار، اِدیل اُز یُلباشچیلارینگیز یالی، سیزینگ-ده دوشونمِزلیکدِن شِیله حِرِکِت اِدِندیگینگیزی بیلیَرین.
۱۸ اِمّا خودای اُز مسیحینینگ عاذاپ گُرجِکدیگی بارادا هِمّه پیغامبارلارینگ اوستو بیلِن اُنگدِن آیدانلارینی بِرجای اِتدی.
۱۹ ایندی گونَه‌لِرینگیزینگ باغیشلانماغی اوچین توبا اِدینگ و خودایا طاراف اُورولینگ. شُندا خودای سیزه راحاتلیق واقتینی حوضوریندا بِرِر.
۲۰ اُل سیزینگ اوچین بِلِّنِن مسیحی، یَعنی عیسانی یُل‍لار.
۲۱ خودایینگ اُز مُقادِّس پیغامبارلارینگ اوستو بیلِن اُوالدان سُز بِرشی یالی، هِمّه زادی تَزه‌لِمِگینگ واقتی گِلِر. اِمّا شُل واقت گِلیَنچَه، عیسانینگ آسماندا قالماغی گِرِک.
۲۲ موسی شِیله دییّپدی: ”خودایینگیز تانگری سیزینگ اوچین اُز خالقینگیزینگ آراسیندان مِنینگ یالی پیغامبار چیقارار. سیز شُل پیغامبارا قولاق آسینگ.
۲۳ هِر کیم شُل پیغامبارا قولاق آسماسا، اُل آدام خودایینگ خالقینینگ آراسیندان چیقاریلیپ، دویبوندِن یُق اِدیلجِکدیر“.*
۲۴ حاقیقاتدان هِم، سموئیلدِن باشلاپ، هِمّه پیغامبارلار بو گونلِرینگ واقالاری بارادا اُووندِن آیتدیلار.
۲۵ سیز شُل پیغامبارلارینگ نِسیل‍لِریسینگیز و خودایینگ آتا-بابالارینگیز بیلِن باغلاشان عَهدینینگ میراثچیلاریسینگیز. خودای ابراهیما: ”یِر یوزونینگ هِمّه میلِّتلِری سِنینگ نِسلینگ اوستو بیلِن بِرِکِت آلارلار!“ دییدی.*
۲۶ یامان یُلونگیزدان اُوروپ، سیزی بِرِکِت بِرمِک اوچین، خودای اُز خیدماتچیسی عیسانی سایلادی و اَوَّل اُنی سیزه یُلّادی.»