Kayamot jafar Siiná
19
1-2 Xagho la Israíiliyiin min Rafidiim naghlaw,
it saalsaay warex min fagiir wilaad Israíil min Masir,
Dangarat Siiná batsxaw wa ghiblaatta dabir karaw.
3 Wa xare Musa jahatta dabir tahanghaba it gats Rabbi* igil laáwxil.
Rabbi minna dabir adhayu wa belayu,
“Igil qad Yaqghub illa xabre abtsex,
igil wilaad Israíil qallinna:
4 ‘La itta Masriyiin ajrekowu ib qintaatkum raékumu wa kafo kim ib danabbir gaabaat qaawalkokum wa asikye jalabkokum.
5 Ka wasiyachche min dtayqowa wa galajje min titkallabo,
baxaachche tgabbó min finge killa la shuqub jalliib killu la midir milikye gabá.
6 Wa mamlakat kahana wa ummat ghiddisit tgabbó iyye.’
Illa liíkat ta la wilaad Israíil taábatstsaxa.”
7 Ka Musa minna dabir darra wa qabayila shaqab gats xid adha wa ib killu la Rabbi ammarayu assaálayom.
8 Wa killu la shaqab ib oro af balsa,
“Killu la Rabbi ammara ibu igil nidtyaq tu.”
Ka Musa ibba baliissa shaqab asik Rabbi qaghbala.
9 Ka Rabbi igil Musa belayu,
“It hayát dabna kilxim inde gabáko igil imtsaáka tu dolat ithaageka la shaqab ib nosu igil lismaq wa kil dol itka igil lusagh.”
Wa Musa asik Rabbi gholla shaqab abtsaxa.
10 Wa Rabbi igil Musa belayu,
“Asikka shaqab darre wa yom wa fangox attadthirrom wa lababbisom atxatsibbom
11 igilla amqil la saalsayit igil liddaalaw jallaab itta amqil la saalsayit ghadamma shaqab it Dabir Siiná igil itkarre gabáko.
12 Wa la dabir gaanid la shaqab la gin igil iilitqaade wa ballom,
‘Min faggir illi dabir daggago aw kayiid jafaru ma.
Wa la dabir la kayid killu,
daruri igil litghattal tu.
13 La gin la litqaade,
ib ide iilittamtam;
litrajjam aw ib saham litrashshan indeíko,
xewan ligbá aw aadami.’
Laakiin waan la bugh naghiim serik ledta,
la dabir igil lithanghbo ghadro.”
14 Wa dolat Musa minna dabir asikka shaqab taharbaba igil qibaadat adtharayom wa lababbisom xatsbaw.
15 Wa belayom,
“Igilla amqil la saalsayit daalaw wa min jimaq riimo.”
16 Wa itta tsibxatta amqil la saalsayit,
hadayid tahaadadat wa qabarrigh tbaaraghat wa qiraay tsaabidt itta dabir kara.
Wa xinaan bugh wighghul seraka ka killu la shaqab la itta makayam qala qarqada.
17 Wa Musa la shaqab minna makayam afgara ajil matwaajhot Rabbi* ka itta qarghayya dabir badtraw.
18 Wa Dabir Siiná ib tanaan taqammama jallaab Rabbi ib hayát isaat tkarra ittu.
Wa tanaanu kim tanaan qile tferagha wa la dabir ib milú ib xiilat hanghalghala.
19 Wa xinaanna bugh minna qalaya azaayada Musa inde lithaage wa Rabbi* ib hadud inde ballis ittu.
20 Wa Rabbi it nighrat Dabir Siiná tkarra wa Musa adha asikka nigratta dabir igil litwaghghal ka asku twaghghala.
21 Ka Rabbi belayu,
“Dinan wa la shaqab addagig la gin igil iilitqaade igil lirénni la sarraratta bizxaam minnom igil litmaayato tu.
22 Wa la ma kahana la jahachche gharbo igil lidtharo bom igil yishawidtdtom.”
23 Ka Musa igil Rabbi belayu,
“La shaqab asik Dabir Siiná igil liqirag iighaddir jalliib inta xazzarkanna wa tibe,
‘La dabir gannid wa adthirru.’”
24 Ka Rabbi balsa ittu,
“Darre wa baak Haarun xuka twaghghal.
Laakiin la kahana wa la shaqab laata la gin igil litqaadaw alabom jahachche iilighrabo igil iilitqaaghabo.”
25 Ka Musa asikka shaqab taharbaba wa xazzarayom.