La Qasir Wasiyat
20
Wa xare Rabbi* la shaqab ibbillan wasiyaat killan wassayu:
2 “Ana Rabbika la Daayim la min ardat Masir daarra gibrinnatka afgarkoka ana.
3 Imbaleye aalihat igil tahalle ikka iiwajjib.
4 Timsaal iititsrab wa surat iitisnaq minna diibba sama halla millaqal wa minna diibba midir halla mittaxat wa minna diibba maayataat halla xan arid.
5 Iitisjad ila wa iitqibadda jallaab ana Rabbiika Molaay ghayur ana.
Zinubba gherxachche it wilaadom wa awaaldom ikarriya asikka gim la saalsaay wa la rabqaay.
6 Wa igil asik alif gim fittiye la iitzawil qaghazzir,
itta fattuni wa wasiyaachche dtayqo.
7 Wa ib gimish ib simet Rabbi Molaayka iitingham jalla Rabbi simetu ib bahlalat la laharris laqaaghib.
8 Wa amqil sabit tfaaghad igil tighaddissa.
9 Sis amqil killa ashghaalka shaghghe diiban.
10 Laakiin la amqil la saabqayit,
sabit igil Rabbi Molaayka twaddiya wa ayi shighil iitshaghghe itta - inta aw walka aw walatka aw gabirka aw amatka aw matsqaanka aw la gaashaay la baakka saakin.
11 Jallaab Rabbi it sis amqil qastar wa midir wa baxar wa killu la halla diiban mana wa itta amqil la saabqayit qabadtdtala.
Sababu Rabbi amqil sabit baarakaya wa ghaddasaya.
12 Imka wa abuka xashshim qimirka igil liriim itta arid la Rabbi Molaayka lahaybakka tu.
13 Iitightal.
14 Iitizne.
15 Iitisragh.
16 It giwaareka ib zur iitishhad.
17 Bet giwaareka aw issiitu aw gabru aw amatu aw xahu aw adgu aw biqidu iitirghab.”
18 Wa waan la shaqab la hadud wa xinaanna bugh samqaw wa la barigh wa la dabir tannin raáw ib farhat qarqadaw.
Wa aruh badtraw
19 wa igil Musa belawu,
“Inta noska tahaagena igil nismaq igil iinimut Rabbi* mathaagaayna min laáttalaale.”
20 Ka Musa balsa ittom,
“Iitifraho jalla Rabbi* igil laáttamtixnakum matsá farhat Rabbi* siwaar igil tigbá itkum igil iitisxato.”
21 Wa la shaqab rayiim baadtir inintu Musa jahatta tsilmat la kil ximmayit la Rabbi* qala diiba shaága.
Maxaarid
22 Wa Rabbi igil Musa belayu,
“Igil wilaad Israíil ballom,
‘Intim noskum reékum kim kafo min sama tahaagekokum.
23 Ka min sannoqot aalihat fiddat aw aalihat dahab misilye igil taáshruka tbarró.
24 Maxrad min cabal nidagh iyye karaamaat xaarrat igil tighaddim ittu iyye wa karaamaat salaam min qadtaalka wa qabaageqka wa xaaka.
Itta simechche attafghadkoka ta igil imtsaákka wa idxarakka tu.
25 Wa maxrad min iman min naddigh iyye,
min iman tsirub iitindaghghu.
La iman ib aalat iitishakkillu jalla illi ghadaasatu laádtallex.
26 Wa shankat maxrajje ib qatabaat iitqirag qawratka igil iititkashshaf.’”