Matqaddaay baxar
14
Wa xare Rabbi igil Musa belayu,
2 “Igil wilaad Israíil igil laqaghbilo wa jafar Fam Al Xeyrus igil litákkabo xabbirom finge Majdal wa la baxar.
‘Mabaashir madtor Baqal Safun jafarra baxar igil tikeyimo halla ikkum,’
ballom.
3 Firqon intim itta baadobat imbal martiqiyat it arid taángogu hallekum wa la baadobat kalkalattakkum igil limsallu tu.
4 Wa lib Firqon igil qatsneq tu wa asarkum igil ligbá tu.
Laakiin ana igil nafishe xaban igil iksab tu ib gabey damaar Firqon wa killu deshu.
Wa la Masriyiin ana Rabbi la Daayim kim ana igil laámro tu.”
Ka la Israíiliyiin kimsalehu wadaw.
5 Wa Firqon malik Masir dolat la Isaraíiliyiin harbaw samqa,
raáyu wa raáy dtarru tballasa ittom wa belaw,
“Mi ta la ila wadena wa wilaad Israíil min kidmatna arhena!”
6 Ka Firqon markibaatu it afrusu taalaga wa deshu nasá baaku.
7 Wa sis miít min sanniyaat markibaatu nasá baaku wa killa markibaat Masir xatteka misil merxaya.
8 Wa Rabbi lib Firqon malik Masir qatsnaqa asik wilaad Israíil qaddaxa tsaqada inde fagro qarora.
9 Ka la Masriyiin qarrawom ib killa markibaat Firqon wa firsaanu wa deshu jafarra baxar ghirub Fam Al Xeyrus kaaryaam inintom ghibaal Baqal Safun.
10 Wa Firqon dol shaága,
wilaad Israíil bal abalaw ka la Masriyiin inlitqarorawom raáw.
Wa sanni farhaw wa it Rabbi waqaw.
11 Wa igil Musa belawu,
“Mi ta la ila wadekanna wa min Masir afgarkanna?
Jalla Masir qaghbir saánat ittilla baadobat igil nimut amtsaákanna?
12 Diib Masir,
‘La Masriyiin nikdam xidaganna,’
yiímbelakka?
Min mot it baadobat kidmatom titfaddal!”
13 Ka Musa belayom,
“Iitifraho.
Sibato wa yom mangafo Rabbi ginxo.
Illom Masriyiin la illom tirú hallekum,
xagho yom igil diima igil tiráwom iiko.
14 Rabbi it akaankum laxarrib wa intim kiriit iitraffaqo.”
15 Wa Rabbi igil Musa belayu,
“Jalla mi titxassabanni halleka?
Igil wilaad Israíil igil ligqazo xabbirrom!
16 Moraaka rifaq wa ideka raássa baxar midad wa sidtarru wilaad Israíil igil ib baxar lixilafo it ardat ziffit.
17 Albaabba Masriyiin igil qatsneq tu sababu igil laqarrukum tu.
Wa ib dammarot Firqon wa killu deshu wa markibaatu wa firsaanu xaban igil ikassib
18 la Masriyiin ana Rabbi la Daayim kim ana igil laámro waan ib dammarot Firqon wa markibaatu wa firsaanu xaban ikassib.”
19 Wa xare malaak Rabbi* la ghadam desh Israíil saafir qala gats xar xaragraga wa qaamudda dabna ma mirraxarom xaragraga.
20 Wa finge maqaskar Masir wa maqaskar Israíil gabá.
Min gats laali la dabna it simidt oro tsilmat amtsát wa itta simidt la biqid barhat abrahat.
Ka la kilót fariigh laali ib gidiida iitghaarabaw.
21 Wa Musa idehu madda raássa baxar wa itta laali laha ib riima Rabbi ib shamaal mifgaar tsaxaay tirud la baxar sadtra wa it migba ardat ziffit afgara.
22 Wa wilaad Israíil ibba kabidda baxar ib ardat ziffit xalfaw wa sariif maay dimmaanom wa galabom qala.
23 Wa la Masriyiin taqarorawom wa darbom diibba baxar daggaxaw misil killa afrus Firqon wa markibaatu wa firsaanu.
24 Wa ghadam fakaak,
Rabbi min qaamud dabna balballaay deshsha Masriyiin shabba wa rabkayom.
25 Wa kafaraatta markibaatom atwaalagha sababu sawagot kabdayom.
Wa la Masriyiin belaw,
“La Israíiliyiin nitxaagal jalla Rabbi it akaanom didna laxarrib halla.”
Damaar desh Firqon
26 Wa xare Rabbi igil Musa belayu,
“Ideka raássa baxar midad la maay xar igil laghbil itta Masriyiin wa itta markibaatom wa itta firsaanom.”
27 Ka Musa tsibex midir idhu raássa baxar madda ka la baxar it akaana qaghbalat wa itta Masriyiin la shankata laharbo qalaw wa Rabbi asikka kabidda baxar shalhatayom.
28 La maay xar qera wa la markibaat wa la firsaan wa desh Firqon ib tamaamu la asikka baxar taqarorayom shamma.
Orot ib xiyaayu iitarfa minnom.
29 Wilaad Israíil laata kabidda baxar ib ardat ziffit xalfaw wa la maayataat sariif it dimmaanom wa it galabom gabát.
30 Wa kiínna itta amqil laha Rabbi la Israíiliyiin minna ideyya Masriyiin attakra wa ganayizza Masriyiin itta nageb shudxit ininta raáwa.
31 Wa la Isaraíiliyiin dolat la daghib ruúy la Rabbi la Masriyiin tghaarxa ibbu raáw,
la shaqab Rabbi farha wa ib Rabbi wa ib Musa gabru wasgha.