Akûûyî baîrî
11
1 Ndaacooka ndaanenkerwa kamûtî kaaraaya ga gûtûmîra karî kîthimi. Ndeerwa, “Îthi ûthime Nyomba ya Ngai na kîthînjîro, na ûtare bara bagongagîra Ngai ku. 2 Ûtigaatindanîre na ome ya Nyomba ya Ngai. Ûtikaamîthime n'ûntû n'ya antû batarî Ayaundi. Bakaatha taûni întheru na njîra înthûûku mîeri mîrongo îna na îîrî. 3 Na îgiitaani rîru nkaa ankûûyî baakwa inya barî baîrî barorie ntugû ngiri îmwe na magana maîrî ma mîrongo îthanthatû, beekîrîte maguo matarî meega kwonania kîeba.” 4 Ankûûyî babu i mîceituuni îîrî kana taa ciîrî ira ndoonaga irî agu mbere ya Mwathani wa nthîgûrû. 5 Anthû baao bakageria kûbathûûkia, mwanki uuma tûnyua twa ankûûyî babu ûkaûraga anthû babu. Ûgu i bu anthû baao bakaûragangwa baageria kûbathûûkia. 6 Îgiitaani rîao rîa ûroria, ankûûyî babu baîrî barî na inya ya kûrigîîria îgûrû rîtaurithie mbura. Barî na inya ya kûgarûra ndûûyî igatuîka nthakame na ya kûreeta mûthemba unthe wa inyamaara nthîgûrû, maita wa mara bakeenda.7 Ankûûyî babu baîrî bakûrîîkia gûkûûyîîra na ûroria, ndoona nyamû kuuma îrinyaani rîra rîorokeru mûno yarûa nabo, yabacinda, yabaûraga. 8 Mîîrî ya ankûûyî babu baîrî yatungumana barabaraani ya taûni îra nene, taûniini îra Mwathani aambirwe. Taûni înu yîtagwa na gîîkîrundu Sondomu kana Miisiri. 9 Ndoona antû kuuma kîrî mîîrîga yonthe, mîgongo yonthe, na nthiomi baakara baraithîîte mîîrî ya ankûûyî babu ntugû ithatû na nucu, kûregeetwe bathikwa. 10 Bara batûûraga nthîgûrû baakeneera ûgu mûno, na kweyana beeyana biewa n'ûntû bwa bûra ankûûyî babu baabareetagîra thîîna barî mwoyo.
11 Îndî ntugû inu ithatû na nucu ikûthira, Ngai aabuîrîîra ankûûyî babu mîruke ya mwoyo. Akûbabuîrîîra, iroria bibu biarûngama. Bara baaboonire baamaka mûno. 12 Iroria bibu biegua kayû kaanene kuuma îgûrû, kabeera, “Ncûûni gûkû îgûrû!” Iroria bibu bietia îgûrû na îtu, anthû baao babicûûbîîte.
13 Warîo nthîgûrû yainaina mûno. Gîcuncî kîmwe gîa îkûmi gîa taûni înu kîenyangua, antû ngiri mûgwanja baûragwa i kwinaina gûku kwa nthîgûrû. Bara baatigarire baamaka mûno, baakîra Ngai wa îgûrû.
14 Kînyamaara kîa biîrî gîgûkûrûka. Kîa bithatû îîndî i kîo kîîyîîte weendî.
Karumbeeta ka mûgwanja
15 Mûraîka wa mûgwanja aaringa karumbeeta gaake. Akûringa, ndeegua tûyû twagondoka gûku îgûrû, twauga,
“Wathani bwa nthîgûrû îîndî i bwa Mwathani wetû
na Kîrîstû mûthuure wake.
Akaathana tene na tene.”
16 Akûrû bara mîrongo îîrî na bana, bara bakari itîîni biao bia ûnene bathiûrûkîîrîîte Ngai baaturia maru batiirithîîtie moothiû maao nthîgûrû, bamûgonga. 17 Bauga,
“Mwathani Mwene Inya, woû ûtwîre oogo,
woû warî oogo wana tene, itûgûgûcookeria nkaatho
n'ûntû bwa kwanjîîria kwathana na inya yaku înene.
18 Antû ba nthîgûrû ibarathûûri i woû,
îndî îîndî nûbooneetie bûra mûthûûro waku ûgana.
Îîndî îgiita rîgûkinya rîa kûgiitîra bara bakuû îgamba.
Îîndî n'îgiita rîa kwaa aruti ngûgî baaku
biewa, tabo iroria.
Na ûkaa biewa kinya antû baaku,
tabo bara bagûtîîyaga, baanene na baaniini.
Îgiita rîgûkinya rîa kwînyangia
bara beenyangagia nthîgûrû!”
19 Ndoona Nyomba ya Ngai gûku îgûrû yarugûrwa, kathandûkû kara kaarî na maathana gaatua kwonekana. Ndoona gwatua kwenia, ndeegua gîtuma, nkwa yatua kwaria, nthîgûrû yatua kwinaina, na gwatua kuura mbura ya maiga.