Abhazot Rabbi it Musa
3
Qamqilaay xatte,
Musa qabaageq xamuhu Yasrun kaahin Midyaan inde laáwqil,
la qabaageq asikka baadobat attaremaya asik Sinaá dabir Rabbi*.
2 Wa ken malaak Rabbi min isaat taxaye min kabid kitkittotat abxaza ittu.
Musa ib qajabeb fazza la kitkittotat ghaarxat ininta tnaddid yaqalat.
3 Musa misil nafsu,
“Illa qajab qajaayib ta.
La kitkittotat igil mi tighhim yahallet?
Inde gisko igil iráya halla iyye.”
4 Rabbi waan Musa inde matstsí min ghirub igil lignax raá minna ghabatta kitkittotat adhayu,
“Wo Musa,
wo Musa,”
inde libil wa Musa balsa,
“Illa ana.”
5 Asaru Rabbi Musa addaggaga,
“Iitighaddim!
Isínka xiradt sabab it arid ghiddus baadtir halleka.
6 Ana Rabbi* abuka ana,
Rabbi* Ibraahiim wa Rabbi* Isxaagh wa Rabbi* Yaqghub.”
Musa illi waan samqa,
gatstsu galbaba jalla min ganex Rabbi* farha.
7 Wa xare Rabbi belayu,
"Macaghaadt shaqabye diib Masir ib qintaachche raékowu.
Mawqi ghammom ibba sababba mattashgiyat la rebyat izinye batsxa wa kirbatom it gacce gabát.
8 Ka minna tsibdtola Masriyiin igil ibaalxom tkarreko wa min Masir asik ardat tsiddighit wa rixiibat igil attafgirrom.
Hita ardat xaliib wa maqar taáwxiz ta wa hita maskabba Kanqaaniyiin wa la Xissiyiin wa la Amuriyiin wa la Firiziyiin wa la Xiwiyiin wa la Yabusiyiin ta.
9 Ginax ikka mawqi wilaad Israíil izinya batsxa wa la Masriyiin kafo kim ib siddit tghaaraxawom raéko.
10 Ka tkamkam sabab asik Firqon igil ilákakka gaáko.
Shaqabye la Israíiliyiin min Masir igil taáttafgir halla ikka.”
11 Ka Musa bela,
“Ana min ana la ghadam Firqon ibadtdtir wa wilaad Israíil min Masir attafgir?”
12 Ka balsa ittu,
“Misilka igil igbá tu.
Wa illa taámriitka ana kim laákkoka ta:
Darib la shaqab min Masir afgarotka,
Rabbi* igil tiqibado tu ittilli dabir nosu.”
13 Laakiin Musa Rabbi* tbaalasa,
“Asik wilaad Israíil min igayis wa ‘Rabbi* abawkum laákenni itkum,’
min ibillom igil lissaáluni tu,
‘Min ta simetu?’
inde liblo ka xare mi iblas ittom?”
14 Ka Rabbi* it Musa balsa,
“Ana la Daayima ana.
Igil wilaad Israíil illa ballom,
‘La Daayim laákenni itkom.’”
15 Rabbi* bardu bela,
“Igil wilaad Israíil illa ballom,
‘La Daayim,
Rabbi* abawkum Ibraahiim wa Isxaagh wa Yaqghub laákenni itkum.’
Illa simechche la daaymat ta.
Wa hita la simet la agmaam
faghdanni ibba ta.
16 Giis wa sab gats Israíil baak xid jimaq wa ballom,
‘La Daayim,
Rabbi* abawkum Ibraahiim wa Isxaagh wa Yaqghub abhaza ichche wa belenni,
“Atwiqil qalko la Masriyiin ib kafo kim litghaarxukum qalaw.
17 Ghol aati qalko minna maccaghaadt la diib Masir kiruy itkum igil angiffakkum wa asikka ardat la xaliib wa maqar sadtdtidt minna igil attafgirakkum tu,
la ardat la Kanqaaniyiin wa la Xissiyiin wa la Amuriyiin wa la Firiziyiin wa la Xiwiyiin wa la Yabusiyiin nabbura hallaw.”’
18 Sab gats Israíil izin igil likraw ikka tu.
Inta wa la sabba gats asik malik Masir igil tigiiso halla ikkum wa bolu,
‘Rabbila Qibriyiin,
la Daayim,
ajtamqa gona.
Ka ib maqarufka,
asikka kadan mishwaar salas amqil naherir xidaganna igil Rabbiina la Daayim karaamat igil nikarrrim.’
19 Laakiin aamir halleko malik Masir igil tigiiso iilaárhe ikkum ide xaaylat min iitghassibbu.
20 Sababu ideye igil irfaq tu wa la Masriyiin igil hawish tu ib ajrayot mistinkiraat fanattiit diib migbom.
Xarteni it dangoba tigiiso igil lixidakkum tu.
21 Wa la Masriyiin igil arde itkum tu.
Wa hidaat igil lahabukum tom waan gayso ib idey braaghu igil iitigqazo.
22 Kil issiit Israíiliyat minna agwaara la Masriyaat wa minna anis la diibba abyaatan saaknaat lababbis wa sargo dahab wa fiddat igil tidtlab ta.
Wa kiínna wilaadkum wa awaalidkum min salallib Masir igil taálbusom wa tissargawom tu.”