Tahadiid ib mot abkaar
11
Wa xare Rabbi igil Musa belayu,
“Orot bala la it Firqon wa itta Masriyiin la ikarriyu taarif halla.
Xaghohu min insar igil tigiiso igil lixidagakkum tu wa dolat dtalghakkum ib tamaamkum igil liddaakanakkum tu.
2 Ka aze minna shaqab,
kil inaas min giwaarehu wa kil issiit min giwaareha dahab wa fiddat min kil shakil igil lidtlabo dtilab minnom.”
3 Wa Rabbi la Masriyiin itta shaqab arda wa Musa ma diib Masir itta qintaatta masúliin Firqon wa itta qintaatta shaqab xibuna qala.
4 Wa Musa bela,
“Illi la Rabbi qallanayu tu:
‘Migib laali Masir igil ishaagig tu.
5 Wa kil wad bikir diiba igil limut tu min wad bikir Firqon la raássa qarish tirnoq asikka wadda bikirra amat la itta madtxana wa bikir kil bihimat.
6 Ka it arid Masir killa sarur wighghul igil lissammaq tu,
tamsaalu yaqala wa iimatstsí.
7 Fingela wilaad Israíil laata kalib igil linbax iiko it aadami ligbá aw it xewaan.’
La waghit lahey,
Rabbi kim finge Masir wa Israíil kim fanaate igil taámro tu.
8 Illom masúliinka killom asikye igil lidnano tu wa ghadameye igil lirkoqo tu,
‘Inta wa killu la shaqab la talleka,
min insar giiso!’
inde liblo,
la dol laha igayis!”
Xaghohu Musa sanni xaarigh inintu Firqon tarka.