13
Wa Rabbi igil Musa belayu,
2 “Kil bikir tabqat abxittanni.
Kil wilud salif min wilaad Israíil,
igilye tu,
kil bikir min anis wa min niwaay.”
Qiid Fadtiir
3 Wa Musa igilla shaqab belayom,
“Illa amqil illa fighado,
min Masir fagarkum itta min arid gibrinnat jalla Rabbi ib ide xaaylat afgarekkum minna.
Ka raghiif kamiir iitiblaqo.
4 Yom it warex abiib intim tnaghlo hallekum.
5 Sababu Rabbi waan asikka aridda Kanqaaniyiin wa la Xissiyiin wa la Amuriyiin wa la Xiwiyiin wa la Yabusiyiin la ib xaliib wa maqar tuxiz laátekkum la igil abawkum igil lahabakkum ta maxala,
illa fariidat titfaaghado ittilli warex.
6 Saboq amqil raghiif kamiir iitballoqo wa itta amqil la saabqayit igil Rabbi ixtifaal widaw.
7 Igil saboq amqil raghiif fadtiir balloqo wa diib abyaat sanqat kamiirat iitaákkibo wa it mingof qad baladkum igil litreé alabu.
8 Itta amqil laha igil walka tibillu,
‘Illi ajilla Rabbi wadayu iyye ibaalissu dolat min Masir afgarenni.’
9 Ka illa fariidat illa kim qalaamat it ideka wa mafghidayit finge qintaatka tgabbí ikka shariiqat Rabbi diib afuka igil tigbá jalliib Rabbi ib ide xaaylat min Masir afgarekka.
10 Ka illa fariidat illa it waghta igil tibaalissa halla ikka kil sanatka.”
Takriis Abkaar
11 “Wa xagho Rabbi asik ardat Kanqaan laátekka kimma igil abawka maxalaya igil lahabakkaata,
12 igil Rabbi kil tabqat min wilud salif igil tikarris halla ikka wa bardu kil bikir tabqat minna niwaay latmallikku naay Rabbi gabbí.
13 Ayi adig bikir ib biggoq taádxinnu laakiin min iitádxinnu,
sigaadu gardim.
Wa bardu kil bikir min wilaadka adxin.
14 Wa itta amqilotaat latmatstsá walka dol lissaálakka wa liblakka,
‘Illi min maqanat tu?’
tballis ittu,
‘Rabbi ib ide xaaylat min Masir aridda gibrinnat afgarenna.
15 Wa dolat Firqon ib dtighyaan arxayotna aba Rabbi kil bikir it arid Masir amota,
min abkaar addaam wa niwaay.
Sababu ana igil Rabbi la qatbaqin min kil wilud salif ikarrim wa kil bikir min wilaajje adxin.’
16 Ka illa fariidat illa it ideka kim qalaamat tgabbí ikka wa ramiz it bisotka kim Rabbi ib ide xaaylat min Masir afgarenna.”
Xaliif ib baadobat
17 Wa waan Firqon la shaqab dtallagha,
Rabbi* ibba gabey la ibba ardat Filisdtiiniyiin kayid iimarxayom,
hita inde taxaccir,
jalla bela,
“La shaqab igil iilittaqas xarib min waajih wa asik Masir iilaghbil.”
18 Minnaata Rabbi* la shaqab ibba gabeyya baadobat shankat Baxar Ghayaxa marxayu.
Wa ibbilla wilaad Israíil min Masir sillaxaam wa igil xarib duluyaam inintom fagraw.
19 Musa qaacmotaat Yusif nasá goru jallaab Yusif wilaad Israíil maxala imxul qala inde libil,
“Ib yighghun Rabbi* igil liqinakkum tu,
wa la waan lahay,
min illa akaan qaacmotaachche gokum igil tirfaqo bikum.”
20 Wa min Sukut naghlaw wa it Isaam kayamaw itta fardatta baadobat.
21 Wa Rabbi gats amqil diib qaamud dabna ghaddimmom qala itta gabey igil limraxom wa gats laali diib qaamud isaat la gabey igil labrih ilom.
22 Wa qaamudda dabna it amqil wa qaamudda isaat it laali minna ghadamma shaqab iitshankakaw.