9
1 Mûraîka wa bataano aaringa karumbeeta gaake. Akûringa, ndoona nthata yarûkua kuuma îgûrû îîndamîîte nthîgûrû. Yeewa rûcaabi rwa mûrinya wa kûthi îrinyaani rîra rîorokeru mûno. 2 Yarugûra mûrinya ûyu, ntoogo ta ya mwanki ûmûnene mûno yauma ku. Riûa na maanganyoni biagîa mwindu n'ûntû bwa ntoogo înu yaumaga îrinyaani rîru. 3 Ndoona ngige ciauma ntoogooni înu, ciendama nthîgûrû. Ciewa inya ya kûrûmana ta ing'aarurî. 4 Cierwa itikeenyangie nyaki nthîgûrû, kana kîmera, kana mûtî. Na cierwa ikaarûmanga antû bara bataarî na rwano rwa Ngai ûthiû bonka. 5 Iteewa watho bwa kûûraga antû. Ciarî ibanyamaarie akî mîeri îtaano. Na ûrûrû bûra antû beegagua ciabarûma bwakari ta bwa kîng'aarurî kîrûmîîte muntû. 6 Rîra kagiita gaku gagaakinya antû bagaacûa bûra bakua, îndî bationa bûra barûtha. Ûkeegua bakîenda gûkua, îndî gîkuû igîkaabakuthûka.7 Ngige inu ciakari ta mbaraathi ithuuranîrîtwe kûthi ndûani. Ciekîrîte gîntû gîakari ta nthûmbî cia ûnene cia thaabu biongo, na ciarî na moothiû maakari ta ma antû. 8 Ciarî na ntundu ikari ta cia aka, na magego ta ma cimba. 9 Ciogeereetwe gîntû gîakari ta kîbaati kîa îthaga gîa kûrigîîria kîbara gîtigaatonywe. Na mûrurumo wa mathabu ma cio ibuurûûkîîte wakari ta wa mbaraathi inyingî mûno ikururîîtie nkaarî cia ndûa ira ciakururagia. 10 Ciarî na mîtiro na nguarû ta ing'aarurî. Na nguarû inu i ciarî na inya. Ikîûmba kûrûmanga antû mîeri îtaano wa bakînyamaaraga. 11 Na ngige inu i ciarî na mûnene wacio ûra aitongoreereetie. Mûnene ûyu aarî mûraîka kuuma îrinyaani rîra rîorokeru mûno. Na mûraîka ûyu eetagwa Abandoni na Kîibirania. Na Kîîngiriki eetagwa Aporoni (na riîtwa rîru rîake riugaga “Mwînyangia.”)
12 Kînyamaara gîku kîa mbere gîgûkûrûka. Îndî kûrî kîngî na kîngî kîîyîîte.
13 Mûraîka wa bathanthatû aaringa karumbeeta gaake. Akûringa, ndeegua kayû kauma koonaani irî inya cia kîthînjîro kîra kîarî agu mbere ya Ngai. 14 Keera mûraîka ûyu wa bathanthatû aarî na karumbeeta, “Rekeeria araîka bara bana barigîîrîîtue agu muurooni ûyu mûnene wa Yufîrîti.” 15 Araîka babu bana baarekeerua. Baathuuranîrîtwe n'ûntû bwa îthaa, ntugû, mweri, na mwanka ûra mantû mama magaatuîkîka. Na gîtûmi, i kaingo baûraga antû gîcuncî kîmwe kîrî bithatû. 16 Ndeegua kwerwa njûûrî îra baatongorereetie yarî ya acikaarî miirioni magana maîrî. Na wa kîra mûcikaarî naarî na mbaraathi.
17 Kîonekiini gîku ndoona mbaraathi na bara baitwete. Na babu baitwete boogeereete mabaati ma kûrigîîria batigaatonywe i bara. Mabaati mamu maarî ma rangi ithatû; maatuune, mburuu, na yerû. Mbaraathi inu ciarî na biongo ta bia cimba. Tûnyua twaumaga ndîrîmbî, mwanki wa ûbiriti,a na ntoogo. 18 Inyamaara bibu bithatû biaumire tûnyua twa mbaraathi inu biaûraga antû gîcuncî kîmwe kîrî bithatû. 19 Rûgakaî rûra mbaraathi inu ciekagîra antû rwaumaga tûnyuani na mîtirooni. Mîtiro yacio yarî njoka. Na mîtiro înu yarî na biongo n'yo ciatûmagîra kûnyamaaria antû.
20 Bara bataûragwa i mînyamaaro înu bateerira. Bataatigana na ngai ciao cia ûrongo ira beerûthîrîte. Bataatiga kûgonga irundu biithûûku na ngai cia mîbuanaano. Imwe cia ngai inu ciarûthîîtwe na thaabu, cingî na fetha, na cingî na yûmba rîra rîrûthagwa gîkama. Na kûrî imwe ciarûthîîtwe na maiga, na cingî na mîtî; into bitaûmba kwona, kana biîgua, kana biûmba kûthi. 21 Na bateerira batigana na ûûragani, kana marogi, kana ûmaramari, kana wamba bwao.