6
Ka Rabbi igil Musa belayu,
“Aze it Firqon la iwaddiyu igil tiré tu.
Wa hitu ibba idye la ghedrayit igil laqarxiyom tu wa ibba,
minna ardu igil lidtraddom tu.”
Waqad Rabbi
2 Wa Rabbi* igil Musa belayu,
“Ana Rabbi la Daayim ana.
3 Ibraahiim wa Isxaagh wa Yaqghub traéko kim Rabbi la Ghaadir.
Minnaata kim Rabbi la Daayim iitaámarkowom.
4 Wa ardat Kanqaan la diiba tgonaw igil habbom galad bayako ilom.
5 Wa aniin wilaad Israíil la Masriyiin gabburom hallaw samqako ka galajje mislom faghadko.
6 Jallaabu igil wilaad Israíil ballom,
‘Ana Rabbi la Daayim ana.
Ana minna cighdtola Masriyiin afagrakkum wa minna gibrinnatom atbaalxakkum.
Wa ib jariid widtdtudt wa axkaam daamqat attarxekkum.
7 Wa shaqabye iwaddekum wa Rabbikum igabbí.
Darbu ana Rabbi Molaaykum la magzamma Masriyiin nawakko minkum kim ana igil taámro tu.
8 Wa asikka ardat la ideye inde rafqako igil Ibraahiim wa Isxaagh wa Yaqghub igil habba maxalko igil aatekkum tu.
Wa igilkum kim meraas igil habakkum ta tu.
Ana Rabbi la Daayim ana.’”
9 Ka Musa igil wilaad Israíil illa higya assaála laakiin iisamqawa ibba sababba tsabareb wa la gibrinat latkarraya ittom.
10 Wa xare Rabbi igil Musa belayu,
11 “Asik Firqon,
malik Masir giis wa wilaad Israíil minna baladu igil lifgaro igil lixidaggom assiíllu.”
12 Laakiin Musa igil Rabbi belayu,
“Wilaad Israíil inde iilaáttansuni,
Firqon mi kallafayu iyye la liggud igil laáttanse?”
13 Ka Rabbi Musa wa Haarun tahaaga wa ibba kisussa Israíiliyiin wa Firqon,
malik Masir wa Musa wa Haarun ib afgarot wilaad Israíil min Masir ammarayom.
Molaad Musa wa Haarun
14 Illom mattamaaghraxatta qaylaatom tom:
wilaad Ruábiin,
bikir Israíil:
Xanuk wa Fallu wa Xasrun wa Karmi tom wa hitom qafirraqat Ruábiin tom.
15 Wa wilaad Shamqun:
Yamuíil wa Yaamiin wa Uhad wa Yaakiin wa Suxar wa Shaaúl (wadda Kanqaaniyat) tom wa hitom qafirraqat Shamqun tom.
16 Wa illa asmaay wilaad Laawi wa zirayom ta:
Jarshun wa Ghahaat wa Maraari.
Wa Laawi miít wa salaasa wa saboq sanat balqa.
17 Wilaad Jarshun:
Libni wa Shimqi tom misilla qafirraqatom.
18 Wa wilaad Ghahaat:
Qamraam wa Yishaar wa Xabrun wa Quziil tom.
Wa Ghahaat miít wa salaasa wa salas sanat balqa.
19 Wa wilaad Maraari:
Maxli wa Mushi tom.
Wa hitom qafirraqatta Laawiyiin misilla zirayom tom.
20 Wa Qamraam qammatu Yukaabad hada wa Musa wa Haarun walda minna.
Wa Qamraam miít wa salaasa wa saboq sanat nabra.
21 Wa wilaad Yishaar:
Ghurax wa Naafaj wa Zikri tom.
22 Wa wilaad Quziil:
Miishaaíil wa Alsaafaan wa Sitri tom.
23 Wa Haarun Aliishabaq walat Qamiinaadaab xit Naaxish hada wa Naadaab wa Abiihu wa Aliqaazaar wa Iisimaar walda minna.
24 Wa wilaad Ghurax:
Asiir wa Alghaana wa Abiyaasaaf tom wa hitom qafirraqatta Ghuraxiyiin tom.
25 Wa Aliqaazaar wad Haarun xatte minna awaalid Fudtiil hada wa Fiinxaas walda minna.
Illom mattamaaghraxatta qafirraqatta Laawiyiin qalaw xasabba ghadtayrom.
26 Illom Haarun wa Musa la Rabbi,
“Wilaad Israíil ib jimaqat jimaqat min Masir afgiro,”
belayom tom.
27 Wa hitom Musa wa Haarun la Firqon malik Masir tahaagaw wilaad Israíil igil lidtalligh min Masir igil lifgaro tom.